Gwaɗaha tfa wi
28
1 « Ka snana sna kuni dardar ta gwaɗa Yawe, Lazglafta ghuni ka ŋanata nda ma maga slna nda inda tsa gwaɗaha mnaf tsi vlaghuna yu gita ya, dzaʼa kapaghunaf kapa Yawe, Lazglafta ghuni ka malaghuta inda sanlaha ma mndəra mnduha ta ghəŋa haɗik. 2 Wya inda tfa wi dzaʼa saha ta ghəŋa kaghuni ka nzaghunaghata, ka sna sna kuni ta gwaɗa Yawe, Lazglafta ghuni:3 Dzaʼa nda tfa wi ta ghəŋa ghuni ma luwa, dzaʼa nda tfa wi ta ghəŋa ghuni ma vwah.
4 Dzaʼa mutsay kuni ta tfa wi ŋa yafta ghuni, dzaʼa ŋwaku skwi ta vwaha ghuni, dzaʼa yaku rina ghuni ta bra, slaha ghuni nda rina fisika ghuni.
5 Dzaʼa nda tfa wi ta ghəŋa ghwanakha ghuni, dzaʼa sgaku hpu ta kwatahpwa ghuni.
6 Dzaʼa nda tfa wi ta ghəŋa kaghuni ma ɓhakta ghuni nda ya ma sliʼa ghuni.
7 Dzaʼa mbəɗana mbəɗa Yawe ta ghumaha ghuni ma sagha taŋ dika kaghuni. Təv turtuk dzaʼa sagha həŋ dika kaghuni, ŋa hwayafta taŋ nda ta təvha ndəfáŋ kavghakavgha.
8 Dzaʼa fanagha fa Yawe ta gasifa ta ghəŋa guvura ghuni nda ya ta ghəŋa inda slnaha ghuni. Dzaʼa tfanagha tfa Yawe, Lazglafta ghuni ta wi ta haɗik ya dzaʼa tsi vlaghuna.
9 Dzaʼa fa fa Yawe ta kaghuni ka mnduha ni nda ghuɓa, manda ya waɗaghuna tsi, ka ŋana ŋa kuni ta zlahuha Yawe, Lazglafta ghuni, ka ksa tva ni. 10 Dzaʼa nghay inda mnduha ta ghəŋa haɗik kazlay ŋa Yawe kaghuni kəʼa, ŋa zləŋay taŋ ta kaghuni. 11 Dzaʼa sgaghunagha sga Yawe ta zɗaku, nda ma pghata ghuni ta zwani, nda rina ghuni, nda skwiha ta vwahha ghuni, ta tsa haɗik waɗana Yawe ta dzidzíha ghuni ŋa vlaghunata ya. 12 Dzaʼa gunighunis guna Yawe ta guvura gadghəla ni ta nzakway ka luwa, ka nzəgaghunatá imi ta haɗik nda fitika ni, ka tfanaghatá wi ta ghəŋa inda slna ghuni. Dzaʼa ɓlay kuni ta nzawa ŋa ndəghata mndəra mnduha, ama haɗ kaghuni dzaʼa tsaktá wa. 13 Ka ghəŋ dzaʼa fata Yawe ta kaghuni, ka htur a wa. Ta kəma ta kəma dzaʼa dzaʼa kaghuni, vrəta a kuni ɗekɗek nda hul, ka sna sna kuni ta zlahuha ya mnaf Yawe, Lazglafta ghuni, ta mnaghunafta yu gita, ka ŋana ŋa kuni ka maga slna nda tsi wa. 14 Yaha kuni mbəɗaghutá vgha dər nda ga zeghwi, dər nda ga zlaɓa laghwi mista sanlaha ma lazglaftaha ŋa tsəlɓu ŋa taŋ, ka zluŋtá inda na tviha ya mnaghunaf yu gita na. 4
Gwaɗaha ksiʼi
15 Ama ka kwalaghu kwala kuni ta snatá gwaɗa Yawe, Lazglafta ghuni, ŋanata a kuni ka maga slna nda inda tsa gwaɗaha ni nda zlahuha ta vlaghunata yu gita na wu katsi, wya inda ksiʼiha dzaʼa slaghunaghata:
16 Dzaʼa nda ksiʼa kuni ma luwa ghuni, dzaʼa nda ksiʼa kuni ma vwahha ghuni.
17 Dzaʼa nda ksiʼa ghwanakha ghuni nda kwatahpuha ghuni.
18 Dzaʼa nda ksiʼa kuni yafta a kuni wu, nda skwiha ta vwaha ghuni, nda zwana slaha ghuni, nda ŋa rina fisika ghuni.
19 Dzaʼa nda ksiʼa kuni ma ɓhakta ghuni nda ya ma sliʼa ghuni.
20 Dzaʼa ghunadagha ghuna Yawe ta ksiʼi ta ghəŋa kaghuni, nda hwazlaɓaku, nda ghuya ɗaŋwa ma inda skwi ya dzaʼa kuni da magay, ha ka zaɗaghunata, ka gi zaɗighunista, dabga ghwaɗaka skwi ta mag kuni nda ma zlihata ghuni. 21 Dzaʼa favagha fa Yawe ta zləmnda, ha ka zaɗaghunata ni ta tsa haɗik dzaʼa lam kuni dida ŋa nzakwa ni ka ŋa ghuni ya. 22 Dzaʼa ghunadagha ghuna Yawe ta ɗaŋwa shaku, nda ŋuɗidar, nda həslaku, nda kuliŋ, nda ghwalaku, nda madzaɓdzaɓ, nda maghweftegeɗ. Inda tsa skwiha ya dzaʼa zbighunista ha ka zaɗatá kaghuni. 23 Dzaʼa nza nza luwa nda ta ghəŋa ghuni ndeleleŋ manda ghuva tili, haɗik nda mista ghuni guli manda kfur. 24 Ŋa da manaka imi, dzaʼa nzəgaghuna nza Yawe ta gninik nda rgitik. Ta luwa dzaʼa pghagata tsi ha ka zaɗatá kaghuni.
25 Dzaʼa vlaŋ vla Yawe ta tvi ta ghumaha ghuni ŋa zata ghwa ta ghəŋa kaghuni. Nda ta təv turtuk dzaʼa lagha kuni gəmata nda həŋ, ama nda ta təvha ndəfáŋ dzaʼa hwayafta kuni ta kəma taŋ. Dzaʼa mbiɗ nda mbiɗa inda ga mghamha nghaŋər həŋ ta skwi ta slaghunaghata. 26 Dzaʼa nzakway mbliha ghuni ka skwa zay inda zarakha ta luwa nda tsuɗayha ta haɗik. Haɗ mndu dzaʼa ghəzlaftá həŋ wa.
27 Dzaʼa ghunadagha ghuna Yawe ta mbuʼa mndərga ŋa la Masar, nda basər, nda hwasigwa, nda mahdzehdza dzaʼa kwal kul mbavata*. 28 Dzaʼa dzughnus dza Yawe nda ɗaŋwa halaway, nda ghulpaku, nda pɗamta. 29 Ma tsaka fitik, dzaʼa lalamaku manda ghulpata mndu ma grum. Dzaʼa bursuʼuwaku kuni ma slna ghuni. Dzaʼa ghuyay lu ta kaghuni inda fitik ka zləɗa kaghuni, haɗ mndu dzaʼa katapta kaghuni da həŋ wa.
30 Dzaʼa dzugway kuni ta makwa, ama sana mndu dzaʼa han nda tsi. Baf kuni ta həga, nzamta a kuni mida wa. Ŋaɓaf kuni ta vwaha inabi, tsagatá a kuni ta dər taŋtaŋa yakwa ni wa. 31 Dzaʼa ghwanaf ghwa lu ta sla ghuni ta kəma ghuni, zaŋta a kuni wa. Dzaʼa hlugudughunus hla lu ta kəɗihha ghuni ta kəma ghuni, vraghunakta a lu wa. Dzaʼa vlaŋ vla lu ta rina fisika ghuni ta ghumaha ghuni, haɗ mndu dzaʼa lagha kata kaghuni wa. 32 Dzaʼa vla vla lu ta zwana ghuni nda kwagha ghuni ŋa mndəra sana mndu, ŋa hərfuta ira ghuni inda fitik ta ngha vrakta taŋ, ama haɗ sana skwi dzaʼa kuni laviŋta magata wa. 33 Mnduha ta kul snaŋta kuni ta həŋ dzaʼa lagha zuta skwi si ta vwaha ghuni nda skwiha ya ghuyap kuni ta ɗaŋwa ta magay. Dula kaghuni yeya dzaʼa dulu lu ka gaghunaptá iri. 34 Dzaʼa tsutsa kuni ka halaway ma ngha skwiha ta magaku ta wa ira ghuni.
35 Dzaʼa dzughunus dza Yawe ta karam nda ya ta rkuf nda ghwaɗaka mbuʼa, daga ma huɗa səla ha da bɗəm, ŋa kwala ghuni mbafta.
36 Dzaʼa hlagha hla Yawe ta kaghuni nda mgham ya fam kuni ta ghəŋa kaghuni da mndəra sana mnduha kul snaŋta kaghuni, dər dzidzíha ghuni ta həŋ. Hada, dzaʼa magana maga kuni ta slna ta sanlaha ma lazglaftaha, ka udzu nda ya ka pala. 37 Dzaʼa mbiɗ nda mbiɗa mnduha dzaʼa hladaghata Yawe ta kaghuni da həŋ, nghaŋər həŋ ta skwi ta slaghunaghata, ŋa gagay taŋ ta kaghuni, ka ghuɓasa kaghuni.
38 Dzaʼa sləgam sləga kuni ta hulfa ŋulum ma vwah, ama mtsekw skwi dzaʼa kuni tskata, kabga dzaʼa zuza hiʼa maya. 39 Dzaʼa ŋaɓaf ŋaɓa kuni ta vwaha inabi ka payafta, ama haɗ kuni dzaʼa saŋtá ima yakwa ni, dər ka tskanata yakwa ni wu, kabga dzaʼa zuza mtarak. 40 Dzaʼa mutsaf mutsa kuni ta zaytuŋha ma inda kwakwara ghuni, ama haɗ kuni dzaʼa mutsafta rɗi ŋa masay wu, kabga dzaʼa stu sta yakwa ni. 41 Dzaʼa yaya kuni ta zwani nda kuʼaha, ama nzata a həŋ ka ŋa ghuni wu, kabga dzaʼa hlagha hla lu ta həŋ ka vuʼa. 42 Inda fuha nda inda skwiha ta vwahha ghuni, hiʼi maya dzaʼa zuta.
43 Dzaʼa ŋlaku nda ŋla matbayha ta nzakw mataba ghuni. Ama kaghuni, dzaʼa htagata nda hta ŋa ghuni. 44 Hahəŋ dzaʼa ɓla nzawa ŋa ghuni. Ama kaghuni, haɗta a skwi da kaghuni ŋa ɓla nzawa ŋa taŋ wa. Hahəŋ gwal dzaʼa nzakway ka ghəŋ, ta nzata kaghuni ka htur.
45 Dzaʼa sagha sa inda tsa ksiʼiha ya ta ghəŋa kaghuni, ka zbighunista ka slaghunaghata ha ka zaɗatá kaghuni, kabga kwala ghuni kul snatá lwa Yawe, Lazglafta ghuni nda ma ŋanata gwaɗaha ni nda zlahuha ni vlaghuna tsi. 46 Dzaʼa nzakway ka ŋizla nda mandərmimi ta ghəŋa kaghuni nda zivirha ghuni ŋa ɗekɗek.
47 Tshala kwalaghu kwala kaghuni ta maganatá slna ta Yawe, Lazglafta ghuni nda rfu ma zɗakwa ŋuɗufa ghuni ma nzakwa ni dəŋəz da kaghuni ya, 48 dzaʼa magana maga kuni ta slna nda maya nda maya, nda ndala nda ndala, ka fərdiʼu, bɗadar ta ghumaha ghuni dzaʼa ghunagaghata Yawe dika kaghuni. Dzaʼa faghunam fa ta udza sla ka kfur ma ŋurzluŋ ha ka zaɗaghunata ni. 49 Dzaʼa sliʼanaf sliʼa Yawe ta mndəra sanlaha ma mnduha diʼiŋ ta kɗavakta ghəŋa haɗik ŋa dika kaghuni ŋa valaghunaghata manda dzala, mndəra mndu kul snaŋta kuni ta gwaɗa taŋ, 50 mndəra mndu nda ŋrus ma kəma taŋ kul vla glaku ŋa halata mndu, kul haɗ ta tawa hiɗahiɗa ta zwani. 51 Dzaʼa zuza həŋ ta zwana rina ghuni nda skwi ta vwaha ghuni ha ka zaɗatá kaghuni. Zlaghunaŋta a həŋ dər nimaya, dər ima inabi ta ka nuni, dər rɗi, dər zwana slaha, dər ŋa rina fisika ghuni ha ka zaɗaghunata taŋ wa. 52 Dzaʼa dɗaghunagha dɗa həŋ ma inda luwaha ghuni ha ka zlazluta slarata matsakha huzla ghuni ya faf kuni ta ghəŋ tida ya. Dzaʼa dɗaghunagha dɗa həŋ ta wa tgha inda luwaha ghuni ta inda haɗika ghuni ya vlaghuna Yawe, Lazglafta ghuni.
53 Dzaʼa zay kuni ta zwana ghuni, sluʼa zwana ghuni nda kwagha ghuni ya vlaghuna Yawe, Lazglafta ghuni, dabga ghuya ɗaŋwa nda gira vəl ŋamta ghumaha ghuni ta kaghuni. 54 Dər mndu ya ta ɗva ghəŋa ni ta maghən mataba ghuni tsi, dzaʼa nghə nda ghwaɗaka iri ta zwaŋama ni, dər marakw ya ta han kuni ta ghuva nda tsi a tsi, dər zwana ni ta pɗaku a tsi. 55 Dzaʼa kwalaghu kwala ta dga sluʼa zwana ni ta zə tsi nda ya dər turtuk mataba taŋ, kabga haɗta a pɗakwa skwa zay ma tsa fitika dzaʼa ŋamta ghumaha ghuni ta kaghuni ma inda luwaha ka ghuya ɗaŋwa ŋa ghuni ya wa. 56 Dər marakw ya ta ɗva ghəŋa ni ta maghən mataba ghuni, kul ɗva ksaŋta səla ni ta haɗik ma tsa nzakwa ni ta ɗva ghəŋa ni ya, dzaʼa nghə nda ghwaɗaka iri ta zəʼala taŋ ya ta han tsi ta ghuva nda tsi, dər zwaŋa ni, ka dər makwa ni a tsi. 57 Kulam nda sumbah tani, nda vziʼuwa yaga tsi tani, dzaʼa zuta tsi ma ɗifa, kabga haɗta a pɗakwa skwa zay ma tsa fitika dzaʼa ŋamta ghumaha ghuni ta kaghuni ma luwaha ka ghuya ɗaŋwa ŋa ghuni ya wa.
58 Ka ŋana a kuni ɗina, ka maga slna nda inda tsa gwaɗaha ta tagh lu nda vinda ma na defteri na, nda zləŋa tsa hgu nda sgit ka makwitkwit, Yawe, Lazglafta ghuni ya wu, 59 dzaʼa ghunagagha ghuna Yawe ta ghəŋa kaghuni, nda zivirha ghuni tani ta inda mndəra lkuha nda ɗaŋwaha nda bla nda bla dzaʼa nzəɗavata ta kaghuni. 60 Dzaʼa klagagha kla ta inda zləmndaha la Masar ya si ta zləŋ kuni ya ŋa favaghunata. 61 Dər inda ɗaŋwaha nda inda lkuha kul vindaku ma na deftera zlahu na, dzaʼa favaghuna fa Yawe ha ka zaɗatá kaghuni. 62 Kaghuni si ta ndəghuta manda tekwatsaha ta luwa, ŋa pɗata ghuni hutsekw, kabga kwala ghuni kul snatá lwa Yawe, Lazglafta ghuni. 63 Manda ya zɗəgana tsi ta Yawe ka magaghunatá tsi ta zɗaku ka yaghunafta ya, manda tsaya dzaʼa zɗəganata tsi ta Yawe ŋa zaɗaghunata tendərzleleʼ guli. Dzaʼa tsahigighunis tsaha lu ma tsa haɗik dzaʼa lam kuni dida ŋa nzakwa ni ka ŋa ghuni ya.
64 Dzaʼa wutsighunis wutsa Yawe da taba inda mndəra mnduha, daga ta kɗavakta haɗik dikw ta sana kɗavakta ni. Hada, dzaʼa magana maga kuni ta slna ta sanlaha ma lazglaftaha, kul snaŋta kuni dər dzidzíha ghuni, ka udzu nda ya ka pala. 65 Nzata a kuni nda hanatá ghəŋ mataba mndəra tsa mnduha ya wa. Mutsafta a kuni ta vli dər ŋa fatá səla ghuni dəmbekw wa. Hada, dzaʼa faghunam fa Yawe ma ndanu, ma ngha vli rwətrwəta, nda ya ma rwatá vgha. 66 Nzeknzeknzek dzaʼa ngha kuni ta hafa ghuni, ŋa zləŋay ghuni ta zləŋ nda fitik tani, nda rviɗik tani, fafta a kuni ta ghəŋ ta nzakwa ghuni wa. 67 Ga sərɗək, “dzaʼa sagha yawu hawu ɓa?” ka kuni dzaʼazlay, ga hawu guli “dzaʼa sagha yawu sərɗək ɓa?” ka kuni dzaʼazlay, kabga ta ghudzaku ŋuɗufa ghuni dabga skwiha ya ta nghə ira ghuni. 68 Dzaʼa vradaghunam vra Yawe nda kwambalu da Masar, nda ta tvi ya si mnaghuna yu kazlay na: “Haɗ kuni dzaʼa walglaŋta nghaŋta wu,” kəʼa ya. Hada, dzaʼa kumay kuni ta skwanapta ghəŋa ghuni ta ghumaha ghuni ŋa nzakw ka vuʼa, nda kurɗuha, ama haɗ mndu dzaʼa kuma skwa kaghuni wu, » kaʼa.
Dzratá wa Yawe nda la Israʼila ta haɗika Muwav
69 Wya gwaɗaha dzratá wi mnanaf Yawe ta Musa ŋa dzrafta nda la Israʼila ma haɗika Muwav, ka sganaghata ta ghəŋa dzratá wi ya dzraf tsi nda həŋ ma Hwarev yaª.