Tva pla ghəŋ inda fitik
28
1 Ka Yawe nda Musa mantsa: 2 « Wya skwiha dzaʼa ka mnanaftá la Israʼila: Yaha kuni nda madərŋəzl ka klaɗikta ma fitika ni ta mbəhuha ɗa nda ɗafa ɗa ka skwa pla ghəŋ ŋa dray ta vu, zɗagiha həlata ni.3 Ka mnanata ka ta həŋ: Wya skwa pla ghəŋ ŋa dray ta vu dzaʼa kladaghata kuni ŋa Yawe: Slaɓalakwha maŋazak his turtuk turtuk vakwa taŋ, kul haɗ maslivinza ta həŋ, ka skwa pla ghəŋ ŋa dray tsuh tsuh inda fitik. 4 Ka vlata lu ta slaɓalakwa maŋazak turtuk ga sərɗək, slaɓalakwa maŋazak turtuk ga hawu, 5 kawadaga nda mbəha nimaya ka hpu kəzlitit ka kiluʼ hkən hwaɗata ni nda ɗitsatá rɗa zaytuŋ ka litər turtuk. 6 Nda nza ka skwa pla ghəŋ ŋa dray tsuh tsuh inda fitik manda ya tsaf lu ta ghwá Sinay, ka skwa pla ghəŋ ŋa dray ta vu zɗəgana həlata ni ta Yawe. 7 Ka litər turtuk skwi ŋa slranata ŋa inda slaɓalakwa maŋazak. Ma həga nda ghuɓa dzaʼa slranata lu ŋa Yawe ta ima inabi nda tawa. 8 Tsa mahisa slaɓalakwa maŋazak ya, dzaʼa vlata ga hawu lu, nda mbəha nimaya kawadaga nda skwi ŋa slranata manda va tsa ga sərɗək ya. Tsaya skwa pla ghəŋ ŋa dray ta vu zɗəgana həlata ni ta Yawe. »
Pla ghəŋ baɗ Sabat
9 « Baɗ Sabat, dzaʼa vla vla lu ta slaɓalakwha maŋazak his turtuk turtuk vakwa taŋ, kul haɗ maslivinza ta həŋ, nda mbəha nimaya ka hpu kəzlitit ka kiluʼ mkuʼ hwaɗata ni nda rɗi, nda skwi ŋa slranata. 10 Tsa skwa pla ghəŋ ŋa dray tsuh tsuh ta nzakway inda Sabat ya, dzaʼa sganaghata lu ta ghəŋa skwa pla ghəŋ ŋa dray tsuh tsuh inda fitik, nda skwi ŋa slranata. »
Pla ghəŋ baɗ taŋtaŋa fitik ma tili
11 « Ma inda ngha tili, kladaghata ghuni ŋa Yawe ta skwa pla ghəŋ ŋa dray tsuh tsuh: Ta lghəŋha dɓakw dɓakwa his, nda maŋazak turtuk, nda slaɓalakwha maŋazak ndəfáŋ turtuk turtuk vakwa taŋ, rini kul haɗ maslivinza ta həŋ, 12 nda mbəha nimaya ka hpu kəzlitit ka kiluʼ təmbay, hwaɗata ni nda rɗi, ŋa lghəŋ turtuk, nda mbəha nimaya ka hpu kəzlitit ka kiluʼ mkuʼ hwaɗata ni nda rɗi ŋa pla ghəŋ nda maŋazak turtuk, 13 nda mbəha nimaya ka hpu kəzlitit ka kiluʼ turtuk hwaɗata ni nda rɗi ŋa pla ghəŋ nda slaɓalakwa maŋazak turtuk. Tsaya skwa pla ghəŋ ŋa dray tsuh tsuh ta vu, zɗəgana həlata ni ta Yawe. 14 Skwi ŋa slranata nda slra ná, wya həŋ: Ima inabi ka litər his ta lghəŋ turtuk. Litər turtuk nda rita, ta maŋazak turtuk. Litər turtuk ta slaɓalakwa maŋazak turtuk. Tsaya skwa pla ghəŋ ŋa dray tsuh tsuh ma ngha tili. Tili tili, ŋa inda tili ma vaku. 15 Ta ghəŋa tsa, nda dugzum turtuk ŋa Yawe ka skwa pla ghəŋ ŋa ɗawa pla dmaku, dzaʼa vlata lu ta ghəŋa tsa skwa pla ghəŋ ŋa dray tsuh tsuh inda fitik ya, nda skwi ŋa slranata. »
Pla ghəŋ baɗ skala Pak
16 « Baɗ maghwaŋpəɗ fwaɗa fitik ma taŋtaŋa tili, tsaya skala Pak ŋa Yawe. 17 Baɗ maghwaŋpəɗ hutafa fitik ma tsa tili ya, fitika skalu. Ma fitik ndəfáŋ, buradi kul haɗ is mida dzaʼa lu da zay. 18 Baɗ taŋtaŋa fitik, dzaʼa mamu kuni nda guyatá ghəŋ nda ghuɓa. Haɗ kuni dzaʼa maga slna ya snu kuni ta magay wa. 19 Ka vlaŋta kuni ka mbəhu ŋa dray tsuh tsuh ta vu ŋa Yawe: Ta lghəŋha dɓakw dɓakwa his, nda maŋazak turtuk, nda slaɓalakwa maŋazakha ndəfáŋ, turtuk turtuk vakwa taŋ, kul haɗ maslivinza ta həŋ, 20 nda mbəha nimaya ka hpu kəzlitit ka kiluʼ təmbay hwaɗata ni nda rɗi, ta lghəŋ turtuk, kiluʼ mkuʼ ta maŋazak turtuk, 21 nda kiluʼ hkən hkən ta inda tsa maŋazakha ndəfáŋ ya. 22 Ta ghəŋa tsaya, dzaʼa vla vla kuni ta dugzum turtuk ŋa pla ghəŋ ŋa ɗawa pla dmaku ŋa slərɓaghunaptá zughu. 23 Dzaʼa magay kuni ta inda tsaha ya ta ghəŋa tsa skwa pla ghəŋ ŋa dray tsuh tsuh ga sərɗək, tsa skwa pla ghəŋ ŋa dray tsuh tsuh inda fitik ya. 24 Manda va tsaya dzaʼa vlata kuni inda fitik, ma tsa fitikha ndəfáŋ ya, ta mbəha ɗafa ka skwa pla ghəŋ ŋa dray ta vu, zɗəgana həlhəla ni ta Yawe. Tsaya dzaʼa lu sganaghata ta ghəŋa tsa skwa pla ghəŋ ŋa dray tsuh tsuh inda fitik, nda skwi ŋa slranata ya. 25 Baɗ mandəfáŋa fitik, dzaʼa mamu kuni nda guyatá ghəŋ nda ghuɓa. Haɗ kuni dzaʼa maga slna baɗ tsa fitik ya manda ya snu kuni ta magay wa. »
Pla ghəŋ ŋa skala nekwata tskatá skwi ta vwah
26 « Baɗ fitika skala rfa nekwatá nimaya ta vwah ta kladaghata kuni ta mbəha taŋtaŋa ndəhatá lfiɗa nimaya ŋa Yawe, dzaʼa mamu kuni nda guyatá ghəŋ nda ghuɓa. Haɗ kuni dzaʼa maga dər wati ma slna baɗ tsa fitik ya, manda ya snu kuni ta magay wa. 27 Ka kladaghata kuni ŋa Yawe ta skwa pla ghəŋ ŋa dray tsuh tsuh ya zɗəgana həlata ni, ta lghəŋha dɓakw dɓakwa his, nda maŋazak turtuk, nda slaɓalakwa maŋazakha ndəfáŋ turtuk turtuk vakwa taŋ, 28 nda mbəha nimaya ka hpu kəzlitit hwaɗata ni nda rɗi. Kiluʼ təmbay ŋa lghəŋ turtuk. Kiluʼ mkuʼ ŋa maŋazak turtuk. 29 Kiluʼ hkən hkən ta inda tsa slaɓalakwa maŋazakha ndəfáŋ ya. 30 Ta ghəŋa tsaya, ka vlata kuni ta dugzum ŋa slərɓaghunaptá zughu. 31 Ka vlata kuni ta mbəha nimaya ni, kawadaga nda skwiha ŋa slranata ta ghəŋa tsa skwa pla ghəŋ ŋa dray tsuh tsuh inda fitik ya. Ka hlafta kuni ta rini kul haɗ maslivinza ta həŋ. »