Mtakwa Musa
34
1 Ka sliʼaftá Musa ma daɓiha Muwav ka ŋladafta ta ghwá Nevu, ka laghwi ta bɗəma ghwá Pisga, mbəŋ nda Yeriku. Ka maranaŋtá Yawe ta inda tsa haɗik ya: Sliʼafta daga ma kwakwara Gilghat dikw da Daŋ, 2 nda inda kwakwara Naftali, nda ŋa i Ifrayim nda Mənase, nda inda kwakwara Yahuda dikw da drəf Dagala, 3 nda kwakwara Negev, nda daɓa ma didiŋa Yeriku, luwa dibinaʼuha dikw da Tsughwar. 4 Ka Yawe nda tsi mantsa: « Tsaya haɗik ya waɗana yu ta i Abraham, nda Izak, nda Yakubu kazlay: “Ŋa zivira gha dzaʼa vlaŋta yu,” kəʼa ya. Ta maraghaŋ mara yu, ama haɗ kagha dzaʼa lam dida wu*, » kaʼa.5 Ka mtutá Musa kwalva Yawe hada ta haɗika Muwav manda ya mnaf Yawe*. 6 Ka lamta Yawe ma didiŋa ta haɗika Muwav mbəŋ nda Betʼpəghur. Haɗ mndu nda sna ta vla kula ni kulam gita wa. 7 Dərmək nda hisambsak (120) ima Musa ta mtutá tsi. Ta nda ngha ta vli tsiɗiɗ, ta nda prəsl ma vgha ni guli. 8 Fitik hkən mbsak maga la Israʼila ta tawamtá Musa ma daɓiha Muwav. Tahula tsa, ka hlatá tawa Musa.
9 Nda ndəgha Yəhusuwa, zwaŋa Nuŋ nda Sulkuma ɗifil, kabga fanagha fa Musa ta dzvu. Ka snə la Israʼila ta gwaɗa da tsi, ka maga skwi ya mnanaf Yawe ta Musa*.
10 Tahula tsa, haɗ sana anabi ta nzəglata manda Musa ma Israʼila ya snaŋ Yawe kuma nda kuma wa. 11 Haɗ mndu ŋa gray nda tsi ta magatá inda ŋizlaha nda inda mandərmimiha ghunaf Yawe da magata ta haɗika Masar ta kəma Firʼawna, nda kwalvaha ni, nda inda haɗika ni wa. 12 Ta wa ira inda la Israʼila guli ná, ka magatá Musa ta skwiha nda mbra nda mbra ta ga zləŋ.