Zata la Israʼila ta ghwa ta ghəŋa mghama Arat
21
1 Ka snaŋtá mnda la Kanʼana mghama Arat ta nzakw ma Negev kazlay waʼa la Israʼila ta sab nda ta tva Atarim kəʼa. Ka guyata tsi nda vulu nda la Israʼila, ka kasaftá sanlaha ka vuʼa. 2 Mantsa tama, ká la Israʼila waɗanatá Yawe mantsa: « Ka vlaŋna vla ka ta luwa na mnduha na ma dzva ŋni katsi, dzaʼa zaɗana zaɗa ŋni ta luwa taŋ nekwnekw, » kaʼa. 3 Ka snaŋtá Yawe ta lwa la Israʼila, ka vlatá tsi ta la Kanʼana ma dzva taŋ. Ka zaɗanatá həŋ nekwnekw, hahəŋ nda luwaha taŋ tani. Ka tsanaftá lu ta hgu ta tsa vli ya ka Hurmaª.Nahaɗika ghuva tili
4 Ka sliʼaftá la Israʼila ta ghwá Hur, ka labi nda ta tva drəfa Zaŋwafiha, ka tsanaghatá wara ta haɗika Idum, ama ka traptá həŋ ta ksa ŋuɗuf kabga diʼiŋata ni. 5 Ka zlraftá mnduha ta tsa mndəra i Lazglafta nda Musa, ka həŋ mantsa: « Kabgawu kəl kuni ka hlagaŋnafta ma Masar, ka rwa aŋni ma mtak? Haɗ skwa zay wu, haɗ imi wu, ta ziʼaŋna ziʼa na ghwaɗaka skwa zay na! » ka həŋ. 6 Ka ghunakta Yawe ta nahaɗik ka gruma slanaghatá mnduha, ka hihiʼida həŋ. Ka rwutá ndəghata mbsaka mnduha ma Israʼila. 7 Ka lagha mnduha da slanaghatá Musa, ka həŋ mantsa: « Gaga ŋni ta dmaku ma tsay ŋni ta mndəra Yawe, nda ya ma tsay ŋni ta mndəra gha, ndəɓana dzvu ta Yawe ka diʼiŋiŋta tsi nda aŋni ta na nahaɗikha na! » ka həŋ. Ka mag Musa duʼa ta ghəŋa mnduha. 8 Ka Yawe nda Musa mantsa: « Magaf maga gha ta nahaɗik ka gruma, ka hagata ka ta udzu nda slra dzugwa lu. Inda mndu ya nda hiʼida, ka nghanavatá tsi, dzaʼa mbaku, » kaʼa. 9 Ka magaftá Musa ta nahaɗik ka ghuva tili, ka hagata ta udzu. Hiʼidata nahaɗik ta mndu ya, nghay tsa mndu ya ta tsa nahaɗika ghuva tili ya, gi nda mba.
Ɓhadaghata dista ghwá Pisga
10 Ka sliʼaftá la Israʼila hada, ka laghwi fatá ghuɓa taŋ ma Uvut. 11 Ka sliʼaftá həŋ ma Uvut, ka laghwi da fatá ghuɓa taŋ ma Ghiyehaʼavarim ma mtak ta mukuma nda Muwav təv safa fitik. 12 Ka sliʼaftá həŋ hada, ka laghwi da fatá ghuɓa taŋ ma didiŋa Zeret. 13 Ka sliʼaftá həŋ hada guli, ka laghwi da fatá ghuɓa taŋ ta sana ɓla zala Arnuŋ, tsaya mtak ta laghwi ta mukuma nda la Amuru, kabga Arnuŋ ná, tsaya mukuma Muwav nda la Amuru. 14 Tsaya kəl lu ka mnay ma deftera Vuluha Yawe kazlay na:
« ...Wahev ma Sufa nda didiŋaha.
ta laha da vla Ghar,
ka lagha ta mukuma nda Muwav kəʼa ya... »
16 Daga hada ka laghwi həŋ nda ma Bəʼerª, vavrəm ma vla mnanata Yawe ta Musa kazlay: « Tskana tska ta mnduha, ka vlaŋta yu ta imi ta həŋ, » kəʼa ya. 17 Mantsa tama, ka tsaftá la Israʼila ta ya laha ya:
« Ar vavrəm, mbəzigiŋ mbəza ta imi!
Ka fanafta lu ta laha!
18 Vavrəmha lalap maliha,
vavrəmha zlarap gwal dagala dagala ta ghəŋa mnduha
nda dafaha ga mgham, nda dafaha taŋ, » kaʼa.
Daga ma tsa mtak ya, ka laghu həŋ da Mattana, 19 daga ma Mattana, ka ksaghatá həŋ ta tvi da Nahaliyel, ka sliʼaftá həŋ ma Nahaliyel ka laghwi da Bamut. 20 Ka sliʼaftá həŋ ma Bamut ka laghwi nda ma didiŋa ta haɗika Muwav, mista ghwá Pisga, daga ta ghəŋa tsa ghwá ya, ta nghaku inda vli ma mtak.
Zata la Israʼila ta ghwa ta ghəŋa mghamha Sihuŋ nda Ghug
21 Ka ghunaftá la Israʼila ta gwal ghunay da mnanatá Sihuŋ, mghama la Amuru: 22 « Zlaŋna zla ka laba ŋni nda ma haɗika gha! Haɗ ŋni dzaʼa lami nda ma vwahha wu, dər nda ma vwahha inabiha wa. Haɗ ŋni dzaʼa sa imi ma vavrəmha ghuni wa. Dzaʼa lab nda ta tvi dagala ŋa mgham ŋni, ha ka tsughwaɗapta ŋni ta kwakwara gha, » ka həŋ. 23 Ama ka kwalaghutá Sihuŋ ta vlaŋtá tvi ta la Israʼila ŋa labi nda ma kwakwara ni. Ka tskanatá tsi ta inda mnduha ni. Ka sabi həŋ da guyata nda vulu nda la Israʼila ma mtak. Ka lagha tsi da Yahats. Hada, ka guyatá tsi nda vulu nda la Israʼila. 24 Ka dzuŋtá la Israʼila nda kafay, ka klaghutá haɗika ni, daga ma Arnuŋ dikw da Yabuk ha ta mukuma nda la Ghamuŋ, kabga nda mbra ŋaghuta lu ta mukuma ni. 25 Ka hlaghutá la Israʼila ta inda tsa luwaha ya, ka nzatá həŋ ma inda luwaha la Amuru, nda Hesbuŋ, nda inda zwana luwaha mista ni.
26 Hesbuŋ ná, si luwa Sihuŋ, mghama la Amuru ta guyata nda vulu nda mghama Muwav ghalya, ka hlaghutá inda haɗika ni dikw da Arnuŋ ya. 27 Tsaya kəl gwal ta falaha ka mnay:
« Sawa da Hesbuŋ, ka bəglafta lu.
Ka lfiɗanafta lu ta luwa Sihuŋ.
28 Ma Hesbuŋ saba vu,
saba zlghakwa vu ma luwa Sihuŋ.
Ka dəghaɗutá tsi ta Ghar ma Muwav,
ka kabɗamutá skwa wuyayha ta kuɗuŋurha Arnuŋ.
29 Wabaw kagha, Muwav!
Nda zaɗa kuni gwal ta tsəlɓu ŋa Kəmus!
Ta vlatá zwana ni ka gwal hwaya,
ta kwagha ni ka gwal kasagha lu ka vuʼa,
ma dzva Sihuŋ mghama la Amuru.
30 Ka sla slanatá ŋni ta həŋ demdem,
ka zaɗanatá həŋ daga ma Hesbuŋ dikw da Divuŋ.
Ka rakwatsatá ŋni dikw da Nufah,
ka lagha dikw da Medəva, » ka həŋ.
31 Mantsa tama, ka nzata la Israʼila ta haɗika la Amuru. 32 Ka ghunaftá Musa ta gwal ŋa vitsaptá Yaghəzer, ka hlaghutá həŋ ta zwana luwaha ta wanafta. Ka ghəzliŋtá la Israʼila ta la Amuru ma tsa vliha ya. 33 Ka mbəɗaghatá la Israʼila ta vgha nda ta sana tvi, ka ŋlaghata nda təv Basaŋ. Ka sab Ghug, mghama Basaŋ da guyata ŋa vulu nda həŋ ma Idreghi, tsatsi nda inda mnduha ni.
34 Ka Yawe nda Musa mantsa: « Ma zləŋaŋ ka! Vlagha vla yu ma dzva gha, tsatsi nda mnduha ni, nda haɗika ni tani. Magana maga manda ya magana ka ta Sihuŋ, mghama la Amuru si ta nzaku ma Hesbuŋ ya, » kaʼa. 35 Ka pslatá həŋ ta mgham Ghug, tsatsi nda zwana ni, nda mnduha ni demdem, kul pɗatá mndu dər turtuk nda hafu. Ka hlaghutá həŋ ta haɗika ni.