Vakwa mbiʼa vgha haɗik
25
1 Ka mnanatá Yawe ta Musa ta ghwá Sinay. Kaʼa mantsa: 2 « Mnana mna ta la Israʼila, ka ka nda həŋ na: Lama ghuni da tsa haɗik dzaʼa vlaghunata yu ya ná, dzaʼa mbiʼanap mbiʼa kuni ta vgha ta haɗik ŋa nzakwa ni ka Sabat ŋa Yawe. 3 Ma vaku mkuʼ ya, sləgay ghuni ta vwaha ghuni, slaɗay ghuni ta fwa inabiha ghuni ka ɗaga yakwa taŋ. 4 Ama mandəfáŋa vaku ya, Sabat tsaya, vakwa mbiʼa vgha haɗik dar dar ŋa Yawe. Sləgəta a kuni ta vwaha ghuni wu, slaɗafta a kuni ta fwa inabiha ghuni wa. 5 Tskəta a kuni ta mandawasa nimaya wu, ɗagəta a kuni ta yakwa fwa inabi kul slaɗaftá lu wa. Nda nza ka vakwa mbiʼa vgha ŋa haɗik dar dar. 6 Ma tsa vakwa Sabata ni ya ná, dzaʼa laviŋ lava kuni ta za skwi dzaʼa vlaghunata haɗik, ka ghuni, nda kwalvaha ghuni, nda kurɗuha ghuni, nda gwal ta planata kuni ta nisəla, nda matbayha ga ghuni, 7 nda rina ghuni, nda nimtak ta haɗika ghuni. Dzaʼa nzakway inda mandawas ka gandawaz. »Vakwa plata vgha
8 « Ka mbəɗafta kuni ta vakwa Sabatha ndəfáŋ, vaku ndəfáŋ ndəfáŋ səla. Tsaya ta klaftá vakuha fwaɗ mbsak təmbay mida. 9 Baɗ maghwaŋa fitik ma tila mandəfáŋ ta nzakway ka fitika slərɓaptá zughu ya, ka vya kuni nda mbraku ta dula maŋazak ta inda haɗika ghuni. 10 Mantsa, ka fata kuni ŋa Yawe ta tsa mahutaf mbsaka vaku ya ka vaku nda ghuɓa, ka mna kuni baŋluwa ta platá vgha inda mnduha ta haɗika ghuni. Dzaʼa nzakway tsa vaku ya ka vakwa plata vgha. Dzaʼa vrəglaf vra dər wa ta haɗika dzidza ni, dər wa ta uʼa taŋ. 11 Dzaʼa nzakway mahutaf mbsaka vaku ka ŋa ghuni ka vakwa plata vgha. Haɗ kuni dzaʼa sləgu wu, tskəta a kuni ta mandawasa ta vwah wu, ɗagta a kuni ta yakwa fwa inabi kul slaɗaftá lu wa. 12 Tsa vakwa plata vgha ya ná, dzaʼa nghay kuni ka skwi nda ghuɓa. Dzaʼa zay kuni ta mandawasa ta ɗyafta ma vwah.
13 Ma tsa vakwa plata vgha ya, dzaʼa vrəglaf vra dər wa ta haɗika dzidza ni. 14 Ka skwanap skwa kuni ta vli ta la ghuni, ka skwa nda skwa a kuni da sani, yaha sani da nənɓaptá sani. 15 Ta sku kuni, ka ta skwaptá kuni a tsi ya, ka ndanapta kuni ta vakuha ta laghwi, zlrafta ta vakwa plata vgha, ka mbəɗafta kuni ta vakuha dzaʼa kəl lu ka hvay ta kəma, ha ka lagha ta vakwa plata vgha ta sagha. 16 Ka ta dagala pɗakwa vaku, ŋulum dzva ni. Ka ta kiʼa yeya tsi, degetsa dzva ni, kabga ta vakuha ta hvay dzaʼa skwa kuni. 17 Yaha dər wa da nənɓaptá la taŋ, zləŋawa Lazglafta ghuni, kabga iʼi Yawe ná, Lazglafta ghuni yu.
18 Ka snata kuni ta zlahuha ɗa nda tva skwiha ŋa magay ya mnaghunaf yu. Ka ŋanata kuni ta həŋ kada nzata kuni ləŋləŋ ta haɗika ghuni. 19 Dzaʼa magaku skwa zay ta haɗik, ŋa zay ghuni ka baghaku, ŋa nzay ghuni ta nzakw ləŋləŋ.
20 Kawayaka skwi dzaʼa mnay kuni kazlay: “Ka slgəta a ŋni ta slgu, tskəta a ŋni ta skwi ta vwah ya wu ní, nahgani dzaʼa ŋni zay ta mandəfáŋa vaku na?” kəʼa. 21 Snawa ɓa! Dzaʼa fanagha fa yu ta gasifa ta mamkuʼ a vaku, ŋa ŋwakwa skwa zay biti tsa ka ŋa vakuha hkən. 22 Ta matghasa vaku, dzaʼa slgəgəl slga kuni ta slgu, ŋa va zay ghuni ta vava ha ka tskatá skwi ta matəmbaya vaku. »
Varaktá haɗik nda həga
23 « Skwapta a kuni ta haɗik ŋa ɗekɗek wu, kabga ŋa ɗa haɗik, ka mayəm, nda matbay kaghuni ta nzakw ga ini. 24 Ma inda haɗik ya dzaʼa kuni mutsafta ná, sladanawa skwi ya dzaʼa kəl mndu ka vara haɗika ni.
25 Ka nuna sani ma kaghuni ka pɗu dgər, ka skwanaghutá tsi ta haɗika ni, lagha sani ta uʼa taŋ hɗeka raŋ varata da varatá tsa skwi skwap tsi ya. 26 Ka haɗ mndu raŋ varay wu katsi, sən tsa ka dzaʼa mutsay tsatsi ka ghəŋa ni ta skwi ŋa varay katsi, 27 mbəɗafta ni ta vakuha zlrafta ta fitika skwata, ka vranavata pɗakwa ni ta mndu ta skwata, ŋa varagaghuta ni ta haɗika ni. 28 Ala, ka haɗ skwa ni ŋa varata wu, nzakwa tsa haɗik ya ma dzva tsa mndu ta skwata ya, ha ka lagha ta vakwa plata vgha. Ma tsa vaku ya, dzaʼa vranava vra lu ta skwa ni ŋa nzəglakwa ni ka ŋa ni.
29 Ka skwap skwa mndu ta həga ta nzakway ma huɗa luwa ŋam lu ma matsak, dzaʼa laviŋ lava ta varata ma vaku turtuk manda skwapta. Ma tsa vaku turtuk ya dzaʼa laviŋta tsi ta varay. 30 Ka vara a lu ta tsa həga ma luwa ya ma hɗatá tsa vaku turtuk ya wu katsi, nda nza tsa həga ya ka ŋa tsa mndu ta skwata ya nda zivira ni tani, haɗ lu dzaʼa vranavatá tsa mndu si nda həga ni ya ma vakwa plata vgha wa. 31 Ama həgaha ma zwana luwa kul ŋamta lu ya, dzaʼa mbəɗ mista vli ma mtak lu ta tsaha ya. Laviŋ lava lu ta varay dər nzəɗava nzəɗa tsi. Ta vranava vra lu mnda ni ma vakwa plata vgha. 32 Nziya nza tsi, laviŋ lava la Levi ta vara həgaha taŋ dər yawu tsi ma luwa taŋ. 33 Ka skwap skwa sani ma la Levi ta həga ni ma luwa, ka trapta tsi ta varata, dzaʼa vranava vra lu ma vakwa plata vgha, kabga həga la Levi mataba la Israʼila ná, nda nza ka ŋa taŋ ŋa ɗekɗekª. 34 Vla ngha rini ta wawanafta luwaha taŋ ya, haɗ lu dzaʼa skwapta wu, kabga nda nza ka ŋa taŋ ŋa ɗekɗek. »
Kataŋtá gwal ka pɗu
35 « Ka ksu ksa pɗu ta zwaŋama ghuni haɗ skwa ni ɗekɗek ŋa katá ghəŋa ni wu, katanata ghuni, manda ya ta laviŋta lu ta katanatá mayəm ka matbay a tsi ma səla ghuni ya, kada nzata tsi ta vata kaghuni. 36 Yaha kuni da ɗawa imi ta ghəŋa ni ŋa psa ndeli. Ama zləŋawa ta Lazglafta ghuni, ka zlaŋta kuni ta zwaŋama ghuni, kada nzata tsi ta vata kaghuni. 37 Ka ɓlanaf ɓla kuni ta nzawa tsedi, ma ɗaw kuni ta imi ta ghəŋa ni. Ka klanaf kla kuni ta zimi ka kanay, ma zbə kuni ta ndeli ta ghəŋa ni. 38 Iʼi ná, Yawe, Lazglafta ghuni yu ta hlagaghunapta ma haɗika Masar, ŋa vlaghunata haɗika Kanʼana, ŋa nzakwa ɗa guli ka Lazglafta ghuni. »
Tva vara ghəŋ
39 « Ka nuna zwaŋama ghuni ka pɗu dgər, ka skwaghunaptá tsi ta ghəŋa ni, ma fam kuni da slna ga vuʼa. 40 Ama ka nza tsi ga ghuni manda mndu ta maga slna tsedi, ka manda mndu ta lagha za matbay a tsi. Dzaʼa magaghuna maga ta slna ha ka sagha vakwa plata vgha. 41 Ma tsa fitik ya, dzaʼa sab sa ga ghuni nda plata vgha ni tsatsi nda zwana ni tani, ŋa vraghuta ni da uʼa taŋ, ka vraghuta ta haɗika dzidza taŋ. 42 Haɗ lu dzaʼa dzawaptá la Israʼila ka vuʼa wu, kabga kwalva ɗa hahəŋ, gwal hlagap yu ta haɗika Masar. 43 Yaha kuni da nzanaghatá həŋ ka dula həŋ, ama ka zləŋa kuni ta Lazglafta ghuni. 44 Ama ka ta kumay kuni ta vuʼaha nda kurɗuha ya, skway ghuni mataba mndəra mnduha ta waghunafta. 45 Dzaʼa laviŋ lava kuni guli ta skwaktá vuʼa mataba la matbayha ta nzakw ma səla ghuni, ka gwal ta uʼa taŋ ta yayata ta haɗika ghuni a tsi. Tsaha ya dzaʼa nzakway ka ŋa ghuni. 46 Dzaʼa laviŋ lava kuni ta niŋtá həŋ ka skwa za həga zwana ghuni, ŋa nzakwa taŋ ka ŋa taŋ. Dzaʼa nzakway həŋ ka vuʼa ghuni ŋa ɗekɗek. Ama zwana ma ghuni la Israʼila ya ná, yaha sani ma kaghuni da dulay.
47 Ka nuna mayəm ka matbay a tsi ma səla ghuni ka gadghəl, ama ta nutá zwaŋama ghuni mnda Israʼila ka pɗu ta vata ni, ka skwanaptá tsi ta ghəŋa ni ta tsa mayəm ka matbay ya, ka ta sana mndu ta uʼa tsa mayəm ya a tsi, 48 dzaʼa mamu tvi ŋa varatá tsa mnda la Israʼila ya dər tahula skwapta ni ta ghəŋa ni. Sani mataba zwana ma ni raŋ varay dzaʼa varakta: 49 Dər dasliʼiŋa ni tsi, dər zwaŋa dasliʼiŋa ni a tsi, dər sani ta uʼa taŋ a tsi ta varata. Ka mutsaf mutsa vərɗa tsatsi guli ta tseda ni, laviŋ lava ta varatá ghəŋa ni. 50 Tsatsi, nda tsa mndu ta skwata ya, dzaʼa mbəɗaftá mbsaka vaku mataba vaku kəl lu ka skwapta nda vakwa plata vgha. Dzva tsa tsedi ŋa play ya ná, ta mbsaka tsa vakwa ni ya dzaʼa nzakwa tsi. Taɓta tseda vakwa mndu ta vaghay ta maga slna dzaʼa mbəɗafta lu. 51 Ka ta dagala pɗakwa vaku kada lagha ta vakwa plata vgha katsi, ŋa vara ghəŋa ni ná, mal ya dzaʼa vranavata tsi ta daŋahəga ni ma tsedi ya skwap tsi ta ghəŋa ni. 52 Ama ka ta sira a pɗakwa vakwa plata vgha wu, mbəɗafta ni ta tsa vakuha ta pɗaku ya, ka vranavata ni ta daŋahəga ni ta tseda vara ghəŋa ni. 53 Dzaʼa nza nza tsa mnda la Israʼila ya ga tsa mayəm ya manda mndu ta maga slna tsedi ŋa ni ma vaku ma vaku. Haɗ lu dzaʼa zlanaŋtá tvi ta daŋahəga ni ŋa dulay ni ta zwaŋama ghuni wa. 54 Ka mataba tsa tviha ya, mutsaf a lu ta varata wu katsi, dzaʼa sab sa flauʼ, tsatsi nda zwana ni ta vakwa plata vgha. 55 La Israʼila ná, kwalvaha ɗa həŋ, kwalvaha ɗa hlagap yu ma haɗika Masar həŋ. Iʼi ná, Yawe yu, Lazglafta ghuni, » kaʼa.