Vrafta ta zlahu 31

Famtá Yəhusuwa da vla Musa

1 Ka lagha Musa mnanatá inda la Israʼila ta na gwaɗaha na. 2 Kaʼa nda həŋ mantsa: « Dərmək nda hisambsak ima ɗa ndanana. Lavgliŋ a yu ta klaghunatá kəma wa. Ka Yawe nda iʼi na: “Tsughwaɗapta a kagha ta na Yardeŋ na wu,” kaʼa. 3 Yawe, Lazglafta ghuni dzaʼa klaghunatá kəma, tsatsi dzaʼa zaɗanatá na mndəra mnduha ta kəma ghuni na ŋa ghəzlafta ghuni ta həŋ. Yəhusuwa dzaʼa klaghunatá kəma manda ya mna Yawe. 4 Yawe dzaʼa zaɗanatá mndəra na mnduha na manda ya magana tsi ta i Sihuŋ nda Ghug, mghamha la Amuru nda haɗikha taŋ. 5 Dzaʼa vlaghuna vla Yawe ta həŋ ma dzva ghuni, ŋa maganata ghuni ta həŋ taɓta inda gwaɗaha ya mnaghunaf yu^*. 6 Mbrawa vgha ka dihavata kuni, ma zləŋ kuni ta zləŋ, ma ghudzaku kuni ta ghudzaku ta kəma taŋ, kabga ta mbaɗa Yawe, Lazglafta ghuni kawadaga nda kaghuni, zlaghunata a wu, vzighunista a guli wu, » kaʼa nda həŋ.

7 Ka hgadaghatá Musa ta Yəhusuwa. Kaʼa nda tsi ta kəma inda la Israʼila mantsa: « Mbra ta vgha ka dihavata ka, kabga kagha dzaʼa lami kawadaga nda na mnduha na ta haɗik ya waɗana Yawe ta vlaŋta dzidzíha taŋ. Kagha dzaʼa vlaŋtá həŋ ka skwa za həga taŋ. 8 Yawe dzaʼa mbaɗa ta kəma gha. Tsatsi dzaʼa nzata kawadaga nda kagha. Haɗ dzaʼa zlavaghata wu, vzighista a wa. Ma zləŋ ka ta zləŋ, ma ghudzaku ka ta ghudzaku, » kaʼa.

Dzaŋa zlahu ta inda mandəfáŋa vaku

9 Ka vindaftá Musa ta tsa zlahu ya, ka vlaŋtá gwal dra skwi ŋa Lazglafta, mndəra la Levi ta kla akwata dzratá wa Yawe, nda inda la galata mnduha la Israʼila. 10-11 Ka mnanaftá Musa ta həŋ kazlay: « Ta inda kɗavakta mandəfáŋa vaku, fitik ya fa lu ŋa hliŋtá dməŋ ta mndu ya, ka dzaŋa kuni ta tsa zlahu ya ma fitika skala dumbi^*. Ma sagha dzaʼa sagha inda mnduha Israʼila ta kəma Yawe, Lazglafta ghuni, ma vli ya dzaʼa tsi zbapta, ka dzaŋa kuni ta tsa zlahu ya ta wa sləməŋa inda la Israʼila. 12 Ka tskanata kuni ta mnduha, zgwana, nda miʼaha, nda zwani, nduk nda la matbayha ta nzakw ma luwaha ghuni, ŋa snay taŋ, ŋa taghay taŋ ta zləŋa Yawe, Lazglafta ghuni, ka magay taŋ ta slna nda inda gwaɗaha tsa zlahu ya. 13 Dzaʼa snaŋ sna zwana taŋ ta kul snaŋta ya guli, ŋa taghay taŋ ta zləŋa Yawe, Lazglafta ghuni ma inda nzakwa ghuni ta haɗik ya dzaʼa tsghwaɗadapta kuni ta Yardeŋ ŋa zata ŋa nzakwa ni ka ŋa ghuni ya, » kaʼa nda həŋ.

Kwanaghaha gwaɗa Yawe nda Musa

14 Ka Yawe nda Musa mantsa: « Wana ndusak ndusa fitika mtakwa gha. Hgaŋ hga ta Yəhusuwa ka lama kuni his his da tumpula guyaku, ka mnanafta yu ta skwi ŋa magay ni, » kaʼa. Ka lam i Musa nda Yəhusuwa sladata ma tumpula guyaku. 15 Ka zlagapta Yawe ma həga tumpul ma sundula kusay. Ka sladatá tsa sundula kusay ya ta wa tgha həga tumpul.

16 Ka Yawe nda Musa mantsa: « Wana ndusa ka ka dzaʼa slanaghatá dzidzíha gha. Tahula mtatá kagha, dzaʼa sliʼaf sliʼa na mnduha na ka laghwi da maga sliʼiŋsliʼiŋ nda sanlaha ma lazglaftaha ka mayəm, tsaha ta haɗik dzaʼa lam həŋ dida ya. Dzaʼa zliɗiva zla həŋ ka ɓliŋta dzratá wa ɗa ya dzraf yu nda həŋ. 17 Dzaʼa gufaf gufa ŋuɗufa ɗa ta ghəŋa taŋ baɗ tsa. Dzaʼa zlaŋ zla yu ta həŋ ka mbəɗaghutá kəma ɗa, ŋa zatá həŋ, ŋa slanaghata ɓadzaku nda ghuya ɗaŋwa katakata ta həŋ. Ka həŋ dzaʼazlay baɗ tsa: “Nana ɓadzaku ta slamaghata nana, nza a kabga vəl kwala Lazglafta mu kul haɗ mataba mu wu ra?” ka həŋ dzaʼazlay. 18 Baɗ tsaya, dzaʼa kɗaŋ kɗa yu ta ɗifa kəma ɗa, dabga inda tsa ghwaɗaka skwi maga həŋ nda ma mbəɗaghuta taŋ ta vgha təv sanlaha ma lazglaftaha ya. 19 Ndana tama, vindafwa vinda nda vinda ya laha ya, ka tagha ka ŋa la Israʼila, ka fanamta ka ta həŋ ma wa taŋ, kada nzakwa tsa laha ya ka masləmtsəka ɗa ta ghəŋa la Israʼila^*. 20 Hladamta ɗa ta na mnduha na da tsa haɗik ta mbəzaku uʼa nda zuɗum mida, ya waɗana yu ta dzidzíha taŋ ya, dzaʼa zay həŋ ta skwa zay ka baghaku, ka uwaslafta. Tahula tsa, ŋa mbəɗaghuta taŋ ta vgha təv sanlaha ma lazglaftaha ka maganatá slna ta həŋ, ka hərtətihata, ka ɓliŋta dzratá wa ɗa. 21 Ka dɗanagha dɗa ɓadzaku nda ghuya ɗaŋwaha kavghakavgha ta həŋ, dzaʼa nzakway na laha na ka masləmtsək ta ghəŋa taŋ, kabga haɗ zivirha taŋ dzaʼa zanapta ka zlaŋtá fay wa. Daga ndanana, nda sna yu ta tsatá ŋuɗufa taŋ, ma kɗaku yu hladamtá həŋ da haɗik waɗa yu ta vlaŋtá həŋ, » kaʼa. 22 Baɗ va tsa fitik ya vindafta Musa ta na laha na, ka taghanaftá la Israʼila.

23 Ka Yawe mnanaftá Yəhusuwa, zwaŋa Nuŋ mantsa: « Mbra ta vgha ka dihavata ka, kabga kagha dzaʼa hladamtá la Israʼila da tsa haɗik waɗata yu ta həŋ ya. Iʼi ná, dzaʼa nza nza yu kawadaga nda kagha, » kaʼa.

24 Manda kɗiŋta Musa ta vindaftá deftera tsa gwaɗaha zlahu ya nekwnekw, 25 ka mnanaftá tsi ta la Levi ta kla akwata dzratá wa Yawe ya kazlay na: 26 « Zlghawa na deftera zlahu na, ka fanavata kuni ta vata akwata dzratá wa Yawe, Lazglafta ghuni, ŋa nzakwa ni hada ka masləmtsək ta ghəŋa kaghuni. 27 Iʼi ná, nda sna yu ta gatá sida ghuni nda təŋatá ghəŋa ghuni. Ka si ma na nzakwa ɗa ta nda hafu kawadaga nda kaghuni na, ta ga sidi kuni nda Yawe ya ní, kighkigh dzaʼa maga kuni tahula mtatá iʼi na! 28 Tskagaghawa tska ta vata iʼi ta inda la galata mndu ma mndəra ghuni, nda gwal nghapta ka kaghuni, ka mnata yu ta tsa gwaɗaha ya ta wa sləməŋa taŋ, ka fata yu ta luwa nda haɗik ka masləmtsək, 29 kabga nda sna yu, tahula mtatá iʼi, dzaʼa ɓadziŋ ɓadza kuni ta ghəŋa ghuni, ka zluŋtá tvi ya mnaghunaf yu. Dazlay, dzaʼa sagha sa ɓadzaku ta ghəŋa kaghuni, kabga magata ghuni ta ghwaɗaka skwi ta kəma Yawe, ka ganaftá ɓasa ŋuɗuf nda ma slna ghuni, » kaʼa.

Laha Musa

30 Ka mnigiŋtá Musa nekwnekw ta gwaɗaha ma tsa laha ya ta wa sləməŋa inda guyatá ghəŋa la Israʼila: