Luwaha ŋa hwaya mataray
19
1 « Dzaʼa zaɗana zaɗa Yawe, Lazglafta ghuni ta mndəra mnduha dzaʼa vlaghunatá tsi ta haɗik taŋ ya, ŋa ghəzliŋta ghuni ta həŋ, ka nza nzata ghuni ma luwaha taŋ nda ya ma həgaha taŋ. 2 Tahula tsa, ŋa pghaghuta ghuni ŋa ghuni ta luwaha hkən ma haɗika ghuni dzaʼa vlaghunata Yawe, Lazglafta ghuni ŋa ŋa ghuni ya. 3 Ka garafta kuni ta mtak mataba tsa haɗik vlaghuna Yawe, Lazglafta ghuni ka skwa za həga ghuni ya, ka daganapta ghuni hkən ŋa laviŋta dər wati ma mndu ta hwaya mataray ta ɓhata misimmisim da tsa luwaha ya.*4 Wya kəʼa dzaʼa magaku ka dza dza mndu ta mndu nda kumay ni a wu, si husaŋ a tsa mndu ya guli wu, ka hwayamta tsi da ya turtuk ma tsa luwaha ya ŋa mba hafa ni. 5 Kawayaka skwi, ka sliʼafta mnduha his ka laghwi da həga fuha da psla fu, ka kapaftá sani ta dzvu ŋa tsa fu, ama ka səndilaptá slpaɗa ma ɗughus ka slafta ta tsa sana mndu ya, ka mtutá tsi katsi, dzaʼa laviŋ lava tsa mndu ya ta hwayamta da ya turtuk ma tsa luwaha ya ŋa mba hafa ni, 6 dá hwayiŋtá mnda plamta ma gufata ŋuɗufa ni, ŋa ksafta ka dzata, ka diʼiŋ vli. Aŋ mndani, nza a guma tsa mndu ta dzatá mndu ya prək ka dzata wu, kabga si husaŋ a tsa mndu ta mtuta ya wa. 7 Tsaya ta kəl yu ka mnaghunafta kazlay na: Ka faghuta kuni ta luwaha hkən kəʼa ya.*
8 Ka sganagha sga Yawe, Lazglafta ghuni ta kwakwara ghuni, manda ya waɗana tsi ta dzidzíha ghuni, ka vlaghunatá tsi ta inda tsa haɗik ya tanaf tsi ta imi ta sləməŋ ta həŋ ya, 9 ka ŋanata kuni ta inda zlahuha ni ya mnaghunaf yu gita, ka maga kuni ta slna nda tsi ma ɗvuta ghuni ta Yawe, Lazglafta ghuni, ka ksa ksa kuni inda fitik ta tva ni katsi, dzaʼa sganagha sga kuni guli ta luwaha hkən ta ghəŋa tsaha hkən taŋtaŋ ya.* 10 Manda tsaya, pghiŋta a lu ta usa mndu kul haɗ dmakwa ni ta haɗik ya vlaghuna Yawe, Lazglafta ghuni ka skwa za həga ghuni wu, kabga yaha tsa us ya vrafta ta ghəŋa ghuni.
11 Ama kawayaka skwi husaŋ husa sana mndu ta sana mndu katsi, ka pghanatá tsi buɗukwa ka dzata, ka hwayamtá tsi da sani turtuk ma tsa luwaha ya katsi, 12 ghunafta la galata mndu ma tsa luwa ni ya ta mndu ŋa ksakta, ka vlata taŋ ma dzva mnda plamta ŋa dzata ni. 13 Yaha kuni da tawa hiɗahiɗa tida. Mantsa ya dzaʼa kliŋta kuni ma Israʼila ta dmakwa pghiŋta usa mndu kul haɗ dmakwa ni, ŋa nzata ghuni ləŋləŋ mida.* »
Zlahu ta ghəŋa gana mukuma
14 « Ma tsa haɗik dzaʼa vlaghuna Yawe, Lazglafta ghuni, ya dzaʼa kuni mutsay ka skwa za həga ghuni ya, yaha kuni da gana mukuma haɗika sləvda ghuni ya fa dzidzíha manda ghalya.* »
Slna masləmtsəkha ma vla guma
15 « Slaf a masləmtsək turtuk ŋa mnaŋtá krughuva mndu ka dər dmakwa ni a tsi, dər nahgani maga tsi wu, ba snanata ma wa masləmtsəkha his ka hkən a tsi, kada nzakwa tsi manda va tsaya.
16 Ka lagha sana ghwaɗaka masləmtsək ka tsanavatá gwaɗa ta mndu ta ghəŋa sana ghwaɗaka skwi katsi, 17 sagha mnduha nda tsa gwaɗa ya his his ta kəma Yawe, ta kəma i gwal dra skwi ŋa Lazglafta, nda gwal tsa guma ta maga slna ma tsa fitik ya. 18 Dzaʼa ɗabaf ɗaba gwal ta tsa guma ta hya mida ɗina. Ka lagha taŋ ka tsatsafta kazlay na tsakalawi tsakalanava tsa masləmtsək ya ka bətbət ta zwaŋama ni kəʼa katsi, 19 vranamtá ghuni da kuma ni ta tsa skwi si ndanaf tsatsi ta ghəŋa zwaŋama ni ya. Mantsa ya dzaʼa kliŋta kuni ta ghwaɗaka skwi mataba ghuni. 20 Dzaʼa snaŋ sna sanlaha ma la Israʼila, ŋa zləŋay taŋ ta zləŋ, ŋa kwala lu kul magəgəlta mndəra tsa ghwaɗaka skwi ya mataba ghuni. 21 Yaha da ksaghunata ka hiɗahiɗa. Plamta ghuni ta hafu nda hafu, iri ŋa pla iri, sliʼiŋ ŋa pla sliʼiŋ, dzvu ŋa pla dzvu, səla ŋa pla səla.* »