Mbsak 31

Vulu nda la Midyaŋ

1 Ka Yawe nda Musa mantsa: 2 « Plam pla ta ghwaɗaka skwi magana la Midyaŋ ta la Israʼila. Tahula tsa ŋa dzaʼa gha guya vgha nda dzidzíha gha, » kaʼa.

3 Ka Musa nda mnduha mantsa: « Ka hba sanlaha ma bakwa gwal vulu mataba ghuni ta vgha ŋa vulu. Ka dzaʼa həŋ da guyata nda la Midyaŋ, ŋa planamta Yawe ta la Midyaŋ ta skwi maga həŋ. 4 Ka ghwanafta kuni ta bakwa gwal vulu dəmbuʼ dəmbuʼ (1.000) ma inda mndəra mnduha la Israʼila, » kaʼa. 5 Ka hlaftá lu ma dəmbuʼata la Israʼila ta mnduha dəmbuʼ dəmbuʼ ma inda mndəra mndu, tsaya gwal vulu dəmbuʼ ghwaŋpəɗ his (12.000), nda hbatá vgha ŋa sliʼi da vulu. 6 Ka ghunaghatá Musa ta gwal vulu dəmbuʼ dəmbuʼ ma inda mndəra mndu da vulu. Ka ghunaghatá tsi ta həŋ kawadaga nda Pinhas, zwaŋa Ilghazar mnda dra skwi ŋa Lazglafta, ta klatá huzla nda ghuɓa, nda duli ŋa tsgha lwi ya ma dzva ni.

7 Ka laghu həŋ da guyata nda vulu nda la Midyaŋ manda ya mnanaf Yawe ta Musa. Ka pslata həŋ ta inda zgwana. 8 Ta ghəŋa tsa rwatá mnduha ya, ka pslatá həŋ guli ta mghamha Midyaŋ: I Ivi, nda Rekem, nda Tsur, nda Hur, nda Revagh, mghamha Midyaŋ hutaf. Ka dzatá həŋ guli nda kafay ta Bilgham, zwaŋa Bəghur. 9 Ka hlaftá la Israʼila ka vuʼa ta miʼa la Midyaŋ, nda zwana taŋ. Ka hlutá həŋ ta inda rina taŋ, nda inda bra rina taŋ, nda inda huzla taŋ. 10 Ka dariŋtá həŋ ta luwaha ta nzakw la Midyaŋ, nda inda ghuɓuha taŋ. 11 Ka hlaghatá həŋ ta skwa zləɗu, nda inda skwi ya kasaf həŋ, nda mnduha, nda rini tani. 12 Ka hlaghatá həŋ ta vuʼaha, nda skwiha hlaf həŋ ma vulu, nda skwa zləɗu, da i Musa, nda ya da Ilghazar mnda dra skwi ŋa Lazglafta, nda ya da guyatá ghəŋa la Israʼila ma ghuɓa taŋ ma daɓiha Muwav ta wa Yardeŋ mbəŋ nda Yeriku.

13 Ka sab i Musa nda Ilghazar mnda dra skwi ŋa Lazglafta, nda inda maliha ta ghəŋa guyatá ghəŋ, da guya həŋ ta hula ghuɓu. 14 Ka ɓasanavatá Musa ta ŋuɗuf ta maliha ta ghəŋa bakwa gwal vulu, maliha ta ghəŋa dəmbuʼ, nda ya ta ghəŋa dərmək ta vrakta ma vla vulu. 15 Ka Musa nda həŋ mantsa: « Nahgani! Nya kəl kuni ka zlanata nda hafu ta inda miʼaha na? 16 Wya nana miʼaha na, nda ma gwaɗa Bilgham ta hlamtá la Israʼila da dmata nda Yawe ma skwi ta maguta ma Pəghur, kəl zləmnda ka lanaghata guyatá ghəŋa mnduha Yawe. 17 Mantsa, ndanana, pslawa psla ta inda zwana zgwana! Pslawa psla ta inda miʼaha ta snaŋtá zgun. 18 Ama inda kuʼaha kul snaŋtá zgun ya, ŋanawa ŋa ta həŋ nda hafu ŋa ŋa ghuni.

19 Kaghuni, nzawa nza ta hula ghuɓu ka fitik ndəfáŋ. Inda tsa kaghuni ta pslatá mndu, ka ksaŋtá mbli ya a tsi, ka ghuɓiŋta kuni ta nzakwa ghuni baɗ mahkən fitik, nda ya baɗ mandəfáŋ fitik, kaghuni, nda vuʼaha ghuni tani. 20 Mantsa ya inda lgutha, nda inda huzla ka huta, nda inda skwiha gagaf lu nda swida gu, nda inda huzlaha ka udzu, ka ghwaɓiŋta kuni ta həŋ, » kaʼa.

21 Ka Ilghazar mnda dra skwi ŋa Lazglafta nda tsa gwal vulu si ta laghwi da vulu ya mantsa: « Wya tva skwi ŋa magay ma zlahu mnanaf Yawe ta Musa: 22 Ta ghəŋa dasu, nda tsedi, nda ghuva tili, nda kfur, nda dalma, nda sanlaha ma kfurha, 23 nda inda skwiha ta ŋaŋtá vu yeya dzaʼa pghadamta kuni da vu ŋa nanafta ka skwi kul tsaɗ lu. Dzaʼa ghuɓay lu guli nda ima ghuɓiŋta. Ka pghamta kuni ma imi ta inda ya kul haɗ ta ŋaŋtá vu. 24 Baɗ mandəfáŋ fitik, ka ghwaɓiŋta kuni ta lgutha ghuni, ŋa nzakwa ghuni kul tsaɗ lu. Tahula tsaya, dzaʼa vradamta kuni da ghuɓu, » kaʼa.

Daga skwa zləɗu

25 Ka Yawe nda Musa mantsa: 26 « Mbəɗaf mbəɗa vərɗa kagha, nda Ilghazar mnda dra skwi ŋa Lazglafta, nda la zəʼala həgaha ma guyatá ghəŋ, ta skwiha zləɗagagha lu, nda mnduha, nda rini tani. 27 Ka daganafta ka ta tsa skwiha zləɗagagha lu ya ta bakwa gwal vulu si ta laghwi da vulu, nda inda guyatá ghəŋ. 28 Ka hlanapta ka ŋa Yawe ta skwiha tsaf lu, ta inda gwal vulu ta vragaghata ta vulu, nda ma klaftá zgun turtuk ma hutaf dərmək, nda rini turtuk ma hutaf dərmək, mataba slaha, nda kəɗihha, nda rina fisik. 29 Ma tsa rita ni ka mayaka gwal vulu dzaʼa hlapta kuni, ka vlaŋta ka ta Ilghazar, mnda dra skwi ŋa Lazglafta, manda mbəhu klap lu ŋa Yawe. 30 Ma tsa sana rita mayak ka ŋa la Israʼila ya, ka klapta ka ta mahutaf mbsaka ni, mataba mnduha, nda inda rini: Slaha, nda kəɗihha, nda rina fisik. Ka vlaŋta ka ta la Levi ta nghapta ka həga tumpula Yawe ya, » kaʼa.

31 Ka magatá i Musa nda Ilghazar mnda dra skwi ŋa Lazglafta ta skwi manda va ya mnanaf Yawe ta Musa. 32 Ma tsa skwiha hlaf lu ma vəl zləɗata gwal vulu ya ná, wya paɗakwa ni: Dəmbuʼ mkuʼ dərmək nda ndəfáŋ mbsak hutaf mida (675.000) rina fisik, 33 dəmbuʼ ndəfáŋ mbsak his mida (72.000) slaha, 34 dəmbuʼ mkuʼ mbsak ndeŋ mida (61.000) kəɗihha. 35 Mnda səla ta nzakway ka kuʼaha kul snaŋtá zgun ya na: Dəmbuʼ hkən mbsak his mida (32.000) gwata ni.

36 Rita ni vlaŋ lu ta gwal vulu na: Dəmbuʼ hkən dərmək nda hkən mbsak ndəfáŋ mida nda hutaf dərmək (337.500) rina fisik. 37 Ya tsaf lu ŋa Yawe klap lu ma rina fisik na: Mkuʼ dərmək nda ndəfáŋ mbsak hutaf mida (675). 38 Slaha: Dəmbuʼ hkən mbsak mkuʼ mida (36.000) həŋ, ndəfáŋ mbsak his mida (72) klapta lu ŋa Yawe. 39 Kəɗihha: Dəmbuʼ hkən mbsak nda hutaf dərmək (30.500) həŋ, mkuʼ mbsak ndeŋ mida (61) klapta lu ŋa Yawe. 40 Mnda səla: Dəmbuʼ ghwaŋpəɗ mkuʼ (16.000) həŋ, hkən mbsak his mida (32) klapta lu ŋa Yawe. 41 Ka vlaŋtá Musa ta tsaha tsaf lu ka mbəhu ŋa Yawe ya ta Ilghazar, mnda dra skwi ŋa Lazglafta, manda va ya mnaf Yawe.

42 Wya rita ni vlaŋ lu ta la Israʼila, tsa hlap Musa ma mayaka gwal ta labi da vulu ya. 43 Tsa rita ni vlaŋ lu ta guyatá ghəŋ ya na: Rina fisik dəmbuʼ hkən dərmək nda hkən mbsak ndəfáŋ mida nda hutaf dərmək (337.500) həŋ, 44 nda slaha dəmbuʼ hkən mbsak mkuʼ mida (36.000), 45 nda kəɗihha dəmbuʼ hkən mbsak nda hutaf dərmək (30.500), 46 nda mnda səla dəmbuʼ ghwaŋpəɗ mkuʼ (16.000). 47 Ka hlaptá Musa ma mayaka la Israʼila ta mahutaf mbsak mataba mnduha, nda rini. Ka vlaŋtá tsi ta la Levi ta nghapta ka həga tumpula Yawe, manda va ya mnaf Yawe.

48 Tsa maliha ta ghəŋa bakwa gwal vulu, maliha ta ghəŋa dəmbuʼ, (1.000) nda maliha ya ta ghəŋa dərmək (100) ya, ka gavadaghatá həŋ da Musa. 49 Ka həŋ nda tsi mantsa: « Mbəɗaf mbəɗa kwalvaha gha ta gwal vulu si mista mbrakwa ŋni, haɗ mndu ta pɗavaghuta mataba ŋni dər turtuk wa. 50 Tsaya kəl ŋni ka hlanaktá mbəhu ta Yawe, ta huzlaha ka dasu mutsaf ŋni, ŋa slərɓaŋnaptá zughu ta kəma Yawe: Dzaɓaha, nda tsuhwalha, nda halagarha, nda yeriha sləməŋ, nda miziɗikwha, » kaʼa.

51 Ka zlghaftá i Musa nda Ilghazar mnda dra skwi ŋa Lazglafta da həŋ ta inda tsa huzla ka dasu slaraf lu ya. 52 Inda tsa mbəhu ka dasu hlap lu ŋa Yawe ya na: Kiluʼ dərmək nda təmbay mbsak (190) həŋ. Maliha ta ghəŋa dəmbuʼ, nda maliha ta ghəŋa dərmək ta valata. 53 Inda hamata gwal vulu ya ná, zləɗa ŋa ŋa taŋ hahəŋ. 54 Ka hlaftá i Musa nda Ilghazar, mnda dra skwi ŋa Lazglafta ta tsa huzlaha ka dasu si da tsa maliha ta ghəŋa dəmbuʼ (1.000) nda maliha ta ghəŋa dərmək (100) ya, ka klaghata da tumpula guyaku ka skwa havu ŋa la Israʼila ta kəma Yawe.