<<    <     Vrafta ta zlahu     7     >    >> 
Zaɗanatá la Kanʼana nda skwa wuyayha taŋ
7
1 « Dzaʼa hladaghunam hla Yawe, Lazglafta ghuni da tsa haɗik ya dzaʼa nzakway ka ŋa ghuni ya. Dzaʼa ghəzliŋ ghəzla ta kəma ghuni ta la Het, nda la Girgis, nda la Amuru, nda la Kanʼana, nda la Periz, nda la Hiv, nda la Yəbus, tsa mndəra mnduha ndəfáŋ ta ndəghuta malaghu mbrakwa taŋ ka ŋa ghuni ya. 2 Dzaʼa vlaghuna vla Yawe, Lazglafta ghuni ta həŋ ma dzva ghuni, ŋa kwarafta ghuni ta həŋ, ka zaɗanata kuni ta həŋ tuzluzl. Ma dzrə kuni ta wi nda həŋ, ma zɗanaŋ kuni ta huɗi ta həŋ. 3 Ma kluvus kuni ta makwa mataba ghuni nda həŋ. Ma vlaŋ kuni ta kwagha ghuni ta zwana taŋ, ma klanaf kuni ta kwagha taŋ ka marakw ta zwana ghuni, 4 kabga dzaʼa mbəɗiŋ mbəɗa həŋ ta zwana ghuni ŋa zlanatá Yawe, ka laghwa taŋ da tsəlɓu ŋa sanlaha ma lazglaftaha. Dzaʼa gufaf gufa ŋuɗufa Yawe ta ghəŋa kaghuni ŋa gi zaɗaghunata. 5 Katək ná, wya skwi dzaʼa kuni maganatá mndəra tsa mnduha ya. Ka zlazliŋta kuni ta gwirha taŋ, ka pasliŋta kuni ta dzugwatá palaha skwa wuyay taŋ, ka ghwadiŋta kuni ta udzuha Asera skwa wuyay taŋ, ka dariŋta kuni ta tsatsatá skwa wuyayha taŋ, 6 kabga nda fa kaghuni ka ŋa Yawe, Lazglafta ghuni. Tsatsi ta zbaptá kaghuni mataba inda mnduha ta ghəŋa haɗik ŋa nzakwa ghuni ka mnduha ni nda sgit ta həŋ.
7 Ka si ndiʼaf ndiʼa Yawe ta vgha nda kaghuni, ka zbapta kaghuni ya, kabga malaghuta yatá kaghuni ta ghəŋa inda sanlaha ma mndəra mnduha a wa. Kaghuni katək nda hta ka inda sanlaha. 8 Ama kabga ɗvuta Yawe ta kaghuni, ka hɗamta tsi ta skwi ya waɗana tsi ta dzidzíha ghuni. Tsaya kəl tsi ka hlagaptá kaghuni nda glakwa mbrakwa ni, ka hlagaghunapta, ka varagaptá kaghuni ma ga vuʼa ma dzva Firʼawna, mghama Masar.
9 Grafwa gra kazlay Yawe, Lazglafta ghuni ná, tsatsi turtukwa ni Lazglafta kəʼa. Ta ŋana ŋa dar ta dzratá wa ni nda zɗakwa ni, ŋa inda gwal ta ɗvuta, ta ŋanatá zlahuha ni, ha ka lagha ta zivir dəmbuʼ. 10 Ama ta gi vranam vra Lazglafta da kuma ni ta mndu ta husaŋta, ka zaɗanata. Haɗ ta gərɗaku ka planamtá mndu ya ta husaŋtá wu, ta gi vranam vra da kuma ni. 11 Ka ŋanata kuni ɓurkuts ta na gwaɗaha na, nda na zlahuha na, nda na tva skwi ŋa magay ta mnaghunata yu gita na. »
Tfa wiha ma snatá gwaɗa
12 « Ka sna sna kuni ta tsa skwiha ŋa magay ya, ka ŋanata, ka ksa slna nda tsi katsi, dzaʼa ŋana ŋa Yawe, Lazglafta ghuni ta dzratá wa ni, nda zɗakwa ni waɗana tsi ta dzidzíha ghuni ya. 13 Dzaʼa ɗvu ɗva ta kaghuni, dzaʼa tfaghunagha tfa ta wi, dzaʼa yaghunaf ya. Dzaʼa tfaghunagha tfa ta wi nda zwani, dzaʼa ŋwaku skwi ta vwahha ghuni ŋa mutsay ghuni ta nimaya, nda ima inabi ta ka nuni, nda rɗi. Dzaʼa sgaku nda sga slaha ghuni, nda rina fisika ghuni ta tsa haɗik dzaʼa vlaghunata tsi, manda ya waɗana tsi ta dzidzíha ghuni ya. 14 Dzaʼa nzakway kuni ka gwal nda tfa wi ta ghəŋa taŋ ka malaghuta inda mnduha. Slanaghata a lu ta zgun ka marakw a tsi ka dzəghəŋ mataba ghuni, dər mataba rina ghuni wa. 15 Dzaʼa kliŋ kla Yawe ta inda ɗaŋwaha. Inda ghwaɗaka zləmndaha ta slanaghatá la Masar ya snaŋ kuni ya ná, ghunafta a ta kaghuni wu, ama ta gwal husaŋ kuni ta həŋ demdem. 16 Dzaʼa zaɗana zaɗa kuni ta inda mndəra mnduha vlaghuna Yawe, Lazglafta ghuni ma dzva ghuni. Ksaghunata a həŋ ka hiɗahiɗa wu, tsəlɓəta a kuni ta tsəlɓu ŋa lazglaftaha taŋ wu, kabga nda nza tsaya ka dəɓəl ka ŋa ghuni. »
Yawe ná, zalama mnduha ni ya
17 « Kawayaka skwi ta ndanay kuni kazlay: “Mal ndəghata mndəra tsa mnduha ya ka aŋni! Waká ŋni dzaʼa ghəzlaftá həŋ na?” kəʼa. 18 Ma zləŋ kuni ta həŋ. Havakwa hava ta skwi ya magana Yawe, Lazglafta ghuni ta Firʼawna nda inda la Masar. 19 Havakwa hava ta inda ghwazla ira taŋ ya ngha kaghuni, nda mazəmzəmha, nda mandərmimiha magana tsi ta həŋ, nda glakwa mbrakwa ni, nda tɗatá dzva Yawe, Lazglafta ghuni ma hlagaghunapta ni. Manda tsaya dzaʼa maganata Yawe ta mndəra mnduha má si dzaʼa kuni zləŋay. 20 Tsa yeya a wu, dzaʼa ghunadagha ghuna Yawe, Lazglafta ghuni ta gwadzaŋ ha ŋa zaɗanatá gwal ta pɗata nda hafu, nda gwal ta ɗifaghuta. 21 Yaha kuni da zləŋ ta kəma tsa mnduha ya, kabga kawadaga Yawe, Lazglafta ghuni nda kaghuni, tsatsi Lazglafta dagala, ka makwitkwit. 22 Dzaʼa ghəzliŋ ghəzla Yawe, Lazglafta ghuni ta tsa mnduha ya ta kəma ghuni makiʼamakiʼa. Laviŋta a kuni ta zaɗanatá həŋ gi hada hada wu, dá yaghunaghatá nimtak. 23 Ama dzaʼa vlaghuna vla Yawe, Lazglafta ghuni ta tsa mnduha ya ma dzva ghuni. Dzaʼa hwazlaɓanaf hwazlaɓa ta həŋ katakata ha ka zaɗanatá həŋ. 24 Dzaʼa vlaghuna vla ta mghamha taŋ ma dzva ghuni. Ka hərɗiŋta ghuni ta hga taŋ ta ghəŋa haɗik. Haɗ ya dzaʼa sladata ta kəma ghuni wu, dzaʼa zaɗana zaɗa kuni ta həŋ demdem. 25 Ka dariŋta kuni ta tsatsatá skwa wuyayha taŋ. Yaha kuni da haraʼuwa dər kfura tsedi, dər dasu ta tsa skwa wuyayha ya. Yaha ka da hlay, dá nzakw tsi ka ŋatá dəɓəl ka ŋa ghuni, kabga nda nza həŋ ka manzakɗawayha da Yawe, Lazglafta ghuni. 26 Yaha ka da kladamta skwi ka manzakɗaway da həga ga ghuni, dá nzakw kaghuni guli ka skwi ŋa hwanzaɓiŋta manda tsatsi. Ka skwa manzakɗaway həŋ da kaghuni, ka mbiɗa kuni, kabga nda nza ka skwi ŋa hwanzaɓiŋta, » kaʼa.