17
1 Yaha kuni dá planatá ghəŋ ta Yawe, Lazglafta ghuni nda sla, ka rina fisik a tsi, ya nda maslivinza tida, ka ya ka tərɗa a tsi, kabga nda nza tsaya ka manzakɗaway ka ŋa Yawe, Lazglafta ghuni.
2 Kawayaka skwi, mamu sana zgun ka marakw a tsi mataba ghuni ta maga ghwaɗaka skwi kul zɗəganata Yawe, Lazglafta ghuni ma luwaha ya dzaʼa vlaghunata tsi, ka ɓlanapta dzratá wa ni, 3 ka laghwi maganata slna ta sanlaha ma lazglaftaha, ka tsəlɓu ta kəma taŋ, dər ta kəma fitik, dər ta kəma tili, ka dər ta kəma tsatá sana skwi ta luwa a tsi, ya kul mnaftá yu. 4 Ka snaghagha sna gwaɗa ta ghəŋa ni nda mnay ta mnə lu katsi, ka psaŋta ka dardar. Ka si kahwathwata tsa ghwaɗaka manzakɗaway ya, magu maga ma Israʼila katsi, 5 klagaghata ghuni ta wi tgha luwa ta tsa zgun ya, ka tsa marakw ya a tsi ya, ka zlərtsata kuni nda pala ha ka mtata ni. 6 Kada dzata lu ta mndu ná, mamu ka masləmtsək his ka hkən a tsi ta mnaŋtá gwaɗa ta ghəŋa ni. Slaghu a gwaɗa masləmtsək turtuk ka dzatá mndu wa. 7 Tiŋəl tsa gwal ka masləmtsək ya dzaʼa faftá dzvu tida ŋa dzata, ŋa fay inda mnduha ta dzvu tida. Mantsa ya dzaʼa kliŋta kuni ta ghwaɗaka skwi mataba ghuni. »
Guma nda bla dganata
8 « Ka mamu skwi nda bla dgiŋtá guma ni ta wi tgha luwaha ghuni, manda gwaɗa ta dzatá mndu, ka zlərɗa wi a tsi, ka dza vgha a tsi, sliʼafta ghuni ka ŋladafta da vli dzaʼa zbapta Yawe, Lazglafta ghuni. 9 Ka lagha kuni slanaghatá gwal dra skwi ŋa Lazglafta, la Levi, nda mnda tsa guma ma tsa fitikha ya. Hahəŋ gwal dzaʼa dgighunistá tsa guma ya. 10 Ka maga kuni taɓta gwaɗa ya dzaʼa həŋ mnaghunata ma tsa vli dzaʼa zbapta Yawe ya. Ka ŋanata kuni ɗina ta inda skwi dzaʼa həŋ mnaghunata. 11 Ka ŋanata kuni taɓta zlahu ya dzaʼa həŋ taghaghunafta, ka ŋanata kuni ta dgatá guma ya dzaʼa həŋ mnaghunata. Yaha kuni da walaŋta tsughwaɗaghuta dər nda ga zeghwi, dər nda ga zlaɓa ta gwaɗa ya dzaʼa mnaghuna həŋ. 12 Ama ka kwalaghu kwala mndu ma gla ghəŋa ni ta gwaɗa mnda dra skwi ŋa Lazglafta fa lu ŋa maganata slna ta Yawe, Lazglafta ghuni, sna a ta ŋa mnda tsa guma wu, dzatá tsa mndu ya. Mantsa ya dzaʼa kliŋta kuni ta ghwaɗaka skwi mataba la Israʼila. 13 Dzaʼa snaŋ sna inda la Israʼila, ŋa zləŋay taŋ ta zləŋ, ŋa kwala mndu da gləgəltá ghəŋ. »
Zlahuha tva nzakwa mgham
14 « Ma lama ghuni da tsa haɗik dzaʼa vlaghunata Yawe, Lazglafta ghuni, dzaʼa klaghuta kuni ŋa ŋa ghuni, ka nzata mida ya, kawayaka skwi dzaʼa mnay kuni kazlay na: “Ta kumay ŋni ta faftá mgham ta pala manda ŋa hamata mndəra mnduha ta waŋnafta na,” kəʼa. 15 Ala, ka fafta kuni ta pala ta mndu ya dzaʼa Yawe, Lazglafta ghuni da zbapta. Mataba la ghuni dzaʼa zbapta kuni ta mgham ka fata ka mghama ghuni. Yaha kuni klaftá mayəm, ya kul nzakway ka la ghuni ŋa fata ka mghama ghuni. 16 Ama yaha da zakiŋtá plisha, yaha guli da vriŋtá mnduha da Masar ŋa sganaghatá plisha, kabga ká Yawe si mnaghunata: “Yaha kuni walglaŋta vrəglagapta ta na tvi na,” kaʼa. 17 Yaha guli da zakanatá miʼaha, dá mbəɗiŋtá həŋ ta ŋuɗufa ni. Yaha da hambala tsedi, nda dasu.
18 Ma ŋladafta ni ta dughurukwa ga mgham, ka vindanafta tsi ta ghəŋa ni ma defteri ta ghəzama na zlahu na, ta kəma gwal dra skwi ŋa Lazglafta, la Levi. 19 Ŋa nzakwa ni da tsi, ŋa dzaŋay ni inda fitik ma nzakwa ni nda hafu, kada taghafta tsi ta zləŋa Yawe, Lazglafta ni, ŋa ŋanata ni ta inda gwaɗaha ma na zlahu na, nda inda tva skwi ŋa magay, 20 kada kwala tsi da gla ghəŋ ta ghəŋa zwana ma ni, dá tərɗanatá tsi dər nda ga zeghwi, dər nda ga zlaɓa ta na zlahu ya mnaf lu na. Tsaya tama, dzaʼa nzəɗava nzəɗa ga mghama ni nda ŋa zivirha ni tani mataba la Israʼila. »