32
1 Luwa, fa fa ta sləməŋ, dzaʼa gwaɗa yu,haɗik, sna ta gwaɗaha dzaʼa sab ma wa ɗa.
2 Ka bərzla tagha skwa ɗa manda nzakwa imi,
ka taɗa gwaɗa ɗa manda wuninik,
manda imi suksuksuk ta kuzuŋ ləhtəɗ,
manda zəgədəɓata wuninik ta kuzuŋ.
3 Dzaʼa tay yu ta hga Yawe.
Vlawa glaku ŋa Lazglafta mu!
4 Tsatsi ná, kutumba ya,
nda tva ni ta maga tsi ta inda skwi,
kahwathwata tɗukwa inda tva ni.
Tsatsi ná, vərɗa Lazglafta ya,
haɗ ta tərɗanata skwi wu,
ŋərma ya, tɗukwa tsatsi.
5 Ama kaghuni, gana ga kuni ta dmaku ta Yawe,
gwal nda ɓadza, nzəgla a kuni ka zwana ni wu,
zivir kul ndan tɗukwa, gwal nda tərɗa nzakwa taŋ.
6 Manda tsaya má dá vranamta kuni ta Yawe rí,
a mnduha ka rgha kul haɗ ɗifil ma ghəŋa taŋ?
Tsatsi a da ghuni, ta vlaghunatá hafu wu ra?
Tsatsi a ta magaftá kaghuni ka faghunata ra?
7 Havakwa hava ta fitikha ya ghalya,
nghadapwa ngha ka vakuha ya ta luta ma zivir ma zivir.
Ɗawawa ɗawa da dadaha ghuni dzaʼa rusaghunafta həŋ,
ɗawawa ɗawa da la galata mnduha ghuni, dzaʼa mnaghuna mna həŋ.
8 Ma daganafta Lazglafta Dagala ta skwa za həga taŋ ta mndəra mnduha,
manda kɗakwa ni ta dagaptá mnda səla,
ka kwakwaranatá tsi ta mukumaha taŋ,
taɓta nzakwa mbsaka la Israʼila.
9 Mayaka Yawe ná, mnduha ni ya.
Yakubu tsa mayaka skwa za həga ni ya.
10 Ta haɗik ma mtak tuhwayaŋ slanaghata tsi,
ma mtak turtukwa ni mataba wawahaku.
Ka wanaftá tsi ka payanata,
ka nghay manda hya ira ni.
11 Ka nzakw tsi manda dzala ta nghapta ka zwana ni ma həga ni,
ka zawataku ta ghəŋa zwana ni,
ka gunaptá zlambakha ni ka hlaftá həŋ,
ka hla həŋ ta hula ni.
12 Yawe turtukwa ni ta hla mnduha ni,
haɗ sanlaha ma lazglaftaha kawadaga nda tsi wa.
13 Ka hladaftá tsi ta həŋ ta kuɗuŋurha haɗik,
ŋa zay taŋ ta skwa zay si ma vwah.
Ka niʼunustá tsi ta zuɗum si ma takwa pala ta həŋ,
vlaŋha ta rɗi si ta fuha mataba palaha ta həŋ,
14 nda rɗa uʼa sla nda uʼa rina fisik,
nda ghwaviɗa slaɓalakwa maŋazakha,
nda maŋazakha Basaŋ, nda dugzumha,
nda alkama ya ta ɗinuta,
ka sutá həŋ ta ima yakwa inabi ya ta ɗinuta.
15 Ka zutá Israʼila ka baghafta,
ka uwaslaftá Yəsuruŋª, ka gaftá tsi ta sidi.
Uwaslafta ni gdəɓəsl, haɗ ŋəzleɓ tida wu, kuɗetehw.
Ka zlaŋtá tsi ta Lazglafta ta magafta,
ka hərtətatá tsi ta kutumba mbakwa ni.
16 Ka ganaftá həŋ ta draku ta Yawe nda sanlaha lazglaftaha ka mayəm,
ka ganaftá həŋ ta ɓasa ŋuɗuf nda maga skwiha ka manzakɗaway.
17 Ka plə həŋ ta ghəŋ ŋa ghwaɗaka sulkumha, ka zluŋtá Lazglafta,
ŋa lazglaftaha si kul snaŋta həŋ,
ta sagha matsna ka lfiɗ,
si kul zləŋaŋtá dzidzíha taŋ.
18 Vziŋ vza ka ta kutumba ya ta yatá kagha,
zanap za ka ta Lazglafta ta vlaghatá hafu.
19 Ta nghadapta Yawe ná, hərtəta hərtəta həŋ,
kabga gana ga zwana ni nda kwagha ni ta dmaku.
20 Kaʼa mantsa: « Dzaʼa mbəɗaghu mbəɗa yu ta kuma ɗa ta vata həŋ,
ka ngha yu ta kɗavakta nzakwa taŋ,
kabga nda nza həŋ ka ghwaɗaka zivir,
ŋərma zwani a həŋ wa.
21 Sliʼiɗif sliʼa həŋ ta draku
nda ma skwi kul haɗ ka Lazglafta,
ka giɗiftá həŋ ta ɓasa ŋuɗuf nda ma skwiha kul haɗ hayhaya taŋ.
Iʼi guli, dzaʼa ganaf ga yu ta draku ta həŋ
nda ma mndəra mnduha nda hta,
dzaʼa ganaf ga yu ta ɓasa ŋuɗuf ta həŋ nda ma mndəra mndu ka rgha,
22 kabga kəbaf kəba ɓasatá ŋuɗufa ɗa,
ta zlghaku dikw da lata ta mnaka haɗik.
Ta zuza ta ghəŋa haɗik nda skwiha ta yafta tida,
ta driŋ dra ta sta ghwáha.
23 Dzaʼa tskaf tska yu ta zləmndaha ta həŋ,
dzaʼa kɗiŋ kɗa yu ta havaha ɗa ta həŋ.
24 Dzaʼa htaku mbrakwa taŋ nda ma maya,
dzaʼa tuʼu tuʼuwa həŋ da ɗaŋwaha, nda ya da zləmndaha,
dzaʼa ghunak ghuna yu ta ghəŋa taŋ ta nimtak ghiyaŋaŋ,
nda tsuɗayha ka gruma lələɓaku ta haɗik.
25 Nda mabli, kafay dzaʼa rwanata zwana taŋ,
nda ma həga, zləŋ dzaʼa raghwanatá həŋ:
Galaɓayha nda daghaliha,
vziʼuwaha nda halata mnduha.
26 Ka yu sizlay na: Dzaʼa ɓalanap ɓala yu ta həŋ,
ka magata ɗa ŋa zanaptá həŋ ta haɗik, ka yu,
27 ama ka zləŋaftá yu ta ghuɓasay dzaʼa ghuɓas ghumaha taŋ ta iʼi,
dá ndanu tsa ghumaha taŋ ya kazlay na:
“Nda mbrakwa ŋni zata ŋni ta ghwa,
haɗ skwi maga Yawe wu,” kəʼa. »
28 La Israʼila ná, mndəra mnduha kul haɗ ghunislak ma ghəŋa taŋ həŋ,
haɗ mahizl ma ghəŋa taŋ wa.
29 Má mamu ɗifil ma ghəŋa taŋ ná,
má nda sna həŋ ta tsaya,
má tsatsaf tsatsa həŋ ta skwi dzaʼa slanaghatá həŋ.
30 Waká mndu turtuk dzaʼa ghəzlaftá gwal dəmbuʼ na?
Waká mnduha his dzaʼa ŋawaftá gwal dəmbuʼ ghwaŋ na?
Ka nza a tsi ka skwapta kutumba taŋ ta həŋ,
ka nza a tsi ka vlata Yawe ta həŋ ma dzva taŋ.
31 Ama nza a kutumba taŋ manda kutumba amu wu,
dər ghumaha mu ná, nda sna həŋ ta tsaya.
32 Fwa inaba taŋ ná, ta dzuslafta ta dughwaŋa inabiha ma Sədum,
nda ya ma vwahha inabi ma Ghamura həŋ*.
Yakwa taŋ ná, ka gruma nzakwa ni,
zuŋura taŋ ná, ɗahɗaha nzakwa ni.
33 Ima inaba taŋ ná, gruma nahaɗik ya,
gruma ta dza mndu ya manda ŋa mupuha ya.
34 Ka Yawe na: « Ɗifana a yu ta tsa skwiha ya da iʼi,
ka ŋərzlamta ma dzuguva ɗifa skwa ɗa ra?
35 Iʼi dzaʼa planamtá mndu, iʼi dzaʼa vranamta,
ma fitika tsəhiŋta skwi ta səla taŋ,
kabga ndusak ndusa fitika slanaghata ɓadzaku ta həŋ,
dzaʼa gi sagha sa skwi ya payaf lu ta ghəŋa taŋ. »
36 Dzaʼa tawa tawa Yawe ta hiɗahiɗa ta kwalvaha ni,
ŋa dganatá ni ta guma ta həŋ kazlay tɗukwa kaghuni kəʼa,
nghər tsi ta htatá mbrakwa taŋ,
ta haɗ pɗakwa mndu dər ka vuʼa wu, dər flaʼu vgha ni wa.
37 Kaʼa dzaʼazlay mantsa: « Ga lazglaftaha taŋ,
tsa kutumba taŋ si ta kəl həŋ ka ɗifa ya?
38 Ga tsa gwal si ta za ghwaviɗa skwa pla ghəŋa taŋ,
ka sa ima inabi ta slranata həŋ ya?
Ka sliʼaf sliʼa həŋ tama ɓa, kata kaghuni,
ka nzakwa həŋ ka vla ɗifa ghuni!
39 Nghawa ɓa, iʼi ná, iʼi ya,
haɗ sana Lazglafta ta ghəŋa iʼi wa.
Iʼi ta dzata, iʼi ta zlaŋta nda hafu guli.
Iʼi ta balanata, iʼi ta mbanafta.
Haɗ mndu dzaʼa zluʼapta ma dzva ɗa wa.
40 Wana yu ta kapaftá dzva ɗa nda ta luwa,
kazlay na: “Ta waɗa waɗa yu nda hafa ɗa:
41 Ka hədzap hədza yu ta kafaya ɗa ka wuɗapta,
ka ŋanata ŋa tsa guma ná,
dzaʼa gi vranam vra ya ta ghumaha ɗa,
ka planamtá gwal ta husaŋta yu ta həŋ.
42 Dzaʼa ghuyanaf ghuya yu ta havaha ɗa nda us,
dzaʼa zuza kafaya ɗa ta sluʼi,
usa gwal psla lu nda gwal hlagha lu,
ta mbəzagapta ma ghəŋa maliha ghumaha ɗa”. »
43 Mndəra mnduha, rfawa ta rfu kawadaga nda mnduha Yawe,
kabga dzaʼa plam pla ta usa kwalvaha ni.
Dzaʼa vranam vra ta ghumaha ni,
dzaʼa ghuɓiŋ ghuɓa ta haɗika mnduha ni.
44 Ka lagha Musa mna inda gwaɗaha ma tsa laha ya ta wa sləməŋa mnduha, kawadaga nda Huseyaghª zwaŋa Nuŋ nda tsi.
45 Manda kɗiŋta Musa ta mnanatá inda tsa gwaɗaha ya ta la Israʼila, 46 kaʼa nda həŋ mantsa: « Ka ŋamta kuni ta inda tsa gwaɗaha mnaghuna yu gita, ŋa hurzlaghunaptá sləməŋ ya, ma ghəŋa ghuni. Ka mnanafta kuni ta zwana ghuni ŋa ŋanata taŋ ta inda gwaɗaha ma tsa zlahu ya demdem ka maga slna nda tsi. 47 Nza a tsa gwaɗaha ya ka gwaɗa bətbət wu, ama tsaya hafa ghuni. Nda ma tsa gwaɗaha ya dzaʼa slranaghata kuni ta hafa ghuni ta tsa haɗik ta ɓla Yardeŋ dzaʼa lam kuni dida, ŋa nzakwa ni ka ŋa ghuni ya, » kaʼa.
Mnaŋtá dzaʼa Musa mtaku
48 Baɗ va tsaya, ka Yawe nda Musa mantsa: 49 « Ŋla ta ghwáha Ghavarim, ta ghwá Nevu ta nzakway ta haɗika Muwav mbəŋ nda Yeriku ya, ka nghadapta ka ta haɗika Kanʼana ta vlaŋta yu ta la Israʼila ka ŋa taŋ ya. 50 Ta tsa ghwá dzaʼa ŋladafta ka ya dzaʼa mtuta ka, ŋa dzaʼa gha slanaghatá la ghuni, manda ŋa zwaŋama gha Haruna ta mtuta ta ghwá Hur, ka laghu slanaghata la taŋ ya*, 51 kabga giha ga kuni his his ta mghama krughuvi ta kəma la Israʼila ta wa ima Meriva ma Kades ta mtaka Tsiŋ, kwalaghu kwala kuni ta maraŋtá ghuɓata iʼi ta kəma la Israʼila*. 52 Tsaya tama, dzaʼa nghadap ngha ka diʼiŋ ka tsa haɗik ta vlaŋta yu ta la Israʼila ya, ama lamta a vərɗa kagha dida wu, » kaʼa.