Vrafta ta zlahu 4

Snatá zlahuha Yawe

1 « Ndanana tama la Israʼila, fawa fa ta sləməŋ, ka sna kuni ta zlahuha, nda tva skwiha ŋa magay ta tagh yu ŋa ghuni ŋa snata ghuni, kada nzata kuni nda hafu, ŋa laviŋta ghuni ta lami klaghutá haɗik ya vlaghuna Yawe, Lazglafta dzidzíha ghuni. 2 Ma sganagha kuni ta ghəŋa tsa gwaɗaha ta mnaghunafta yu ya, ma htanaghu kuni, ama ka ŋanata kuni ta zlahuha ta mnafta Yawe, Lazglafta ghuni ta mnaghunata yu gita na. 3 Nda ngha kuni nda ira ghuni ta skwi magana Yawe, Lazglafta ghuni ma Baghalpəghur. Inda gwal si ta dzaʼa mista Baghala Pəghur^* mataba ghuni ná, ka zaɗanatá Yawe, Lazglafta ghuni ta həŋ. 4 Ama kaghuni ta ndiʼafta ta Yawe, Lazglafta ghuni ya, ta ndiri kaghuni demdem gitana.

5 Nghawa, taghaghunaf tagha yu ta zlahuha, nda tva skwiha ŋa magay manda ya mnaɗif Yawe, Lazglafta ɗa. Lama ghuni da tsa haɗik ŋa ŋa ghuni ya, ka ŋanata kuni ta tsa zlahuha nda tva skwiha ŋa magay ya. 6 Ka ŋanata kuni, ka maga kuni ta slna nda həŋ. Tsaya dzaʼa naghunafta ka gwal nda ɗifil, nda mahizl ta wa ira sanlaha ma mnduha dzaʼa snaŋtá inda tsa zlahuha ya. Ka həŋ dzaʼazlay na: “Kahwathwata, mndəra na mnduha dagala na ná, mndəra gwal nda ɗifil da həŋ, nda ya nda mahizl da həŋ, həŋ” ka həŋ dzaʼazlay. 7 Wati ma mndəra mndu dagala ya ta ndusanavata lazglafta taŋ ta həŋ manda ŋa Yawe, Lazglafta mu inda fitika hgaŋta mu na? 8 Wati ma mndəra mndu dagala ya mamu zlahu, nda tva skwiha ŋa magay tɗukwa da həŋ, manda inda na zlahu ta fata yu ta kəma ghuni gita na na?

9 Ama ɗasuwa ka kuni, ka nghuta kuni ta ghəŋa ghuni, ma zanap kuni ta skwi ya nghaŋ kuni nda ira ghuni, dá zliŋtá kuni ŋa saghwa ni ma ŋuɗufa ghuni ma inda nzakwa ghuni. Ka rusa kuni ŋa zwana ghuni nda ya ŋa zighiha ghuni. 10 Ka hava kuni ta tsa fitik kəl kuni ka sladata ta kəma Yawe, Lazglafta ghuni ma Hwarev, tsa fitik baɗ mnihata Yawe kazlay na: “Tskigiɗigha tska ta mnduha ka mnanata yu ta gwaɗa ɗa ta həŋ ŋa taghafta taŋ ta zləŋa iʼi inda fitik ma nzakwa taŋ nda hafu ta ghəŋa haɗik, ŋa taghay taŋ guli ŋa zwana taŋ,” kəʼa ya.

11 Ma tsa fitik ya, ka gavadaghatá kuni ka sladata mista ghwá. Ka vu tsa ghwá ya, ha ka zaghutá zləghakwa ni da ghuvaŋata luwa ma ɗiŋ kuɗumbul, nda kusay tɗik. 12 Ka gwaɗagapta Yawe ma vu ka kaghuni. Ka snaŋta kuni ta lwi ta gwaɗa, ama ngha a kuni ta tsata ni wa. Lwa ni yeya snaŋ kuni. 13 Ka mnaghunatá tsi ta dzratá wa ni nda kaghuni, ya mnaghunaf tsi ŋa magay ghuni ta slna nda tsi, tsaya zlahuha ghwaŋ vivindaf tsi ta klamha his. 14 Ma tsa fitik ya mnaɗifta Yawe ŋa taghaghunafta ɗa ta zlahuha, nda tva skwi ŋa magay, ŋa magay ghuni ta slna nda tsi ma tsa haɗik dzaʼa tsughwaɗadamta kuni ŋa klaghuta ŋa ŋa ghuni ya. »

Ma zekaŋ lu ta skwa wuyay

15 « Ɗasuwa ka kuni nda ghəŋa ghuni! Baɗ tsa gwaɗgaghunata Yawe ma vu ta ghwá Hwarev ya ná, haɗ tsatá dər wati ma skwi nghaŋ kuni wa. 16 Ma ɓadziŋ kuni ta ghəŋa ghuni nda ma tsatsanafta ghuni ta ghəŋa ghuni ta skwa wuyay ta gara vgha nda tsatá dər wati ma skwi, ka zgun, dər ka marakw, 17 dər ka rini, dər nda wati nimtak ta haɗik, dər ka skwi nda zlghəŋ ta ndaraku ta luwa, 18 dər ka tsuɗay ta ləlɓaku ta haɗik, dər ka klipi ma imi a tsi. 19 Ɗasuwa ka kuni ma nghadafta ghuni ta luwa ka nghaŋtá kuni ta fitik, nda tili, nda tekwatsaha, nda inda tsatsatá skwiha ta luwa, da tɗaghatá həŋ ta kaghuni ŋa tsəlɓay ghuni tsəlɓu ŋa taŋ ka maganatá slna ta həŋ. Vlaŋtá inda hamata sanlaha ma mndəra mnduha ta ghəŋa haɗik demdem Yawe, Lazglafta ghuni ta tsaha ya. 20 Ama kaghuni, Yawe ta zbaptá kaghuni, ka hlagaptá kaghuni ma Masar, tsa duda vu ŋa nwa kfur ya, ŋa nzakwa ghuni ka mnduha ŋa ŋa ni, manda va na nzakwa ghuni gita na.

21 Ka ɓasiɗivatá Yawe ta ŋuɗuf dabga kaghuni. Ka waɗihatá tsi kazlay na, tsughwaɗadapta a kagha ta zala Yardeŋ, ka lami da tsa haɗik ta ɗinuta vlaghuna Yawe, Lazglafta ghuni ka skwa za həga ghuni ya wu, kəʼa. 22 Iʼi ná, dzaʼa mtuta ta na haɗik na iʼi, tsughwaɗadapta a iʼi ta zala Yardeŋ wa. Ama kaghuni, dzaʼa tsughwaɗadap tsughwaɗa kuni, ka klaghutá tsa haɗik ta ɗinuta ya ŋa ŋa ghuni. 23 Ɗasuwa ka kuni, dá zanaptá kuni ta dzratá wa Yawe, Lazglafta ghuni nda kaghuni, dá tsaftá kuni ŋa ghəŋa ghuni ta skwa wuyay ta gara vgha nda tsatá dər wati ma skwi tsi pyaf tsi, 24 kabga Yawe, Lazglafta ghuni ná, vu ta zaɗanatá skwi ya, Lazglafta ta draku ya.

25 Ma yayata ghuni ta zwani nda zighiha, nzəɗavar kuni dazlay ma tsa haɗik ya, yaha kuni da klamtá ghəŋa ghuni da dmaku nda ma tsaftá skwa wuyay ka gray nda dər wati ma skwi. Tsaya ná, maga ghwaɗaka skwi ya ta wa ira Yawe, Lazglafta ghuni ŋa gufanaftá ŋuɗuf. 26 Ta fa fa yu ta luwa nda haɗik ka masləmtsək mataba ɗa nda kaghuni gita. Ka kwalaghu kwala kuni ta snata, dzaʼa zaɗaku kuni misimmisim ta tsa haɗik dzaʼa tsughwaɗadapta kuni ta Yardeŋ ŋa klaghuta ya. Nzəɗavata a kuni wu, kabga dzaʼa zaɗaghuna zaɗa lu nekwnekw. 27 Dzaʼa wutsighunis wutsa Yawe mataba mndəra sanlaha ma mnduha, ŋa pɗata ghuni ŋuleŋ ma səla mndəra mnduha dzaʼa kasaghata Yawe ta kaghuni da taba taŋ. 28 Hada, dzaʼa tsəlɓay kuni ta tsəlɓu ŋa sanlaha ma lazglafta magaf mnda səla nda udzu, nda ya nda pala, ngha a həŋ ta vli wu, sna a həŋ ta sləməŋ wu, za a həŋ ta skwa zay wu, laviŋ a həŋ ta ziʼa skwi wa. 29 Ama daga hada, dzaʼa psay kuni ta Yawe, Lazglafta ghuni, dzaʼa slaf sla kuni tida ka psaŋ psa kuni nda ma hya hya ŋuɗufa ghuni, nda ya nda inda nzakwa ghuni. 30 Ka nda nza kuni ma ghuya ɗaŋwa dazlay, slaghunaghaha na skwiha na ma tsa fitik ya, dzaʼa vragagha vra kuni da Yawe, Lazglafta ghuni ŋa snanatá ŋa ni. 31 Yawe, Lazglafta ghuni ná, Lazglafta tawa hiɗahiɗa ya. Zlaghunata a wu, zaɗaghunata a wu, zanapta a ta dzratá wa ni hbaf tsi nda waɗu nda dzidzíha ghuni wa. »

Haɗ mndu taɓta Lazglafta la Israʼila wa

32 « Psawa psa ta skwi ya ta luta manda ghalya ta kul yata lu ta kaghuni, daga zlrafta Lazglafta ta zlaganapta mndu ta ghəŋa haɗik, zlrafwa zlra ta psay daga ma mndəra luwa dikw dista luwa. Mamu mndərga skwa mandərmimi ta kəɗ slata manda na rki na? Mamu mndu ta kəɗ snaŋtá mndərga ni rki? 33 Ar mamu a sana mndəra mndu ta kəɗ snaŋtá sana lazglafta ta gwaɗagapta ma vu manda ya snaŋ kaghuni, ka nzatá həŋ nda hafu rki na? 34 Ar mamu a sana lazglafta ta kaɗaŋta hlapta ŋa ŋa ni ta sana mndəra mndu mataba sana mndəra mndu, nda dzəghəha, nda mazəmzəmha, nda mandərmimiha, nda ya nda vuluha nda glakwa mbrakwa ni, nda ya nda tɗatá dzva ni, nda skwiha maga tsi dagala dagala ta ga zləŋ manda inda ya maga Yawe, Lazglafta ghuni ma Masar ta wa ira ghuni ya rki na?

35 Maraghunaŋ mara ta tsa skwiha ya ŋa snaŋta ghuni ta Yawe kazlay tsatsi Lazglafta, haɗ sani ta ghəŋa tsatsi wu kəʼa. 36 Daga ta luwa, maga maga ŋa snaŋta ghuni ta lwa ni, ŋa taghaghunaftá skwi. Ta haɗik, ka maraghaŋtá tsi ta vwa ni dagala. Ma tsa vu ya, ka snaŋtá kuni ta gwaɗaha ni. 37 Dabga vəl ɗvuta ni ta dzidzíha ghuni, ka zbaptá tsi ta zivirha taŋ ta yagapta ma həŋ. Ka hlagaptá tsatsi ka ghəŋa ni ta kaghuni ma Masar, nda glakwa mbrakwa ni. 38 Ka ghəzlaftá tsi ta kəma ghuni ta sanlaha ma mndəra mnduha ta malaghutá mbsaka ghuni, nda mbrakwa ghuni, ŋa hladamtá kaghuni da haɗika taŋ, ŋa vlaghunata ka skwa za həga ghuni manda ɗaslakwa na gita na.

39 Grafwa gra gita, ka ndana kuni ma ŋuɗufa ghuni kazlay Yawe ná, Lazglafta ta luwa nda ya ta haɗik ya, haɗ sani wu, kəʼa. 40 Ka ŋanata kuni ta zlahuha ni, nda skwiha ŋa magay ya mnaghunaf yu gita, kada nzata kuni ləŋləŋ, kaghuni nda zivira ghuni, ŋa slravaghata hafa ghuni ta haɗik ya vlaghuna Yawe, Lazglafta ghuni ŋa ɗekɗek. »

Luwa ŋa hwaya mataray

41 Ka zabaptá Musa ta luwaha hkən ta sana ɓla Yardeŋ nda təv safa fitik, 42 ŋa vla hwaya mataray, ka dza dza mndu ta mndu nda kumay ni a wu, si husaŋ a tsa mndu ya wu. Mantsa tama, ŋa hwayamta ni da ya turtuk ma tsa luwaha ya, ŋa kataftá hafa ni. 43 Tsa luwaha ya ná, tsaha ya Betser ma mtak ta dandar, ka ŋa la Rubeŋ, nda Ramut ma Gilghat, ka ŋa la Gat, nda Gulaŋ ma Basaŋ, ka ŋa la Mənase.

Lami da zlahuha Lazglafta

44 Wya zlahu fa Musa ta kəma la Israʼila. 45 Tsaha ya zlahuha, nda gwaɗaha, nda tva skwi ŋa magay mnanaf Musa ta la Israʼila ma saba taŋ ma Masar, 46 ma nzakwa taŋ ta ɓla Yardeŋ təv safa fitik ma didiŋa mbəŋ nda Betʼpəghur ta haɗika Sihuŋ, mghama la Amuru si ta nzakw ma Hesbuŋ ya. Ka kwaraftá i Musa nda la Israʼila ta həŋ tahula saba taŋ ma Masar. 47 Ka klaghutá həŋ ta haɗika ni, nda haɗika Ghug, mghama Basaŋ. Tsa hahəŋ his mghamha la Amuru si ta nzakw ta sana ɓla Yardeŋ təv safa fitik ya. 48 Ka nzatá la Israʼila ta tsa haɗik ya, zlrafta ni ma luwa Gharugher ta vata vli ta ghəŋa zala Arnuŋ, ha ka laghwi ta ghwá Siwuŋ, tsaya Hermuŋ, 49 nda inda vliha ma Gharava ta sana ɓla Yardeŋ təv safa fitik, ha ka lagha da drəfa Gharava mista ghwá Pisga.