Zlahuha ghwaŋ
20
1 Ka Lazglafta nda la Israʼila mantsa:2 « Iʼi ná, Yawe yu, Lazglafta gha ta klagaghapta ma ga vuʼa ma haɗika Masar.
3 Yaha ka nda sanlaha ma lazglaftaha ba iʼi turtukwa ɗaª.
4 Ma tsaf ka ŋa ghəŋa gha ta skwa wuyay dər ka wu ka wu tsi ta gara vgha nda skwiha nda gaftək ta luwa, nda ya ndakalandala ta haɗik, nda ya ma imi mista haɗik. 5 Ma tsəlɓu ka ta tsəlɓu ŋa tsa skwiha ya, ma vlə ka ta glaku ŋa taŋ, kabga iʼi Yawe, Lazglafta gha ná, Lazglafta ta draku yu. Ta ghuzlanaptá iri ta zwani dabga dmakwa dadaha taŋ, ha ka lab ta zigha ndindliŋ, ka zigha papah a tsi, ŋa gwal husaŋ yu ta həŋ. 6 Ama ta maranaŋ mara yu ta zɗakwa ɗa ha ka lab ta dəmbuʼata zighiha ta gwal ta ɗvuta iʼi, ta sna zlahuha ɗa.
7 Ma hgaŋ ka ta hga Yawe, Lazglafta gha ka bətbət. Iʼi Yawe ná, haɗ yu dzaʼa zlanata tsanaghatá guma ta mndu ta hga hga ɗa ka bətbət wa.
8 Havap hava ka fitika Sabat ŋa nzakwa ni nda fa ka ŋa ɗa. 9 Ma fitik mkuʼ, dzaʼa magata ka ta inda slnaha gha. 10 Ama mandəfáŋa fitik ya ná, nda nza ka Sabat ŋa Yawe, Lazglafta gha. Ma mag ka ta dər wati ma slna, dər kagha, dər zwaŋa gha, dər makwa gha, dər kwalva gha, dər kurɗa gha, dər rina gha, dər mayəm ta nzaku mataba ghuni a tsi. 11 Ma fitik mkuʼ magafta Yawe ta luwa, nda haɗik, nda imi, nda inda skwi ma həŋ, ka mbiʼaptá tsi ta vgha ni baɗ mandəfáŋ. Tsaya kəl Yawe ka tfanaghatá wi ta Sabat*, ka fatá tsi ka ŋa ni.
12 Vlaŋ vla ta glaku ta i da gha, nda ma gha, kada slravaghata hafa gha ta haɗik dzaʼa vlaghata Yawe, Lazglafta gha*.
13 Ma dza ka ta mnda səla*.
14 Ma hlə ka tiri*.
15 Ma ghal ka ta ghali*.
16 Ma gə ka ta masləmtsəka tsakalawi ta ghəŋa sləvda gha*.
17 Ma harauʼa ka ta həga ga sləvda gha, ma haraʼu ka ta markwa sləvda gha, dər kwalva ni, dər kurɗa ni, dər sla ni, dər kəɗiha ni, dər inda skwa ni*, » kaʼa.
Hluta zləŋ ta la Israʼila
18 Ta snay inda la Israʼila ta tsa ŋəzla luwa, nda ghudzaga duli ya. Ta nghay həŋ ta wuɗa luwa guli, nda kuɗumbulatá tsa ghwá ya ka ɗiŋ. Na nghay taŋ ta tsa skwiha ya, ka ghudzaku həŋ ta ghudzaku da zləŋ, ka nzaktá həŋ kətsauʼ diʼiŋ*. 19 Ka həŋ nda Musa mantsa: « Kagha katsi gwaɗay ŋa ŋni, dzaʼa snagha sna ŋni. Ama ma gwaɗ Lazglafta ŋa ŋni da rwuta ŋni, » ka həŋ. 20 Ama ka Musa nda mnduha mantsa: « Ma zləŋ kuni ta zləŋ! Sagha da dzəghaghunata Lazglafta ŋa ghuni ta zləŋay, kada kwala kuni ga dmaku, » kaʼa. 21 Ka nzaktá mnduha kətsauʼ diʼiŋ, ta gavadaghatá Musa ndusa nda tsa kusay tɗik katakata nzam Lazglafta mida ya.
Zlahu ta ghəŋa skwa pla ghəŋ
22 Ka Yawe nda Musa mantsa: « Wya skwi dzaʼa ka mnanatá la Israʼila: “Nda ngha vərɗa kaghuni ká yu gwaɗagata ka kaghuni daga ta luwa. 23 Ma tsatsaf kuni ŋa ghəŋa ghuni ta sana lazglaftaha ka kfura tsedi nda ya ka dasu, ma magaɗiva kuni. 24 Ka magaɗifta kuni ta gwir ka haɗik. Tida dzaʼa plihata kuni ta ghəŋ nda rina fisika ghuni, nda slaha ghuni, ŋa dray tsuh tsuh, nda pla ghəŋa zɗaku guli. Ma inda dər wati ma vli dzaʼa havaghunakta yu ta hga ɗa ya ná, dzaʼa sagha sa yu da kaghuni, ŋa tfaghunaghata ɗa ta wi. 25 Ka dzihwaɗif dzihwa kuni ta gwir nda pala katsi, yaha kuni dzihwafta nda palaha fifiɗa kuni nda fifiɗa. Ta fiɗ kuni ya ná, dmanaf dma kuni nda tsa*. 26 Yaha kuni dzihwaɗiftá gwir ya ta ŋlə lu nda ŋla tida, kada kwala lu ta nghadafta ka fərdiʼu a tsa mndu ta ŋlə tida ya,” » kaʼa.