Mayaka gwal dra skwi ŋa Lazglafta
18
1 « Haɗ gwal dra skwi ŋa Lazglafta, la Levi, mndəra la Levi demdem tani dzaʼa mutsa mayaka taŋ, nda skwa za həga taŋ kawadaga nda la Israʼila wa. Mataba skwa pla ghəŋ ta drə lu ta vu ŋa Yawe ŋa taŋ mayak ŋa zay taŋ. 2 Haɗ skwa za həga la Levi mataba zwana ma taŋ wa. Yawe mayaka hahəŋ, manda ya mnana tsi ta həŋ.3 Wya mayaka gwal dra skwi ŋa Lazglafta ma skwi ŋa pla ghəŋ ta plə mnduha, dər ŋa sla tsi, dər ŋa rina fisik a tsi. Dzaʼa vlaŋ vla lu ta mnda dra skwi ŋa Lazglafta ta pipa ni, nda ghanikaª ni, nda nuɓa ni. 4 Ka vlaŋta kuni guli ta həŋ ta taŋtaŋa ndəhata nimaya ghuni, nda ima inabi ghuni ta ka nuni, nda rɗa ghuni, nda taŋtaŋa swida rina fisika ghuni dzaʼa gatsatá kuni, 5 kabga Levi zbap Yawe, Lazglafta ghuni kawadaga nda zivira ni mataba inda mndəra ghuni, ŋa sladata taŋ inda fitik ka maganata ta slna ŋa Yawe.
6 Ka lagha mnda la Levi ta zlaŋtá sana luwa ghuni dər ga tsi ma Israʼila ya si ta nzakw tsi mida, kabga kumaftá maya ni ta dzaʼa nzata ma vli ya dzaʼa zbapta Yawe katsi, 7 laviŋ lava ta maganatá slna ta Yawe, Lazglafta ni hada manda ŋa pɗakwa zwana ma ni la Levi ta maga slna ma tsa vli ya ta kəma Yawe. 8 Dzaʼa mutsay tsatsi ta mayak ŋa zay ni ka guram nda ŋa sanlaha, zlanaha lu ta skwi ya dzaʼa tsi mutsay ma skwiŋta ni ta skwa za həga ni daga ta dzidzíha ni. »
Zlahu ta ghəŋa nzakw ka manzakɗaway
9 « Ma lagha ghuni ta tsa haɗik dzaʼa vlaghunata Yawe, Lazglafta ghuni ya, yaha kuni da tagha ksa saɗa manzakɗaway ta nzakw mndəra tsa mnduha ya. 10 Yaha lu slanaghata mataba ghuni ta mndu ta vla zwaŋa ni, ka makwa ni a tsi ŋa driŋta ma vu ŋa pla ghəŋ, ta vza mandaŋ, ta snaŋtá skwi nda ma tekwatsa, ta ga muta, ta ga ɗəgha, 11 ta savatu, ta gwaɗa nda ghwaɗaka sulkum, ta gwaɗa nda gwal ma haɗik. 12 Inda mndu ta maga tsaha ya ná, nda nza ka manzakɗaway da Yawe. Ta ghəŋa tsa manzakɗawayha ya dzaʼa kəl Yawe, Lazglafta ghuni ka ghəzliŋta mnduha ta tsa haɗik ya ta kəma ghuni. 13 Kaghuni, ka nzata kuni ka ŋərma mndu ta kəma Yawe, Lazglafta ghuni. 14 Tsa mndəra mnduha dzaʼa kuni ghəzliŋta ya ná, ta snay həŋ ta ŋa gwal vza mandaŋ, nda ŋa ɗəghaha. Ama kaghuni, vlaghuna a Yawe, Lazglafta ghuni ta tvi ŋa magay mantsa ya wa, » kaʼa.
Sana anabi manda Musa
15 Ka Musa guli mantsa: « Dzaʼa klagap kla Yawe, Lazglafta ghuni ta anabi manda iʼi mataba la ghuni, ŋa ni dzaʼa kuni snay. 16 Tsaya skwi ɗaw kuni da Yawe, Lazglafta ghuni ta ghwá Hwarev baɗ tskavata guyatá ghəŋ, ka mnə kuni kazlay na: “Va a ŋni ta snəgəltá lwa Yawe, Lazglafta mu wa. Va a ŋni ta nghəgəlta na mghama vu na wa. Va a ŋni ta rwuta wu,” ka kuni.* 17 Ka Yawe nda iʼi mantsa: “Ta ŋa taŋ tsa gwaɗa ya. 18 Dzaʼa klagap kla yu ta anabi manda kagha mataba la taŋ. Dzaʼa fanam fa yu ta gwaɗa ɗa ma wa ni ŋa mnay ni ta inda gwaɗa ya dzaʼa yu mnanafta. 19 Ka kwalaghu kwala mndu ta sna gwaɗa ɗa ya dzaʼa tsi mnay nda hga ɗa ya, iʼi ka ghəŋa ɗa dzaʼa ɗawaŋtá gwaɗa da tsa mndu ya. 20 Ama dər wati anabi dzaʼa glanaftá ghəŋ ka mna gwaɗa ma hga ɗa ya kul mnanaftá yu ŋa mnay, ka dər ka mna gwaɗa nda hga sanlaha ma lazglaftaha a tsi ná, dzatá tsa anabi ya,” kaʼa.
21 Kawayaka skwi dzaʼa mnay kuni ma ŋuɗufa ghuni kazlay: “Kinawu ka ŋni dzaʼa grafta kazlay nana gwaɗa na ná, Yawe a ta mnata wu,” kəʼa? 22 Ka mna mna tsa anabi ya ta gwaɗa nda hga Yawe, ka maga a tsa skwi mna tsi ya wu, Yawe a ta mnatá tsa gwaɗa ya nda tsa wa. Ma gla ghəŋa ni tsaʼata tsa anabi ya ɓaŋalaŋ. Yaha kuni da zləŋay. »