Skala Pak
16
1 « Ŋanawa ŋa ta tila Avivª ka skala kuni ta skala Pak ŋa Yawe, Lazglafta ghuni, kabga ma tsa tila Aviv ya hlagapta Yawe, Lazglafta ghuni ta kaghuni girviɗik ma Masar. 2 Ka plata kuni ta pla ghəŋa Pak ŋa Yawe, Lazglafta ghuni nda rina fisik ka sla a tsi ma vli ya dzaʼa zbapta Yawe ŋa nzakwa hga ni hada. 3 Ta skal kuni ta tsa skalu ya, yaha kuni da za buradi nda is mida. Fitik ndəfáŋ dzaʼa zata kuni ta za tsa buradi kul haɗ is mida ya, burada sa duni, kabga ta hwaya ta hwaya saba kuni ma haɗika Masar. Manda tsaya dzaʼa hava kuni ma nzakwa ghuni, ká kuni sabi ma haɗika Masar. 4 Ma tsa fitik ndəfáŋ ya, yaha lu nghaŋtá is da kaghuni ta inda haɗik ghuni. Sluʼa skwa pla ghəŋ ya hna kuni ga hawu baɗ taŋtaŋa fitik ya guli, zlaŋta a lu ka pɗanata ŋa ga sərɗək ga mahtsima ni wa. 5 Haɗ kuni dzaʼa pla ghəŋa Pak ma ya dər turtuk ma luwaha ya dzaʼa vlaghunata Yawe, Lazglafta ghuni wa. 6 Ma tsa vli dzaʼa zbapta Yawe, Lazglafta ghuni ŋa nzakwa hga ni ya, kweŋkweŋ dzaʼa pla kuni ta ghəŋa Pak ga hawu dɗar fitik, ta tsa ləwa kəl kuni ka saghwi ma Masar ya. 7 Ka data kuni, ka zuta ma tsa vli dzaʼa zbapta Yawe, Lazglafta ghuni ya, ŋa sliʼa ghuni dzagha ghuni ga sərɗək. 8 Ma fitik mkuʼ, buradi kul haɗ is mida dzaʼa kuni da zay. Baɗ mandəfáŋ, fitik ka tskafta kuni ta tska vgha dagala ŋa Yawe, Lazglafta ghuni. Magta a kuni ta slna baɗ tsa fitik ya wa. »Skala tska nimaya ta vwah
9 « Ka mbəɗafta kuni ta luma ndəfáŋ. Daga baɗ zlrafta ghuni ta tska nimaya ta vwah ya, dzaʼa zlrafta kuni ta mbəɗa tsa luma ndəfáŋ ya. 10 Tahula tsa, ka skala kuni ta skala rfa nekwatá nimaya ta vwah ŋa Yawe, Lazglafta ghuni. Ka hlanakta kuni ta mbəhu manda ya kumaf ŋuɗuf ghuni, taɓta tfa wi ya tfaghunagha Yawe, Lazglafta ghuni. 11 Ka rfa kuni ta rfu ta kəma Yawe, Lazglafta ghuni ma vli ya dzaʼa zbapta Yawe, Lazglafta ghuni ŋa nzakwa hga ni hada, kawadaga nda zwana ghuni, nda kwagha ghuni, nda kwalvaha ghuni, nda kurɗuha ghuni, nda la Levi ta nzakw ma luwaha ghuni, nda matbayha ta nzakw ma səla ghuni, nda tawakriha, nda wadguha mataba ghuni. 12 Ka hava kuni si ta nzakwa ghuni ka vuʼa ma haɗika Masar. Ka ŋanata kuni ta tsa zlahuha ya ka ksa slna nda tsi. »
Skala dumbi
13 « Manda kɗiŋta ghuni ta hlagaghutá nimaya ta wa blikwi nda ya ma tsuʼaŋa ɗitsa yakwa inabi, ka skala kuni ta skala dumbi ka fitik ndəfáŋ. 14 Ta skal kuni ta tsa skalu ya, ka rfu kuni ta rfu kawadaga nda zwana ghuni, nda kwagha ghuni, nda kwalvaha ghuni, nda kurɗuha ghuni, nda la Levi, nda matbayha ma səla ghuni, nda tawakriha, nda wadguha ma luwaha ghuni ya. 15 Ka skala kuni ta tsa skalu ya ka fitik ndəfáŋ ŋa Yawe, Lazglafta ghuni ma vli ya dzaʼa zbapta Yawe, kabga dzaʼa tfaghunagha tfa Yawe, Lazglafta ghuni ta wi ta ghəŋa inda skwi tska kuni ta vwaha ghuni nda inda slnaha dzva ghuni, ŋa va rfay ghuni ta rfu.
16 Inda vaku, hkən səla dzaʼa maravata inda zgwana ta kəma Yawe, Lazglafta ghuni ma vli ya dzaʼa tsi zbapta: Ŋa skala buradi kul haɗ is mida, nda skala rfa nekwatá nimaya ta vwah, nda skala dumbi. Yaha mndu laha ta kəma Yawe nda dzvu bayah wa. 17 Inda dər wa dzaʼa kladanaghatá skwi ma dzvu taɓta tfa wi tfanagha Yawe, Lazglafta ghuni. »
Paghamtá gwal tsa guma
18 « Ka paghamta kuni ta gwal tsa guma, nda gwal nghapta ma inda mndəra ghuni ma inda luwaha dzaʼa vlaghunata Yawe, Lazglafta ghuni, ka tsanata həŋ tɗukwata guma ta mnduha. 19 Yaha kuni tərɗiŋtá guma, yaha kuni gala mndu nda gala. Yaha kuni zlgha sməɗ, kabga ta ghulpay sməɗ ta ira mndu ya nda ɗifil, ka turɓuslatá tɗukwa mnduha. 20 Nzakw tɗukwa kweŋkweŋ psa kuni, kada slravaghata hafa ghuni, ŋa nzakwa tsa haɗik dzaʼa vlaghunata Yawe, Lazglafta ghuni ya ŋa ŋa ghuni. »
Pyaftá tsəlɓu ŋa skwa wuyay