Mbsak 3

Zwana Haruna

1 Wya mndəra la Haruna nda Musa ta fitika gwaɗganata Yawe ta Musa ta ghwá Sinay. 2 Wya hga zwana Haruna: Zumali ná, Nadav ya, ka fiŋtá Avihuʼ, nda Ilghazar, nda Itamar. 3 Tsaha ya hga zwana zgwana Haruna, gwal dra skwi ŋa Lazglafta pghanagha lu ta rɗi ta həŋ, ka pghamta həŋ ma slna taŋ ya. 4 Ama ka rwutá i Nadav nda Avihuʼ ta kəma Yawe, ma kladaghata taŋ ta dzibata vu ta kəma Yawe ta mtaka Sinay. Ya a həŋ ta zwaŋ wa. Tsaya tama, i Ilghazar nda Itamar yeya ta maga slna dra skwi ŋa Lazglafta ta ira da taŋ Haruna.

Slna la Levi

5 Ka Yawe nda Musa mantsa: 6 « Gavaganagha gava ta mndəra la Levi, ka pghata ka ta həŋ ta kəma Haruna mnda dra skwi ŋa Lazglafta, ŋa kataŋta ma slna ni. 7 Dzaʼa magay həŋ ta slna ŋa ni, nda ya ŋa inda guyatá ghəŋ ta kəma tumpula guyaku, ŋa maga slna həga tumpul. 8 Dzaʼa nghap ngha həŋ ka inda huzla tumpula guyaku. Dzaʼa magana maga həŋ ta slna ta nghanatá tsa həga tumpul ya ŋa la Israʼila. 9 Mataba inda la Israʼila ná, dzaʼa vla vla ka ta la Levi ŋa ɗekɗek ta i Haruna nda zwana ni ŋa kataŋtá həŋ. 10 Ka pghamta ka ta i Haruna nda zwana ni ma slna taŋ, ŋa nghapta taŋ ka slna dra skwi ŋa Lazglafta. Inda dzibata mndu dzaʼa gavadaghata ná, dzaʼa dza dza lu, » kaʼa.

11 Ka Yawe nda Musa guli mantsa: 12 « Wya hlaf hla vərɗa iʼi mataba la Israʼila ta la Levi ma vla inda zumali ta tagatá mndər ma inda la Israʼila. La Levi ná, ŋa ɗa həŋ, 13 kabga inda zumali ná, ŋa ɗa həŋ. Baɗ dzuŋta ɗa ta inda zumaliha ma haɗika Masar ná, pghawu pgha yu ŋa ɗa ta inda zumali ma Israʼila, nda ŋa mndu tani, nda ŋa rini tani, ŋa ɗa həŋ. Iʼi ná, Yawe yu! » kaʼa.

Mbəɗaftá mbsaka la Levi

14 Ka Yawe nda Musa ta mtaka Sinay mantsa: 15 « Mbəɗaf mbəɗa ta mbsaka la Levi ta həga ta həga, ta uʼa taŋ ta uʼa taŋ. Ka mbəɗafta ka ta inda zgun ta klaftá imi ka tili turtuk ha ka laghwi ta kəma, » kaʼa. 16 Ka mbəɗaftá Musa taɓta gwaɗa Yawe, manda va ya mnanaf tsi. 17 Wya hga zwana Levi: I Gersuŋ, nda Kehat, nda Mərari. 18 Hga zwana Gersuŋ ta uʼa taŋ na: I Livni nda Simghi. 19 Hga zwana Kehat ta uʼa taŋ na: I Amram, nda Yitshar, nda Hevruŋ, nda Ghuziʼel. 20 Hga zwana Mərari ta uʼa taŋ na: I Mahli nda Musi. Tsaha ya la Levi ta uʼa taŋ ka həga ka həga.

21 Zivira la Gersuŋ ná, wya həŋ: La Livni ta uʼa taŋ, nda la Simghi ta uʼa taŋ. Tsaha ya la Gersuŋ ta uʼa taŋ. 22 Ma mbəɗafta lu ta inda tsa zgun ta klaftá imi tili turtuk ha ka laghwi ta kəma ná, ka laf mbsaka taŋ ta dəmbuʼ ndəfáŋ nda hutaf dərmək (7.500). 23 Ka fata la Gersuŋ ta uʼa taŋ ta ghuɓa taŋ nda ta hula həga tumpul, nda təv dɗakwa fitik. 24 Mali mataba la Gersuŋ ta uʼa taŋ ná, tsaya Ilyasaf zwaŋa Laʼel. 25 Slna zwana Gersuŋ ma tumpula guyaku ná, tsaya nghapta ka: Həga tumpul, nda tumpul nda skwi ŋa bukway, nda laɓle wa tgha lami da tumpula guyaku, 26 nda wupayha ŋa wamtá daɓa həga tumpul, nda laɓle wa tgha lami da həga tumpul, nda gwir, nda təɓaŋha. Hahəŋ ta nghapta ka inda tsa skwiha ya.

27 Zivira la Kehat ná, wya həŋ: Tsaha ya la Amram ta uʼa taŋ, nda la Yitshar ta uʼa taŋ, nda la Hevruŋ ta uʼa taŋ, nda la Ghuziʼel ta uʼa taŋ. Hahəŋ la Kehat ta uʼa taŋ. 28 Ma mbəɗafta lu ta inda la Kehat ka zgun ta klaftá imi tili turtuk ha ka laghwi ta kəma ná, ka laf mbsaka taŋ ta dəmbuʼ tghas nda mkuʼ dərmək (8.600). Hahəŋ gwal nghapta ka slna vli nda ghuɓa. 29 Ka fata la Kehat ta uʼa taŋ ta ghuɓa taŋ nda təv suda həga tumpul. 30 Mali mataba la Kehat ta uʼa taŋ ná, tsaya Ilitsafaŋ zwaŋa Ghuziʼel. 31 Slna taŋ na: Tsaya nghapta ka akwata dzratá wi, nda tabəl, nda pitirlaha, nda gwirha, nda huzla ksa slna ma vli nda ghuɓa, nda zlala ŋa haghuta. Hahəŋ dzaʼa nghapta ka inda tsa huzla ya. 32 Ilghazar zwaŋa Haruna mnda dra skwi ŋa Lazglafta ná, tsatsi mali ta ghəŋa maliha ma mndəra la Levi, tsatsi guli ta nghapta ka inda gwal ta maga slna vli nda ghuɓa.

33 Zivira la Mərari ná, wya həŋ: Tsaya la Mahli ta uʼa taŋ, nda la Musi ta uʼa taŋ. Hahəŋ la Mərari ta uʼa taŋ. 34 Ma mbəɗafta lu ta inda la Mərari ka zgun sliʼafta ta imi tili turtuk ha ka laghwi ta kəma ná, dəmbuʼ mkuʼ nda his dərmək (6.200) həŋ. 35 Mali ma mndəra la Mərari ta uʼa taŋ ná, tsaya Tsuriʼel zwaŋa Avihayil. Ka fata la Mərari ta uʼa taŋ ta ghuɓa taŋ nda təv nura həga tumpul. 36 Slna vlaŋ lu ta la Mərari ná, tsaya nghapta ka katakuha həga tumpul, nda həndilha ni, nda guguɗiha ni, nda tughuha ni, nda inda huzla ni. Hahəŋ dzaʼa nghapta ka tsa huzla ya. 37 Hahəŋ guli dzaʼa nghapta ka matalaha ta wanaftá kuraghuta daɓa həga tumpul, nda tughuha taŋ, nda silikha taŋ, nda təɓaŋha taŋ. 38 Ka fata i Musa, nda Haruna nda zwana ni ta ghuɓa taŋ nda ta kəma həga tumpul nda təv silwa, tsaya təv kəma tumpula guyaku nda təv safa fitik. Dguv ta ghəŋa taŋ na nghapta ka slna vli nda ghuɓa, ŋa la Israʼila. Inda dzibata mndu dzaʼa gavadaghata ná, dzaʼa dza dza lu. 39 Gwagwata mbsaka inda zgwana ta klaftá imi tili turtuk ha ka laghwi ta kəma mataba la Levi, vivindaf i Musa nda Haruna ta uʼa taŋ ta uʼa taŋ manda ya mnanaf Yawe ta həŋ ná, dəmbuʼ hisambsak his mida (22.000) həŋ.

La Levi da manaka zumaliha la Israʼila

40 Ka Yawe nda Musa mantsa: « Mbəɗaf mbəɗa ta inda zumaliha ka zgun ma Israʼila, gwal ta klaftá imi ka tili turtuk ha ka laghwi ta kəma, ka vivindafta ka ta hga taŋ. 41 Ama da manaka zumaliha inda la Israʼila ya, ka hlafta ka ta la Levi ŋa nzakwa taŋ ka ŋa ɗa. Ka hlafta ka ta rina la Levi ŋa da manaka zumala inda rina la Israʼila. Iʼi ná, Yawe yu, » kaʼa. 42 Ka Vivindaftá Musa ta inda zumaliha ma Israʼila manda ya mnanaf Yawe. 43 Gwagwata mbsaka inda zumaliha ka zgun manda ya vivindaf lu ta hga taŋ, gwal ta klaftá imi ka tili turtuk ha ka laghwi ta kəma, ka laf tsi ta dəmbuʼ hisambsak his mida nda his dərmək nda ndəfáŋ mbsak hkən mida (22.273) həŋ.

44 Ka Yawe nda Musa mantsa: 45 « Hlaf hla ta la Levi da manaka inda zumaliha la Israʼila, nda rina la Levi ŋa da manaka rina taŋ. Dzaʼa nzakway la Levi ka ŋa ɗa. Iʼi ná, Yawe yu. 46 Ama mamu zumaliha la Israʼila his dərmək nda ndəfáŋ mbsak hkən mida (273) ta malaptá la Levi, ŋa varata gha nda vara ta həŋ. 47 Sulay hutaf dzaʼa zlghafta ka ta mndu turtuk taɓta ndəgakwa sulay ma həga nda ghuɓa. Gram ghwaŋpəɗ his ndəgakwa ya turtuk. 48 Ka vlaŋta ka ta i Haruna nda zwana ni ta tsa tsedi dzaʼa kəl ka ka varatá tsa mnduha ya, » kaʼa. 49 Ka tsaʼuwaftá Musa ta tsa tseda varatá zumaliha la Israʼila ta malaptá mbsaka mnduha vara la Levi ya. 50 Tsedi ya tsaʼuwaf tsi ta zumaliha la Israʼila ná, klaf kla ta sulay dəmbuʼ nda hkən dərmək nda mkuʼ mbsak hutaf mida (1.365) taɓta ndəgakwa sulay ma həga nda ghuɓa. 51 Ka vlaŋtá Musa ta i Haruna nda zwana ni taɓta gwaɗa Yawe manda va ya mnanaf tsi.