Mbsak 30

1 Ka mnanatá Musa ta la Israʼila ta inda skwi ya mnanaf Yawe.

Zlahu ta ghəŋa skwi waɗa lu ŋa magay

2 Ka Musa nda maliha ta ghəŋa mndəra la Israʼila mantsa: « Wya skwi mnaf Yawe: 3 “Ka waɗana waɗa zgun ta waɗu ta Yawe, ka waɗu a waɗa tsi ka hbaftá kwalaghuta magatá sana skwi ŋa ghəŋa ni, haɗ dzaʼa ɓlanaptá gwaɗa ni wu, ka magata tsi manda va ya mnagap tsi ma wa ni.

4 Ma nzakwa makwa ta ka daghali karaku ga da ni, ka waɗanatá tsi ta waɗu ta Yawe, ka waɗu a waɗa tsi ŋa magatá sana skwi, 5 ka snaŋ sna da ni ta tsa waɗu waɗa tsi, ka tsa skwi waɗa ta ŋa magay ya a tsi, gwaɗanaf a tsi wu, nda ra inda tsa skwi waɗa tsi nda ya hbaf tsi ta magay ya. 6 Ama ka kwalaghu kwala da ni daga baɗ va tsa snaŋta ni ya, nda nza inda tsa skwi waɗa tsi nda ya hbaf tsi ta magay ya ka bətbət. Klafta a Yawe ka gwaɗa wu, kabga lanaf a ta da ni wa.

7 Ka laghu la tsi da zəʼal ta nda tsa waɗatá waɗa ni ka skwi hbaf tsi fərtəgiŋ tsi ŋa magay ni ya a tsi, 8 ka snaŋtá zəʼala taŋ, mnana a ta sana skwi wu, dzaʼa nzakway tsa waɗa ni ka tsa skwi hbaf tsi ŋa magay ya a tsi ka skwi nda ra. 9 Ama ka kwalaghutá zəʼala taŋ baɗ snaŋta ni katsi, hliŋ hla ta tsa waɗu ka tsa skwi hbaf tsi ŋa magay ni fərtəgiŋ tsi ya a tsi. Klafta a Yawe ka gwaɗa wa.

10 Nziya nza tsi, waɗa markwa wadgu, ka marakw ghəzliŋ lu a tsi, nda nza inda tsa skwi hbaf tsi ya ka skwi nda ra, dər kinawu tsa skwi kura tsi ta maganata ŋa ghəŋa ni ya.

11 Ama ka ma həga ga zəʼala taŋ waɗata tsi ta tsa waɗu ya, ka hbaftá tsi ta skwi ŋa maganatá ghəŋa ni a tsi, 12 tsaw lagha zəʼala taŋ ma snaŋta ni, mnana a ta sana skwi wu, kwalaghu a wu, inda tsa skwi waɗa tsi ya, nda nza ka skwi nda ra. Inda tsa skwi waɗa tsi ka hbafta ŋa magay ni ya, nda nza mantsa ya. 13 Ama ka kura kura zəʼala taŋ ta hliŋta baɗ tsa snaŋta ni ya katsi, inda tsa skwi ta sab ma wa ni, waɗa tsi ka hbafta payaf tsi ŋa magay ni ya, nda nza ka bətbət. Klafta a Yawe ka gwaɗa wu, kabga hliŋ hla zəʼala taŋ.

14 Dər kinawu tsa skwi waɗa tsi, ka tsa skwi hbaf tsi ŋa magay ni nda ma kwalaghuta ɗvaftá sana skwi ya, zəʼala taŋ dzaʼa mnay nda ra, ra a wu kəʼa. 15 Ka mnana a zəʼala taŋ ta sana skwiha ha ga mahtsima ni wu, tsuʼanaf tsuʼa nda tsa ta magay ni ta skwi ya waɗa tsi, ka skwi ya hba tsi ŋa magay ni ya a tsi. Tsuʼanaf tsuʼa, kabga haɗ skwi mnana tsi baɗ tsa snaŋta ni ya wa. 16 Ama tahula tsa fitik kəl zəʼala taŋ ka snaŋta ya, ka kura kura tsi ta hliŋta, tsatsi dzaʼa kla dmakwa tsa marakw taŋ ya,” » kaʼa.

17 Tsaha ya zlahuha mnanaf Yawe ta Musa ta ghəŋa zgun nda markwa taŋ, ka da nda makwa ni ta ka daghali karaku ga taŋ ya a tsi.