La Levi 23

Zlahuha ta ghəŋa skaluha la Israʼila

Fitika Sabat

1 Ka Yawe nda Musa mantsa: 2 « Ka ka mnanata la Israʼila na: Skaluha ka ŋa Yawe dzaʼa kuni da mnay, dzaʼa nzakway ka guyatá ghəŋ nda ghuɓa. Wya tsa skaluha ɗa ya:

3 Ma fitik mkuʼ, dzaʼa ksay lu ta slna. Ama baɗ mandəfáŋ ya, Sabat, fitika mbiʼa vgha dar dar tsaya, dzaʼa mamu guyatá ghəŋ nda ghuɓa. Haɗ sana slna dzaʼa mag lu baɗ tsa fitik ya wa. Dzaʼa nzakway tsa Sabat ya ŋa Yawe dər ma vli ga dzaʼa nzata kuni.

4 Wya sanlaha ma skaluha ka ŋa Yawe dzaʼa tskavata guyatá ghəŋ nda ghuɓa ŋa skalay nda fitika ni nda fitika ni. »

Skala Pak, nda skala buradi kul haɗ is mida

5 « Baɗ maghwaŋpəɗ fwaɗa fitik ma taŋtaŋa tili^ª, beeghwa fitik, dzaʼa mamu skala Pak ŋa Yawe. 6 Baɗ maghwaŋpəɗ hutafa fitik ma va tsa tili ya, dzaʼa mamu skala buradi kul haɗ is mida ŋa Yawe. Fitik ndəfáŋ dzaʼa magata kuni ta za buradi kul haɗ is mida. 7 Baɗ taŋtaŋa fitik, dzaʼa mamu kuni nda guyatá ghəŋ nda ghuɓa. Haɗ kuni dzaʼa maga slna ya snu kuni ta magay wa. 8 Ma tsa fitik ndəfáŋ ya ná, ka vla kuni ta skwa pla ghəŋ ŋa dray ta vu ŋa Yawe. Baɗ mandəfáŋa fitik guli, dzaʼa mamu guyatá ghəŋ nda ghuɓa. Baɗ tsa fitik ya ná, yaha kuni da maga dər wati ma slna, » kaʼa.

Skala taŋtaŋa bakərva

9 Ka Yawe nda Musa mantsa: 10 « Mnana mna ta la Israʼila, ka ka nda həŋ na: Lama ghuni da tsa haɗik ta dzaʼa vlaghunata yu ya, zlrafta ghuni ta tska skwi ta vwah ya, ka hlədanaghata kuni ta mnda dra skwi ŋa Lazglafta ta bakərva taŋtaŋa ndəhatá nimaya ghuni, 11 ŋa zukwafta tsatsi guli ta kəma Yawe ga mahtsima Sabat, ŋa tsuʼaghunafta ɗa. 12 Baɗ va tsa fitik zukwaf kuni ta tsa bakərva ya, ka vlata kuni ta slaɓalakwa maŋazak turtuk vakwa ni kul haɗ maslivinza tida, ŋa pla ghəŋ ŋa dray tsuh tsuh ŋa Yawe. 13 Kawadaga nda tsi, ka vlihata kuni ta hpu kəzlitit hwaɗam lu nda rɗi ka kiluʼ mkuʼ, ŋa pla ghəŋ ŋa dray ta vu zɗəganata həlata ni ta Yawe. Klak kuni guli ta ima inabi ka litər turtuk ŋa slranata. 14 Yaha kuni da za burada lfiɗa nimaya, dər fsatá ghəŋa ni, dər ndəhata ni, ha baɗ kladaghata ghuni ta tsa mbəhu ya ŋa Lazglafta ghuni. Nda nza tsaya ka zlahu ŋa ɗekɗek ha ma zivira ghuni ma inda vli dzaʼa nzata kuni. »

Skala nekwata tskatá skwi ta vwah

15 « Zlrafta ni baɗ tsa ga mahtsima Sabat, fitik kəl kuni ka klakta bakərva ŋa zukwafta ya, ka mbəɗafta kuni ta luma ndəfáŋ dzarakrak. 16 Ka mbəɗafta kuni ta fitik hutaf mbsak dzarakrak, ha ga mahtsima hɗatá mandəfáŋa Sabat, ka klədanaghata kuni ta Yawe ta mbəha lfiɗa nimaya. 17 Ka hlanakta kuni mintgha ghuni ta buradi his ŋa vlihata nda ma zukwaŋta. Ka magata kuni ta inda tumbura tsa buradi ya nda kiluʼa hpu kəzlitit hkən hkən, laɓata ni guli nda is. Tsaya dzaʼa nzakway ka mayak faghu lu ŋa Yawe ma taŋtaŋa ndəhatá skwi ta vwah. 18 Ka vlata kuni kawadaga nda tsa buradi ya ta slaɓalakwa maŋazakha ndəfáŋ kul haɗ maslivinza ta həŋ, ya turtuk turtuk vakwa taŋ, nda lghəŋ dɓakwa, nda maŋazakha his ŋa pla ghəŋ ŋa dray tsuh tsuh ŋa Yawe, kawadaga nda mbəha nimaya taŋ, nda ima inabi ŋa slranata. Nda nza tsaya ka skwa pla ghəŋ draf lu ta vu ŋa ɗa, ka skwa pla ghəŋ zɗəgana həlata ni ta Yawe. 19 Ka vlata kuni guli ta dugzum ŋa pla ghəŋ ŋa ɗawa pla dmaku, nda slaɓalakwa maŋazakha his turtuk turtuk vakwa taŋ ŋa pla ghəŋa zɗaku. 20 Ka zuzukwaŋta mnda dra skwi ŋa Lazglafta ta tsa slaɓalakwa maŋazakha his ya, kawadaga nda burada taŋtaŋa ndəhatá nimaya, ka mbəhu ta kəma Yawe. Nda fa tsa skwiha ya ka ŋa Yawe, tsaya mayaka mnda dra skwi ŋa Lazglafta. 21 Baɗ va tsaya, dzaʼa mnay kazlay na dzaʼa mamu kuni nda guyatá ghəŋ nda ghuɓa kəʼa. Haɗ kuni dzaʼa maga dər wati ma slna baɗ tsa fitik ya, manda ya snu kuni ta magay wa. Ka snata kuni ta tsa zlahu ya ŋa ɗekɗek ha ma zivira ghuni ma inda vli dzaʼa nzata kuni.

22 Ma tskay ghuni ta skwi ta vwah ma haɗika ghuni, haɗ kuni dzaʼa nekwaftá tskata ha kɗavakta mukuma vwaha ghuni wu, haɗ kuni dzaʼa tskaftá ya dzaʼa paɗata ŋa vanay wa. Dzaʼa zlanaŋ zla kuni ta inda tsaha ya ta gwal ka pɗu, nda la mayəm ma səla ghuni. Iʼi ná, Yawe yu, Lazglafta ghuni, » kaʼa.

Skala rfa vya duli

23 Ka Yawe nda Musa mantsa: 24 « Mnana mna ta la Israʼila, ka ka nda həŋ na: Nda nza taŋtaŋa fitik ma tila mandəfáŋ ka fitika mbiʼa vgha ghuni dar dar, dzaʼa mamu kuni nda guyatá ghəŋ nda ghuɓa, dzaʼa havu lu nda vaya duli. 25 Yaha kuni da maga dər wati ma slna snu kuni ta magay baɗ tsa fitik ya. Ka vlaŋta kuni ta Yawe ta skwa pla ghəŋ draf lu ta vu, » kaʼa.

Fitika slərɓa zughu

26 Ka Yawe nda Musa mantsa: 27 « Nda nza maghwaŋa fitik ma tila mandəfáŋ ka fitika slərɓaptá zughu. Dzaʼa mamu kuni nda guyatá ghəŋ nda ghuɓa. Ka hanaganata kuni ta ghəŋ, ka plata kuni ta ghəŋ ka draftá ta vu ŋa Yawe. 28 Yaha kuni da maga dər wati ma slna baɗ tsa fitik ya, kabga nda nza ka fitik ŋa slərɓaptá zughu, fitika slərɓaghunaptá zughu ta kəma Yawe, Lazglafta ghuni. 29 Dər wati ma mndu dzaʼa kwalaghutá hanaganatá ghəŋ baɗ tsaya, dzaʼa kliŋ kla lu mataba mnduha ni. 30 Dər wati ma mndu dzaʼa ksaŋtá slna baɗ tsaya ná, vərɗa iʼi ka ghəŋa ɗa dzaʼa zaɗanata mataba mnduha ni. 31 Yaha kuni da maga dər wati ma slna. Nda nza ka zlahu ŋa ɗekɗek ŋa inda zivirha ghuni ŋa ŋanata ghuni ma inda vliha dzaʼa nzata kuni. 32 Nda nza tsa fitik ya ka Sabat, fitika mbiʼa vgha ghuni dar dar, ŋa hanaganata ghuni ta ghəŋ. Zlrafta ga hawu baɗ matəmbaya fitik ma tsa tili ya, ha ga hawu ga mahtsima ni, ka ŋanata kuni ta Sabata ghuni, » kaʼa.

Skala dumbi

33 Ka Yawe nda Musa mantsa: 34 « Mnana mna ta la Israʼila, ka ka nda həŋ na: Baɗ maghwaŋpəɗ hutafa fitik ma tsa tila mandəfáŋ ya dzaʼa zlrafta lu ta skala dumbi ŋa Yawe. Dzaʼa skalay lu ta tsa skalu ya ha fitik ndəfáŋ. 35 Baɗ taŋtaŋa fitika tsa skalu ya, dzaʼa mamu kuni nda guyatá ghəŋ nda ghuɓa. Yaha kuni da maga dər wati ma slna manda ya snu kuni ta magay. 36 Ma tsa fitikha ndəfáŋ ya, ka valata kuni ta pla ghəŋ ŋa dray ta vu ŋa Yawe. Baɗ matghasa fitik dzaʼa mamu kuni nda guyatá ghəŋ nda ghuɓa, ka vlaŋta kuni ta Yawe ta pla ghəŋ ŋa dray ta vu. Tsaya tska vgha dagala, yaha kuni da maga dər wati ma slna manda ya snu kuni ta magay.

37 Tsaha ya skaluha tsaf lu ŋa Yawe, dzaʼa kuni mnay kazlay na dzaʼa mamu kuni nda guyatá ghəŋ nda ghuɓa kəʼa, ŋa vlay ghuni ta pla ghəŋha ŋa dray ta vu ŋa Yawe: Skwa pla ghəŋha ŋa dray tsuh tsuh, nda mbəha nimaya, nda pla ghəŋha zɗaku, nda mbəhuha ŋa slranata manda ya mnaf lu ŋa magay nda fitika ni nda fitika ni. 38 Tsa skaluha ya ná, sganaghata ta ghəŋa Sabatha Yawe ya. Tsa pla ghəŋha ya guli ná, sganaghata ta ghəŋa mbəhuha ghuni, nda pla ghəŋha ghuni ŋa hɗamta skwi waɗa kuni ta magay, nda mbəhuha nda kumaŋta ŋuɗufa ghuni, vlaŋ kuni ta Yawe ya.

39 Skwi ŋa havakta ghuni ná, baɗ maghwaŋpəɗ hutafa fitik ma tila mandəfáŋ, kɗiŋər kuni ta tskatá skwi ta vwah ya, ka zlrafta kuni ta skala dumbi ŋa Yawe ha fitik ndəfáŋ. Baɗ taŋtaŋa fitik nda ya baɗ matghasa fitika tsa skalu ya, dzaʼa mbiʼapta lu ta mbiʼa vgha dar dar. 40 Baɗ taŋtaŋa fitik, dzaʼa ɗaga ɗaga kuni ta yakwa fuha ɗina ɗina, nda dzva zlizlam, nda zligama fuha ka sluhwa dzeʼdzeʼ, ka fuha ta wa lika a tsi, ka rfay ghuni ta rfu ta kəma Yawe, Lazglafta ghuni ka fitik ndəfáŋ. 41 Ka skala kuni ta tsa skalu ya ŋa Yawe ka fitik ndəfáŋ inda vaku ma tila mandəfáŋ. Nda nza tsaya ka skwi ŋa magay ghuni ŋa ɗekɗek ha ma zivira ghuni. 42 Ma tsa fitikha ndəfáŋ ta skalu lu ta tsa skalu ya ná, ma dumbi dzaʼa nzanzamta kuni. Dzaʼa nzanzamta ma dumbi kaghuni la Israʼila, 43 ŋa snaŋta zivira ghuni ta kəma kazlay si fa fam fa fa yu ta la Israʼila ma dumbi ma fitika hlagapta ɗa ta həŋ ma haɗika Masar kəʼa. Iʼi ná, Yawe yu, Lazglafta ghuni, » kaʼa.

44 Mantsa ya snanamta Musa ta gwaɗa ta ghəŋa skaluha Yawe ta la Israʼila.