Ima ghuɓiŋtá nzaku
19
1 Ka Yawe nda i Musa nda Haruna mantsa: 2 « Wya tva skwiha ŋa magay mnaf Yawe ma zlahu: Mnanawa mna ta la Israʼila ka kləgaghaghata həŋ ta rva sla dvaŋdvaŋa ɗina kul haɗ maslivinza tida, kul haɗ balaku tida, sla ya ta kul fanaftá ta zuk. 3 Ka vlaŋta kuni ta Ilghazar, mnda dra skwi ŋa Lazglafta, ŋa klaghata ta hula ghuɓu, ka ghwanafta ta wa ira ni. 4 Ka ɗaʼata Ilghazar, mnda dra skwi ŋa Lazglafta ta usa tsa sla ya nda ndəfiŋa ni, ŋa wutsikata ni ndəfáŋ səla nda ta kəma tumpula guyaku. 5 Tahula tsa, ŋa driŋtá tsa sla ya ta wa ira ni, ka driŋta lu ta huta ni, nda sluʼa ni, nda usa ni, nda swiɗa ni tani. 6 Ka klafta mndu ta dra skwi ta udza sedra, nda izwap, nda sləvdza dva ghuz, ka pghamta ma takataka lanzəŋa tsa vu ta drə lu ta tsa sla ya. 7 Tahula tsa, ŋa ghwaɓiŋta mnda dra skwi ŋa Lazglafta ta lgutha ni, mbazaghuha ta mbaza nda imi, ŋa vraghuta ni da ghuɓu, ama ka nzata tsi ka mndu ta tsaɗ lu ha ga hawu. 8 Tsa mndu ta driŋtá tsa sla ya, ŋa ghwaɓiŋta ni ta lgutha ni guli, mbazaghuha ta mbaza nda imi, ka nzata ni ka mndu ta tsaɗ lu ha ga hawu. 9 Mndu kul haɗ skwa tsaɗa tida dzaʼa faɗaftá hutiɗifa tsa sla ya, ka laghwi da pghata ta hula ghuɓu ma vli kul haɗ lu ta tsaɗay fa lu ŋa tska hutiɗif. Dzaʼa payana paya guyatá ghəŋa la Israʼila ta tsa hutiɗif ya ŋa paya imi ŋa ghuɓiŋtá skwi ta niŋta ta mndu ka mndu nda skwa tsaɗa tida. Tsaya skwa pla ghəŋ ŋa ɗawa pla dmaku. 10 Tsa mndu ta faɗaftá hutiɗifa tsa sla ya ná, dzaʼa ghwaɓiŋ ghwaɗa tsatsi ta lgutha ni guli, ka nzata ni ka mndu ta tsaɗ lu ha ga hawu. Dzaʼa nzakway ka zlahu ŋa ɗekɗek ŋa la Israʼila, mantsa ya matbayha ta nzaku ma səla taŋ, » kaʼa.11 Mndu ta ksaŋtá mbla mnda səla, dər má mndəra wati ma mbla skwi tsi, nda nza ka mndu ta tsaɗ lu ka fitik ndəfáŋ. 12 Baɗ mahkəna fitik nda ya baɗ mandəfáŋa fitik, dzaʼa kliŋ kla ta skwi ta tsaɗ lu ma nzakwa ni nda tsa imi ya ŋa nzakwa ni ka mndu kul tsaɗ lu. Ama ka hliŋ a tsi ta skwi ta tsaɗ lu ma nzakwa ni baɗ mahkəna fitik nda ya baɗ mandəfáŋa fitik wu, haɗ dzaʼa nzakway ka mndu kul tsaɗ lu guli wa. 13 Dər wati ma mndu ta ksaŋtá mbla mnda səla ya ta mtuta, ka nzakw tsi ka mndu ta tsaɗ lu, nda tsa imi ta ghuɓiŋtá mndu tsa ya, niŋ na ka skwi ta tsaɗ lu ta həga tumpula Yawe. Dzaʼa kliŋ kla lu ta tsa mndu ya mataba la Israʼila, kabga kwala lu kul wutsikanaftá imi ŋa ghuɓiŋta, nda nza ka mndu ta tsaɗ lu. Gɗavata ni ma tsa nzakwa ni ta tsaɗ lu ya.
14 Wya zlahu ta nghanatá mndu ta mtuta ma tumpul: Dər wati ma mndu ta lami da tsa tumpul ya, dər wati ma mndu ta nzakway ma tsa tumpul ya, nda nza həŋ ka gwal ta tsaɗ lu ka fitik ndəfáŋ. 15 Inda siga nda guna, kul fuŋtá lu ta paɗuwi ta wa ni ka hbanata, nda nza ka skwi ta tsaɗ lu. 16 Dər wati ma mndu tsi ma vwah, ka ksaŋtá tsi ta mbla mndu dza lu nda kafay, ka mtaku a tsi ta dzata, ka ghudzifa mndu a tsi, ka kulu a tsi, nda nza ka mndu ta tsaɗ lu ka fitik ndəfáŋ. 17 Dzaʼa klaf kla lu ŋa tsa mndu ta tsaɗ lu ya, ta hutiɗifa tsa sla pla ghəŋ ŋa ɗawa pla dmaku driŋ lu nda vu ya, ka pghamta ma siga ka pghanaghatá ima dzuɓay. 18 Dzaʼa klaf kla mndu kul haɗ skwa tsaɗa tida ta udza izwap, ka tsughumamta ma tsa imi ya, ka wutsikafta ta tsa tumpul ya, nda ya ta inda huzla, nda ya ta mnduha mida. Ka wutsikafta ni guli ta tsa mndu ta ksaŋtá ghudzifa mndu ya, ka ta tsa mndu ta ksaŋtá tsa mndu dza lu, ka mbli a tsi, ka kulu a tsi ya.
19 Dzaʼa wutsikaf wutsika mndu kul haɗ skwa tsaɗa tida ta imi ta tsa mndu nda skwa tsaɗa tida ya baɗ mahkəna fitik, nda ya baɗ mandəfáŋa fitik. Baɗ mandəfáŋa fitik, ŋa nzakwa tsa mndu si nda skwa tsaɗa tida ya ka mndu kul haɗ skwa tsaɗa tida. Tahula tsa, ŋa ghwaɓiŋta ni ta lgutha ni, ka mbazaghuta ni ta mbaza nda imi, ŋa nzakwa ni ka mndu kul haɗ skwa tsaɗa tida ga hawu. 20 Ama tsa mndu ta tsaɗ lu ta kwalaghutá kliŋtá skwi ta tsaɗ lu ma nzakwa ni ya, dzaʼa kliŋ kla lu ta mndərga tsa mndu ya mataba guyatá ghəŋ, kabga niŋ na ka skwi ta tsaɗ lu ta vli ya nda ghuɓa ŋa Yawe. Nda nza ka mndu ta tsaɗ lu, kabga wutsikanaf a lu ta ima ghuɓiŋta wa. 21 Dzaʼa nzakway ŋa taŋ ka zlahu ŋa ɗekɗek. Tsa mndu ta wutsika ima kliŋtá tsaɗa ta mndu ya, dzaʼa ghwaɓiŋ ghwaɓa tsatsi guli ta lgutha ni. Dər wati ma mndu ta ksaŋtá ima ghuɓiŋta mndu ya, dzaʼa nza nza ka mndu ta tsaɗ lu ha ga hawu. 22 Inda skwi dzaʼa ksaŋta tsa mndu ta tsaɗ lu ya, dzaʼa nda nza ka skwi ta tsaɗ lu. Dər wati ma mndu dzaʼa ksaŋtá tsa skwi ta tsaɗ lu ya, dzaʼa nza nza ka mndu ta tsaɗ lu ha ga hawu.