Mali mataba zlahuha
6
1 « Wya gwaɗaha, nda zlahuha, nda tva skwiha ŋa magay mnaɗif Yawe, Lazglafta ghuni ŋa taghaghunafta, ŋa magay ghuni ta slna nda tsi ta haɗik ya dzaʼa lam kuni dida dzaʼa kuni zata ŋa ŋa ghuni. 2 Magawa maga mantsa, kada zləŋa kuni ta Yawe, Lazglafta ghuni ma inda nzakwa ghuni nda hafu, nda ma ŋanata ghuni ta inda zlahuha ni, nda gwaɗaha ni ya mnaɗif tsi ta vlaghunata yu, kaghuni nda zwana ghuni, nda zighiha ghuni, kada slravaghata tɓaŋa ghuni. 3 Tsaya tama, fawa sləməŋ la Israʼila, ka snata kuni, ka ksa kuni ta slna nda tsi, ka da nzata kuni ləŋləŋ ŋa yafta ghuni tusak ta tsa haɗik ta mbəzaku uʼa nda zuɗum mida manda ya mnaghuna Yawe, Lazglafta dzidzíha ghuni ya.4 Sna ɓa Israʼila! Yawe na Lazglafta mu, Yawe turtuktuk. 5 Ɗvu ɗva ta Yawe, Lazglafta gha ma hya hya ŋuɗufa gha, nda inda hafa gha, nda inda mbrakwa gha. 6 Ka nza na gwaɗaha ta mnaghafta yu gita na ma ghəŋa gha. 7 Ka vriŋta ka ta mnay ŋa zwana gha. Ka mna ka ŋa taŋ mintgha gha, ta mbaɗ ka ta mbaɗa ta tvi, ta hanadatá ka, nda ya ta sliʼavatá ka. 8 Ka hbafta ka ka ŋizla ta dzva gha, ka fuŋta ka ka lamba ta wa bizlbizla kuma gha. 9 Ka vindafta ka ta slərpuha wa tgha həga gha, nda ya ta wa tgha luwa gha. »
Ma zanap la Israʼila ta Lazglafta
10 « Yawe, Lazglafta ghuni ta waɗanatá dzidzíha ghuni i Abraham, nda Izak, nda Yakubu kazlay dzaʼa hladaghunap hla ta haɗik ya vlaghuna tsi kəʼa. Hada, dzaʼa slanagha sla kuni ta luwaha dagala dagala, ɗina ɗina mida kul baŋta kaghuni, 11 nda həgaha nda ndaghatá inda skwiha ɗina ɗina mida kul tskamtá kaghuni, nda vavrəmha kul lalaŋtá kaghuni, nda inabiha nda zaytunha kul ŋaŋaɓaŋtá kaghuni. Dzaʼa zay kuni ka baghakwa ghuni. 12 Ɗasuwa ka kuni, dá zanaptá kuni ta Yawe ta hlagaghunapta ma Masar ma ga vuʼa ya. 13 Yawe, Lazglafta ghuni dzaʼa kuni da zləŋay, ŋa ni dzaʼa tsəlɓa kuni ta tsəlɓu, nda hga ni dzaʼa waɗa kuni ta waɗu. 14 Ma lə kuni mista sanlaha ma lazglaftaha, lazglaftaha gwal ta waghunafta, 15 kabga Yawe, Lazglafta ghuni ta nzakw mataba ghuni ná, Lazglafta draku ya. Ɗasuwa ka kuni, dá gufaftá ŋuɗufa Yawe, Lazglafta ghuni ta ghəŋa kaghuni ŋa zaɗaghunata ni ta ghəŋa haɗik.
16 Ma dzəghə kuni ta Yawe, Lazglafta ghuni manda ya dzəghaŋ kuni ma Masa ya*. 17 Ka ŋanata kuni ɗina ta gwaɗaha ya mnaf Yawe, Lazglafta ghuni, nda zlahuha, nda tva skwiha ŋa magay ya mnaghunaf tsi ya. 18 Ka maga kuni ta skwi tɗukwa, nda skwi ɗina ta wa ira Yawe, ŋa nzata ghuni ləŋləŋ, ŋa lama ghuni zatá tsa haɗik ta ɗinuta waɗana Yawe ta dzidzíha ghuni ŋa vlaghunata ŋa ŋa ghuni, 19 nda ma ghəzliŋta Yawe ta inda ghumaha ghuni diʼiŋ nda kaghuni manda ya mna tsi ya.
20 Baɗ mahtsim, ka ɗawaŋ ɗawa zwana ghuni dazlay: “Nahgani klatá ghəŋa na zlahuha na, nda na gwaɗaha na, nda na tva skwiha ŋa magay mnaghunaf Yawe, Lazglafta mu na na?” ka həŋ, 21 ka kuni dazlay nda həŋ na: “Si nza nza mu ka vuʼa Firʼawna ma Masar, ama ka hlagamaptá Yawe nda glakwa mbrakwa ni. 22 Ka magatá Yawe ta wa ira mu ta mazəmzəmha nda mandərmimiha dagala dagala ka zləmnda ta ghəŋa Masar, nda Firʼawna nda la ga taŋ tani. 23 Ama amu ya, ka hlagamaptá tsi hada, ŋa hlagamaghata, ŋa vlamatá ta na haɗik waɗana tsi ta dzidzíha mu na. 24 Ka mnamaftá Yawe ŋa snata mu ta inda tsa zlahuha ya, ŋa zləŋay mu ta Yawe, Lazglafta mu, ŋa mutsay mu ta nzata ləŋləŋ ma nzakwa mu, ŋa nzulanata ni ta hafa mu manda va na nzakwa ni gita na. 25 Dzaʼa nzakway mu ka tɗukwa mnduha, ka ŋana ŋa mu ta inda tsa gwaɗaha ya manda ya mnamaf Yawe, Lazglafta mu ya,” ka kuni dzaʼazlay. »