Tfa wa Lazglafta ŋa gwal ta snatá gwaɗa ni
26
1 Ka Yawe mantsa: « Ma tsatsaf kuni ŋa ghəŋa ghuni ta skwa wuyayha kul haɗ hayhaya taŋ. Ma sladana kuni ta fiɗatá fwata skwi dər skwi dguma a tsi. Ma dzagwa kuni ta fifiɗata palaha ta haɗika ghuni ŋa tsəlɓay ghuni ta tsəlɓu ta kəma taŋ, kabga iʼi Yawe ná, Lazglafta ghuni yu. 2 Ka ŋanata kuni ta sabatha ɗa. Ka vlaŋta kuni ta sgit ta vla nzakwa ɗa nda ghuɓa. Iʼi ná, Yawe yu.3 Ka ŋana ŋa kuni ta zlahuha ɗa, ŋana ŋa kuni ta tva skwiha ŋa magay ya mnaghunaf yu ka snata katsi, 4 dzaʼa nzəgaghuna nza yu ta imi nda fitika ni, ŋa magakwa nimaya ta haɗik, ŋa yakwa fuha ma mtak. 5 Dzaʼa nzəɗava nzəɗa kuni ta ɗəgu ha ka lagha ta fitika ɗaga yakwa inabiª, ŋa va ɗagay ghuni ka lagha ta fitika sləgu. Dzaʼa zay kuni ta skwa zay ka baghaku, ŋa nzay ghuni ta nzakwa ghuni ləŋləŋ ma haɗika ghuni.
6 Dzaʼa vlaghuna vla yu ta nzakw ləŋləŋ ta haɗika ghuni. Ta han kuni ta hani ya, haɗ skwi dzaʼa gərzla hana ghuni wa. Dzaʼa hliŋ hla yu ta tsuɗay ta haɗika ghuni. Haɗ kafaya ghuma ghuni dzaʼa lagha ta haɗika ghuni wa. 7 Dzaʼa ghəzlaf ghəzla kuni ta ghumaha ghuni, ka dzudzuɓanatá həŋ nda kafay. 8 Mnduha ghuni hutaf dzaʼa ghəzlaftá ghumaha dərmək. Mnduha ghuni dərmək dzaʼa ghəzlaftá ghumaha dəmbuʼ ghwaŋ, ka dzudzuɓanatá həŋ nda kafay.
9 Dzaʼa nghap ngha yu ka kaghuni. Dzaʼa yaghunaf ya yu tusak. Dzaʼa ŋana ŋa yu ta dzratá wa ɗa nda kaghuni*. 10 Dzaʼa zay kuni ta vava zimi, ha ŋa tigiŋta ghuni ka pgha lfiɗa ni. 11 Dzaʼa fa fa yu ta həga tumpula ɗa mataba ghuni, haɗ kuni dzaʼa husihata wa*. 12 Dzaʼa gɗava gɗa yu kawadaga nda kaghuni, ŋa nzakwa ɗa ka Lazglafta ghuni, ta nzakw kaghuni ka mnduha ɗa. 13 Iʼi ná, Yawe yu, Lazglafta ghuni. Iʼi ta hlagaghunapta ma haɗika Masar, kada kwala kuni ta gəgəltá vuʼa taŋ. Ɓliŋ ɓla yu ta tsa udza sla faghunam həŋ ma ŋurzluŋ ya, ka vlaghunatá yu ta mbaɗay ghuni ta mbaɗa nda klatá ghəŋ. »
Guma Lazglafta ŋa gwal kul snatá gwaɗa
14 « Ama ka sniha a kuni ta gwaɗa ɗa wu, ksa a kuni ta slna nda inda tsa zlahuha ya wu, 15 ka ta pghiŋ pgha kuni ta tva skwi ŋa magay, ka ta husaghuna husa zlahuha ɗa, ka maga a kuni ta slna nda inda gwaɗaha mnaghunaf yu wu, ka ɓlanap ɓla kuni ta dzratá wa ɗa nda kaghuni katsi, 16 wya skwi dzaʼa yu magaghunata: Dzaʼa ghunaghunak ghuna yu ta zləŋ, nda ɗaŋwaha ɗizi, nda ŋuɗidar ŋa kwala ghuni nghaŋtá vli ɗina, ŋa nzakwa ghuni hulepeteʼ. Dzaʼa slgaf slga kuni ta vwaha ghuni, ŋa nzakwa ni ka slna mbalay, kabga ghumaha ghuni dzaʼa zuta. 17 Dzaʼa lighunis la yu, ŋa zata ghumaha ghuni ta kaghuni. Dzaʼa nzaghunagha nza gwal ta husaŋta kuni ta həŋ. Dzaʼa kakafaku kuni ka hwaya dər haɗ mndu ta ghəzla kaghuni.
18 Kulam nda tsa, ka ta sniha a kuni wu katsi, dzaʼa sganagha sga yu ta va nzisla kaghuni ndəfáŋ səla ta ghəŋa dmakwa ghuni. 19 Dzaʼa ɓlanap ɓla yu ta tsa mbrakwa ghuni ta ghərɓu kuni ya. Dzaʼa ghwaliŋ ghwala yu ta luwa ta ghəŋa ghuni manda kfur ŋa kwala imi nzaku, ŋa təŋuta haɗika ghuni manda ghuva tili. 20 Dzaʼa hərfaku kuni ta maga slna ka mbalay, haɗ skwi dzaʼa magəglaku ta vwaha ghuni wu, haɗ fuha dzaʼa yəglaku guli wa.
21 Ka ta kɗaŋ kɗa kuni ta dza kuma nda iʼi, ka kwalaghutá sna gwaɗa da iʼi, dzaʼa sganagha sga yu guli ta va nzisla kaghuni ndəfáŋ səla taɓta dmakwa ghuni. 22 Dzaʼa ghungaghunagha ghuna yu ta nimtak, ŋa dgaghunata nda zwana ghuni, ŋa zaɗay taŋ ta rina ghuni, ŋa htaghunakta, ŋa nuta tviha ghuni ka zivak.
23 Ka ta zlahaɗif a tsa skwiha ya ta kaghuni wu, ka tata dza kuma kuni nda iʼi katsi, 24 iʼi guli, dzaʼa dzay yu ta kuma nda kaghuni, ka ghuzlaghunap ta iri ndəfáŋ səla dabga dmakwa ghuni. 25 Dzaʼa ghungaghunagha ghuna yu ta kafay ŋa plamta dzratá wa ɗa nda kaghuni ɓlanap kuni. Ɗifaghu kuni ma luwa ghuni, dzaʼa ghundaghunagha ghuna yu ta zləmnda ŋa vlatá kaghuni ma dzva ghumaha ghuni. 26 Ma htiŋta ɗa ta skwa zaya ghuni, dzaʼa day miʼaha ghwaŋ ta skwa zay ma litika turtuk, ŋa neʼaghunafta taŋ nda neʼa. Dzaʼa zay kuni mndani, ama baghaghunafta a wa.
27 Kulam nda tsaya ka ta snəgla a kuni wu, ka tata kɗaŋ kɗa kuni ta dza kuma nda iʼi, 28 iʼi guli dzaʼa dzay yu ta kuma nda kaghuni, dzaʼa ghuzlaghunap ghuzla yu ta iri ndəfáŋ səla dabga dmakwa ghuni. 29 Dzaʼa zay kuni ta sluʼa zwana ghuni, nda ŋa kwagha ghuni dabga maya. 30 Dzaʼa zaɗana zaɗa yu ta inda vla wuya skwa ghuni tskal tskala. Dzaʼa dzaɓiŋ dzaɓa yu ta gwirha urda ghuni. Dzaʼa babana baba yu ta mbliha ghuni ta skwa wuyayha ghuni kul haɗ hafu ma həŋ. Dzaʼa mbiɗay yu ta kaghuni. 31 Dzaʼa niŋ na yu ta luwa ghuni ka kufik, ŋa zaɗanata ɗa ta vliha ghuni nda ghuɓa. Haɗ yu dzaʼa tsuʼuglaftá ta skwi həlhəla ta drafta kuni ŋa ɗa wa. 32 Dzaʼa niŋ na vərɗa iʼi ta haɗika ghuni ka zivak ha ŋa ndraʼuway ghumaha ghuni dzaʼa nzata mida. 33 Kaghuni, dzaʼa wutsighunis wutsa yu ma səla mndəra sanlaha ma mnduha, ŋa zbighunista ɗa nda tsəhata kafay, ŋa nuta haɗika ghuni ka zivak, nuha luwaha ghuni ka kufik.
34 Mantsa ya tama, dzaʼa vranam vra haɗika ghuni ta vakuha Sabat ma tsa fitik dzaʼa nzata tsi husam, ma tsa nzakwa kaghuni ta haɗika ghumaha ghuni ya. Mantsa tama dzaʼa mbiʼap mbiʼa haɗika ghuni ta vgha, ka vranamtá vakuha Sabata ni. 35 Ma tsa fitika nzakwa ni husam ya, dzaʼa mutsa tsi ta mbiʼa vgha, tsa vakuha Sabat kul mutsaftá tsi ma tsa fitika nzakwa ghuni mida ya.
36 Gwal dzaʼa pɗaku, ka gɗavata ta haɗika ghumaha ghuni ya ná, dzaʼa pgham pgha yu ta ghəŋ da zləŋ katakata, ŋa tsakwa ŋuɗufa taŋ. Dər sluhwa yeya ta hwahwasavata, dzaʼa hwaya həŋ manda ya ta hway lu ta kafay, ŋa zlambakwa taŋ dər haɗ mndu ta ghəzla həŋ. 37 Dzaʼa zlambaku mnduha sani ta sani manda hwaya ta hway lu ta kəma ghuma nda kafay, dər haɗ mndu ta ghəzla həŋ. Haɗ kuni dzaʼa ŋaŋta da ghumaha ghuni wa. 38 Dzaʼa rwaku kuni mataba mndəra sanlaha ma mnduha. Dzaʼa zuza haɗika ghumaha ghuni ta kaghuni. 39 Dzaʼa ziʼu ziʼa inda gwal dzaʼa pɗaku mataba ghuni ta haɗika ghumaha ghuni tata hafu ta hafu ka rwuta dabga dmakwa taŋ, nda ya dabga dmakwa dzidzíha taŋ. »
Havay Lazglafta ta dzratá wa ni nda la Israʼila
40 « Dzaʼa mnigiŋ mna həŋ ta dmakuha taŋ, nda ŋa dzidzíha taŋ, ya ká həŋ ɓlanaptá zlahuha ɗa nda ya ka həŋ dzaŋtá kəma nda iʼi. 41 Tsaya kəl iʼi guli ka dzaŋtá kuma nda həŋ, ka hlaghatá həŋ ta haɗika ghumaha taŋ. Ka hanagana hana həŋ ta təŋata ghəŋa taŋ, ka tsuʼaftá tsanaghatá guma nda tva ni ta krughuva taŋ katsi, 42 dzaʼa havak hava yu ta dzratá wa ɗa nda Yakubu, nda Izak, nda Abraham, ŋa havapta ɗa guli ka haɗika taŋ. 43 Dzaʼa zlana zla həŋ ta haɗik ŋa vranamta ni ta vakuha Sabata ni, ma tsa nzakwa ni husam kul haɗ mndu ya. Dzaʼa pla pla həŋ ta bika krughuva taŋ, kabga vziŋta taŋ ta tva skwiha ŋa magay ya mnanaf yu ta həŋ, ka mbiɗatá həŋ ta zlahuha ɗa. 44 Kulam nda va tsaya, haɗ yu dzaʼa vziŋta həŋ wu, mbiɗata a yu ta həŋ ha ka zaɗanatá həŋ nekwnekw ma nzakwa taŋ ta haɗika ghumaha taŋ ya wa. Haɗ yu dzaʼa ɓlanapta dzratá wa ɗa nda həŋ wu, kabga iʼi Yawe, Lazglafta taŋ. 45 Dabga hahəŋ, dzaʼa havap hava yu ka dzratá wa ɗa nda dzidzíha taŋ ya hlagap yu ma haɗika Masar ta wa ira mndəra sanlaha ma mnduha, ŋa nzakwa ɗa ka Lazglafta taŋ. Iʼi ná, Yawe yu, » kaʼa.
46 Tsaha ya zlahuha, nda tva skwiha ŋa magay, nda tagha skwiha pgha Yawe mataba ni nda la Israʼila nda ma wa Musa ta ghwá Sinay.