Zlahuha ghwaŋ
5
1 Ka hgafta Musa ta inda la Israʼila. Kaʼa nda həŋ mantsa: « La Israʼila, snawa ta na zlahuha, nda tva skwiha ŋa magay ta mnaghunata yu ta wa sləməŋa ghuni gita na. Ka tagha kuni, ka ŋanata kuni ɗina ŋa maga slna nda tsi. 2 Dzraf dzra Yawe, Lazglafta mu ta wi nda amu ma Hwarev. 3 Nda dzidzíha mu a dzrafta Yawe ta tsa wi ya wu, ama nda inda na amu hadna ta ndiri gita na. 4 Ka gwaɗgamatá Yawe kuma nda kuma ma takataka vu ta ghwá. 5 Ma tsa fitik ya, ka nzatá yu mataba ghuni nda Yawe ŋa mnaghunatá gwaɗa mna Yawe, kabga ta zləŋay kaghuni ta vu, ŋladaf a kuni ta ghwá wa. Kaʼa mantsa:6 “Iʼi ná, Yawe yu, Lazglafta gha ta klagaghapta ma ga vuʼa ma haɗika Masar.
7 Yaha ka nda sanlaha ma lazglaftaha ba iʼi turtukwa ɗa.
8 Ma tsaf ka ŋa ghəŋa gha ta skwa wuyay dər ka wu ka wu tsi ta gara vgha nda skwiha nda gaftək ta luwa, nda ya ndakalandala ta haɗik, nda ya ma imi mista haɗik. 9 Ma tsəlɓu ka ta tsəlɓu ŋa tsa skwiha ya, ma vlə ka ta glaku ŋa taŋ, kabga iʼi Yawe, Lazglafta gha ná, Lazglafta ta draku yu. Ta ghuzlanaptá iri ta zwani dabga dmakwa dadaha taŋ, ha ka lab ta zigha ndindliŋ, ka zigha papah a tsi, ŋa gwal husaŋ yu ta həŋ. 10 Ama ta maranaŋ mara yu ta zɗakwa ɗa ha ka lab ta dəmbuʼata zighiha ta gwal ta ɗvuta iʼi, ta sna zlahuha ɗa.
11 Ma hgaŋ ka ta hga Yawe, Lazglafta gha ka bətbət. Iʼi Yawe ná, haɗ yu dzaʼa zlanata tsanaghatá guma ta mndu ta hga hga ɗa ka bətbət wa.
12 Ka ŋanata ka ta fitika Sabat ŋa nzakwa ni nda fa ka ŋa Yawe, Lazglafta gha manda ya mnaghaf tsi. 13 Ma fitik mkuʼ, dzaʼa magata ka ta inda slnaha gha. 14 Ama mandəfáŋa fitik ya ná, nda nza ka Sabat ŋa Yawe, Lazglafta gha. Ma mag ka ta dər wati ma slna, dər kagha, dər zwaŋa gha, dər makwa gha, dər kwalva gha, dər kurɗa gha, dər sla gha, dər kəɗiha gha, dər rina fisika gha, dər mayəm ta nzakw ma səla ghuni a tsi, ka mbiʼapta kwalvaha gha nda kurɗuha gha ta vgha manda ŋa gha.
15 Havap hava ka si ta nzakwa gha ka vuʼa ta haɗika Masar, ka klagaghaptá Yawe, Lazglafta gha nda glakwa mbrakwa ni, nda ya nda tɗatá dzva ni. Tsaya kəl Yawe, Lazglafta gha ka mnaghafta ka ŋanata ka ta fitika Sabat kəʼa.
16 Vlaŋ vla ta glaku ta i da gha, nda ma gha, manda ya mnaghaf Yawe, Lazglafta gha, kada slravaghata hafa gha, ŋa nzata gha ləŋləŋ ta haɗik dzaʼa vlaghata Yawe, Lazglafta gha.
17 Ma dza ka ta mnda səla.
18 Ma hlə ka tiri.
19 Ma ghal ka ta ghali.
20 Ma gə ka ta masləmtsəka tsakalawi ta ghəŋa sləvda gha.
21 Ma haraʼu ka markwa sləvda gha, ma tɗu ŋuɗufa gha ta skwa sləvda gha, dər həga ni, dər vwaha ni, dər kwalva ni, dər kurɗa ni, dər sla ni, dər kəɗiha ni,” kaʼa.
22 Tsaya gwaɗaha ya mnana Yawe ta inda guyatá ghəŋa ghuni ta ghwá ma takataka vu, ma kusay, ma grum tɗik, nda lwi dagala. Haɗ sana skwi sganagha tsi wa. Ka vindaftá tsi ta klamha his, ka vlihata.
Nzakwa Musa mataba mnduha nda Lazglafta
23 Manda snaŋta ghuni ta tsa lwi ta sab ma grum tɗik ta ghwá ka vu ya, ka gavagaghatá kuni da iʼi, nda inda maliha ma mndəra mnduha ghuni, nda galata mnduha ghuni tani. 24 Ka kuni mantsa: “Maraŋnaŋ mara Yawe, Lazglafta mu ta sgita ni, nda glakwa ni. Snaŋ sna ŋni guli ta lwa ni ta sabi ma takataka vu, nda ngha ŋni gita kazlay, ta gwaɗgana gwaɗa Lazglafta ta mnda səla ka nzata ni nda hafu kəʼa. 25 Ndanana, kabgawu dzaʼa kəl lu ka rwaŋnata nda na mghama vu na na? Ka tata kɗaŋ kɗa ŋni ta sna na lwa Yawe, Lazglafta mu na katsi, dzaʼa rwu rwa ŋni! 26 Tsaya ná, wati ma mndu ya, tahula snaŋta ni manda aŋni ta lwa Lazglafta nda hafu mida ta gwaɗagapta ma vu, ŋa nzata ni nda hafu na? 27 Gavadagha gava kagha Musa, ka sna ka ta inda skwi ta mnə Yawe, Lazglafta mu. Tahula tsaya, ka sagha ka mnaŋnatá inda skwi dzaʼa mnaghata Yawe, Lazglafta mu. Dzaʼa snay ŋni, dzaʼa magay ŋni ta slna nda tsi,” ka kuni.
28 Ka snaŋtá Yawe ta gwaɗaha ya gwaɗ kuni nda iʼi. Kaʼa nda iʼi mantsa: “Snaŋ sna yu ta gwaɗaha ya gwaɗ mnduha nda kagha. Ta ŋa taŋ tsa gwaɗa ya. 29 Ka si má da nza nza tsa ŋuɗufa taŋ ya mantsa, ŋa zləŋay taŋ ta iʼi, ka ŋanata taŋ inda fitik ta inda zlahuha ɗa, kada nzata həŋ nda zwana taŋ ləŋləŋ ŋa ɗekɗek. 30 La mnanatá həŋ ka vra həŋ da tumpulha taŋ! 31 Ama kagha Musa, nza nza ta vata iʼi ka mnaghafta yu ta inda gwaɗaha, nda zlahuha, nda tva skwiha ŋa magay ŋa taghanafta gha ta həŋ, ŋa magay taŋ ma tsa haɗik vlaŋ yu ta həŋ ŋa ŋa taŋ ya,” kaʼa.
32 Ka ŋavata kuni tama ka maga skwi manda va ya mnaghunaf Yawe, Lazglafta ghuni. Yaha kuni da mbəɗaghutá vgha dər nda ga zeghwi, dər nda ga zlaɓa. 33 Ka mbaɗa kuni ta mbaɗa nda tva ni ta inda tvi ya mnaghunaf Yawe, Lazglafta ghuni, kada nzata kuni nda hafu, ŋa nzata ghuni ləŋləŋ, ŋa slravaghata tɓaŋa ghuni ta haɗik dzaʼa kuni zata ŋa ŋa ghuni. »