Zlahu ta ghəŋa skwi waɗa lu ta vlaŋtá Yawe
27
1 Ka Yawe nda Musa mantsa: 2 « Ka ka nda la Israʼila na: Ka waɗana waɗa mndu ta vlaŋta ni ŋa Yawe ta mnda səla katsi, laviŋ lava ta hɗamta taɓta sgita tsa mnda ni ya. 3 Wya ka lu dzaʼa gra sgita mndu:Zgun ta klaftá imi hisambsak ha ka lagha ta mkuʼ mbsak ya, ka sulay hutaf mbsak dzaʼa nzakwa sgita ni, taɓta ya ka lu ta kura tsedi ma həga nda ghuɓa.
4 Ka marakw tsi, ka sulay hkən mbsak dzaʼa nzakwa sgita ni.
5 Ka zwaŋa zgun ta klaftá imi hutaf ha ka lagha ta hisambsak tsi, ka sulay hisambsak dzaʼa nzakwa sgita ni, sulay ghwaŋ ŋa makwa.
6 Ka zwaŋ ta klaftá tili turtuk ha ka labi ta imi hutaf tsi, ka sulay hutaf dzaʼa nzakwa sgita zwaŋa zgun, ka sulay hkən dzaʼa nzakwa ŋa makwa.
7 Ka mndu ta malaptá imi mkuʼ mbsak tsi, ka sulay ghwaŋpəɗ hutaf dzaʼa nzakwa sgita zgun, sulay ghwaŋ ŋa marakw.
8 Ka ka pɗu dgər mndu, laviŋ a ta platá sgita skwi tsaf lu wu katsi, kladaghatá tsa mndu ya ta kəma mnda dra skwi ŋa Lazglafta, ŋa tsanafta tsaya ta sgita skwi taɓta mbrakwa ni.
9 Ka waɗa waɗa mndu ta mbəhatá Yawe nda rini katsi, nda fa tsa skwi ya nda ghuɓa ka ŋa Yawe. 10 Mbəɗapta a lu ta tsaya nda sani wu, famtá a lu ta ya ɗina da manaka ya kul ɗinaku, dər ya kul ɗinaku da manaka ya ɗina wa. Ama ka kaɗaŋ kaɗa mndu ta mbəɗaptá tsa rini ya katsi, dzaʼa nzakway həŋ his his ka ŋa Yawe.
11 Ka rini ta tsaɗ lu tsi kul laviŋtá lu ta mbəhatá Yawe nda tsi katsi, dzaʼa kladagha kla lu ta kəma mnda dra skwi ŋa Lazglafta. 12 Dzaʼa vitsanava vitsa mnda dra skwi ŋa Lazglafta ta nzakwa ni ka ɗina tsi, ka ɗina a wa tsi ŋa tsafta ni ta sgita ni, ŋa nzakwa ni manda ya dzaʼa tsafta tsi ta sgita ni. 13 Ka ta kumay tsa mndu ta waɗata ya ta varatá skwa ni, plata ni ta sgita ni, sganaghaha ta ghəŋa ni ta ya turtuk ma dagata sgita ni hutaf.
14 Ka həga ni fa mndu ŋa nzakwa ni nda ghuɓa ka ŋa Yawe katsi, vitsanavata mnda dra skwi ŋa Lazglafta ka ɗina tsi ka ɗina a wa tsi, ŋa tsafta ni ta sgita ni taɓta nzakwa tsa həga ya. Ka nu skwi dzaʼa tsafta mnda dra skwi ŋa Lazglafta ya, nda nza manda tsaya. 15 Ka ta kumay tsa mndu ta fatá ya ta varatá həga ni, plata ni ta tsedi ya tsaf lu, sganaghaha ta ghəŋa ni ta turtuk ma dgatá dzva ni hutaf, ŋa nzəglakwa tsa həga ya ka ŋa ni.
16 Ka vwaha ni klanaghu mndu ka fata ŋa nzakwa ni ka ŋa Yawe katsi, dzaʼa tsaf tsa lu ta sgita ni taɓta glakwa hulfa dzaʼa kəl lu ka sləgaftá tsa vwah ya. Sulay hutaf mbsak ta buhwa urz hkən. 17 Ka fa ma vakwa plata vgha tsa mndu ya ta vwaha ni katsi, nda slada tsa dzva ni tsaf lu ya manda va tsaya. 18 Ama ka lula vakwa plata vgha ta fatá tsi ta vwaha ni katsi, dzaʼa tsanaghu tsa mnda dra skwi ŋa Lazglafta ta tseda ni taɓta pɗakwa vakuha ka sagha vakwa plata vgha. 19 Ka ta kumay tsa mndu ta fatá vwaha ni ya ta varata katsi, plata ni ta tsa tseda ni tsaf lu ya, ka sganaghata ni ta ghəŋa ni ta turtuk ma dgatá sgita ni hutaf, ŋa nzəglakwa tsa vwah ya ka ŋa ni. 20 Ka vara a tsi ta tsa vwah ya wu, ka skwanaptá lu ta sana mndu katsi, lavgliŋ a lu ta vargəlta wa. 21 Ma vakwa plata vgha, ŋa nzakwa tsa vwah ya ka ŋa Yawe, ŋa vlaŋtá mnda dra skwi ŋa Lazglafta, manda skwi ya fana lu ŋa ɗekɗek ta Yawe.
22 Ka fa fa mndu ŋa nzakwa ni ka ŋa Yawe ta vwah skwa tsi nda skwa si kul nzakway ka vwaha dzidzí katsi, 23 tsafta mnda dra skwi ŋa Lazglafta ta dzva ni taɓta pɗakwa vakuha ka sagha vakwa plata vgha. Plata tsa mndu ya baɗ va tsaya ta skwi ya tsaf lu, ŋa fata ka ŋa Yawe ta tseda ni. 24 Ma vakwa plata vgha, dzaʼa vru tsa vwah da tsa mndu skwa lu ma dzva ni, si ta nzakway ka mnda vwah ya.
25 Inda sgita skwi ná, taɓta ya ka lu ta kura skwi ma həga nda ghuɓa dzaʼa nzakwa tsi. Ta magay sulay turtuk ta gram ghwaŋpəɗ his. »
Mbəhuha kavghakavgha
26 « Ama laviŋta a dər wati ma mndu ta fata ka ŋa Yawe ta zumala rini, kabga inda zumala sla, nda ŋa rina fisik ná, nda ghada nzakwa ni ka ŋa Yawe. 27 Ama ka rini ta tsaɗ lu tsi, laviŋ lava lu ta varay taɓta skwi ya dzaʼa tsafta lu ta dzva ni, ka sganaghatá ya turtuk ma dgata ni hutaf. Ka vara a lu wu, skwapta manda ya dzaʼa tsaf lu ta dzva ni.
28 Inda skwi ya vlaŋ lu ta Yawe, ka taghuta ghəŋ mista ni na: Nda mndu tani, nda rini tani, nda vwaha dzidza ni tani, haɗ wa ni ka skwapta dər ka varata wu, kabga inda ya fa lu ka taghuta ghəŋ mista ni ná, nda nza ka skwi ta ghuɓuta ka ŋa Yawe. 29 Dər mnda səla fa lu taghu ghəŋ mista ni, haɗ lu dzaʼa varay wu, dzaʼa dza dza lu tkweʼ.
30 Inda zaka skwi tska lu ta vwah nda yakwa fuha tani ná, ŋa Yawe tsaya. Dzaʼa fa fa lu nda ghuɓa ka ŋa Yawe. 31 Ka ta kumay mndu ta varanaghutá zaka ni katsi, plata ni ta tseda skwata ka sganaghata ni ta turtuk ma dga dzva ni hutaf. 32 Inda zaka sla nda rina fisik tani, ta mbəɗ lu ta labi həŋ mista zləŋata dafa ya, dzaʼa faghu fa lu nda ghuɓa ka ŋa Yawe. 33 Yaha lu galay nda gala mataba ya ɗina nda ya kul ɗinaku. Mbəɗapta a lu guli wa. Ka kaɗaŋ kaɗa lu ta mbəɗay katsi, dzaʼa pghaghu pgha lu ta həŋ his his ka ŋa Yawe, haɗ lu dzaʼa vara həŋ wu, » kaʼa.
34 Tsaha ya zlahuha vlaŋ Yawe ta Musa ta ghwá Sinay ŋa la Israʼila.