Mbsak 15

Mbəhu kawadaga nda skwa pla ghəŋ

1 Ka Yawe nda Musa mantsa: 2 « Mnana mna ta la Israʼila, ka ka nda həŋ na: “Manda ɓhadaghata ghuni da tsa haɗik dzaʼa nzata kuni mida ya, tsa haɗik dzaʼa vlaghunata yu ya, 3 ka vlaŋta kuni ta Yawe ta skwi ŋa pla ghəŋ draf lu ta vu zɗəgana həlata ni ta Yawe ka sla ka rina fisik a tsi ŋa dray tsuh tsuh, ka ya ŋa hɗamtá skwi ya waɗa lu a tsi, ka mbəha rfa ŋuɗuf a tsi, ka ya ŋa skala rfu a tsi. 4 Inda mndu ya ta kuma vlaŋtá mbəhu manda tsaya ta Yawe, sganaghata ni ta mbəha nimaya ka hpu kəzlitit ka kiluʼ hkən hwaɗata ni nda rɗi ka litər turtuk. 5 Ka pla ghəŋ nda slaɓalakwa maŋazak ŋa pla ghəŋ ŋa dray tsuh tsuh ka sana pla ghəŋa a tsi, kladanaghata gha ta ima inabi ka litər turtuk ŋa slranata.

6 Ka maŋazak tsi ná, sganaghata gha ta mbəha nimaya ka hpu kəzlitit ka kiluʼ mkuʼ hwaɗata ni nda rɗi ka litər nda rita, 7 nda ima inabi dzaʼa vlaŋta ka guli ka litər nda rita ŋa slranata. Tsaya skwa pla ghəŋ zɗəgana həlata ni ta Yawe.

8 Ka lghəŋ tsi, dzaʼa vlaŋta ka ta Yawe ŋa pla ghəŋ ŋa dray tsuh tsuh, ka pla ghəŋ ŋa hɗamtá skwi waɗa lu a tsi, ka pla ghəŋa zɗaku a tsi, 9 Ta ghəŋa tsa lghəŋ ya, sganaghata gha ta mbəha nimaya ka huʼata hpu kəzlitit ka kiluʼ təmbay hwaɗata ni nda rɗi ka litər his, 10 nda mbəhu ka ima inabi ka litər his ŋa slranata. Tsaya skwa pla ghəŋ draf lu ta vu zɗəganata həlata ni ta Yawe. 11 Mantsa ya dzaʼa maga lu ta ŋa lghəŋ, nda ŋa maŋazak, ka slaɓalakwa tuwak, ka gu a tsi. 12 Dər kidaghi mbsaka rini dzaʼa kuni vlata ka mbəhu, manda tsaya dzaʼa magata kuni ŋa inda ni.

13 Inda mnda Israʼila ná, manda tsaya tva skwi ŋa magay ni ta vlə tsi ta skwa pla ghəŋ ŋa dray ta vu zɗəgana həlata ni ta Yawe. 14 Ka ma zivira ghuni mamu mayəm ta nzata ma səla ghuni, mamu ya lama ni yeya da səla ghuni, ka ta vlay tsi ŋa Yawe ta skwa pla ghəŋ ŋa dray ta vu zɗəgana həlata ni, manda va tsa ta magata kaghuni ya dzaʼa magata tsatsi guli. 15 Tsa tva skwi ŋa magay ya ná, nda nza ŋa inda guyatá ghəŋa ghuni, ŋa ghuni nda ya ŋa mayəm ta nzaku ma səla ghuni. Nda nza ka tva skwi ŋa magay ghuni ŋa kɗekedzeŋa ghuni ha zivira zivirha ghuni. Ka nzakwa tsi ŋa ghuni nda ya ŋa mayəm mataba ghuni ta kəma Yawe. 16 Ka skwa turtuk zlahu nda tva skwi ŋa magay ghuni nda ya ŋa magay mayəm ta nzaku ma səla ghuni,” » kaʼa.

Mbəha slihatá taŋtaŋa ndəhata nimaya

17 Ka Yawe nda Musa mantsa: 18 « Mnana mna ta la Israʼila, ka ka nda həŋ na: Na ɓhadamta ghuni da haɗik ta hlə yu ta kaghuni ya, 19 ta zə kuni ta skwa zay ma tsa haɗik ya, ka hlapta kuni ta mayak ŋa mbəhata Yawe. 20 Ka klapta kuni ta gatu ka mbəhu mataba taŋtaŋa ndəhata nimaya ghuni. Dzaʼa faghu fa lu manda va klapta lu ta mbəhu ta wa blikwi ya. 21 Ma zivir zivirha ghuni, ka klanapta kuni ta mayak ŋa mbəhata Yawe ma taŋtaŋa slihatá hpwa ghuni, » kaʼa.

Pla ghəŋa ŋa ɗawa pla dmaku ka fərtaku

22 « “Ka guv ga kuni ta krughuvi, ka ɓlanaptá sani ma zlahu ya mnana Yawe ta Musa, 23 ka inda skwi ya mnaghunaf Yawe nda wa Musa daga baɗ mnafta Yawe ha zivira zivirha ghuni a tsi, 24 ka tsa krughuvi ya ka fərtaku a tsi wu, sna a guyatá ghəŋa mnduha wu, klafta guyatá ghəŋa mnduha demdem ta lghəŋ dɓakwa ŋa pla ghəŋ ŋa dray tsuh tsuh zɗəgana həlata ni ta Yawe, nda mbəha ni ka nimaya, nda mbəha skwi ŋa slranata manda ya mnaf lu, nda dugzum turtuk ŋa pla ghəŋ ŋa ɗawa pla dmaku. 25 Dzaʼa slərɓanap slərɓa mnda dra skwi ŋa Lazglafta ta zughu ta inda guyatá ghəŋa la Israʼila. Dzaʼa plana pla lu ta dmakwa taŋ, kabga ka fərtaku gata həŋ. Dzaʼa klaf kla həŋ ta mbəha taŋ ŋa dray ta vu ŋa Yawe, nda ya ŋa ɗawa pla dmakwa taŋ maga həŋ ka fərtaku ya. 26 Dzaʼa plaku dmakwa inda guyatá ghəŋa la Israʼila, mantsa ya ŋa la mayəm ta nzaku mataba taŋ, kabga nda gwa inda mndu ma tsa krughuvi ga lu ka fərtaku ya.

27 Ka mndu turtuk ta gata dmaku ka fərtaku, kladaghata ni ta daɓala gu turtuk vakwa ni ŋa pla ghəŋ ŋa ɗawa pla dmakwa ni. 28 Ka slərɓanapta mnda dra skwi ŋa Lazglafta ta zughu ta kəma Yawe ŋa ɗawa pla dmakwa ni ya maga tsi ka fərtaku, dzaʼa plaku dmakwa ni. Ka slərɓanap slərɓa lu ta zughu katsi, dzaʼa plaku dmakwa ni. 29 Dər má mnda Israʼila tsi, dər mayəm ta nzaku mataba ghuni a tsi, nda nza tsa tva skwi ŋa magay ya ŋa inda mndu dzaʼa gatá dmaku ka fərtaku. 30 Ama mndu ta gatá dmaku ka palama, dər zwaŋa haɗik tsi, dər mayəm ta nzaku mataba ghuni a tsi, tsa mndu ya ná, raza raza ta Yawe, dzaʼa kliŋ kla lu ta tsa mndu ya mataba mnduha ni. 31 Dzaʼa kliŋ kla lu ta tsa mndu ya mataba mnduha ni kabga vəl hərtəta ni ta gwaɗa Yawe, ka ɓlanaptá zlaha ni. Dguv ta ghəŋa ni dmakwa ni,” » kaʼa.

Mndu ta ɓlanaptá Sabat

32 Ma fitika nzakwa la Israʼila ma mtak, ka slaftá lu ta sana mndu ta ɓla hasuʼu baɗ Sabat. 33 Ka kladaghatá tsa gwal ta slanaghata ta ɓla hasuʼu ya ta tsa mndu ya ta kəma i Musa nda Haruna, nda inda guyatá ghəŋa mnduha. 34 Ka ŋanatá lu ɗina, kabga ta kura a lu karaku ta skwi ŋa maganata wa. 35 Mantsa tama, ka Yawe nda Musa mantsa: « Dzatá tsa mndu ya. Ka zlamba zlamba inda guyatá ghəŋa mnduha ta hula ghuɓu, » kaʼa. 36 Ka kladaptá inda guyatá ghəŋa mnduha ta hula ghuɓu, ka zlambatá lu ka mtuta tsi, manda ya mnanaf Yawe ta Musa.

Bazama ta wa lgut

37 Ka Yawe nda Musa mantsa: 38 « Mnana mna ta la Israʼila, ka mnanata ka ta həŋ kazlay ma inda zivira zivirha taŋ ka magafta həŋ ta bazama ta wa lguta taŋ, ka gamta həŋ ta sləvdza kubwalkubwal ma inda tsa bazama ya. 39 Dzaʼa nzakway tsa bazama ya ka havu. Inda nghaŋta ghuni ya, dzaʼa havak hava kuni ta inda zlahuha Yawe, dzaʼa sna sna kuni, ŋa kwala ghuni maga skwi ta kum ŋuɗufa ghuni, nda ira ghuni ya dzaʼa kla kaghuni da maga sliʼiŋsliʼiŋ. 40 Mantsa ya tama, dzaʼa havak hava kuni ka hɗamtá ghuni ta inda zlahuha ɗa, ŋa nzakwa ghuni ka gwal faghu lu nda ghuɓa ka ŋa Lazglafta ghuni. 41 Iʼi Yawe, Lazglafta ghuni. Iʼi ta hlagaghunapta ma haɗika Masar, ŋa nzakway ka Lazglafta ghuni. Iʼi Yawe, Lazglafta ghuni, » kaʼa.