Zata lu ta haɗika Ghug, mghama Basaŋ
3
1 « Tahula tsa, ka ksadaftá mu tvi ta lafi nda ma Basaŋ. Ka sab Ghug, mghama Basaŋ nda mnduha ni demdem guyata nda amu nda vulu ma Idreghi. 2 Ka Yawe nda iʼi mantsa: “Ma zləŋaŋ ka! Vlagha vla yu ma dzva gha, tsatsi nda mnduha ni, nda haɗika ni tani. Magana maga manda ya magana ka ta Sihuŋ, mghama la Amuru si ta nzaku ma Hesbuŋ ya,” kaʼa.3 Ka vlamatá Yawe, Lazglafta ta Ghug guli, mghama Basaŋ nda mnduha ni demdem ma dzva mu. Ka rwanatá mu ta həŋ, haɗ ya ta pɗata dər turtuk nda hafu wa. 4 Ma tsa fitik ya, ka hlutá mu ta inda luwaha ni, haɗ ya ta pɗavaghuta wa. Tsaha ya kwakwara Arguv demdem, ma ga mghama Ghug ma Basaŋ. 5 Inda tsa luwaha ya ná, ŋaŋam ŋaŋa lu ta həŋ ma matsaka huzlu nda slara, nda parawalha ta wa taŋ his his his, ŋəŋərzlatá ni nda həndil. Mamu ndəghata sanlaha ma luwaha kul haɗ matsakha taŋ guli. 6 Ka zaɗanatá mu ta həŋ nekwnekw manda va ya magana mu ta Sihuŋ, mghama Hesbuŋ. Ma luwaha demdem, ka zaɗanatá mu ta nekwnekw ta zgwana tani, nda miʼaha tani, nda zwani tani. 7 Ka hlagaghuta mu ta rini nda inda skwiha slanagha mu ma tsa luwaha ya ka skwa zləɗu. »
Dagapta Musa ta haɗika Gilghat
8 « Ma tsa fitik ya, ka hlaghutá mu tama ta kwakwar si ma dzva mghamha la Amuru his ta sana ɓla Yardeŋ, zlrafta ni ma zala Arnuŋ dikw ta ghwá Hermuŋ. 9 Siryuŋ ta hga la Tsiduŋ ta tsa Hermuŋ ya. Sənir ta hga la Amuru. 10 Ka hlaghutá mu ta inda luwaha ta dandar ta ghwáha, nda inda Gilghat, nda inda Basaŋ ha Salka, nda Idreghi, luwaha ya si ta gə Ghug ta mgham ta ghəŋa taŋ ma Basaŋ ya. 11 Tsa Ghug, mgham ma Basaŋ ya ná, tsatsi kɗavakta la Rafa ta pɗata nda hafu. Ta nda ngha lu ta ghəzləŋa ni ha gita ma Raba, wudəma la Ghamuŋ. Ka kfur ghəzləŋa ni ta malay slrakwa ni ta mitər fwaɗ, ta magay bughwata ni ta mitər his.
12 Ma tsa fitik ya, ka klaghutá mu tama ta tsa haɗik ya ka ŋa mu. Ka vlaŋtá yu ta mndəra la Rubeŋ nda la Gat ta tsa kwakwar ta sliʼafta daga ma Gharugher ta vata vli ta ghəŋa zala Arnuŋ, nda rita ghwáha Gilghat nda luwaha ni tani ya. 13 Pɗakwa Gilghat nda inda Basaŋ si ta gə Ghug ta mgham ta ghəŋa ni ya, ka vlaŋtá yu ta rita mndəra la Mənase. Inda kwakwara Arguv ma Basaŋ ná, haɗika la Rafa ya ka lu ta hgay guli. 14 Yaʼir, zivira Mənase ta klaghutá inda kwakwara Arguv ha ka lagha ta mukuma kwakwara la Gesur nda la Maghaha. Ka tsanaftá tsi nda hga ni ta hga tsa kwakwara Basaŋ, ta hgu lu ha gita ka luwaha Yaʼir ya. 15 Ka vlaŋtá yu ta la Mahir ta kwakwara Gilghat. 16 Ka vlaŋtá yu ta la Rubeŋ, nda la Gat ta kwakwar ma takataka Gilghat, nda zala Arnuŋ. Zala Arnuŋ mukuma taŋ nda təv sud. Zala Yabuk mukuma taŋ guli nda la Ghamuŋ. 17 Təv dɗakwa fitik ya guli, Yardeŋ mukuma taŋ, zlrafta ta drəfa Kineret nda ma nur ha ka laha ta drəfa Gharava ta nzakway ka drəfa Slughul nda təv sud, ka laghwi dista ghwá Pisga nda təv safa fitik.
18 Ka yu mnaghunafta ma tsa fitik ya kay na: “Yawe, Lazglafta ghuni ta vlaghunata na haɗik nda təv safa fitik na ŋa ŋa ghuni. Ama inda ya ta laviŋtá vulu ya, ka hla həŋ ta huzla vula taŋ, ka dzaʼa həŋ ta kəma zwana ma taŋ la Israʼila. 19 Ta ghəŋa miʼa ghuni, nda zwana ghuni, nda rina ghuni yeya dzaʼa nzata hadna ma na luwaha vlaghuna yu na. Wana nda ndəgha rina ghuni. 20 Ka kata kuni ta zwana ma ghuni ha ka vlaŋta Yawe ta mbiʼa vgha ta hahəŋ manda ŋa kaghuni hadna na, ka mutsafta hahəŋ karaku ta ŋa taŋ ta tsa haɗik ya vlaŋ Yawe, Lazglafta ghuni ta həŋ nda ta ɓla Yardeŋ ya. Tahula tsa, ŋa vragaghuta kaghuni ta haɗik ya vlaŋ yu ta dər wati ma kaghuni,” ka yu.
21 Ma tsaya tama, ka mnanaftá yu ta Yəhusuwa kazlay na: “Nda ngha ira gha ta inda skwi magana Yawe, Lazglafta ghuni ta tsa mghamha his ya kəʼa. Manda tsaya dzaʼa maganata tsi ta inda ga mghamha dzaʼa ŋlatá səla ghuni mida nda ta ɓla Yardeŋ. 22 Yaha kuni da zləŋa həŋ, kabga Yawe, Lazglafta ghuni dzaʼa lmaghunatá lmu”. »
Vlaŋ a lu ta tvi ta Musa ŋa lam da Kanʼana wa
23 « Ma tsa fitik ya, ka tawatá yu ta taw da Yawe. Ka yu mantsa: 24 “Mgham Yawe, zlraf zlra ka ta maranaŋta kwalva gha ta glakwa gha, nda mbrakwa gha. Wati ma lazglafta ya dər ta luwa tsi, dər ta haɗik a tsi, ta laviŋta magatá mndərga na mghama slna maga ka na na? 25 Kdəkkdək, zliha zla ɓa ka tsughwaɗapta yu, ka nghaŋta yu ta tsa haɗik ta ɗinuta nda ta ɓla Yardeŋ ya, tsa vliha ka ghwá ta ɗinuta, nda tsa Ləvanuŋ ya,” ka yu.
26 Ama ka ɓasiɗivata Yawe ta ŋuɗuf dabga kaghuni, ka kwalaghutá tsi ta snihata. Ka Yawe nda iʼi na: “Dzik tsa! Zlana zla ta mnəgəltá tsa gwaɗa ya ŋa ɗa! 27 Ŋla ta bɗəma ghwá Pisga, ka nghadapta ka nda təv dɗakwa fitik, nda ya nda təv nur, nda ya nda təv sud, nda ya nda təv safa fitik, ka naghanata ka nda ira gha, kabga tsughwaɗadapta a kagha ta na Yardeŋ na wa. 28 Mnanaf mna ta Yəhusuwa, ka vlaŋta ka ta mbraku, ka dihavata tsi, kabga tsatsi dzaʼa kla kəma ŋa tsughwaɗanaptá Yardeŋ ta na mnduha na, tsatsi dzaʼa zanatá həŋ ŋa ŋa taŋ ta tsa haɗik dzaʼa nghaŋta ya,” kaʼa.
29 Mantsa ya tama, ka nzata ŋni ma didiŋa mbəŋ nda Betʼpəghur, » kaʼa.