Skala rfa vya duli
29
1 « Baɗ taŋtaŋ fitik ma mandəfáŋa tili, dzaʼa mamu kuni nda guyatá ghəŋ nda ghuɓa. Haɗ kuni dzaʼa maga slna baɗ tsaya, manda ya snu kuni ta magay wa. Dzaʼa nzakway tsa fitik ya ŋa ghuni ka fitika vya duli. 2 Ka vlaŋta kuni ta skwa pla ghəŋ ŋa dray tsuh tsuh zɗəgana həlata ni ta Yawe: Ta lghəŋ dɓakwa turtuk, nda maŋazak turtuk, nda slaɓalakwa maŋazakha ndəfáŋ turtuk turtuk vakwa taŋ. Rini kul haɗ maslivinza ta həŋ, 3 nda mbəha nimaya ka hpu kəzlitit hwaɗata ni nda rɗi. Kiluʼ təmbay ŋa lghəŋ turtuk. Kiluʼ mkuʼ ŋa maŋazak turtuk. 4 Kiluʼ hkən hkən ta inda tsa maŋazakha ndəfáŋ ya. 5 Ta ghəŋa tsaya, ka vlata kuni ta dugzum turtuk ka pla ghəŋ ŋa ɗawa pla dmaku ŋa slərɓaghunaptá zughu. 6 Inda tsa pla ghəŋha ya dzaʼa sganaghata lu ta ghəŋa tsa skwa pla ghəŋ ŋa dray tsuh tsuh ma tili ya, nda mbəha ni ka nimaya, nda skwa pla ghəŋ ŋa dray tsuh tsuh inda fitik, kawadaga nda mbəha ni ka nimaya, nda skwiha taŋ ŋa slranata manda ya mnaf lu. Tsaya skwa pla ghəŋ ŋa dray ta vu zɗəgana həlata ni ta Yawe. »Pla ghəŋ baɗ slərɓaptá zughu
7 « Baɗ maghwaŋ fitik ma tsa tila mandəfáŋ ya, dzaʼa mamu kuni nda guyatá ghəŋ nda ghuɓa. Ka suma kuni ta suma. Haɗ kuni dzaʼa maga dər wati slna wa. 8 Ka vlaŋta kuni ta skwa pla ghəŋ ŋa dray tsuh tsuh zɗəgana həlata ni ta Yawe: Ta lghəŋ dɓakwa turtuk, nda maŋazak turtuk, nda slaɓalakwa maŋazakha ndəfáŋ, turtuk turtuk vakwa taŋ. Ka klafta kuni ta rini kul haɗ maslivinza ta həŋ, 9 nda mbəha nimaya ka hpu kəzlitit hwaɗata ni nda rɗi. Kiluʼ təmbay ŋa lghəŋ turtuk. Kiluʼ mkuʼ ŋa maŋazak turtuk. 10 Kiluʼ hkən hkən ta inda tsa maŋazakha ndəfáŋ ya. 11 Ka vlata kuni ta dugzum turtuk ka pla ghəŋ ŋa ɗawa pla dmaku. Inda tsa pla ghəŋha ya dzaʼa sganaghata lu ta ghəŋa skwa pla ghəŋ ŋa ɗawa pla dmaku ŋa slərɓa zughu, nda skwa pla ghəŋ ŋa dray tsuh tsuh inda fitik, nda mbəha ni ka nimaya, nda mbəha ni ka skwi ŋa slranata. »
Pla ghəŋ ŋa skala dumbi
12 « Baɗ maghwaŋpəɗ hutaf fitik ma tila mandəfáŋ, dzaʼa mamu kuni nda guyatá ghəŋ nda ghuɓa. Baɗ tsa fitik ya, haɗ kuni dzaʼa maga slna manda ya snu kuni ta magay wa. Ka skalanata kuni ta skala rfu ta Yawe ka fitik ndəfáŋ. 13 Ka vlaŋta kuni ka skwa pla ghəŋ ŋa dray tsuh tsuh ta vu, zɗəgana həlata ni ta Yawe: Ta lghəŋha dɓakw dɓakwa ghwaŋpəɗ hkən, nda maŋazakha his, nda slaɓalakwa maŋazakha ghwaŋpəɗ fwaɗ, turtuk turtuk vakwa taŋ, kul haɗ maslivinza ta həŋ, 14 nda mbəha nimaya ka hpu kəzlitit hwaɗata ni nda rɗi. Kiluʼ təmbay, ŋa lghəŋ turtuk, mantsa ya ta inda tsa lghəŋha ghwaŋpəɗ hkən ya. Kiluʼ mkuʼ ta inda tsa maŋazakha his ya. 15 Kiluʼ hkən hkən ta inda tsa slaɓalakwa maŋazakha ghwaŋpəɗ fwaɗ ya. 16 Ka vlata kuni ta dugzum turtuk ka pla ghəŋ ŋa ɗawa pla dmaku. Inda tsa pla ghəŋha ya dzaʼa sganaghata lu ta ghəŋa skwa pla ghəŋ ŋa dray tsuh tsuh inda fitik, nda mbəha ni ka nimaya, nda mbəha ni ka skwi ŋa slranata.
17 Baɗ mahisa fitik: Lghəŋha dɓakw dɓakwa ghwaŋpəɗ his, nda maŋazakha his, nda slaɓalakwa maŋazakha ghwaŋpəɗ fwaɗ, turtuk turtuk vakwa taŋ, rini kul haɗ maslivinza ta həŋ, 18 nda mbəha nimaya, nda skwi ŋa slranata ŋa tsa lghəŋha ya, nda tsa maŋazakha ya, nda tsa slaɓalakwa maŋazakha ya, taɓta mbsaka ni, manda ya mnaf lu. 19 Ka vlata kuni ta dugzum turtuk ka pla ghəŋ ŋa ɗawa pla dmaku. Inda tsa pla ghəŋha ya dzaʼa sganaghata lu ta ghəŋa pla ghəŋ ŋa dray tsuh tsuh inda fitik, nda mbəha ni ka nimaya, nda mbəhuha taŋ ka skwi ŋa slranata.
20 Baɗ mahkən fitik: Lghəŋha ghwaŋpəɗ ndeŋ, nda maŋazakha his, nda slaɓalakwa maŋazakha ghwaŋpəɗ fwaɗ, turtuk turtuk vakwa taŋ, rini kul haɗ maslivinza ta həŋ, 21 nda mbəha nimaya, nda skwi ŋa slranata ŋa tsa lghəŋha ya, nda tsa maŋazakha ya, nda tsa slaɓalakwa maŋazakha ya, taɓta mbsaka ni, manda ya mnaf lu. 22 Ka vlata kuni ta dugzum turtuk ka skwa pla ghəŋ ŋa ɗawa pla dmaku. Inda tsa pla ghəŋha ya dzaʼa sganaghata lu ta ghəŋa skwa pla ghəŋ ŋa dray tsuh tsuh inda fitik, nda mbəha ni ka nimaya, nda mbəha ni ka skwi ŋa slranata.
23 Baɗ mafwaɗ fitik: Lghəŋha ghwaŋ, nda maŋazakha his, nda slaɓalakwa maŋazakha ghwaŋpəɗ fwaɗ, turtuk turtuk vakwa taŋ, rini kul haɗ maslivinza ta həŋ, 24 nda mbəha nimaya, nda skwi ŋa slranata ŋa tsa lghəŋha ya, nda tsa maŋazakha ya, nda tsa slaɓalakwa maŋazakha ya, taɓta mbsaka ni, manda ya mnaf lu. 25 Ka vlata kuni ta dugzum turtuk ka skwa pla ghəŋ ŋa ɗawa pla dmaku. Inda tsa pla ghəŋha ya dzaʼa sganaghata lu ta ghəŋa skwa pla ghəŋ ŋa dray tsuh tsuh inda fitik, nda mbəha ni ka nimaya, nda mbəha ni ka skwi ŋa slranata.
26 Baɗ mahutaf: Lghəŋha təmbay, nda maŋazakha his, nda slaɓalakwa maŋazakha ghwaŋpəɗ fwaɗ, turtuk turtuk vakwa taŋ, rini kul haɗ maslivinza ta həŋ, 27 nda mbəha nimaya nda skwi ŋa slranata ŋa tsa lghəŋha ya, nda tsa maŋazakha ya, nda tsa slaɓalakwa tuwakha ya, taɓta mbsaka ni, manda ya mnaf lu. 28 Ka vlata kuni ta dugzum turtuk ka skwa pla ghəŋ ŋa ɗawa pla dmaku. Inda tsa pla ghəŋha ya dzaʼa sganaghata lu ta ghəŋa skwa pla ghəŋ ŋa dray tsuh tsuh inda fitik, nda mbəha ni ka nimaya, nda mbəha ni ka skwi ŋa slranata.
29 Baɗ mamkuʼ: Lghəŋha tghas, nda maŋazakha his, nda slaɓalakwa maŋazakha ghwaŋpəɗ fwaɗ, turtuk turtuk vakwa taŋ, rini kul haɗ maslivinza ta həŋ, 30 nda mbəha nimaya, nda skwi ŋa slranata ŋa tsa lghəŋha ya, nda tsa maŋazakha ya, nda tsa slaɓalakwa tuwakha ya, taɓta mbsaka ni, manda ya mnaf lu. 31 Ka vlata kuni ta dugzum turtuk ka skwa pla ghəŋ ŋa ɗawa pla dmaku. Inda tsa pla ghəŋha ya dzaʼa sganaghata lu ta ghəŋa skwa pla ghəŋ ŋa dray tsuh tsuh inda fitik, nda mbəha ni ka nimaya, nda mbəhuha ni ka skwi ŋa slranata.
32 Baɗ mandəfáŋ: Lghəŋha ndəfáŋ, nda maŋazakha his, nda slaɓalakwa maŋazakha ghwaŋpəɗ fwaɗ, turtuk turtuk vakwa taŋ, rini kul haɗ maslivinza ta həŋ, 33 nda mbəha nimaya, nda skwi ŋa slranata ŋa tsa lghəŋha ya, nda tsa maŋazakha ya, nda tsa slaɓalakwa tuwakha ya, taɓta mbsaka ni, manda ya mnaf lu. 34 Ka vlata kuni ta dugzum turtuk ka skwa pla ghəŋ ŋa ɗawa pla dmaku. Inda tsa pla ghəŋha ya dzaʼa sganaghata lu ta ghəŋa skwa pla ghəŋ ŋa dray tsuh tsuh inda fitik, nda mbəha ni ka nimaya, nda mbəha ni ka skwi ŋa slranata.
35 Baɗ matghas: Ka tskafta kuni ta tska vgha dagala ŋa skala rfa ghuni. Baɗ tsa fitik ya, haɗ kuni dzaʼa maga slna manda ya snu kuni ta magay wa. 36 Ka vlaŋta kuni ka skwa pla ghəŋ ŋa dray tsuh tsuh ta vu, zɗəgana həlata ni ta Yawe: Ta lghəŋ turtuk, nda maŋazakha turtuk, nda slaɓalakwa maŋazakha ndəfáŋ, turtuk turtuk vakwa taŋ, rini kul haɗ maslivinza ta həŋ, 37 nda mbəha nimaya, nda skwiha taŋ ŋa slranata ŋa tsa lghəŋ ya, nda tsa maŋazak ya, nda tsa slaɓalakwa maŋazak ya, taɓta mbsaka ni, manda ya mnaf lu. 38 Ka vlata kuni ta dugzum turtuk ka skwa pla ghəŋ ŋa ɗawa pla dmaku. Inda tsa pla ghəŋha ya dzaʼa sganaghata lu ta ghəŋa skwa pla ghəŋ ŋa dray tsuh tsuh inda fitik, nda mbəha ni ka nimaya, nda mbəha ni ka skwi ŋa slranata.
39 Tsaha ya skwiha dzaʼa vlaŋta kuni ta Yawe ma fitika skaluha. Mbəɗaf a lu ta pla ghəŋha ŋa hɗamtá skwi ya waɗa kuni, nda mbəhuha rfa ŋuɗufa ghuni, nda pla ghəŋha ghuni ŋa dray tsuh tsuh, nda mbəhuha nimaya ghuni, nda skwiha ghuni ŋa slranata, nda skwiha ghuni ŋa pla ghəŋa zɗaku ya wu, » kaʼa.