Mbsak 13

Ghunafta Musa ta gwal vitsa haɗik

1 Ka Yawe nda Musa mantsa: 2 « Ghunaf ghuna ta zgwana ka dzaʼa həŋ da vitsaptá haɗika Kanʼana ta vlaŋta yu ta la Israʼila ya. Mndu turtuk ma mndəra mndu dzaʼa ghunafta kuni, dər wa ta mndəra taŋ. Dzaʼa hlapta mataba maliha la Israʼila kuni ta inda taŋ, » kaʼa. 3 Daga ta mtaka Paraŋ, ka ghunaftá Musa ta həŋ manda ya mnanaf Yawe. Inda tsa mnduha ya ná, maliha həŋ mataba la Israʼila. 4 Wya hga taŋ:

Mataba mndəra la Rubeŋ, Sammuʼa zwaŋa Zakkur.

5 Mataba mndəra la Simghuŋ, Safat zwaŋa Huri.

6 Mataba mndəra la Yahuda, Kalep zwaŋa Yəfune.

7 Mataba mndəra la Yisakar, Yigal zwaŋa Yusufu.

8 Mataba mndəra la Ifrayim, Huseyagh zwaŋa Nuŋ.

9 Mataba mndəra Biŋyamiŋ, Palti zwaŋa Rafu.

10 Mataba mndəra la Zəvuluŋ, Gaddiʼel zwaŋa Sudi.

11 Mataba mndəra la Yusufu, mndəra la Mənase, Gaddi zwaŋa Susi.

12 Mataba mndəra la Daŋ, Ammiʼel zwaŋa Gəmali.

13 Mataba mndəra la Aser, Setur zwaŋa Mikaʼel.

14 Mataba mndəra la Naftali, Nahbi zwaŋa Wufsi.

15 Mataba mndəra la Gat, Geʼuwel zwaŋa Maki.

16 Tsaha ya hga zgwana ghunagha Musa ta həŋ ŋa vitsaptá tsa haɗik ya. Ka tsanaftá Musa ta hgu ta Huseyagh zwaŋa Nuŋ ka Yəhusuwa.

17 Ka ghunaftá Musa ta həŋ ŋa vitsaptá haɗika Kanʼana, kaʼa nda həŋ mantsa: « Ka laba kuni nda ma Negev, ka ŋladafta kuni ta ghwá. 18 Ka vitsanata kuni ta nzakwa tsa haɗik ya. Ka nghanata kuni ka kinawu nzakwa mnduha mida, nda mbara nda mbara həŋ re, haɗ wa a mbrakwa taŋ, nda tska həŋ re, tska a wa a həŋ. 19 Ka nghanata kuni, ta tsa haɗik nza tsa mnduha mida ya, ka zɗa tsi, ka zɗa wa a tsi, ka tsa luwa ta nzaku həŋ mida ya ka ghuɓuha tsi, ka ŋam ma matsak nda mbra a lu. 20 Ka nghanata kuni ka zɗa tsa vwahha ya tsi, ka zɗa a wa tsi, mamu fuha mida re, ka haɗuwa a tsi. Ka viɗafta kuni ŋa tsaganaghatá yakwa fu ta tsa haɗik ya, » kaʼa. Tsaw ta tsa fitik ya ta ɗaga lu ta taŋtaŋa yakwa fwa inabi.

21 Mantsa tama, ka ŋladaftá tsa mnduha ya, ka vitsaptá tsa haɗik ya daga ta mtaka Tsiŋ dikw da Rehuv ta wa Hamat. 22 Ka laf həŋ nda ma Negev, ka ɓhadaghata ha da Hevruŋ ma vla nzakwa i Ahimaŋ, nda Tsetsay, nda Talmay ma mndəra la Ghanak. Hevruŋ ná, ndəfáŋ vakwa ni manda fata ma kɗaku lu fatá Tsughaŋ ma Masar. 23 Ka ɓhadaghatá həŋ ha da didiŋa Iskul, hada ka tsatá ta sləma fwa inabi nda zuŋura yakwa ni turtuk ka gwaftá mnduha his ta vgha ka klay ta ksal. Ka klaftá həŋ guli ta yakwa fu manda rimuŋ nda ghurafha. 24 Ka hgə lu ta tsa vli ya ka didiŋa Iskul, dabga vəl tsata la Israʼila ta zuŋura inabi hada.

Rusay gwal vitsa haɗik ta skwi nghaŋ həŋ

25 Tahula fitik fwaɗ mbsak, ka vraktá tsa gwal ghwaŋpəɗ his ya ta vitsa tsa haɗik ya. 26 Ka vraktá həŋ ka lagha slanaghatá i Musa, nda Haruna, nda inda guyatá ghəŋa la Israʼila ma Kades ta mtaka Paraŋ. Ka rusanaftá həŋ ta həŋ, mantsa ya ŋa inda guyatá ghəŋa mnduha ta skwi nghaŋ həŋ, maranaha həŋ ta həŋ ta yakwa fuha si ta tsa haɗik ya. 27 Wya skwi rusanaf həŋ: « Ɓhadagha ɓha ŋni ta haɗik ya ghunaf ka ta aŋni, kahwathwata ná, haɗik ya ta mbəzaku uʼa nda zuɗum mida ya. Wana yakwa fu si mida! 28 Nziya nza tsi ná, mnduha ma tsa haɗik ya ná, nda mbra nda mbra həŋ. Luwaha guli ná, dagala dagala həŋ katakata ŋaŋam ma matsak nda mbra. Nda ngha vərɗa aŋni hada ta mndəra la Ghanak. 29 Ma kwakwara Negev nzata la Ghamalek. Ta ghwá nza nzata la Het, nda la Yəbus, nda la Amuru. Ndusa nda wa drəf dagala, nda laghwa vli ta wa Yardeŋ nza nzata la Kanʼana, » ka həŋ.

30 Ka lɓanatá Kalep ta mnduha ta kəma Musa: « Mbaɗma! Dzaʼa za za mu ta tsa haɗik ya, kabga dzaʼa ghuɓasap ghuɓasa mu ta tsa haɗik ya, » kaʼa. 31 Ama ka tsa mnduha ta lafi kawadaga nda tsi ya mantsa: « Laviŋta a mu ta kuranavatá tsa mnduha ya wu, kabga mbru mbra həŋ ta ghəŋa amu, » ka həŋ. 32 Ka zlraftá həŋ ta mana ghwaɗaka gwaɗaha ta tsa haɗik vitsana həŋ ya ta kəma la Israʼila: « Tsa haɗik vitsana aŋni ya ná, haɗik ya ta dghaɗa mnduha ni ya. Inda mnduha nghana aŋni mida ná, ghərndiŋ ghərndiŋ həŋ. 33 Hada, nda ngha aŋni ta dər gwal nda slara, mndəra la Ghanak ya. Ka nghə ŋni ta ghəŋa ŋni ná, manda hiʼi manda hiʼi ŋni, manda tsaya aŋni ta wa ira taŋ! » ka həŋ.