Sabi 21

Zlahu ta ghəŋa nzakwa kwalvaha

1 Ka Yawe guli mantsa: « Wya gumaha dzaʼa ka da mnanatá la Israʼila:

2 Ka skwa skwa kuni ta zgun mataba la Hebru ŋa ga vuʼa, dzaʼa ksana ksa ta slna ka vaku mkuʼ. Ta mandəfáŋa vaku ya, ŋa saba ni flaʼu, haɗ sana skwi dzaʼa tsi plata wa. 3 Ka turtukwa ni tsi ta lagha tsi, turtukwa ni dzaʼa zliŋta lu guli. Ka nda marakw tsi ta lagha tsi, kawadaga dzaʼa saba markwa taŋ nda tsi. 4 Ka daŋahəga ni ta klanaftá marakw, ka yayanatá tsi ta zwana zgwana, ka kuʼaha a tsi katsi, ŋa daŋahəga ni tsa zwani ya, nda tsa marakw ya tani. Turtukwa ni dzaʼa saba tsa mndu ya. 5 Ama ka ka tsa vuʼa baŋluwa ya mantsa: “Ɗvu ɗva yu ta daŋahəga ɗa, nda markwa ɗa, nda zwana ɗa tani, va a yu ta sab ŋa nzakway flaʼu wu,” kaʼa, 6 tsaya tama ná, dzaʼa kladagha kla daŋahəga ni ta kəma Lazglafta, ŋa fata ta vata paɗəwa tgha, ka ta vata wa tgha a tsi, ŋa zlranapta ni ta sləməŋ nda dzili, ŋa nzakwa ni ŋa ksanatá slna ŋa ɗekɗek.

7 Ka skwap skwa mndu ta makwa ni ŋa ga vuʼa katsi, haɗ lu dzaʼa zliŋtá tsa makwa ya manda ya ta zliŋta lu ta zgun ka vuʼa wa. 8 Ka si skwa ŋa nzakway ka markwa taŋ daŋahəga ni, ama tahula tsa, zɗəgiha a wu kaʼa katsi, zlanaŋta ni ta da ni ka varata tsi. Laviŋ a ta skwanaptá mayəm wu, kabga magana a ta skwi ɗina wa. 9 Ala ka skwa ŋa vlaŋtá zwaŋa ni tsi katsi, ka nu skwi ta raku ta mag lu ŋa kuʼaha ya, tsaya dzaʼa maganata tsi. 10 Ka klaf kla daŋahəga ni ta sana marakw katsi, yaha da htanaghuta ŋa tsa taŋtaŋa marakw ya ta vla skwa zay, nda lgutha, mantsa ya han nda tsi guli. 11 Ka maga a tsi ŋa ni ta tsa skwiha hkən ya wu, laviŋ lava ta sab flaʼu, haɗ skwi dzaʼa tsi plata wa. »

Zlahuha ta ghəŋa sanlaha ma gatá dmaku

12 « Dər wa ta dzuŋtá mndu ka mtutá tsa mndu ya, dzaʼa dza dza lu ta tsatsi guli. 13 Ka fərtaku tsi kəl tsi ka dzata, ka Lazglafta ta masanamta ma dzvu katsi, dzaʼa maragha mara yu ta vli ŋa hwayaghuta ni da ɗifaghuta. 14 Ama kawayaka skwi, hiɗaku magaf tsa mndu ya ka dzatá mndu ka palama, dər ta vata gwir ɗa tsa mndu ya, dzaʼa ksaf ksa lu ŋa dzata.

15 Dər wa ta dzuŋta da ni, ka ma ni a tsi, dzaʼa dza dza lu ta tsa mndu ya.

16 Dər wa ta ksaghatá mndu, dər slanagha sla lu ma dzva ni, ka nda ghada a skwapta ni, dzaʼa dza dza lu ta tsa ghali ya.

17 Dər wati ma mndu ta razatá^ª da ni, ka ma ni a tsi, dzaʼa dza dza lu ta tsa mndu ya.

18 Ka zlərɗaf zlərɗa mnduha ta wi, ka dzuŋtá sani ta sani nda pala, ka nda dembi a tsi, mta a tsa mndu ya wu, ama ka hananatá tsi, 19 ka ta laviŋ lava tsi ta sliʼavata ta dafa ka wawavata mabli katsi, flaʼu vgha tsa mndu ta dzuŋta ya, ama nghapta ni ka tsa mndu ya ha ka mbafta ni. Planaha guli ta inda tsa vagha ni ta haɗik ya.

20 Ka lagha mndu ka dzuŋta nda sarak ta vuʼa ni ka zgun ka ka marakw a tsi, ka mtamtá tsi ma dzva ni katsi, dzaʼa plam pla lu. 21 Ala ka maga maga tsa vuʼa ya ta fitik turtuk, ka his a tsi kada mtuta, haɗ lu dzaʼa plamta wu, kabga si ŋa ni ya.

22 Ka lagha mnduha ka zlərɗaftá wi, ka dzə həŋ ta vgha, ma tsa dza vgha taŋ ya ná, ka dzuŋtá həŋ ta marakw nda huɗi, ka gi saghu zwaŋ. Ka haɗ sana ɗaŋwa wu, dzaʼa play tsa mndu ta dzuŋta ya ta skwi dzaʼa ɗawaŋta zəʼala tsa marakw ya da tsi, ŋa plata ni manda ya dzaʼa tsiŋta guma ta ghəŋa ni. 23 Ama ka nuna tsi ka ɗaŋwa, nda hafu ta pla lu ta hafu, 24 iri ŋa pla iri, sliʼiŋ ŋa pla sliʼiŋ, dzvu ŋa pla dzvu, səla ŋa pla səla, 25 drata nda vu ŋa pla drata nda vu, balaku ŋa pla balaku, ɗgata ŋa pla ɗgata.

26 Ka lagha mndu ka dzuŋtá vuʼa ni, ka zgun ka ka marakw a tsi ta iri ka pslanapta, zlanata ni flaʼu ŋa pla ira ni. 27 Ka sliʼiŋa vuʼa ni, ka zgun ka ka marakw a tsi nduliŋ tsi, zliŋta ni flaʼu ŋa pla sliʼiŋa ni. »

Zlahuha ta ghəŋa rini

28 « Ka lagha sla ka dzuŋtá mndu nda duli, dər zgun tsi dər marakw a tsi, ka mtuta tsi, dzaʼa zlamba zlamba lu ta tsa sla ya nda pala, ama haɗ lu dzaʼa za sluʼa ni guli wa. Haɗ lu dzaʼa tsanaghatá guma ta mnda sla wa. 29 Ka ta dza mndu tsa sla ya manda ghalya, ka mnanata lu ta mnda sla, ama ka kwalaghutá tsi ta nghay, ka dzatá tsa sla ya ta zgun ka marakw a tsi katsi, dzaʼa zlamba zlamba lu ta tsa sla ya nda pala ka dzata, dzaʼa dza dza lu ta mnda sla guli. 30 Ka pla pla ta skwi ka lu nda mnda sla katsi, plata ni ta inda skwi dzaʼa ɗawaŋ lu da tsi ŋa vara hafa ni. 31 Ka lagha sla ka dzuŋta nda duli ta zwaŋa zgun ka makwa a tsi, manda va tsaya dzaʼa tsanaghata lu ta guma. 32 Ka vuʼa ka zgun ka ka marakw a tsi, dzuŋ sla nda duli katsi, planata tsa mnda sla ya ta sulay hkən mbsak ta daŋahəga ni ma tsa vuʼa ya. Dzaʼa zlamba zlamba lu ta tsa sla ya nda pala ka dzata.

33 Ka lagha mndu ka guniŋtá ghurum, ka lap nda la a tsi ta ghurum kul huŋtá wa ni, ka dɗaghatá sla ka kəɗih a tsi dida, 34 dzaʼa plana pla tsa mnda ghurum ya ta tsedi ta mnda ma skwi taɓta skwa ni. Ama ŋa tsa mndu ta platá tsedi ya mbla tsa skwi ya.

35 Ka lagha sla sana mndu ka dzuŋtá sla sana mndu nda duli ka dzata, skwapta taŋ ta tsa sla ta ndiri ya ka dganaptá tseda ni. Dganapha həŋ ta mbla tsa sla ta mtuta ya guli. 36 Ka ta dza mndu tsa sla ya manda ghalya, ka mnanata lu ta mnda sla, ama ka kwalaghutá tsi ta nghay, plamta ni nda sla ŋa pla sla taɓ tida, ka klay ni ta tsa mbla sla ya ŋa ni.

37 Ka lagha mndu ka ghalaftá sla ka rina fisik a tsi, ka hnuta ka skwap nda skwa a tsi, ka sla hutaf dzaʼa plamta tsi ta tsa sla ya, ka rina fisik fwaɗ dzaʼa plamta tsi ta tsa rina fisik ghalaf tsi ya, » kaʼa.