Tfa wa Musa ta ghəŋa mndəra la Israʼila ghwaŋpəɗ his
« Sagha sa Yawe daga ta ghwá Sinay,
manda fitik sliʼafta tsi daga ta haɗika Seghir,
daga ta ghwá Paraŋ, ka tsuwaɗak tsi ta vli da mnduha ni.
Ka sagha tsi kawadaga nda dəmbuʼata gwal nda ghuɓa,
nda ŋatá zləghakwa vu ma dzva zeghwa ni.
3 Kahwathwata, ɗvu ɗva ta mnduha.
Inda mnduha ni nda ghuɓa ná, ma dzva gha həŋ,
ta vata səla gha tskavata hahəŋ.
Ka tsuʼa gwaɗa ta sagha da kagha.
4 Vlama vla Musa ta zlahu,
nda nza ka ghazlu ŋa guyatá ghəŋa la Yakubu.
5 Ka nzatá Yawe ka mgham ma Yəsuruŋª,
ma fitika tskavata mghamha mnduha,
kawadaga nda mndəra la Israʼila.
6 Ka nza Rubeŋ nda hafu, má ka zlana zla skwi,
dər má kiʼa yeya həŋ.
7 Wya kəʼa mnata ta ghəŋa Yahuda:
Yawe, sna ta tawa Yahuda, ka vranakta ka nda təv mnduha ni,
ka vlaŋta ka ta mbraku ma dzvu ŋa vulu,
ka kataŋta ka da ghumaha ni.
8 Wya kəʼa mnata ta ghəŋa Levi:
Kagha ta vlaŋtá Tumim nda Urim* ta la Levi,
gwal klaf ka ka ŋərma mndu,
ya dzəghaŋ ka ta həŋ ma Masa,
nda ma zlərɗa wi ta wa ima Meriva*,
9 ya ta mnay kazlay:
“Ngha yu ta kaghuni ka mndu wu,”
kaʼa nda i da ni nda ma ni.
“Sna a yu ta kaghuni wu,”
kaʼa nda zwana ma ni, nda ya nda zwana ni,
dabga ŋanata taŋ ta gwaɗa gha,
nda dzratá wa gha.
10 Ta tataghay həŋ ŋa Yakubu ta tva skwi ŋa magay,
nda zlaha gha ŋa Israʼila.
Hahəŋ ta dra urdi ta kəma gha,
nda skwa pla ghəŋ ŋa dray tsuh tsuh ta gwira gha.
11 Yawe, tfanagha wi ta mbrakwa taŋ ka tsuʼafta ka ta slna taŋ.
Htumusana htumusa ta vgha ghumaha taŋ,
kada kwala gwal husaŋ həŋ ta həŋ walglaŋta sliʼavata.
12 Wya kəʼa mnata ta ghəŋa Biŋyamiŋ:
Ɗvu ɗva Yawe ta tsatsi,
nda nza nzakwa ni ləŋləŋ nda tsi.
Yawe ta nghay inda fitik,
ma ghuva ni ta nzakwa tsi.
13 Wya kəʼa mnata ta ghəŋa Yusufu:
Ka tfanagha tfa Yawe ta wi ta haɗika ni,
nda zəgədəɓata wuninik ta nzagata ta luwa,
nda imi ta sabi ma ghuvata haɗik,
14 vərzləŋ ka skwi ta ndəhanafta fitik ta vwaha ni,
nda ndərhatá skwi ta tskata lu ta vwah ma inda tila ni,
15 nda magatá skwiha ya ɗina ɗina ta ghwáha ŋa ghalya,
nda vərɗa yakwa skwiha ta kuɗuŋurha ŋa ɗekɗek,
16 nda ŋərma skwiha ta ndəghuta ta ghəŋa haɗik.
Ka sagha sa zɗakwa tsa mndu,
si ta zlagapta ma mubuk* ka vu ya.
Ka nzakwa inda taŋ ta ghəŋa Yusufu,
tsa mndu ka mgham mataba zwana ma ni ya*.
17 Sgit ŋa Yusufu!
Nda mbra manda lghəŋ,
manda dula sladra duliha ni.
Nda tsi ta dza tsi ta mnduha,
ha ta kɗavakta slrəŋa luwa.
Sani ma tsa duliha ya dəmbuʼ dəmbuʼata la Ifrayim,
sani ya dəmbuʼata la Mənase.
18 Wya kəʼa mnata ta ghəŋa Zəvuluŋ:
Rfa ta rfu kagha Zəvuluŋ ma za wliwa gha,
kagha Yisakar guli ma həga tumpulha gha.
19 Dzaʼa hagadaf haga həŋ ta mndəra mnduha ta ghwá.
Hada, dzaʼa vlay həŋ ta skwa pla ghəŋ ya mnaf lu,
kabga ta tsagapta ma drəf həŋ ta gadghəla taŋ,
nda skwa gadghəl ta ɗifa ma wutak.
20 Wya kəʼa mnata ta ghəŋa Gat:
Glaku ŋa Yawe ta sganaghatá vli ta Gat.
Nda fa vgha Gat manda rveri,
ŋa kuhwa pipa skwi ksa tsi,
nda ghəŋa ni tani.
21 Zbaf zba Gat ka ŋa ni ta haɗik ya malaghu ɗinakwa ni,
kabga hada fanata lu ta mayaka mgham.
Ka gwaftá tsi ta vgha nda maliha mataba mndəra mndu.
Ka maga maga ta slna tɗukwa taɓta ya ta kum Yawe,
nda tva skwi ŋa magay, vlaŋ Yawe ta la Israʼila.
22 Wya kəʼa mnata ta ghəŋa Daŋ:
Nda nza Daŋ manda slaɓalakwa rveri
ta valagapta ma Basaŋ.
23 Wya kaʼa mnata ta ghəŋa Naftali:
Nda bagha Naftali da zɗakatahuɗi,
ndəghundəgha nda tfa wa Yawe.
Ka gwagwa tsi ka ŋa ni ta kwakwarha,
nda təv dɗakwa fitik nda ya təv sud*.
24 Wya kəʼa mnata ta ghəŋa Aser:
Ka nza tfa wi ta ghəŋa Aser,
mataba zwana Yakubu,
mamu ka sgit tida ta wa ira zwana ma ni,
ka mbaza tsi ta səla ni nda rɗi.
25 Ka nza kra wa tghaha luwa gha,
ka kfur nda ya ka ghuva tili.
Má ka nzəɗava nzəɗa mbrakwa ni,
taɓta nzəɗavata fitika ni nda hafu.
26 Ar Yəsuruŋ, haɗ skwi ŋa gray nda Lazglafta gha wa.
Ta nzafta ta ghwayak ka saha da kata kagha,
ta saha ta luwa ma glakwa ni.
27 Lazglafta ŋa kɗekedzeŋ vla ɗifa gha,
mista gha dzva ni ŋa ɗekɗek.
Ghəzlaf ghəzla ta ghuma ta kəma gha,
“Zaɗana zaɗa gha!” kaʼa.
28 Ləŋləŋ nzakwa Israʼila,
nda kata Yakubu,
ta haɗika nimaya nda ima inabi ta ka nuni,
ma vli ta pghagata wuninik daga ta luwa.
29 Rfa ta rfu kagha Israʼila!
Wa ya manda kagha, mndu ya mbanaf Yawe na?
Nda nza ka zalam, ta kata kagha,
nda nza guli ka kafay zaghatá ghwa.
Dzaʼa tsəlɓu ghumaha gha da kagha,
ama kagha dzaʼa ŋlaf ŋala ka ta həŋ, » kaʼa.