La Levi 24

Sundula pitirla

1 Ka Yawe nda Musa mantsa: 2 « Mnanaf mna ta la Israʼila ka hlaghakta həŋ ta ɗitsatá rɗa zaytuŋ ghenen ŋa tsaftá vu ta pitirla ŋa gɗata ni ta zlghakwa inda fitik. 3 Ka payanata Haruna ta tsa pitirla ya ma tumpula guyaku nda ta kəma tsa zlala ta mbuŋtá akwata dzratá wi ya, ŋa gɗata tsa pitirla ya ta zləghaku ta kəma Yawe daga ga hawu ha ka labi ta sərɗək. Nda nza tsaya ka zlahu ŋa ɗekɗek ha ma zivira ghuni. 4 Ka gɗata tsi ta payanatá tsa pitirlaha ta sundula ni ka dasu ghenen ya ta kəma Yawe, » kaʼa.

Gatuha fana lu ta Yawe

5 Ka Yawe nda Musa mantsa: « Tsəɗaʼa tsəɗa ta hpu kəzlitit ka data ka ta gatu ghwaŋpəɗ his ka kiluʼ mkuʼ mkuʼ. 6 Ka dzarafta ka ta ndər his mkuʼ mkuʼ ta tabəl ka dasu ghenen ta kəma Yawe. 7 Ka kuktafta ka ta urdi ta drə lu nda dra ghenen ta inda ndər, ka drafta ka ta vu da manaka buradi ta kuraghuta ya ka havu ŋa Yawe. 8 Inda Sabat ya, ka gɗata lu ta dzarafta ta kəma Yawe da manaka la Israʼila. Tkweʼ tsaya ka magay ma dzratá wi nda Yawe ŋa ɗekɗek. 9 Dzaʼa nzakway tsa gatuha ya ka ŋa i Haruna nda zwana ni. Ma sana vli nda ghuɓa dzaʼa zuta həŋ, kabga nda nza ka skwi ta ghuɓuta klap lu ma skwa pla ghəŋ ŋa dray ta vu ŋa Yawe. Tsaya tva skwi ŋa gɗata ta magay ŋa ɗekɗek, » kaʼa.

Guma ta ghəŋa mndu ta razanaftá hga Lazglafta

10 Ma sana fitik, ka sab sana mndu mataba la Israʼila. Makwata Israʼila ma ni, la Masar da ni. Ka zlərɗaftá tsi ta wi ma ghuɓu nda sana mnda la Israʼila. 11 Ka razatá tsa zwaŋa makwata Israʼila ya ta hga Lazglafta ka ksiʼay. Ka kladaghatá lu da Musa. Səlumit hga ma ni, makwa Divri ma mndəra la Daŋ. 12 Ka hbanatá lu ɗina ka nghay, ka kəzla skwi dzaʼa mnafta Yawe ŋa maganata.

13 Ka Yawe nda Musa tama mantsa: 14 « Kligiŋ tsa mndu ta razata iʼi ya ma ghuɓu, ka pghafta inda gwal ta snaŋtá tsa razu raza tsi ya ta dzvuha taŋ ta ghəŋa ni, ka zlərtsata inda guyatá ghəŋa la Israʼila. 15 Ka ka dzaʼazlay nda la Israʼila tama mantsa: Dər wa ta razatá Lazglafta ni, dguv ta ghəŋa ni dmakwa ni. 16 Dər wati ma mndu ta razata hga Yawe ná, dzata kahwathwata. Inda guyatá ghəŋa mnduha dzaʼa zlərtsatá nda pala. Dər má mayəm tsi, dər má zwaŋa haɗik a tsi, dzaʼa dza dza lu kabga vəl razata ni ta hga Lazglafta.

17 Ka dza dza mndu ta mndu, dzatá ta tsatsi guli. 18 Ka dzanaghu dza mndu ta rina mndu, vranamta ni nda ya ta nda hafu. Hafu ŋa pla hafu.

19 Ka balana bala mndu ta sana mndu, maganatá tsatsi guli manda va tsaya: 20 Ɓlaku ŋa pla ɓlaku, iri ŋa pla iri, sliʼiŋ ŋa pla sliʼiŋ. Ka wati balaku maga tsatsi ya, tsaya dzaʼa maganata lu guli ta tsatsi. 21 Ka dzanaghu dza mndu ta rini, vranamta ni, ama ka dza dza mndu ta mndu, dzatá tsatsi guli. 22 Ka skwa turtuk zlaha ghuni, dər nda zwana haɗik tani dər nda mayəmha ta nzakw ma səla ghuni tani, kabga iʼi Yawe, Lazglafta ghuni, » kaʼa.

23 Ka rusanaftá Musa ta tsa gwaɗaha ya ta la Israʼila. Ka kligiŋtá həŋ ma ghuɓu ta tsa mndu ta razatá hga Lazglafta ya, ka zlərtsatá həŋ nda pala. Mantsa ya magata la Israʼila ta skwi ya mnanaf Yawe ta Musa.