Mbsak 18

Slna gwal dra skwi ŋa Lazglafta nda la Levi

1 Ka Yawe nda Haruna mantsa: « Kagha, nda zivira gha, nda mndəra ghuni, dzaʼa kla krughuvi dzaʼa magata lu ta nghanatá vli nda ghuɓa. Kagha, nda zivira gha dzaʼa kla krughuvi dzaʼa magata lu ta nghanatá slna ghuni kaghuni gwal dra skwi ŋa Lazglafta. 2 Ka hlakta ka ta zwana ma gha mndəra la Levi, mndəra la ghuni, ŋa gwafta ghuni ta vgha ka maga slna, ŋa nzakwa taŋ ka slufa gha, ta sladatá kagha nda zivira gha ka maga slna ta kəma tumpula akwata dzratá wi. 3 Hahəŋ dzaʼa magaghatá slna, nda inda slna həga tumpul, ama yaha yaha həŋ dá gavadaghata ta vata dər huzla vli nda ghuɓa, dər ŋa gwir, dá rwutá hahəŋ nda kaghuni tani. 4 Dzaʼa nzakway həŋ ka slufaha gha, hahəŋ dzaʼa nghapta ka tumpula guyaku, ka magay taŋ ta inda slna tsa tumpula ya. Haɗ dzibata mndu dzaʼa ŋanadaghata ta vata kaghuni wa. 5 Kaghuni dzaʼa nghapta ka vli nda ghuɓa, nda gwir. Mantsa tama, haɗ ɓasa ŋuɗufa ɗa dzaʼa dɗəglanaghatá la Israʼila wa. 6 Nda ngha ka ná, iʼi ta klapta mataba la Israʼila ta zwana ma ghuni la Levi, vla vla lu ta həŋ ŋa Yawe, nda nza həŋ ka mbəhu ŋa ghuni ŋa maga slna tumpula guyaku. 7 Kagha nda zivira gha dzaʼa maga slna dra skwi ŋa Lazglafta ta nghanatá inda slna gwir, nda ya ta hula zlala. Tsaya slna ghuni. Ta vlaghuna vla yu ta slna dra skwi, tsaya slna mbəhaghuna yu nda tsi. Ama dzibata mndu dzaʼa gavadaghata ná, dzaʼa dza dza lu, » kaʼa.

Mayaka gwal ta dra skwi ŋa Lazglafta

8 Ka Yawe nda Musa mantsa: « Nda ngha ka ná, iʼi ta vlaghatá slna nghapta ka inda mbəhuha ta faghuta la Israʼila ŋa ɗa. Ta vlagha vla yu, mayaka kagha tsaya, kagha nda zivira gha ŋa ɗekɗek. 9 Wya ŋa gha mayak mataba mbəhuha ta ghuɓuta kul draftá lu: Tsaya inda mbəhuha taŋ, ka nimaya, nda skwa pla ghəŋ ŋa ɗawa pla dmaku, nda inda skwa pla ghəŋ ŋa paya tvi ta klagaghata həŋ ŋa ɗa. Tsa mbəhuha nda ghuɓuta ya ná, ŋa kagha nda zivira gha tsaya. 10 Ka zuta ka manda skwa zay ta ghuɓuta. Laviŋ lava inda zgwana ta zay. Ka nzakwa tsi ka skwi nda ghuɓa da kagha.

11 Wya skwiha dzaʼa nzəglaku ka ŋa gha nda zwana gha, nda kwagha gha: Ta vlagha vla yu ta mbəhuha faghu la Israʼila, nda inda skwiha ya zukwanaf lu ta Yawe. Nda nza ŋa ghuni ŋa ɗekɗek. Inda gwal kul haɗ skwa tsaɗa ta həŋ ma həga ga ghuni dzaʼa zay. 12 Ta vlagha vla yu ta inda taŋtaŋa skwi ta vlata həŋ ŋa Yawe: Rɗi ya ɗina, nda ima inabi ta ka nuni, nda nimaya. Taŋtaŋa skwiha ta vlata həŋ ŋa Yawe, ta vlagha vla yu. 13 Mantsa ya taŋtaŋa ndəhatá yakwa skwiha maga həŋ ta haɗika taŋ ta hlakta həŋ ŋa Yawe, ŋa gha tsaya. Inda gwal kul haɗ skwa tsaɗa ta həŋ ma həga ga ghuni dzaʼa zay.

14 Inda skwi faghu la Israʼila ŋa Yawe ŋa ɗekɗek^* ná, ŋa gha tsaya. 15 Inda zumaliha mndu, nda inda zumaliha rini ta hlakta lu ŋa Yawe ná, ŋa gha tsaha ya guli. Ama nziya nza tsi ná, ka tsuʼa ka ta skwa vara inda zumaliha ka zgwana, ka tsuʼa ka ta skwa vara inda zumaliha rini ya ta tsaɗ lu. 16 Ka tsuʼa ka ta skwa vara zwana zgwana turtuk tila taŋ manda ya dzaʼa tsafta ka ta dzva ni, ŋa varata: Ka sulay hutaf taɓta gra skwi ma həga nda ghuɓa. Ndəgakwa sulay turtuk ná, ta magay ta gram ghwaŋpəɗ his^*. 17 Ama yaha ka da vara zumala sla, dər ŋa tuwak, dər ŋa gu: Faghu fa lu ta tsaha ya ŋa ɗa. Ka wutsikafta ka ta usa taŋ ta gwir, ka drafta ka ta ghwaviɗa taŋ ka mbəhu draf lu ta vu, zɗəgana həlata ni ta Yawe. 18 Sluʼa taŋ ná, ŋa gha, manda ya ta vlaghata lu ta ghuva nda rkufa zeghwi ta zukwaŋta^* lu ya guli, ŋa ga tsaya. 19 Inda mbəhuha nda ghuɓa ta faghuta la Israʼila ŋa Yawe ná, ta vlaghuna vla yu ŋa ghuni, nda zwana zgwana gha nda kwagha gha, ka zlahu ŋa ɗekɗek. Tsaya dzratá wi nda slughul^* ŋa ɗekɗek ta kəma Yawe, ŋa gha, nda zivira gha, » kaʼa.

20 Ka Yawe nda Haruna mantsa: « Haɗ haɗika za həga dzaʼa mutsafta ka ma haɗika taŋ wu, haɗ mayaka gha mataba taŋ guli wa. Iʼi mayaka gha nda za həga gha mataba la Israʼila.

21 Wya ŋa la Levi, ta vlaŋ vla yu ta həŋ ka za həga ta inda zakaha la Israʼila, ŋa mbəɗay nda slna ta mag həŋ, slna tumpula guyaku. 22 Mantsa tama, yaha la Israʼila da gavəgladaghata ta vata tumpula guyaku, dá klanaktá həŋ ta dmaku ta ghəŋa taŋ, dá rwutá həŋ. 23 La Levi kweŋkweŋ na gwal dzaʼa maga slna tumpula guyaku, hahəŋ dzaʼa da kla krughuva taŋ dzaʼa gata həŋ ma tsa vli ya. Dzaʼa nzakway ŋa zivira ghuni ka zlahu ŋa ɗekɗek. Haɗ həŋ dzaʼa mutsaftá haɗika za həga mataba la Israʼila wu, 24 kabga vlaŋ vla yu ta la Levi ka za həga taŋ ta zakaha dzaʼa hlapta la Israʼila ka mbəhu ŋa Yawe. Tsaya kəl yu ka mnanatá həŋ kazlay mutsafta a həŋ ta haɗika za həga mataba la Israʼila wu, » kəʼa.

25 Ka Yawe nda Musa guli mantsa: 26 « Ka mnanata ka ta la Levi, ka ka nda həŋ na: Ka zlghaf zlgha kuni ta mayak da la Israʼila, zakaha ta vlaghunata yu ka za həga ya, ka hlapta kuni ta zaka ka skwa mbəhu ŋa Yawe. Tsaya zaka ma zaka. 27 Dzaʼa nzakway tsa mbəhu klap lu ya manda mbəhu ta klapta sanlaha ta nimaya ta wa blikwi, nda skwi ma tsuʼaŋa ɗitsa yakwa inabi. 28 Manda tsaya dzaʼa klapta kaghuni guli ta mbəha ghuni ŋa Yawe ma inda zakaha ta tskafta kuni da la Israʼila. Ma tsa mbəhu ya, ka vlaŋta kuni ta Haruna mnda dra skwi ŋa Lazglafta ta mbəhu dzaʼa klapta kuni ŋa Yawe. 29 Ma inda tsa skwi dzaʼa vlaghunata lu ya, ka klanapta kuni ta Yawe ta ya ta malaghutá ɗinaku ma tsa skwiha ya, ka faghuta kuni nda ghuɓa ta həŋ.

30 Ka mnanata ka ta həŋ guli: Ta hlapta kuni ta ya ta ɗinuta ma inda ni, dzaʼa nzakway ka gragra ŋa kaghuni la Levi, manda nimaya ta wa blikwi, nda skwi ma tsuʼaŋa ɗitsa yakwa inabi. 31 Ka za kuni nda gwal ma həga ghuni ma inda vli, kabga tsaya nisəla slna ghuni mbəɗap lu nda slna tumpula guyaku. 32 Ma inda tsaha ya, faghunaghata a lu ta dmaku ka klap kla kuni ta ya ta malaghutá ɗinaku ma tsa skwiha ya wa. Yaha kuni da niŋta a kuni ka dzibata skwi ta mbəhu nda ghuɓa si da la Israʼila wu, dá rwutá kuni, » kaʼa.