Fiɗglaftá klamha
34
1 Ka Yawe nda Musa mantsa: « Ratsa ratsa ta klamha his manda tsaha taŋtaŋ ya, ŋa vindglafta ɗa ta tsa klamha ya ta tsa gwaɗaha si ta tsa taŋtaŋa klamha dzaɓiŋ ka ya. 2 Ka payavata ka ŋa ga sərɗək mahtsim. Ka ŋlagafta ka ga sərɗək ta ghwá Sinay. Ka sagha ka maravata hada ta kəma ɗa ta bɗəma ghwá. 3 Yaha sana mndu safi kawadaga nda kagha, yaha lu nghaŋtá mndu guli ta inda na ghwá na, dər rina fisik, dər slaha, yaha ngha həŋ mista na ghwá na, » kaʼa. 4 Ka fifiɗaftá Musa ta klamha his manda tsaha taŋtaŋ ya. Ka tsavaftá tsi ga sərɗək ka lafi ta ghwá Sinay, manda ya mnanaf Yawe, nda hlatá tsa klamha his ya ma dzva ni. 5 Ka saha Yawe ma kusay, ka sladata ndusa nda tsi. Ka mnigiŋtá tsi ta hga ni ka, « Yawe. » 6 Ka lab Yawe ta kəma Musa. Kaʼa nda lwi dagala dagala mantsa:
« Iʼi Yawe! Iʼi Yawe!
Lazglafta ta tawa hiɗahiɗa, ta zɗakatahuɗi,
haɗ ta ɓasa ŋuɗufa misimmisim wu,
dagala zɗaku da tsi,
ŋərma ya katakata.
7 Ta maray yu ta zɗaku ŋa mnduha ha ta zivir dəmbuʼ.
Ta plana pla yu ta krughuvi ta maga mndu,
nda dmakwa bisibisi, nda dmakuha.
Ama mndu ksaf dmaku ná,
mna a yu kazlay flaʼu vgha gha kəʼa wa.
Ta ghuzlanap ghuzla yu ta iri ta zwani,
nda zighiha ta ghəŋa dmakwa dadaha taŋ, ha ka lab ta zigha ndindliŋ,
ka ta zigha papah a tsi, » kaʼa.
8 Gi ka zləmbata Musa zlumbruh ta haɗik, ka tsəlɓata. 9 Kaʼa mantsa: « Rvera ɗa, ka si zɗəgagha zɗa yu, kdəkkdək, sawi da da taba ŋni. Nda sna yu kazlay təŋ təŋa ghəŋa tsa mnduha ya kəʼa má mndani, ama plaŋna pla ta krughuviha ŋni, nda dmakuha ŋni, ka tsuʼaf tsuʼa ta aŋni ka mnduha gha, » kaʼa.
Vranafta Yawe ta dzraftá wi
10 Ka Yawe nda Musa mantsa: « Wana yu ta dzrafta wi nda kaghuni. Ta kəma inda mnduha gha dzaʼa magata yu ta skwa ndraʼuway ya ta kul walaŋtá lu ta magata ta ghəŋa haɗik tender, dər mataba mndəra wati ma mndu. Dzaʼa nda ngha inda mnduha ta waghunafta ta slna iʼi Yawe. Skwi ya dzaʼa yu magata nda ghuni ná, skwa ga zləŋ ŋa mndu ya. 11 Ka ŋanata kuni ta skwi ya ta mnaghunafta yu gita: Wana yu dzaʼa ghəzlafta ta kəma ghuni ta la Amuru, nda la Kanʼana, nda la Het, nda la Periz, nda la Hiv, nda la Yəbus. 12 Ɗasuwa ká kuni, yaha kuni da dzra wi nda mnduha ma tsa haɗik dzaʼa lam kuni dida ya, dá nzakw həŋ ka dəɓəl ka ŋa ghuni. 13 Katək ná, ka zlazliŋta kuni ta gwirha taŋ, ka pasliŋta kuni ta dzugwatá palaha skwa wuyay taŋ, ka ghwadiŋta kuni ta udzuha Asera skwa wuyay taŋ. 14 Ma tsəlɓu kuni ta tsəlɓu ŋa sana lazglafta, kabga iʼi Yawe ná, draku hga ɗa, iʼi Lazglafta ta draku kahwathwata.
15 Ma dzraf kuni ta wi nda mnduha ma tsa haɗik ya. Hahəŋ ná, ta maga sliʼiŋsliʼiŋ həŋ nda ma tsəlɓu ŋa lazglaftaha taŋ. Ta pla ghəŋ həŋ ŋa lazglaftaha taŋ guli. Kawayaka skwi dzaʼa hga gha hga sana mndu mataba taŋ, dzaʼa zuza ka ta skwa pla ghəŋa taŋ. 16 Ka hlanaf hla kuni ta kwagha taŋ ŋa zwana ghuni, dzaʼa magay tsa kuʼaha ya ta sliʼiŋsliʼiŋ nda ma tsəlɓu ŋa tsa lazglaftaha taŋ ya. Dzaʼa tɗam tɗa həŋ ta zwana ghuni ŋa magay taŋ sliʼiŋsliʼiŋ nda ma tsəlɓu ŋa lazglaftaha taŋ.
17 Ma tsatsaf kuni ŋa ghəŋa ghuni ta lazglaftaha nda kfur nwap lu.
18 Ka skala kuni ta skala buradi kul haɗ is mida. Ma tila Aviv ná, ndəfáŋ fitik dzaʼa magata kuni ta za buradi kul haɗ is mida manda ya mnaghunaf yu, kabga ma tila Aviv sliʼagapta kuni ma Masar.
19 Inda zumali ka zgun ná, ŋa ɗa ya, nda zumali ya lu mataba rina ghuni, dər ŋa sla tsi, dər ŋa rina fisik tsi, ŋa ɗa ya. 20 Ama inda zumala kəɗih ya, varata ghuni nda rina fisik. Ka vara a kuni wu, dzuŋta ghuni ma warga ka dzata. Zwana zgwana ka zumali mataba mnduha ghuni ya, varata ghuni nda vara. Haɗ kuni dzaʼa sagha ta kəma ɗa nda dzvu bətbət.
21 Ma fitik mkuʼ ya, magay slna ghuni, ama baɗ mandəfáŋa fitik ya, mbiʼapta ghuni ta vgha. Dər ta fitika hva tsi, dər ta fitika tska skwi ta vwah a tsi, mbiʼapta ghuni ta vgha.
22 Ka skala kuni ta skala tska taŋtaŋa ndəhatá alkama slgaf kuni ta vwaha ghuni. Gufwak, ŋa skalay ghuni ta skala rfa nekwatá nimaya ta vwah. 23 Inda vaku, hkən səla dzaʼa maravata inda zgwana ghuni ta kəma Mgham Yawe, Lazglafta la Israʼila. 24 Dzaʼa ghəzliŋ ghəzla yu ta mndəra mnduha ta kəma ghuni, ŋa sganaghatá ɗa ta haɗika ghuni. Ta laf kuni da maraŋtá ghəŋa ghuni ta kəma Yawe, Lazglafta ghuni hkən səla ma vaku ya, haɗ mndu dzaʼa haraʼuwa haɗika ghuni ka zba zluʼata wa.
25 Yaha kuni da vlihatá usa skwa pla ghəŋ kawadaga nda buradi nda is mida. Yaha kuni pɗanatá mapɗaka skwa pla ghəŋ klaf lu ŋa skala Pak, ŋa labi ta sərɗək ga mahtsima ni.
26 Ka hlagaghata kuni da həga Yawe, Lazglafta ghuni ta taŋtaŋa yakwa skwi hva kuni ta vwaha ghuni.
Yaha kuni da damtá zwaŋa gu ma uʼa ma ni, » kaʼa.
27 Ka Yawe nda Musa guli mantsa: « Vindaf vinda ta tsa gwaɗaha ya, kabga ta tsa gwaɗaha ya ta dzrafta yu ta wi nda kagha, nda ya nda la Israʼila, » kaʼa. 28 Ka zatá Musa hada kawadaga nda Yawe ta fitik fwaɗ mbsak, nda rviɗik fwaɗ mbsak, zaŋ a ta skwa zay wu, saŋ a ta imi wa. Ka vindaftá tsi ta tsa klamha ya ta tsa gwaɗaha dzratá wi, zlahuha ghwaŋ ya.
Wuɗakwa kuma Musa
29 Ka vragatá Musa ta ghwá Sinay nda ŋatá tsa klamha dzratá wi his ya ma dzva ni. Ta vragatá tsi ta ghwá, sna a tsatsi kazlay ta wuɗaku kuma ɗa kəʼa wu, dabga si ta gwaɗa həŋ nda Yawe. 30 Nghaŋta i Haruna nda inda la Israʼila ta Musa ta wuɗaku kuma ni. Ka zləŋ həŋ ta gavadaghata ta vata ni. 31 Ama ka hagadaghatá Musa ta həŋ: Ka vradaghatá i Haruna nda inda la mali ta ghəŋa guyata ghəŋ slanaghata. Ka mnə Musa ta gwaɗa ŋa taŋ. 32 Tahula tsa, ka gavadaghatá inda la Israʼila ta vata ni guli, ka mnanaf tsi ŋa ta həŋ ta inda tsa zlahuha manana Yawe ta ghwá Sinay ya. 33 Manda kɗakwa Musa ta gwaɗa nda həŋ, ka bukwamtá tsi ta kuma ni nda lkabaª. 34 Inda dzaʼa Musa lami ta kəma Yawe ŋa gwaɗa nda tsi ya ná, kliŋta ni ta tsa lkaba ya ha ka saba ni. Tahula tsa, ŋa saba ni mnanatá la Israʼila ta skwi ya mnanaf Yawe. 35 Ta nghə la Israʼila ta kuma Musa ná, ta wuɗaku kuma Musa, ŋa bukwuglamta Musa ta kuma ni nda lkaba ha ka sagha fitika dzaʼa kəl tsi ka vrəgladamta da gwaɗa nda Yawe.