Ga ta sida la Israʼila
14
1 Ka sliʼavaftá inda guyatá ghəŋa mnduha ka wahu. Ka han mnduha ta taw ta tsa rviɗik ya. 2 Ka ruruŋ inda la Israʼila ta ruruŋwaku ta ghəŋa i Musa nda Haruna. Ka inda nekwata guyatá ghəŋa mnduha nda həŋ mantsa: « Ta dər má rwuta ŋni ma Masar, ka ta dər má rwuta ŋni ma na mtak na a tsi! 3 Kabgawu ta kəl Yawe ka kla aŋni da tsa haɗik dzaʼa rwaŋnata lu nda kafay ya na? Dzaʼa kasu kasa lu ta miʼa ŋni nda zwana ŋni. Ta dər má vra ŋni da Masar a wu ra? » ka həŋ. 4 Ka həŋ mataba taŋ sani nda sani mantsa: « Zbafma zba ta mali ka vra mu da Masar! » ka həŋ.5 Ka zlambatá i Musa nda Haruna zluzlumbruh ta haɗik ta kəma inda guyatá ghəŋa la Israʼila ta tskavata. 6 Lagha i Yəhusuwa zwaŋa Nuŋ, nda Kalep zwaŋa Yəfune, si mataba gwal ta laghwi da vitsaptá tsa haɗik ya, ka kwahiŋtá lgutha taŋ. 7 Ka həŋ nda inda guyatá ghəŋa la Israʼila mantsa: « Tsa haɗik ranaf ŋni ka vitsanata ya ná, haɗik ta ɗinuta katakata ya. 8 Ka zɗamaŋ zɗa Yawe ta huɗi katsi, dzaʼa hladam hla ta amu da tsa haɗika ya. Dzaʼa vlama vla ta tsa haɗik ta mbəzaku uʼa nda zuɗum mida ya. 9 Nziya nza tsi ná, ma ganava kuni ta sidi ta Yawe. Ma zləŋ kuni ta mnduha ma tsa haɗik ya, ya manda nina dzaʼa zata mu ta həŋ! Diʼiŋaghu diʼiŋa sulkuma lazglaftaha taŋ nda həŋ, ama ta nzaku Yawe ta vata amu. Ma zləŋ kuni tama ta həŋ! » ka həŋ. 10 Ama ka zbə inda guyatá ghəŋa la Israʼila ta zlambatá i Yəhusuwa nda Kalep. Ka gi zlagaptá glakwa Yawe ta tumpula guyaku, ta nghay inda la Israʼila.
11 Ka Yawe nda Musa mantsa: « Ha ŋa yawu dzaʼa gɗata na mnduha na ta hərtətatá iʼi na? Ha ŋa yawu dzaʼa gɗata həŋ ta kwalaghuta faftá ghəŋ ta iʼi, kulam nda inda ŋizlaha maraŋ yu mataba taŋ na? 12 Dzaʼa dzuŋtá həŋ yu nda zləmnda, ka dganatá həŋ yu nda za həga. Nda ma kagha dzaʼa magafta yu ta mndəra mnduha dagala ta malaghutá mbruta ka hahəŋ, » kaʼa.
Magay Musa ta duʼa ta ghəŋa la Israʼila
13 Ama ka Musa nda Yawe mantsa: « Kagha ta hlagaptá na mnduha na ma Masar nda mbrakwa gha. Ka snaŋ sna la Masar ta tsa gwaɗa ya, 14 dzaʼa mnay həŋ ŋa mnduha ma na haɗik na. Tsaw nda ghada snaŋta hahəŋ kazlay kagha Yawe ná, mataba na mnduha na ka kəʼa. Kagha Yawe ta mara vgha da həŋ mbəŋ ya mbəŋ ya. Ta slada slada kusaya gha ta ghəŋa taŋ. Vərɗa kagha ta klanatá kəma ta həŋ gifitik ma sundula kusay, girviɗik guli ma sundula vu. 15 Ndanana, ta kumay ka ta rwanatá na mnduha na mbəsl turtuk! Mantsa tama, ka mnduha ta snaŋtá laghwa hga gha da zərwa dzaʼazlay na: 16 “Trap tra Yawe ta hladamtá tsa mnduha ya da tsa haɗik tanaf tsi ta imi ta sləməŋ ta həŋ ya. Tsaya kəl tsi ka zaɗanata həŋ ma mtak,” ka həŋ dzaʼazlay.
17 Ndanana, ta ndəɓa dzvu yu da kagha mghama ɗa, ka marava mara mbrakwa gha dagala manda ya mna ka kazlay na: 18 “Iʼi Yawe, kul haɗ ta ɓasa ŋuɗuf misimmisim, dagala zɗaku da tsi, ta pla dmakwa krughuvi nda dmaku, ama kul haɗ ta zlanata tsanaghatá guma ta mnda ta gatá dmaku, ta ghuzlanap ghuzla yu tiri ta zwani, nda zighiha ta ghəŋa dmakwa dadaha taŋ ha ta zigha ndindliŋ nda zigha papah a tsi,” kəʼa. 19 Wya dzvu, plana pla ta dmakwa na mnduha na, taɓta glakwa zɗakwa gha, manda va ya plana ka ta dmakwa na mnduha na daga ma Masar ha da hadna ya, » kaʼa.
20 Ka Yawe mantsa: « Ta plana pla yu ta dmakwa taŋ, manda ya mna ka. 21 Ama ta waɗa waɗa yu nda hafa ɗa, nda ya nda glakwa Yawe ta ndəghanaftá inda ghəŋa haɗik ya. 22 Haɗ ya ma inda na mnduha ta nghaŋtá glakwa ɗa, nda ŋizlaha maga yu ma Masar, nda ya ma mtak, ghwaŋ səla taŋ ta dzəghaŋtá iʼi, ka kwalaghutá sna gwaɗa ɗa na, 23 dzaʼa nghaŋtá tsa haɗik waɗana yu ta dzidza taŋ ya wa. Inda tsa gwal ta hərtətatá iʼi ya ná, nghaŋta a həŋ wa. 24 Ama kwalva ɗa Kalep, kabga mamu sana fləm ma tsatsi, ka snatá tsi ta gwaɗa ɗa dgaŋ a ta ghəŋ ya wu, dzaʼa kladam kla yu da tsa haɗik lab tsi da vitsanata ya. Zivirha ni dzaʼa klay ka haɗika za həga taŋ. 25 Ndanana ná, wa a la Ghamalek nda la Kanʼana ta nzaku ma didiŋa. Mahtsim, ka mbəɗa kuni ta vgha, ŋa ksa tvi nda ma mtak, təv drəfa Zaŋwafiha, » kaʼa.
Tsanaghata Yawe ta guma ta mnduha ni
26 Ka Yawe guli nda i Musa nda Haruna mantsa: 27 « Ha ŋa yawu dzaʼa zlanata yu ta guyatá ghəŋa na mnduha ka ghwaɗak ta ruruŋwaku nda iʼi na na? Sniɗigha sna na ruruŋwakwa la Israʼila ta ghəŋa ɗa. 28 Mna ŋa taŋ tama: “Ta waɗa waɗa yu nda hafa ɗa, ka Yawe mnata na: Dzaʼa magaghuna maga yu taɓta tsa gwaɗaha ta sab ma wa ghuni ta kəma ɗa ya. 29 Ma na mtak na dzaʼa rwuta kuni, inda tsa kaghuni vivindaf lu ta mbsaka ghuni sliʼafta ni ta imi hisambsak ka laghwa ni ta kəma ya, dabga ruruŋwakwa ghuni ta ghəŋ iʼi. 30 Ta waɗa waɗa yu, haɗ kuni dzaʼa lami da tsa haɗik si taghunaf yu ta imi ta sləməŋ nda waɗu ŋa pghatá kaghuni ya wu! Ba i Kalep zwaŋa Yəfune, nda Yəhusuwa zwaŋa Nuŋ kasiʼi. 31 Ama zwana ghuni ta mnə kuni kazlay na dzaʼa kasu kasa lu ta həŋ kəʼa ya, dzaʼa hladam hla yu ta həŋ, dzaʼa nda sna hahəŋ ta tsa haɗik mbiɗa kaghuni ya. 32 Ama kaghuni, dzaʼa zlambuta ma na mtak na kuni. 33 Dzaʼa nzakway zwana ghuni ka gwal ngha rini ma mtak ka vaku fwaɗ mbsak, dzaʼa klay həŋ ta ndəgakwa ghwaɗaka skwi maga kuni, ha ka rwuta ghuni nekwnekw ma mtak. 34 Manda tsa fitik fwaɗa mbsak za kuni ta vitsa tsa haɗik ya, mantsa ya ná, vaku turtuk ŋa da manaka fitik turtuk. Dzaʼa klay kuni ma vaku fwaɗ mbsak ta ndəgakwa krughuva ghuni. Dzaʼa nda sna kuni ta skwi dzaʼa magaku ka mbəɗaghuna mbəɗa yu ta hul.” 35 Iʼi, Yawe, mna mna yu, waɗa waɗa yu kazlay manda tsaya dzaʼa maganata yu ta inda na guyatá ghəŋa mnduha ka ghwaɗak ta gwaftá wi ta iʼi na. Dzaʼa kɗu kɗa həŋ demdem ma mtak, hada dzaʼa rwuta həŋ, » kaʼa.
36 Tsa zgwana ghunagha Musa ta həŋ da vitsa haɗik, ma vragaghata taŋ, ka pghamtá həŋ ta inda guyatá ghəŋa mnduha da ruruŋwaku ta ghəŋa ni nda mana ghwaɗaka gwaɗaha ta ghəŋa tsa haɗika ya. 37 Ka rwanatá zləmnda ta tsa mnduha ya ta kəma Yawe dabga manay taŋ ta ghwaɗaka gwaɗaha ta ghəŋa tsa haɗik ya. 38 Mataba tsa gwal ta labi da vitsa tsa haɗik ya ná, ba i Yəhusuwa, zwaŋa Nuŋ nda Kalep, zwaŋa Yəfune yeya ta pɗata nda hafu.
Zaɗakwa la Israʼila
39 Manda mnanatá Musa ta tsa gwaɗaha ya ta inda la Israʼila, ka taw mnduha ta taw ka ŋəɗa ŋəɗa. 40 Ga mahtsima ni wrək sərɗək, ka sliʼadaftá həŋ nda ta bɗəma ghwá. Ka həŋ mantsa: « Kahwathwata gaga ŋni ta dmaku, wana ŋni dzaʼa ŋladafta nda təv tsa vli mna Yawe ya, » ka həŋ.
41 Ama ka Musa mantsa: « Nu ta mag kuni hada na? Ta ɓlanap ɓla kuni ta skwi ta mnafta Yawe! Katsafta a kuni wa. 42 Ma ŋladaf kuni, da pslata ghumaha ghuni ta kaghuni, kabga haɗ Yawe kawadaga nda kaghuni wu. 43 Wya la Ghamalek nda la Kanʼana hada ta kəma ghuni, dzaʼa rwu rwa kuni da kafayha taŋ. Dabga zlanavata ghuni ta dzaʼa mista Yawe, haɗ dzaʼazlay kawadaga nda kaghuni wu, » kaʼa.