29
1 Ka hgadaghatá Musa ta inda la Israʼila. Kaʼa nda həŋ mantsa: « Nda ngha kaghuni nda ira ghuni ta inda skwi ya magana Yawe ta haɗika Masar, ya magana tsi ta Firʼawna, nda inda kwalvaha ni, nda inda haɗika ni,2 tsa ghuya ɗaŋwaha, nda tsa ŋizlaha, nda tsa mandərmimiha nghaŋ ira ghuni ya.3 Tsaw ta vlaghuna a Yawe ta ghwinslaka grafta, nda ira nghaŋta, nda sləməŋa snaŋta ha gita wa.4 Hlagaghunap kla yu ka vaku fwaɗ mbsak ma mtak, rdu a lgutha ta vgha ghuni, nda ɓaɓaha ma səla ghuni wa.5 Buradi a si ta zə kuni wu, ima inabi nda skwa say nda tawa a si ta sə kuni wu, kada snaŋta kuni kazlay iʼi Yawe, Lazglafta ghuni kəʼa.6 Ka ɓhagaghatá kuni da na vli na, ka sab i Sihuŋ, mghama Hesbuŋ, nda Ghug, mghama Basaŋ da guyata nda vulu nda amu, ama ka zatá mu ta həŋ.7 Ka zluʼaghutá mu ta haɗika taŋ, ka vlaŋtá ta la Rubeŋ, nda la Gat, nda rita mndəra la Mənase ka haɗika za həga taŋ.8 Ka ŋanata kuni ta gwaɗaha tsa dzratá wi ya, ka maga kuni ta slna nda tsi, kada ŋwakwa inda skwi dzaʼa kuni magay.
9 Gita, wana kuni demdem ta sladu ta kəma Yawe, Lazglafta ghuni: Maliha ma mndəra mndu, nda la galata mnduha ghuni, nda mghamha ghuni, nda gwal ta nghapta ka kaghuni, nda inda zgwana la Israʼila, 10 nda zwana ghuni, nda miʼa ghuni, nda matbayha ma ghuɓuha ghuni, gwal ta pslaghunatá hasuʼu, nda gwal ta taghunatá imi. 11 Wana kuni dzaʼa lami da dzratá wa Yawe, Lazglafta ghuni ya ta dzrafta tsi nda kaghuni gita nda ma waɗu, 12 ŋa naghunafta ka mnduha ni gita, ta nzatá tsatsi ka Lazglafta ghuni manda ya taghunaf tsi ta imi ta sləməŋ, ka waɗanatá dzidzíha ghuni i Abraham, nda Izak, nda Yakubu ya. 13 Nda na kaghuni na a kweŋkweŋ ta dzrafta yu ta wi nda waɗu wu, 14 ama nda nza guli ka ŋa gwal ta sladu hadna gita ta kəma Yawe, Lazglafta mu, nda ya ŋa gwal kul haɗ mataba mu hadna gita.
15 Nda sna kaghuni ka ghəŋa ghuni ká amu nzata ma haɗika Masar, nda ya ká amu sabi ma takataka mndəra mnduha ya tsatsughwaɗap kuni. 16 Nda ngha kuni ta manzakɗawayha, nda skwa wuyayha ka udzu, nda ya ka pala, nda ya ka kfura tsedi, nda ya ka dasu da həŋ. 17 Yaha mndu dər turtuk mataba ghuni, dər zgun, dər marakw, dər həga ga mndu, dər mndəra mndu mataba ghuni da mbəɗaghutá vgha ka zlanatá Yawe, ka laghwi da ksanatá slna ta lazglaftaha tsa mndəra mnduha ya. Yaha mndu mataba ghuni da nzakway ka slrəŋa fu ka gruma, ka kurak a tsi. 18 Tahula snaŋta mndu ta na gwaɗaha waɗu na, yaha mndu mataba ghuni da ghuba ghəŋa ni, ka mnay kazlay: “Dzaʼa mutsay yu ta zɗaku, dər má kɗaŋ kɗa yu ta maga skwi ta kum yu” kəʼa. Dzaʼa zaɗiŋ zaɗa tsaya ta gwal kul haɗ dmakwa taŋ nda vərɗa tsatsi tani. 19 Tsuʼafta a Yawe ta plinistá dmakwa ni wa. Katək ná, dzaʼa gufaf gufa ŋuɗufa Yawe nda draku ta ghəŋa tsa mndu ya, ŋa ndiʼafta ksiʼi nda vinda ma na defteri na tida, ŋa hərɗiŋta Yawe ta hga ni ta ghəŋa haɗik. 20 Dzaʼa dgana dga Yawe nda inda mndəra la Israʼila ŋa slanaghata zləmnda, taɓta inda ksiʼa dzratá wi nda vinda ma na deftera zlahu na. »
Ghunakta Yawe ta ghuya ɗaŋwa
21 « Dzaʼa nghaŋ ngha zivira ghuni, zwana ghuni dzaʼa yayata lu ta hula kaghuni, nda matbayha dzaʼa sagha ta sana haɗikha diʼiŋ ta zləmnda ta slata ta na haɗik na, nda ɗaŋwaha ya dzaʼa Yawe ghwanakta. 22 Dzaʼa nzakway haɗik ghandand ka slughul da vu. Haɗ skwi dzaʼa laviŋta lu ta sləgafta tida wu, haɗ skwi ta ɗyaku tida wu, haɗ kuzuŋ dzaʼa glaku tida manda ya ma Sədum, nda Ghamura, manda ya ma Adma nda Tsevuyim hwanzaɓiŋ Yawe ma ɓasata ŋuɗufa ni katakata ya wa. 23 Dzaʼa mnay inda mndəra mnduha kazlay na: “Kabgawu kəl Yawe ka maganatá na haɗik na manda na na? Kabgawu kəl tsi ka ɓasaftá ŋuɗuf katakata manda na na?” ka həŋ dzaʼazlay. 24 Ka lu dzaʼa zlghaftá wa ni na: “Nda nza kabga zlanavata taŋ ta dzratá wa Yawe, Lazglafta dzidzíha taŋ, ya ta dzrafta nda həŋ ma hlagapta ni ta həŋ ma Masar ya. 25 Ka laghu həŋ da maganatá slna ta sanlaha ma lazglaftaha ka tsəlɓu ta kəma taŋ, lazglaftaha si kul snaŋtá həŋ, ya kul vlaŋtá Yawe ta həŋ. 26 Mantsa tama, ka gufafta ɓasatá ŋuɗufa Yawe ta ghəŋa tsa haɗik ya, ka hlanaktá inda tsa ksiʼi nda vinda ma na defteri na ta həŋ. 27 Ka hlaptá Yawe ta həŋ ma haɗika taŋ ma gufatá ŋuɗufa ni katakata, ka wutsiŋtá həŋ ta sanlaha ma haɗik, kəl tsi ka nzakw manda tsaya gitana,” ka lu dzaʼazlay.
28 Skwi ya nda ɗifa ná, ŋa Yawe, Lazglafta mu tsaya. Ama skwi ta daɓi ya guli ná, ŋa amu nda zwana mu tsaya ŋa ɗekɗek, ŋa magay mu ta slna nda inda gwaɗaha ma tsa zlahu ya. »