Ɓhadaghata la Israʼila dista ghwá Sinay
19
1-2 Ka sliʼaftá la Israʼila ma Rəfidim. Ta mahkəna tili tahula saba taŋ ma Masar, baɗ taŋtaŋa fitik ma va tsa tili ya, ka ɓhadaghatá həŋ ta mtaka Sinay. Ka fatá həŋ ta ghuɓa taŋ ma tsa mtak ya mista ghwá. 3 Ka sliʼaftá Musa ka ŋlaghata ta tsa ghwá ya da guyaku nda Lazglafta. Daga ta bɗəma tsa ghwá ya, ka hgaŋtá Yawe ta Musa, kaʼa nda tsi mantsa: « Wya ká ka dzaʼa mnanatá la Yakubu, ta skwi dzaʼa snanamta ka ta la Israʼila ya: 4 “Nda ngha vərɗa kaghuni ta skwi magana yu ta la Masar, nda ya ká yu hlaghunakta da hadna ndusa nda iʼi, manda hlay ta hlə dzala ta zwana ni ta zlambaka ni ya. 5 Ndana ná, ka fa fa kuni ɗina ta sləməŋ ka sna skwi ta mnaghunata yu, ka ŋana ŋa kuni ta dzratá wa ɗa nda kaghuni, dzaʼa nzakway kuni ka mnduha ɗa nda sgit ta həŋ mataba inda mndəra mnduha. Aŋ mndani, ŋa ɗa inda ghəŋa haɗik demdem. 6 Ama kaghuni, dzaʼa nzakway kuni ka ŋa ɗa ka gwal ga mghama dra skwi ŋa ɗa, ka mndəra gwal nda fa ŋa ɗa.” Tsaya skwi dzaʼa ka mnanatá la Israʼila, » kaʼa. 7 Ka vragatá Musa, ka hagaftá tsi ta la galata mndu mataba la Israʼila, ka rusanaftá tsi ta həŋ ta inda tsa skwiha mnanaf Yawe ŋa mnanatá həŋ ya. 8 Ka tsuʼaftá mnduha demdem ta wi ka skwa turtuk, ka həŋ mantsa: « Inda skwi mna Yawe ná, dzaʼa magay ŋni, » ka həŋ. Ka vraŋtá Musa ta zlgha wa mnduha ta Yawe.9 Ka Yawe nda Musa mantsa: « Wya yu dzaʼa lagha ma kusay tɗik katakata slaghaghata, kada snaŋta mnduha ta iʼi ta gwaɗa nda kagha. Mantsa tama, dzaʼa faf fa həŋ ta ghəŋ ta kagha ŋa ɗekɗek, » kaʼa. Ka mnanatá Musa ta Yawe ta zlgha wa mnduha.
10 Ka Yawe nda Musa guli mantsa: « Vra slanaghatá mnduha, ka ghuɓiŋta ta nzakwa taŋ gita nda ya mahtsim. Ka ghwaɓiŋta həŋ ta lgutha taŋ guli. 11 Ka payavata həŋ ŋa baɗima, kabga baɗima dzaʼa laha iʼi Yawe ta ghwá Sinay ta nghay mnduha demdem. 12 Ka kwaranata ka ta vli mista ghwá ta mnduha. Ka mnanata ka ta həŋ, ɗasuwa ka həŋ yaha həŋ da ŋlagafta ta na ghwá na, dər gavagaghata ta vata ni. Dər wati ma mndu ta gavagaghata ta vata ni, dzaʼa dza dza lu. 13 Dər má mndu tsi, dər má rini a tsi, haɗ lu dzaʼa zlanata nda hafu wa. Haɗ lu dzaʼa ksaŋta nda dzvu wu, ama dzaʼa zlambata nda zlamba lu nda pala, ka dzaʼa hahata nda hava a lu. Ba ka vya vya lu ta dula maŋazak ka tɗaŋtá lwi ni, dzaʼa kəl mnduha ka laviŋtá ŋlagafta ta ghwá, » kaʼa. 14 Ka vragatá Musa ta ghwá slanaghatá mnduha. Ka ghwaɓiŋtá tsi ta nzakwa mnduha ghwaɓiŋha hahəŋ ta lgutha taŋ guli. 15 Kaʼa nda həŋ guli mantsa: « Nzawa nza nda paya ta vgha ŋa kzla baɗima, yaha kuni da guya vgha nda marakw, » kaʼa.
16 Ga sərɗək baɗ mahkəna fitik, ta tsa ghwá ya ná, ka ŋəzlatá luwa, nda wuɗa luwa, nda kusay tɗik katakata, nda lwa duli nda mbraku katakata. Ka ghudzaku inda gwal ma ghuɓu ta ghudzaku da zləŋ. 17 Ka hlagaptá Musa ta mnduha ma ghuɓa taŋ ŋa dzaʼa da guyaku nda Lazglafta. Ka sladaghutá həŋ mista ghwá. 18 Ta tsa ghwá ya, sliʼavaf sliʼa ɗiŋ kuɗumbul, kabga saha Yawe ma vu tida, Ka sliʼaftá tsa ɗiŋ ya ma ghuvaŋata luwa manda ɗiŋa mghama vu. Ka gigɗavaftá inda tsa ghwá ya nda mbraku katakata. 19 Ka va sgaku snakwa lwa tsa duli ya nda mbraku katakata. Ka gwaɗ Musa ta gwaɗa, mbaɗa Lazglafta ka zlaghagaptá wa ni ma tsa ŋəzla luwa ya. 20 Ka saha Yawe ta bɗəma ghwá Sinay. Hada, ka hgadaftá tsi ta Musa ta bɗəma tsa ghwa ya. Ka laf Musa. 21 Ka Yawe nda tsi mantsa: « Vrada vra da mnanata ka ŋəɗa ŋəɗa ta mnduha: “Yaha həŋ da tsughwagaptá vli ya kwarana lu ta həŋ ŋa ngha iʼi Yawe, da rwuta ndəghata mnduha mataba taŋ.” 22 Dər gwal ta dra skwi ŋa ɗa tata gɗata ta sagha da Yawe ya guli, ka ghuɓiŋta həŋ ta nzakwa taŋ, da valaftá iʼi Yawe ta həŋ, » kaʼa. 23 Ka Musa nda Yawe guli mantsa: « Haɗ mnduha dzaʼa laviŋtá ŋlagafta ta ghwá Sinay wa, kabga nda ghada mnaŋnata gha ka ŋəɗa ŋəɗa kazlay kwara kwara ta vli mista ghwá, ka nzakwa tsi nda ghuɓa ŋa ɗa kəʼa, » kaʼa. 24 Ka Yawe nda tsi mantsa: « Vrada vra kagha, ŋa vragafta gha kawadaga nda Haruna. Ama yaha gwal ta dra skwi ŋa ɗa, nda hamata mnduha da tsughwaɗaptá vli ŋa safi da iʼi Yawe, da valaftá yu ta həŋ, » kaʼa. 25 Ka vragatá Musa tama slanaghatá mnduha, ka mnə tsi ŋa taŋ ta skwi ya mna Yawe.