Mbsak 32

Mndəra mnduha hkən ta sana ɓla Yardeŋ

1 Da la Rubeŋ nda la Gat ná, mamu bra rini ta ndəghuta ka malaghutá mbraku. Nghanata taŋ ta haɗikha Yaghəzer, nda haɗika Gilghat ná, dzaʼa ɗina tsa kwakwar ya ŋa ngha rini. 2 Tsaya kəl la Gat nda la Rubeŋ ka lagha slanaghatá i Musa, nda Ilghazar, mnda dra skwi ŋa Lazglafta, nda maliha ta ghəŋa guyatá ghəŋ. Ka həŋ mantsa: 3 « Luwaha Ghatarut, nda Divuŋ, nda Yaghəzer, nda Nimra, nda Hesbuŋ, nda Ilghale, nda Svam, nda Nevu, nda Beghuŋ, 4 tsa kwakwar dzuŋ Yawe ta kəma guyatá ghəŋa la Israʼila ya ná, nda ra ŋa ngha braha inda rina aŋni kwalvaha gha. 5 Ka ta zɗaŋnaŋ zɗa ka ta huɗi, ka nza tsa kwakwar ya ŋa aŋni kwalvaha gha. Ma tsughwaɗaŋnap ka ta Yardeŋ, » ka həŋ.

6 Ama ka Musa nda la Gat, nda ya nda la Rubeŋ mantsa: « Nu! Ta dzaʼa zwana ma ghuni da vulu ná, ta nzaghutá kaghuni hadna? 7 Kabgawu ta kəl kuni ka rwa vgha ŋa la Israʼila ta dzaʼa tsughwaɗadamta da haɗik ya vlaŋ Yawe ta həŋ na? 8 Ɗina tsa skwi maga dzidzíha ghuni ma ghunaghata ɗa ta həŋ da Kadesbarnegha ŋa vitsanatá tsa haɗik ya ra? 9 Ka ŋladaftá həŋ da didiŋa Iskul. Manda vitsapta taŋ ta tsa haɗik ya, ka rwanatá həŋ ta vgha ta la Israʼila ŋa kwala taŋ lami da tsa haɗik vlaŋ Yawe ta həŋ ya. 10 Ka sliʼavafta gufatá ŋuɗufa Yawe baɗ tsa, ka waɗata tsi: 11 “Kadzeŋkadzeŋ, na mnduha ta safi ma Masar, gwal sliʼafta ni ta imi hisambsak ka laghwi ta kəma, haɗ həŋ dzaʼa nghaŋtá tsa haɗik tanaf yu ta imi ta sləməŋ ta i Abraham nda Izak, nda Yakubu ya wu, kabga dgaŋ dga həŋ ta ghəŋ ka dzaʼa mista ɗa! 12 Ba Kalep, zwaŋa Yəfune, mnda la Kənaz, nda Yəhusuwa zwaŋa Nuŋ, kabga ta dzaʼa hahəŋ mista Yawe kul dgaŋtá ghəŋ,” kaʼa. 13 Ka sliʼavaftá gufatá ŋuɗufa Yawe ta ghəŋa la Israʼila, ka mblaftá tsi ta həŋ ŋa zatá vaku fwaɗ mbsak ma mtak, ha ka zaɗatá inda zivira tsa gwal ta maganatá skwi kul ɗinaku ta Yawe ya. 14 Kaghuni mndəra la ka dmaku, wya kuni ta kla saɗa dzidzíha ghuni, ŋa sliʼiglanafta katakata ta gufatá ŋuɗufa Yawe ta ghəŋa la Israʼila! 15 Ka mbəɗaghu mbəɗa kuni ta vgha ka zlanatá mista ni wu katsi, tsatsi guli, dzaʼa mbəɗava mbəɗa ka zləglanatá la Israʼila ma mtak. Kaghuni dzaʼa klaktá zaɗakwa inda mnduha nda tsa tama, » kaʼa.

16 Ta gavadaghatá həŋ da tsi, ka həŋ mantsa: « Dzaʼa babaftá ŋni hadna ta kalakalaha ŋa braha rina fisika ŋni, nda luwaha ŋa zwana ŋni. 17 Vərɗa aŋni, dzaʼa gi hlaftá huzla vulu ŋni, ŋa dzaʼa ta kəma la Israʼila, ha ka hladamta ŋni ta həŋ da vla taŋ. Dzaʼa nzata hadna zwana ŋni ma luwaha nda matsaka huzlu, ma vli ya dzaʼa kataku həŋ dabga mnduha na haɗik na. 18 Haɗ aŋni dzaʼa vragaghuta da həga ŋni ma kɗaku inda la Israʼila mutsaftá haɗika za həga taŋ wa. 19 Ama haɗ aŋni dzaʼa mutsaftá haɗika za həga ŋni kawadaga nda hahəŋ ta sana ɓla Yardeŋ wu, kabga ŋa aŋni ma haɗika za həga ná, nda ta na təv na, ta ɓla Yardeŋ təv safa fitik, » ka həŋ.

20 Ka Musa nda həŋ mantsa: « Ka maga maga kuni mantsa, ka hlaf hla kuni ta huzla vulu ta kəma Yawe ŋa ŋlu da vulu, 21 ka tsughwaɗadap tsughwaɗa inda mnduha ghuni ta vulu ta Yardeŋ ta kəma Yawe, ha ka ghəzlafta ni ta ghumaha ni ta kəma ni, 22 ka vraghu a kuni ta kul hanagatá tsa haɗik ya ta ghəŋ ta kəma Yawe wu katsi, dzaʼa nzakway kuni flaʼu da Yawe, nda ya da la Israʼila, dzaʼa nzakway na haɗik na ŋa ŋa ghuni ta kəma Yawe. 23 Ama ka maga a kuni mantsa wu, gana ga kuni ta dmaku ta Yawe, ka snaŋta kuni kazlay dzaʼa mista ghuni dmakwa ghuni kəʼa. 24 Babawa luwaha ŋa zwana ghuni, nda kalakalaha ŋa rina fisika ghuni, ama ta ta imi ta sləməŋ ta sab ta wa ghuni ya, ka ŋanata kuni, » kaʼa.

25 Ka la Gat, nda la Rubeŋ nda Musa mantsa: « Dzaʼa magay aŋni kwalvaha gha manda ya mnaf ka mghama ɗa. 26 Zwana ŋni, nda miʼa ŋni, nda bra rina ŋni, nda inda rina ŋni, dzaʼa nzata hadna həŋ ma luwaha Gilghat, 27 ama inda aŋni kwalvaha gha, dzaʼa tsughwaɗadap tsughwaɗa inda aŋni nda hbatá vgha nda huzla ŋa ŋlu da vulu ta kəma Yawe, manda ya mna mghama ŋni, » ka həŋ.

28 Ka mnanaftá Musa ta zlahu ta ghəŋa taŋ ta i Ilghazar, mnda dra skwi ŋa Lazglafta, nda Yəhusuwa zwaŋa Nuŋ, nda ya ŋa zəʼala həgaha ma mndəra la Israʼila. 29 Ka Musa nda həŋ mantsa: « Ka tsughwaɗadap tsughwaɗa la Gat, nda la Rubeŋ ta Yardeŋ kawadaga nda kaghuni, inda taŋ nda hbatá vgha nda huzla vulu ŋa ŋlu da vulu ta kəma Yawe, ha ka hanagata tsa haɗik ya mista ghuni katsi, ka vlaŋta kuni ta həŋ ta haɗika Gilghat ŋa haɗika za həga taŋ. 30 Ama ka tsughwaɗadap a həŋ mista ghuni nda hbatá vgha nda huzla vulu wu, dzaʼa mutsu ma takataka ghuni həŋ ta haɗika za həga taŋ ta haɗika Kanʼana, » kaʼa.

31 Ka i la Gat, nda la Rubeŋ zlghafta wa ni mantsa: « Skwi ya mnana Yawe ta kwalvaha gha ná, dzaʼa magay ŋni. 32 Vərɗa aŋni, nda hbatá vgha nda huzla ŋa vulu ta kəma Yawe dzaʼa laba ŋni da haɗika Kanʼana, ama ŋa aŋni, kwakwar ya ka haɗika za həga ŋni ná, təv na ɓla Yardeŋ na, » ka həŋ.

33 Ka vlaŋtá Musa ta la Gat nda la Rubeŋ, nda rita mndəra la Mənase, zwaŋa Yusufu ta kwakwara Sihuŋ, mghama la Amuru, nda kwakwara Ghug, mghama Basaŋ ta tsa haɗik ya nda luwaha ni, nda kwakwarha taŋ ta wanafta. 34 Ka bəglaftá la Gat ta Divuŋ, nda Ghatarut, nda Gharugher, 35 nda Ghatrutʼsufaŋ, nda Yaghəzer, nda Yugbuha, 36 nda Betʼnimra, nda Betʼharaŋ, ka bəglaftá həŋ ta tsa luwaha ya nda matsaka huzlu, nda kalakalaha ŋa rina fisika taŋ. 37 Ka babəglaftá la Rubeŋ ta Hesbuŋ, nda Ilghale, nda Kiriyatayim, 38 nda Nevu, nda Baghalʼmeghuŋ mbaɗanaf lu ta hga taŋ, nda Sivma. Ka tsatsanaftá həŋ ta lfiɗa hgu ta tsa luwaha babəglaf həŋ ya.

39 Ka laghu la Mahir, zwaŋa Mənase da Gilghat, ka klaghutá həŋ ta tsa haɗik ya, ka ghəzlaftá tsi ta la Amuru ta nzaku hada ya. 40 Mantsa tama, ka vlaŋtá Musa ta Gilghat, ŋa Mahir zwaŋa Mənase, ka nzatá tsi hada. 41 Ka laghu Yaʼir, sana zwaŋa Mənase klaghutá zwana luwaha taŋ, ka hgə tsi ka luwaha Yaʼir. 42 Ka laghu Nuva da klaghutá Kenat nda zwana luwaha ta wanafta. Ka hgə tsi ta Nuvah nda hga ni.