Gədzeha dra urda Kurah
17
1 Ka Yawe nda Musa mantsa: 2 « Mnana mna ta Ilghazar, zwaŋa Haruna mnda dra skwi ŋa Lazglafta, ka hligiŋta tsi ta gədzehha ma tsa lanzəŋ ghandand ya, kwazidiŋha tsi diʼiŋ ta vu, kabga nda ghuɓa həŋ. 3 Gədzehha tsa mnduha ta skwatá dmakwa taŋ nda hafa taŋ ya, ka pslapta lu ka per ka per ŋa bukwanaghatá gwir, kabga maraŋ mara lu ta həŋ ta kəma Yawe, nda nza nda ghuɓa. Dzaʼa nzakway həŋ ka ŋizla ŋa la Israʼila, » kaʼa. 4 Ka hlaftá Ilghazar mnda dra skwi ŋa Lazglafta ta tsa gədzehha ka ghuva tili si ma vəl maray tsa gwal driŋ lu ta həŋ ya, ka pslaptá lu ŋa bukwamtá gwir nda tsi, 5 taɓta skwi mna Yawe nda ma wa Musa ya. Nda nza ka havu ŋa la Israʼila, kada kwala dzibata mndu, mndu ya kul nzakway ka zivira Haruna da gavadaghata ŋa dra urdi ta kəma Yawe, kada kwala tsa skwi ta slanaghatá Kurah nda gwal kawadaga nda tsi ya ta sləglata həŋ.Ganavata mnduha ta sidi ta i Musa nda Haruna
6 Ga mahtsima ni, ka ruruŋwaku inda guyatá ghəŋa la Israʼila ta ruruŋwaku ta ghəŋa i Musa nda Haruna. Ka həŋ mantsa: « Rwana rwa kuni ta mnduha Yawe! » ka həŋ. 7 Ma fitika tskavata guyatá ghəŋa mnduha ka gruŋtá i Musa nda Haruna ya, ka mbəɗavata həŋ təv tumpula guyaku, ka gi saha kusay da bukwamtá tumpul guyaku, ka zlagapta glakwa Yawe.
8 Ka lagha i Musa nda Haruna ta kəma tumpula guyaku. 9 Ka Yawe nda Musa mantsa: 10 « Sabwa sa mataba na guyatá ghəŋa mnduha na, ka zaɗanata yu ta həŋ nda va nana! » kaʼa. Ka zlambatá həŋ zluzlumbruh ta haɗik.
11 Ka Musa nda Haruna mantsa: « Klaf kla ta gədzeha gha, faf fa ta lanzəŋa gwir tida, pghanagha pgha ta urdi ŋa dray nda dra. La misimmisim təv guyatá ghəŋa mnduha, ka slərɓanapta ka ta zughu ta həŋ, kabga nda gufa ŋuɗufa Yawe, nda ghada zlrafta zləmnda, » kaʼa. 12 Ka klaftá Haruna manda ya mnana Musa, ka hwayadaghatá tsi da taba guyatá ghəŋa mnduha, tsaw nda ghada zlrafta zləmnda mataba mnduha. Ka pghanaghatá tsi ta urdi ŋa dray nda dra, ka slərɓanaptá ta tsi ta zughu ta mnduha. 13 Ka sladatá tsi ma takataka gwal nda rwa nda gwal ta nda hafu, ka lɓatá tsa zləmnda ya. 14 Gwal rwana tsa zləmnda ya ná, dəmbuʼ ghwaŋpəɗ fwaɗ nda ndəfáŋ dərmək (14.700) mbsaka taŋ, mbəɗaf a lu ta gwal ta rwuta ma fitika skwi maga Kurah wa. 15 Manda lɓata tsa zləmnda ya, ka vradaghatá Haruna da Musa ta wa tgha lami da tumpula guyaku.
Dafa Haruna
16 Ka Yawe nda Musa mantsa: 17 « Mnana mna ta la Israʼila, ka zlghafta ka da həŋ ta dafaha ghwaŋpəɗ his, dafa turtuk da inda mali ma mndəra mndu. Ka vivindafta ka ta hga inda mndu ta dafa ni. 18 Ta tsa dafa la Levi ya, ka vindafta ka ta hga Haruna, kabga dzaʼa nzakway dafa turtuk ta mali ma mndəra mndu turtuk. 19 Ka pghata ka ta tsa dafaha ya ma tumpula guyaku ta kəma akwata dzratá wi, ma vla guyakwa ɗa nda kaghuni ya. 20 Tsa mndu zbap yu ya, dzaʼa dzuslaf dzusla dafa ni. Mantsa ya, dzaʼa diʼiŋiŋta yu nda iʼi ta ruruŋwakwa la Israʼila, ta ruruŋwaku nda kaghuni ya, » kaʼa.
21 Ka mnanatá Musa ta la Israʼila, ka vlaŋtá inda maliha taŋ ta dafa turtuk turtuk, dafa turtuk ta mali ma mndəra mndu, ka dafa ghwaŋpəɗ his a tsi. Dafa Haruna ya ná, ma takataka sanlaha ma dafa. 22 Ka pghatá Musa ta tsa dafaha ya ta kəma Yawe ma tumpula akwata dzratá wi ya. 23 Ga mahtsima ni, ka lam Musa da tumpula akwata dzratá wi, kəʼa kəʼa nda dafa Haruna ma mndəra la Levi ná, nda dzuslu tida. Dzuslaf dzusla ta dzuslu, ka vzlizlaftá vzlizla, ka ndəhaftá amandaha tida. 24 Ka hlagaptá Musa ta inda tsa dafaha ta kəma Yawe ya, ŋa maranaŋtá inda la Israʼila. Ka nghanatá həŋ, ka kalaghutá inda mali ta dafa ni.
25 Ka Yawe nda Musa mantsa: « Vradanam vra ta dafa Haruna ta kəma akwata dzratá wi ya, ka fata ka ka ŋizla ŋa gwal kul haɗ ta hanaganatá ghəŋ kada hlanata ka ta ruruŋwakwa taŋ ta ghəŋa iʼi, ŋa kwala taŋ rwuta, » kaʼa. 26 Ka magatá Musa manda ya mnanaf Yawe, mantsa ya, ka magatá tsi. 27 Ka la Israʼila nda Musa mantsa: « Ngha ɓa! Nda kɗa gwaɗa ta aŋni, nda zaɗa ŋni, nda zaɗa ŋni demdem! 28 Dər wati ma mndu ta gavadaghata, dər wati ma mndu ta gavadaghata ta vata həga tumpula Yawe ná, dzaʼa mtu mta. Ka mantsa tsi, nda zaɗa inda aŋni nda tsa tama! » ka həŋ.