Mbsak 20

Ima Meriva

1 Ma taŋtaŋa tili, ka ɓhadaghatá guyatá ghəŋa inda la Israʼila ta mtaka Tsiŋ, ka dzagwatá mnduha ta tumpula taŋ ma Kades. Hada mtuta Miryam, hada lamtá lu.

2 Haɗ imi ŋa say guyatá ghəŋa mnduha wu, ka tskanavatá həŋ ta vgha ta i Musa nda Haruna. 3 Ka zbə mnduha ta zlərɗa wi nda Musa. Ka həŋ mantsa: « Ta dər má rwutá ŋni manda ya rwu zwana ma ŋni ta kəma Yawe ya! 4 Kabgawu kəl kuni ka hlaktá guyatá ghəŋa mnduha Yawe da na mtak ŋa rwuta ŋni hadna, aŋni nda braha ŋni tani? 5 Kabgawu kəl kuni ka hlagaŋnafta ma Masar, ka hlagaŋnaghata da na ghwaɗaka vli na? Vli ŋa sləgu a wu, haɗ dər ghuraf wu, haɗ dər fwa inabi wu, haɗ dər rimuŋ wu, haɗ dər imi ŋa say wu! » ka həŋ.

6 Ka zlanatá i Musa nda Haruna ta guyatá ghəŋa mnduha, ka lagha həŋ ta wa tgha lami da tumpula guyaku, ka zlambata həŋ zluzlumbruh ta haɗik. Ka zlagaptá glakwa Yawe da həŋ. 7 Ka Yawe nda Musa mantsa: 8 « Klaf kla ta dafa gha, ka tskanata ka ta guyatá ghəŋa mnduha. Ta kəma taŋ, kagha nda zwaŋama gha Haruna ka gwaɗganata kuni ta kutumba, dzaʼa vlagap vla ta imi. Ka mbəzəganapta ka ta həŋ ta imi ma kutumba, ka vlaŋta ka ta imi ŋa say ta guyatá ghəŋa mnduha, nda braha taŋ tani, » kaʼa.

9 Ka klagaptá Musa ta dafa ta kəma Yawe manda ya mnanaf tsi. 10 Ka tskanatá i Musa nda Haruna ta guyatá ghəŋa mnduha ta kəma kutumba. Ka Musa nda həŋ mantsa: « Snawa tama, kaghuni gwal ta sidi! Ma na kutumba na ta kuma kuni ta mbəzəgaghunapta ŋni ta imi ra? » kaʼa. 11 Ka kapaftá Musa ta dzvu, ka dzuŋtá tsi ta kutumba twaʼ twaʼ his nda dafa ni. Ka mbəzagaptá imi katakata, ka mutsafta guyatá ghəŋa mnduha ta imi ŋa say, mantsa ya braha taŋ guli.

12 Ka Yawe nda i Musa nda Haruna mantsa: « Ma kwala ghuni kul zlghaftá iʼi, maraŋ a kuni ta nzakwa ɗa nda ghuɓa ta kəma la Israʼila ya wu, dabga tsaya, kladamtá a kuni ta na guyatá ghəŋa mnduha na ta tsa haɗik vlaŋ yu ta həŋ ya wu, » kaʼa. 13 Tsaya ima Meriva^ª, ma vla zbay la Israʼila ta zlərɗa wi nda Yawe. Hada maranaŋtá tsi ta nzakwa ni nda ghuɓa ta həŋ.

Pyafta mghama Idum ta laba la Israʼila

14 Daga ma Kades, ka ghunaftá Musa ta gwal ghunay da mghama Idum da mnanata: « Wya ka zwaŋama gha Israʼila: “Nda sna ka ta inda ghuya ɗaŋwa ta slaŋnaghata. 15 La la dzidzíha ŋni bamma da Masar, ma vli ya nzəɗava ŋni hada, ama ka ghuyaŋnaptá la Masar ta ɗaŋwa, ta aŋni nda dzidzíha ŋni tani. 16 Ka wahu ŋni ta wahu da Yawe, ka snaŋtá tsi ta waha ŋni. Ka ghunagatá tsi ta duhwala ni, ka hlagaptá tsi ta aŋni ma Masar. Wana ŋni ndanana ma Kades, luwa ya ta mukuma nda kwakwara gha. 17 Wya dzvu, zlaŋna zla ka laba ŋni nda ma haɗika gha! Haɗ ŋni dzaʼa labi nda ma vwahha, dər nda ma vwaha inabi wa. Haɗ ŋni dzaʼa sa ima vavrəmha ghuni wa. Dzaʼa lab nda ta tvi dagala ŋa mgham ŋni. Mbəɗavata a ŋni dər nda ga zeghwi, dər nda ga zlaɓa, ha ka tsughwaɗapta ŋni ta kwakwara gha wu,” » kaʼa.

18 Ama ka mghama Idum zlghanafta wi mantsa: « Haɗ ka dzaʼa sabi nda ma kwakwara ɗa wa. Ka mantsa a tsi wu, dzaʼa sab sa yu da nda kafay ŋa guyata nda kagha nda vulu, » kaʼa.

19 Ka la Israʼila nda tsi mantsa: « Nda ta tsa tvi ya dzaʼa lafa ŋni. Ka sa a sa ŋni ta ima gha, aŋni nda braha ŋni tani katsi, dzaʼa plagha pla ŋni. Skwi turtuktuk ta ɗawu ŋni: Ka laba ŋni nda səla, » kaʼa.

20 Ama ka mghama Idum mantsa: « Haɗ ka dzaʼa sab wu! » kaʼa. Ka sab tsi da guyata nda həŋ, nda ŋəɗdəmatá gwal vulu nda mbra nda mbra. 21 Mantsa ya ká Idum pyaftá laba la Israʼila ta kwakwara ni, ka ksaghatá la Israʼila ta sana tvi.

Mtakwa Haruna

22 Ka sliʼaftá inda guyatá ghəŋa la Israʼila ma Kades, ka ɓhadaghatá həŋ ta ghwá Hur. 23 Ka Yawe nda i Musa nda Haruna ta ghwá Hur, ta mukuma nda haɗika Idum mantsa: 24 « Dzaʼa laghu la Haruna da slanaghatá dzidzíha ni. Haɗ dzaʼa lami da haɗik ya vlaŋ yu ta la Israʼila wu, kabga ganava ga kuni ta sidi ta lwa ɗa, ta ghəŋa gwaɗa ta ima Meriva. 25 Hlaf hla tama ta i Haruna, nda zwaŋa ni Ilghazar, ka hladafta ka ta həŋ ta ghwá Hur. 26 Ka suɗata ka ta lgutha ta Haruna, ka suɗanavatá zwaŋa ni Ilghazar. Hada dzaʼa mtuta Haruna, ŋa dzaʼa ni slanaghatá dzidzíha ni, » kaʼa.

27 Ka magatá Musa manda ya mnanaf Yawe. Ka laf həŋ ta ghwá Hur ta wa ira inda guyatá ghəŋa mnduha. 28 Ka suɗatá Musa ta lgutha ta Haruna, ka suɗanavatá zwaŋa ni Ilghazar. Ka mtutá Haruna hada ta bɗəma tsa ghwá ya. Tahula tsa, ka vragatá i Musa nda Ilghazar ta tsa ghwá ya. 29 Snaŋta inda guyatá ghəŋa mnduha ta mtatá Haruna, ka tawamtá inda la Israʼila ta Haruna ka fitik hkən mbsak.