Mbsak 4

Slna la Kehat

1 Ka Yawe nda i Musa nda Haruna mantsa: 2 « Mataba la Levi, mbəɗaf mbəɗa ta mbsaka la Kehat ta uʼa taŋ ta uʼa taŋ, ta həga ta həga, 3 gwal ta klaftá imi hkən mbsak ka lafi ta hutaf mbsak, inda gwal ta laviŋtá wuda slna ma tumpula guyaku. 4 Slna zwana Kehat ma tumpula guyaku ná, tsaya nghapta ka skwiha ta ghuɓuta.

5 Ma sliʼanaftá ghuɓu, ŋa lagha i Haruna nda zwana ni da tsahatá zlala ka bukwamtá akwata dzratá wi nda tsi, 6 ka zlatanaghatá hutaha ɗina ɗina, zlatanaghaha həŋ ta lguta sləvdza kubwalkubwal dzeʼdzeʼ, ka paghamha həŋ ta sandlaŋha tsa akwati ya.

7 Ta tabəla vla pla ghəŋ, zlatafha həŋ ta lguta sləvdza kubwalkubwal, ka pghafta tida ta kliwtirha, nda leghwaha, nda kwapha ŋa slranatá skwi, nda hurdzukha. Ka pghafta həŋ ta buradi dzaʼa nzata ta kəma ɗa ŋa ɗekɗek ya. 8 Ta ghəŋa inda tsaha ya, zlatanaghaha həŋ ta lgut ka dva ghəlez, ka bukwanaghata nda hutaha ɗina ɗina. Tahula tsa, ka pghamta həŋ ta sandlaŋha tsa tabəl ya.

9 Tahula tsa, ka klafta həŋ ta lgut ka kubwalkubwal ŋa bukwamtá sundula pitirla ŋa tsuwaɗaka vli, nda pitirlaha ni, nda lmislha ni, nda hutayha ni, nda inda hwaraka pgha rɗi ta kəl lu ka maga slna tida. 10 Ka mbsamta həŋ nda inda tsa huzla ni ya ma huta ɗina ka fafta ta kativiŋ ŋa klay.

11 Ka zlatafta həŋ ta gwira dasu ta lgut ka kubwalkubwal, ka bukwuglanaghatá hutaha ɗina ɗina, ka pghamtá sandlaŋha ni ŋa klay. 12 Tahula tsa, ka hlafta həŋ ta inda huzla ta kəl lu ka ksa slna nda tsi ma həga nda ghuɓa, ka mbsamta ma lgut ka kubwalkubwal, ka bukwuglanaghatá hutaha ɗina ɗina, ka fafta ta kativiŋ ŋa klay. 13 Ka faɗiŋta həŋ ta hutiɗifa gwir, ka zlataftá lgut ka dva ghuz tida, 14 ka fanaghata ta ghəŋa ni ta inda huzla ta kəl lu ka maga slna nda tsi: Hutayha, nda gayaha, nda pelha, nda nzəganzəga, nda inda huzla ksa slna ta gwir. Ka zlatanaghatá hutaha ɗina ɗina ŋa bukwamta, ka pghamtá sandlaŋha ni ŋa klay. 15 Ma fitika sliʼanaftá ghuɓu, ŋa kɗiŋta i Haruna nda zwana ni ta bukwamta skwiha nda ghuɓa nda inda huzlaha ni tani. Tahula tsa, ŋa sagha zwana Kehat da hlay. Ama yaha həŋ da ksaŋtá skwiha nda ghuɓa, dá rwutá həŋ. Tsaha ya skwiha ma tumpula guyaku ŋa hlay zwana Kehat.

16 Ilghazar, zwaŋa Haruna mnda dra skwi ŋa Lazglafta, dzaʼa mutsay tsatsi ta nghapta ka rɗa pitirlaha, nda urdi zɗa ziʼakwa ni ŋa dray nda dra, nda mbəha nimaya inda fitik, nda rɗa faghuta. Tsatsi dzaʼa nghapta ka inda həga tumpul, nda inda skwiha mida, nda inda skwi nda ghuɓa, nda inda huzla ni, » kaʼa.

17 Ka Yawe nda i Musa nda Haruna mantsa: 18 « Yaha kuni zlanatá mndəra la Kehat ka zwaɗuta taŋ ta uʼa taŋ mataba la Levi. 19 Wya skwi ŋa maganata ghuni ta həŋ kada nzata həŋ nda hafu ŋa kwala mtaku slanaghatá həŋ ta lagha həŋ ta vata skwiha ta ghuɓuta. Ka lagha i Haruna nda zwana ni da fafatá inda taŋ ta kəma slna taŋ, ta kəma skwi ya dzaʼa tsi da klay. 20 Ama yaha la Kehat lami da ngha bukwa skwiha nda ghuɓa, da rwutá həŋ, » kaʼa.

Slna la Gersuŋ

21 Ka Yawe nda Musa mantsa: 22 « Mbəɗaf mbəɗa guli ta mbsaka mndəra la Gersuŋ ta həga taŋ ta həga taŋ, ta uʼa taŋ ta uʼa taŋ. 23 Ka mbəɗafta ka ta gwal ta klaftá imi hkən mbsak ha ka laf ta hutaf mbsak, inda ya prək ka magaftá slna ma tumpula guyaku. 24 Wya slna ŋa magay la Gersuŋ ta uʼa taŋ, nda skwiha ŋa hlay taŋ. 25 Hahəŋ dzaʼa hla patakha həga tumpul, nda tumpula guyaku, nda skwi ŋa bukway demdem ka huta ɗina ɗina, nda laɓle wa tgha lami da tumpula guyaku, 26 nda wupayha daɓa ni tumpula guyaku, nda laɓle wa tgha lami da daɓi ta wanaftá həga tumpul nda gwir, nda təɓaŋha taŋ, nda inda huzla taŋ ŋa maga slna taŋ. Dzaʼa magay la Gersuŋ ta inda slna ta nghanatá tsa skwiha ya. 27 Mista skwi dzaʼa mnafta i Haruna nda zwana ni dzaʼa maga la Gersuŋ ta inda slna taŋ, dər skwi ŋa hlay taŋ, nda slna taŋ. Ka maranata kuni ta həŋ ta inda skwi ŋa hlay taŋ. 28 Tsaha ya slnaha ŋa magay la Gersuŋ ta uʼa taŋ ta uʼa taŋ ma tumpula guyaku. Itamar zwaŋa Haruna mnda dra skwi ŋa Lazglafta dzaʼa nghapta ka slnaha taŋ, » kaʼa.

Slna la Mərari

29 Ka Yawe nda Musa mantsa: « Ka mbəɗafta ka ta la Mərari ta uʼa taŋ ta uʼa taŋ, ta həga taŋ ta həga taŋ. 30 Ka mbəɗafta ka ta gwal ta klaftá imi hkən mbsak ha ka laf ta hutaf mbsak, inda ya prək ka magaftá slna ma tumpula guyaku. 31 Wya slnaha ta nghanatá həŋ ma tumpula guyaku. Hahəŋ dzaʼa hla katakuha həga tumpula, nda həndilha ni, nda guguɗiha ni, nda tughuha ni, 32 nda matalaha ta wanaftá daɓa ni nda tughuha taŋ, nda silikha taŋ, nda təɓaŋha taŋ, nda inda huzla ksa slna taŋ. Ka maranata kuni ta inda mndu ta huzla ŋa klay ni nda hga ni nda hga ni. 33 Tsaha ya inda slna ŋa magay la Mərari ta uʼa taŋ ta uʼa taŋ ma tumpula guyaku. Itamar zwaŋa Haruna mnda dra skwi ŋa Lazglafta dzaʼa nghapta ka slnaha taŋ, » kaʼa.

Mbsaka la Levi ma slna

34 Mantsa tama, ka vindaftá i Musa nda Haruna nda maliha ta ghəŋa guyatá ghəŋa mnduha ta la Kehat ta uʼa taŋ ta uʼa taŋ, ta həga taŋ ta həga taŋ, 35 ta inda zgun sliʼafta ta imi hkən mbsak ka lafi ta hutaf mbsak, gwal prək ka maga slna ma tumpula guyaku. 36 Mbsaka taŋ ta uʼa taŋ ná, dəmbuʼ his nda ndəfáŋ dərmək nda hutaf mbsak (2.750) həŋ. 37 Tsaha ya mbsaka gwal vindaf lu mataba la Kehat ta uʼa taŋ ta uʼa taŋ, inda gwal ta maga slna ma tumpula guyaku. Ka vivindaftá i Musa nda Haruna ta həŋ manda ya mnanaf Yawe ta həŋ nda ma wa Musa.

38 Wya mbsaka la Gersuŋ mbəɗaf lu ta uʼa taŋ ta uʼa taŋ, ta həga taŋ ta həga taŋ, 39 ta zgun ta klaftá imi hkən mbsak ka lafi ta hutaf mbsak, inda gwal prək ka maga slna taŋ ma tumpula guyaku. 40 Mbsaka taŋ vivindaf lu ta uʼa taŋ ta uʼa taŋ, ta həga taŋ ta həga taŋ ná, dəmbuʼ his nda mkuʼ dərmək nda hkən mbsak (2.630) həŋ. 41 Tsaha ya mbsaka gwal vivindaf lu mataba la Gersuŋ ta uʼa taŋ ta uʼa taŋ. Ka vivindaftá i Musa nda Haruna ta inda gwal dzaʼa maga slna ma tumpula guyaku manda ya mnaf Yawe.

42 Wya mbsaka la Mərari vindaf lu ta uʼa taŋ ta uʼa taŋ, ta həga taŋ ta həga taŋ, 43 ta zgun ta klaftá imi hkən mbsak ha ka lafi ta hutaf mbsak, inda gwal prək ka maga slna taŋ ma tumpula guyaku. 44 Mbsaka taŋ ta uʼa taŋ ta uʼa taŋ ná, dəmbuʼ hkən nda his dərmək (3.200) həŋ. 45 Tsaha ya mbsaka gwal vindaf lu mataba la Mərari ta uʼa taŋ ta uʼa taŋ. Ka vivindaftá i Musa nda Haruna ta həŋ manda ya mnanaf Yawe ta həŋ nda ma wa Musa.

46 Wya gwagwata mbsaka la Levi mbəɗaf i Musa nda Haruna nda la mali mataba la Israʼila, ma mbəɗafta taŋ ta həŋ ta uʼa taŋ ta uʼa taŋ, ta həga taŋ ta həga taŋ, 47 ta zgun sliʼafta ta imi hkən mbsak ha ka lafi ta hutaf mbsak, inda gwal prək ka maga slna ŋa magay nda hla skwi ŋa hlay ma tumpula guyaku. 48 Gwagwata mbsaka taŋ vivindaf lu ná, dəmbuʼ tghas nda hutaf dərmək nda tghas mbsak (8.580) həŋ. 49 Manda ya mnaf Yawe, ka vivindaftá lu ta mbsaka taŋ nda snaŋta Musa, ka mbəɗanaftá lu ta həŋ ta inda slna ŋa magay taŋ nda ya ŋa hlay taŋ. Inda mndu nda slna ni manda ya mnanaf Yawe ta Musa.