Vrakta la Israʼila da Yawe
30
1 « Ka laghunagha la inda tsa skwiha, tfa wi nda ksiʼi fa yu ta kəma ghuni katsi, ka havakta kuni ma ghəŋa ghuni mataba inda mndəra mnduha ya dzaʼa ghəzladamta Yawe, Lazglafta ghuni ta kaghuni dida ya. 2 Ka vrakta kuni da Yawe, Lazglafta ghuni ka snata kuni ta lwa ni, kaghuni nda zwana ghuni, ma hya hya ŋuɗufa ghuni nda inda hafa ghuni taɓta skwi ya mnaghunaf yu gita. 3 Dzaʼa vranaf vra Yawe, Lazglafta ghuni ta nzakwa ghuni ka tawata hiɗahiɗa ta kaghuni, ka tskəglaghunakta mataba inda mndəra mnduha ya si wutsaghunam Yawe, Lazglafta ghuni ya. 4 Si dər má ghəzlagha ta slrəŋa luwa lu ta kaghuni, dzaʼa tskəglaghunak tska Yawe, Lazglafta ghuni, ka vraghunakta hada. 5 Dzaʼa varagaghunagha vara Yawe, Lazglafta ghuni ta haɗika dzidzíha ghuni ŋa nzakwa ni ka ŋa ghuni. Dzaʼa vlaghuna vla ta nzakw ləŋləŋ, ka yaghunafta ka malaghutá dzidzíha ghuni.6 Dzaʼa ɗatsaghuna ɗatsa Yawe, Lazglafta ghuni ta fafaɗa ŋuɗufa ghuni nda zivirha ghuni, ŋa ɗvuta ghuni ma hya hya ŋuɗufa ghuni, nda ya ma nzakwa ghuni, kada nzata kuni nda hafu. 7 Dzaʼa fanagha fa Yawe, Lazglafta ghuni ta inda tsa ksiʼi ya ta ghəŋa ghumaha ghuni, gwal husaŋ kuni ta ghuyay ŋa ghuni ya. 8 Ama kaghuni, dzaʼa snəgla sna kuni ta lwa Yawe ka magay ghuni ta slna nda inda zlahuha ni ya mnaghunaf yu gita. 9 Dzaʼa vlaghuna vla Yawe, Lazglafta ghuni ta zɗaku ma inda slna dzva ghuni ŋa ŋwakwa ni. Dzaʼa yanaf ya ta zwana ghuni, nda rina ghuni, nda skwi ta vwaha ghuni. Kahwathwata dzaʼa zɗəgləgana zɗa nzakwa ghuni ma zɗaku ta Yawe, manda ya mag tsi ta dzidzíha ghuni ya, 10 manda snata ghuni ta lwa Yawe, Lazglafta ghuni nda ma ŋanata ghuni ta gwaɗaha ni, nda zlahuha ni ya nda vinda ma na deftera zlahu na, varagaghar kuni da Yawe, Lazglafta ghuni ma hya hya ŋuɗufa ghuni, nda ya ma inda nzakwa ghuni. »
Ndusu ndusa gwaɗa Lazglafta nda mndu
11 « Nana gwaɗaha ta mnaghunafta yu gita na ná, blu a ka ŋa ghuni wu, zəgədaghunaghu a wa. 12 Ta luwa a, dá mnə kuni kazlay na: “Wa dzaʼa ŋladafta ta luwa da zbəgaŋnata ka snaŋnamta, kada laviŋta ŋni ta maga slna nda tsi na?” kəʼa wa. 13 Ta ɓla drəf a, dá mnə kuni kazlay na: “Wa dzaʼa tsughwaɗədaŋnaptá drəf ta sana ɓlu, ŋa kləgaŋnaghata ka snaŋnamta, kada laviŋta ŋni ta maga slna nda tsi na?” kəʼa wa. 14 Katək ná, ndusu ndusa tsa gwaɗa ya nda kaghuni, ma wubisima ghuni nda ya ma ŋuɗufa ghuni, kada laviŋta kuni ta maga slna nda tsi. »
Zbaʼata mataba hafu nda mtaku
15 « Nghawa, wana yu ta pghata ta kəma ghuni ta hafu nda mtaku, zɗaku nda ɓadzaku. 16 Skwi ya ta mnaghunafta yu gita ná, ɗvuwa ɗva ta Yawe, Lazglafta ghuni ka ksa kuni ta tva ni, ka ŋanata kuni ta gwaɗaha ni, nda zlahuha ni, nda tva skwiha ŋa magay, kada nzata kuni nda hafu, ŋa nuta ghuni tusak, ŋa tfaghunaghata Yawe, Lazglafta ghuni ta wi ta haɗik dzaʼa kuni lami dida ŋa nzakwa ni ka ŋa ghuni. 17 Ama ka mbəɗaghu mbəɗa kuni ta vgha ma ŋuɗufa ghuni, ka kwal kul snanata, ka tɗaghata lu ta kaghuni da tsəlɓu ŋa sanlaha ma lazglaftaha, ka maganatá slna ta həŋ katsi, 18 ka yu ta mnaghunata gita na: Dzaʼa zaɗaku kuni, slravaghata a hafa ghuni ta haɗik ya dzaʼa lam kuni dida ŋa nzakwa ni ka ŋa ghuni, tsughwaɗapər kuni ta Yardeŋ ya wa.
19 Ta fa fa yu gita ta luwa nda haɗik ka masləmtsək ta ghəŋa kaghuni. Pgha pgha yu ta hafu nda mtaku, ta tfa wi nda ksiʼi ta kəma ghuni. Zbaʼawa zba ta hafu ŋa nzata ghuni nda hafu, kaghuni nda zivirha ghuni. 20 Ka ɗvuta kuni ta Yawe, Lazglafta ghuni, ka snata kuni ta gwaɗa ni, ka ndiʼanavata kuni ta vgha, kabga ma dzva ni hafa ghuni, tsatsi ta slranaghatá fitika ghuni ta haɗik ya waɗana Yawe ta vlaŋtá dzidzíha ghuni i Abraham, nda Izak, nda Yakubu ya, » kaʼa.