Tsughwaɗaptá haɗika la Ghesav, nda ŋa la Muwav, nda ŋa la Ghamuŋ
2
1 « Ka mbəɗaghatá mu ta vgha ka laghwi nda ma mtak, ka ksaghatá tvi ta dzaʼa təv drəfa Zaŋwafiha, manda va ya mnaɗif Yawe. Ka nzəɗavatá mu gerger ta wawaku ta ghwáha Seghir. 2 Ka Yawe nda iʼi tama mantsa: 3 “Nda kɗa fitika ghuni ta wawaku ta na ghwáha na, mbəɗavawa mbəɗa ka dzaʼa kuni təv nur. 4 Mnanaf mna ta na mnduha na, ɗasuwa ka kuni, kabga ta dzaʼa lab nda ta haɗika Seghir ma vli ta nzakw zwana ma ghuni la Ghesav ya kuni. Wya dzaʼa zləŋay həŋ ta kaghuni, 5 ama yaha kuni da linistá həŋ, kabga haɗ sana vli vlaghuna yu ma haɗika taŋ, dər ŋa fatá səla dəmbekw wu. Vlaŋtá la Ghesav yu ŋa ŋa taŋ ta vliha ta ghwáha Seghir. 6 Dzaʼa skwata nda skwa kuni nda tsedi ta skwa zay dzaʼa zə kuni, dər imi ŋa say ghuni skwata ghuni nda skwa da həŋ nda tsedi. 7 Tfaghunagha tfa Yawe, Lazglafta ghuni ta wi ma inda slna ghuni. Tsatsi si ta nghapta ka kaghuni ma mbaɗa ya mbaɗ kuni ma tsa mghama mtak ya. Kawadaga Yawe, Lazglafta ghuni nda kaghuni ma tsa vaku fwaɗ mbsak ya, haɗ sana skwi pɗa kuni wu,” kaʼa.8 Ka mbaɗ ŋni ta mbaɗa ka zluŋtá haɗika Seghir ma vli ta nzakw zwana ma ŋni la Ghesav. Zluŋha ŋni guli ta tva Gharava, nda Ilat, nda Ghetsiyuŋʼgever. Ka mbəɗavata ŋni ka ksaftá tvi ta dzaʼa nda ma mtaka Muwav.
9 Ka Yawe nda iʼi mantsa: “Ma liŋ ka ta la Muwav, ma zbə kuni ta guyata nda vulu nda həŋ, kabga haɗ vli dzaʼa vlaghata yu ŋa ŋa ghuni ma tsa haɗik ya wa. Vlaŋtá mndəra la Lut yu ŋa ŋa taŋ ta Gharª,” kaʼa.
10 Ghalya, la Im si ta nzakw hada. Ká ka nda mbarata həŋ, si ndəghundəgha həŋ, si nda slara nda slara həŋ manda la Ghanak. 11 La Rafa, ka sanlaha ta ngha həŋ, manda la Ghanak ya, ama la Im ká la Muwav ta hga həŋ. 12 Ghalya, si la Huri ta nzakw ma Seghir ya, ama ka ghəzliŋtá mndəra la Ghesav ta həŋ, ka zaɗanatá həŋ, ka nzatá həŋ ma vla taŋ. Manda va tsaya magata la Israʼila ma haɗik ya vlaŋ Yawe ta həŋ ŋa ŋa taŋ.
13 Ka mnamaftá Yawe, kaʼa mantsa: “Ndanana, sliʼafwa sliʼa, ka tsughwaɗapta kuni ta didiŋa Zeret,” kaʼa. Ka tsughwaɗapta mu ta didiŋa Zeret. 14 Vaku hkən mbsak tghas mida za mu ta mbaɗa, zlrafta ma Kadesbarnegha ha ka tsughwaɗapta didiŋa Zeret. Ma tsa fitik ya kɗivta inda tsa zivir ma ghuɓu ta laviŋtá vulu ya, manda va ya waɗana Yawe ta həŋ. 15 Ka mbranaghatá dzva Yawe ta həŋ, ka rwanatá həŋ ma ghuɓu, ha ka zaɗanatá həŋ nekwnekw.
16 Tahula rwuta inda tsa gwal ta laviŋtá vulu mataba mnduha ya, 17 ka Yawe nda iʼi mantsa: 18 “Gita dzaʼa tsughwaɗapta kuni ta mukuma haɗika Muwav ka lab nda ma Ghar. 19 Ɓhadaghata ghuni ndusa nda la Ghamuŋ ya, yaha kuni da liŋtá həŋ nda vulu, yaha kuni da ghazeŋzeŋ nda həŋ, kabga haɗ yu dzaʼa vlaghunatá huɗekw ma tsa haɗika la Ghamuŋ ya ŋa ŋa ghuni wa. Vlaŋ vla yu ta tsa haɗik ya ta mndəra la Lut ŋa ŋa taŋ,” kaʼa.
20 Haɗika la Rafa ya ka lu sizlay guli, kabga hahəŋ si ta nzata hada ghalya. La Zamzum ka la Ghamuŋ si ta hga həŋ. 21 Ká ka nda mbarata həŋ, si ndəghundəgha həŋ, si nda slara nda slara həŋ manda la Ghanak. Ama ka zaɗanatá Yawe ta həŋ ta kəma la Ghamuŋ, ka ghəzliŋtá həŋ ma tsa haɗik, ka nzata hahəŋ ma vla taŋ. 22 Magana maga Yawe ta həŋ manda va ya magana tsi ta mndəra la Ghesav ta nzakw ma Seghir ya, ma zaɗanata ni ta la Huri ta kəma taŋ, ka ghəzliŋtá həŋ ma tsa haɗik ya, ka nzatá həŋ ma vla taŋ ha gita. 23 Wya skwi ta slanaghatá la Ghiva si ta nzakw ma zwana luwaha ha ka lagha da Ghaza ya, la Kaftur ta sliʼafta ma Kaftur ta pslata həŋ, ka nzata hahəŋ ma vla taŋ.
24 Ka Yawe nda iʼi tama mantsa: “Sliʼafuwa sliʼa ka dzaʼa kuni tsughwaɗapta zala Arnuŋ, wya vlaghuna vla yu ma dzva ghuni ta Sihuŋ, mghama la Amuru ta ga mgham ma Hesbuŋ ya, nda haɗika ni tani. Zlrafwa zlra ta zatá haɗika taŋ, ka guyata nda vulu nda tsi. 25 Daga gita dzaʼa zlrafta yu ta favaghunatá zləŋay mnduha demdem ta ghəŋa haɗik ta zləŋ ta kaghuni. Na snaŋ sna həŋ ta gwaɗa ta kaghuni, dzaʼa ghudzaku həŋ ka zləŋ katakata dabga kaghuni,” » kaʼa.
Kwarafta la Israʼila ta mgham Sihuŋ
26 « Tahula tsa, ka ghunaftá yu ta gwal ghunay daga ta mtaka Kedemut da Sihuŋ, mghama Hesbuŋ nda gwaɗa zɗaku. Ka yu nda tsi mantsa: 27 “Zlaŋna zla ka laba ŋni nda ma haɗika gha! Dzaʼa lab nda ta tvi dagala, haɗ ŋni dzaʼa mbəɗavata dər nda ga zeghwi dər nda ga zlaɓa wa. 28 Dzaʼa skwata nda tsedi ŋni ta skwa zay ŋa zay ŋni, nda imi ŋa say ŋni da kagha. Laba ŋni nda səla kweŋkweŋ ta kum ŋni. 29 Ya manda tsaya zlaŋnata mndəra la Ghesav ta nzakw ma Seghir, nda mndəra la Muwav ta nzakw ma Ghar ya. Zlaŋnaŋ zla ta tvi ha ka tsughwaɗapta ŋni ta Yardeŋ, ka ɓhadaghata ŋni ta haɗik ya vlaŋna Yawe, Lazglafta ŋni,” ka yu. 30 Ama ka kwalaghutá Sihuŋ, mghama Hesbuŋ ta vlamatá tvi ŋa laba mu nda ga taŋ, kabga təŋanaf təŋa Yawe, Lazglafta mu ta ghəŋa ni kulis nda ŋuɗufa ni, ŋa vlamata ni ma dzva ghuni manda na nzakwa ni gita na.
31 Ka Yawe nda iʼi mantsa: “Wana daga ndana zlraf zlra yu ta vlaghatá Sihuŋ, nda haɗika ni tani ma dzva gha. Zlraf zlra tama ta zatá haɗika ni,” kaʼa. 32 Ka sab Sihuŋ nda inda mnduha ni guyata nda amu nda vulu ma Yahats. 33 Ka vlamatá Yawe, Lazglafta mu ma dzva mu, ka kwaraftá mu ta həŋ, nda zwana ni tani, nda gwal vula ni demdem tani. 34 Ka hlaghutá mu tama ta inda luwaha taŋ. Ka zaɗanatá mu ta həŋ nekwnekw. Nda zgwana tani, nda miʼaha tani, nda zwani tani, haɗ ya zlana mu nda hafu wa. 35 Ba rina taŋ, nda inda skwiha slanagha mu ma tsa luwaha ya yeya hlagaghu mu ka skwa zləɗu. 36 Zlrafta ni ma Gharugher ta vata vli ta ghəŋa zala Arnuŋ, nda luwa ma didiŋa zala, dikw da kwakwara Gilghat, haɗ luwa ya ta ŋaŋta da amu wu, kabga vlama vla Yawe, Lazglafta mu ta həŋ demdem ma dzva mu. 37 Ama ksaŋ a mu ta kwakwara la Ghamuŋ, nda vliha ta wa zala Yabuk, nda luwaha ta ghwáha, ka inda vliha ya pyaf Yawe, Lazglafta mu ta ka ksaŋta a tsi. »