Vrafta ta zlahu
Vrafta ta zlahu
Sliʼafta ma Hwarev
1
1 Wya gwaɗaha mnana Musa ta inda la Israʼila ma nzakwa taŋ ta ɓla zala Yardeŋ, ma mtaka ta daɓa Gharava mbəŋ nda Suf, ma takataka luwa Paraŋ, nda luwaha Tufel, nda Lavaŋ, nda Hatserut, nda Dizahav. 2 Fitik ghwaŋpəɗ ndeŋ ta zata mndu ta mbaɗa daga ma Hwarev ka ɓhadaghata da Kadesbarnegha, nda ta tvi ta ghwáha Seghir. 3 Baɗ taŋtaŋa fitik ma tila maghwaŋpəɗ ndeŋ, ta mafwaɗ mbsaka vaku tahula saba taŋ ma Masar, ka mnanatá Musa ta la Israʼila ta inda skwi manda va ya mnanaf Yawe ŋa mnanatá həŋ. 4 Magu maga tsaya tahula kwarafta ni ta i Sihuŋ mghama la Amuru ta nzakw ma Hesbuŋ, nda Ghug mghama Basaŋ ta nzakw ma Ghastarut nda Idreghi. 5 Nda təv safa fitik ta nzatá lu ma Yardeŋ ta haɗika la Muwav, zlrafta Musa ta pasla zlaha Yawe ŋa taŋ. Kaʼa nda həŋ mantsa:6 « Ma nzakwa mu ma Hwarev ná, ka Yawe, Lazglafta mu mnamata na: “Nda kɗa fitika ghuni ta nzakw mista na ghwá na. 7 Sliʼafwa sliʼa ka dzaʼa kuni, ka ɓhadaghata kuni ta ghwáha la Amuru, nda ya da sləvdaha taŋ ma Gharava, ta ghwáha, ta kuɗuŋurha, nda haɗika Negev, ta ɓla drəf, ma haɗika la Kanʼana, ta ghwáha Ləvanuŋ, ha da Yufratis zala dagala ya. 8 Nghawa ɓa, vlaghuna vla yu ta na haɗik na. Lawa ka kla kuni ŋa ŋa ghuni ta haɗik ya waɗa Yawe ta vlaŋtá dzidzíha ghuni i Abraham, nda Izak, nda Yakubu, nda ya nda zivirha taŋ tahula taŋ tani,” » kaʼa.
Pghamta Musa ta maliha
9 Ka Musa guli mantsa: « Ka yu nda kaghuni ma fitika nzakwa mu ta ghwá Hwarev kay na: “Laviŋ a yu ta kla kaghuni turtukwa ɗa wa. 10 Yaghunaf ya Yawe, Lazglafta ghuni. Wana kuni gita tusak manda tekwatsaha ta luwa. 11 Má ka kɗa Yawe, Lazglafta dzidzíha ghuni ta yaghunafta dəmbuʼ dəmbuʼ. Má ka tfa tsi ta wi ta ghəŋa kaghuni manda ya taghunaf tsi ta imi ta sləməŋ ya. 12 Ama waká iʼi turtukwa ɗa dzaʼa laviŋta dzraghunaftá gwaɗaha mataba ghuni, nda ndəgakwa ghuni, nda zlərɗa wi mataba ghuni na? 13 Zabapwa zaba mataba ghuni, ma inda mndəra ghuni ta sanlaha ma mnduha, gwal nda ɗifil da həŋ, nda mahizl da həŋ, gwal snaŋ lu ta həŋ, ka pghata yu ta həŋ ka maliha ghuni,” kaʼa. 14 Ka kuni nda iʼi kay na: “Zɗa tsa skwi mnaŋna ka ŋa magay ya,” ka kuni. 15 Mantsa tama, ka hlaftá yu ta maliha ma inda mndəra ghuni, gwal nda ɗifil, gwal snaŋ lu ta həŋ, ka pghatá həŋ ka maliha ta ghəŋa mnduha dəmbuʼ dəmbuʼ sanlaha, nda dərmək dərmək sanlaha, nda hutaf mbsak hutaf mbsak sanlaha, nda ghwaŋ ghwaŋ sanlaha, ka gwal ta nghapta ma inda mndəra ghuni a tsi.
16 Ma tsa fitik ya guli, ka mnanafta yu ta gwal tsaghunata guma kazlay na: “Ka snanata kuni ta skwi ta magaku mataba zwana ma ghuni, ka tsa kuni ta guma tɗukwa mataba sana mndu nda zwaŋama ni, ka nda mayəm ta nzakw ma səla ghuni a tsi. 17 Yaha kuni da gala mndu nda gala, ka sna kuni ta gwaɗa gwal nda hta nda ŋa gwal dagala dagala. Yaha kuni da zləŋa mndu, kabga ŋa Lazglafta guma. Ka ta nghadaptá kuni, nda bla tsa gwaɗa ya katsi, klagaghata ghuni da iʼi ŋa snanata ɗa,” ka yu. 18 Manda tsaya mnaghunafta yu ma tsa fitik ya ta inda skwiha ŋa magay. »
Kwalaghuta la Israʼila ta dzaʼa da Kanʼana
19 « Tahula tsaya, ka sliʼaftá mu ma Hwarev, ka sab nda ma tsa mghama mtak nghaŋ kuni ta ga makwitkwit ya, ma ksafta mu ta tvi təv ghwáha la Amuru manda va ya mnamaf Yawe, Lazglafta mu. Ka ɓhadaghatá mu da Kadesbarnegha. 20 Ka yu nda kaghuni mantsa: “Nda ɓha kuni ta ghwáha la Amuru, ya vlama Yawe, Lazglafta mu. 21 Nghawa ɓa, Yawe, Lazglafta ghuni ta vlaghunatá ma dzva ghuni ta na haɗik na. Ŋladafwa ŋla ka kla kuni ŋa ŋa ghuni manda ya mnaghuna Yawe, Lazglafta dzidzíha ghuni. Ma zləŋ kuni ta zləŋ, ma ghudzu kuni ta ghudzaku,” ka yu.
22 Ka gavagaghatá kuni demdem ta vata iʼi. Ka kuni mantsa: “Ghunafma ghuna ta mnduha ta kəma ta kəma ka dzaʼa həŋ vitsamatá tsa haɗik ya, ŋa rusamafta taŋ ta tvi ya dzaʼa laf mu ta dzaʼa da luwaha ya dzaʼa ɓhadamaghata dida,” ka kuni. 23 Ka zɗəgihatá tsa ndana ghuni ya. Ka hlaftá yu ta mnduha ghwaŋpəɗ his mataba ghuni, mndu turtuk turtuk ta mndəra mndu ta mndəra mndu. 24 Ka laghu həŋ ka ŋlaghata nda ta ghwáha ha ka ɓhadaghata da didiŋa ma Iskul, ka vivitsanatá həŋ ta tsa haɗika ya. 25 Ka ɗagaʼata həŋ ta yakwa fuha ta tsa haɗik ya ka hlamakta. Ka rusamaftá həŋ, ka həŋ mantsa: “Ɗina tsa haɗik vlama Yawe, Lazglafta mu ya!” ka həŋ.
26 Ama ka kwalaghutá kuni ta ŋladafta, ka ganavatá sidi ta skwi mnaf Yawe, Lazglafta ghuni. 27 Ka ruruŋ kuni ta ruruŋwaku ma tumpulha ghuni. Ka kuni mantsa: “Husaŋ husa mu ta Yawe kəl tsi ka hlagamapta ma haɗika Masar, ŋa vlatá amu ma dzva la Amuru ŋa zaɗamata. 28 Dzaʼa ŋlu diga mu? Rwama rwa zwana ma mu ta vgha. Ka həŋ na: Mal tsa mnduha ya ndəghata həŋ, mal hahəŋ mbarata ni ka amu. Dagala dagala luwaha taŋ, nda ŋa ŋa ma matsak ta zaghuta ta luwa. Nda ngha ŋni ta dər mndəra la Ghanak hada,” ka həŋ, ka kuni.
29 Ka yu nda kaghuni na: Ma ghudzaku kuni ta ghudzaku, ma zləŋ kuni ta zləŋ, 30 kabga Yawe, Lazglafta ghuni ta klaghunatá kəma. Tsatsi dzaʼa vulaghunatá vulu, manda va ya magaghuna tsi ma Masar ta wa ira ghuni ya. 31 Ma mtak guli, nda ngha kuni ká Yawe, Lazglafta ghuni tsukwaftá kaghuni, manda ya ta tsukwafta da ta zwaŋa ni ta tvi, ma inda mbaɗa ya mbaɗ kuni, ha ka ɓhagaghata da hadna ya. 32 Kulam nda tsa, ta faf a kuni ta ghəŋ ta Yawe, Lazglafta ghuni wa. 33 Ta wya kay guli, tsatsi ta klaghunatá kəma ta tvi ka zbaghunaftá vli ŋa fatá ghuɓa ghuni. Nda rviɗik ya, ka vu sundul nzakwa ni ŋa tsuwaɗakaghunatá tva mbaɗa ghuni. Ga fitik ya guli, ma kusay sundul nzakwa ni.
34 Ka snaŋtá Yawe ta gwaɗaha ya ta gwaɗ kuni, ka ɓasafta tsi ta ŋuɗuf, ka waɗata tsi, kaʼa mantsa: 35 “Haɗ ya dər turtuk ma tsa ghwaɗaka mnduha ta tsa zamana ya dzaʼa nghaŋta tsa haɗik ta ɗinuta waɗa yu ka vlaŋtá dzidzíha ghuni ya wa. 36 Ba Kalep, zwaŋa Yəfune yeya dzaʼa nghaŋta. Tsatsi dzaʼa vlaŋta yu ta haɗik ya ŋla səla ni, ŋa ni nda zwana ni, kabga ksaf ksa nda tva ni ta skwi ya ta kum Yawe.”
37 Ka ɓasaftá Yawe ta ŋuɗuf nda iʼi guli dabga kaghuni. Kaʼa nda iʼi na: “Dər kagha Musa, lamta a ka da tsa haɗik ya wa. 38 Ama slufa gha Yəhusuwa, zwaŋa Nuŋ ya, dzaʼa lam la tsatsi. Vlaŋ mbraku, kabga tsatsi dzaʼa hladamtá la Israʼila da tsa haɗik ya, ŋa nzakwa ni ka haɗika za həga taŋ,” kaʼa. 39 Tahula tsa, ka mnəglaghunatá Yawe, kaʼa mantsa: “Dzaʼa vlaŋtá yu ta tsa haɗik ya ta zwana ghuni, tsa gwal ta ka zwani həŋ gitana, ta kul snaŋta dganata skwi ɗina nda ya kul ɗinaku, ta mnə kaghuni kazlay dzaʼa nuna zwana ŋni ka vuʼa kəʼa ya. Hahəŋ gwal dzaʼa lami ŋa nzakwa ni ka ŋa taŋ. 40 Ama kaghuni, mbəɗavawa mbəɗa ka dzaʼa kuni da mtak nda ta tva drəfa Zaŋwafiha ya,” kaʼa.
41 Ka zlghiɗiftá kuni ta wi, ka kuni na: “Gana ga ŋni ta dmaku ta Yawe. Ama ndanana ná, ta dzaʼa ŋni da vulu manda ya mnaŋnaf Yawe, Lazglafta mu,” ka kuni. Ka hbaftá inda kaghuni ta vgha nda huzla vulu. Ma ndana ghuni ná, manda skwi bla a dzaʼa ŋladaftá ŋni zatá vliha ta ghwá wu, ka kuni.
42 Ka Yawe nda iʼi tama mantsa: “Mnana mna ta həŋ: Ma ŋladaf kuni, ma lə kuni da vulu, da pslata ghumaha ghuni ta kaghuni, kabga haɗ yu kawadaga nda kaghuni wu,” kaʼa. 43 Ka mnaghunaŋta yu, ama ka kwalaghuta kuni ta snanatá Yawe. Ka gaftá kuni ta sidi ka təŋanaftá ghəŋ, ka ŋladaftá kuni da vliha ta ghwá. 44 Ka sliʼagatá la Amuru ta nzakw ta tsa ghwá ya guyata nda kaghuni, ka ŋawaftá kaghuni manda zuɗum, ka ghəzlaghatá həŋ ta kaghuni daga ma Seghir dikw da Hurma. 45 Ma vrakta ghuni, ka taw kuni ta taw ta kəma Yawe, ama faghuna a ta sləməŋ wu, ka kwalaghutá tsi ta sna tawa ghuni. 46 Mantsa ya, ka nzatá kuni ma Kadesbarnegha ka nzəɗava gerger. »