Vrafta ta zlahu 27

Dzagwanatá palaha ta ghwá Gheval

1 Ka i Musa kawadaga nda la galata mnduha la Israʼila mnanafta mnduha mantsa: « Ŋanawa ŋa ta inda gwaɗa ya mnaghunaf yu gita. 2 Baɗ da tsughwaɗadapta kuni ta zala Yardeŋ ŋa lam da haɗik ya vlaghuna Yawe, Lazglafta ghuni, ka hlafta kuni ta palaha dagala dagala ka dzagwata, ka ɓaɓapta kuni nda mamay. 3 Ka vivindafta kuni ta həŋ ta inda na gwaɗaha zlahu na, tsughwaɗadapər kuni ta Yardeŋ ŋa lam da haɗik ya vlaghuna Yawe, Lazglafta ghuni, haɗik ya ta mbəzaku uʼa nda zuɗum mida, manda ya mnaghuna Yawe, Lazglafta dzidzíha ghuni ya. 4 Ma tsughwaɗapta ghuni ta Yardeŋ, ka dzagwata kuni ta tsa palaha ya ta ghwá Gheval, manda na mnaghunaf yu gita na, ka ɓaɓapta kuni nda mamay. 5 Ka dzihwanafta kuni ta gwir hada ta Yawe, Lazglafta ghuni nda pala ya dzaʼa kwal ka fiɗaŋta nda kfur. 6 Nda pala kul fiɗata lu nda fiɗa dzaʼa dzihwanafta kuni ta gwir ta Yawe, Lazglafta ghuni. Ta tsa gwir ya dzaʼa pla kuni ta ghəŋ ŋa dray tsuh tsuh ŋa Yawe, Lazglafta ghuni. 7 Ka vlata kuni guli ta skwa pla ghəŋ ŋa ɗawa zɗaku, ŋa zay ghuni hada ka rfay ghuni ta rfu ta kəma Yawe, Lazglafta ghuni. 8 Ka vindafta kuni ta inda gwaɗaha na zlahu na ta tsa palaha ya, ta nghaku ka vindata ni ɗina ɗina, » ka həŋ nda həŋ.

Gwaɗa ksiʼiha ghwaŋpəɗ his

9 Ka i Musa nda gwal dra skwi ŋa Lazglafta ka la Levi mantsa: « La Israʼila, tsəriɗ ka kuni, snawa sna ɓa! Gita, nda na kuni ka mnduha Yawe, Lazglafta ghuni. 10 Snawa sna ta lwa Yawe, Lazglafta ghuni. Ŋana kuni ta gwaɗaha ni nda zlahuha ni ta mnaghunata yu gita, » ka həŋ.

11 Baɗ va tsaya, ka Musa mnanaftá mnduha mantsa: 12 « Tsughwaɗadapər kuni ta Yardeŋ ya, ka nzagata i la Simghuŋ, nda la Levi, nda la Yahuda, nda la Yisakar, nda la Yusufu, nda la Biŋyamiŋ ta ghwá Gərizim ka mna gwaɗa tfa wi ŋa mnduha. 13 Wya gwal dzaʼa nzagata ta ghwá Gheval ka mna gwaɗa ksiʼi ŋa mnduha: La Rubeŋ, nda la Gat, nda la Aser, nda la Zəvuluŋ, nda la Daŋ, nda la Naftali. 14 Ka klaŋta la Levi ta lwi ka mnay ŋa inda la Israʼila. Ka həŋ dzaʼazlay na:

15 “Nda ksiʼa mndu ta tsaftá skwa wuyay ya tsaf lu dgum, ka ya nda kfur nwap lu nda nwa a tsi ta nzakway ka slna gwal vivɗa, ka fata ma vli nda ɗifa. Nda nza tsaya ka manzakɗaway da Yawe.”

“Ka nza tsi mantsa!” ka inda mnduha dzaʼa zlghaftá wa ni.

16 “Nda ksiʼa mndu ta hərtəta da ni ka ma ni a tsi.”

“Ka nza tsi mantsa!” ka inda mnduha dzaʼa zlghaftá wa ni.

17 “Nda ksiʼa mndu ta hərtaŋtá mukuma vwaha sləvda ni.”

“Ka nza tsi mantsa!” ka inda mnduha dzaʼa zlghaftá wa ni.

18 “Nda ksiʼa mndu ta faftá ghulpata mndu ta ghwaɗaka tvi.”

“Ka nza tsi mantsa!” ka inda mnduha dzaʼa zlghaftá wa ni.

19 “Nda ksiʼa mndu ta kwalaghutá skwi ta raŋta mayəm, nda tawakri, nda wadgu.”

“Ka nza tsi mantsa!” ka inda mnduha dzaʼa zlghaftá wa ni.

20 “Nda ksiʼa mndu ta hanata nda markwa da ni, kabga ksaŋ ksa ta skwi ya ta raŋta da ni.”

“Ka nza tsi mantsa!” ka inda mnduha dzaʼa zlghaftá wa ni.

21 “Nda ksiʼa mndu ta hanata nda dər mndəra wati ma rini.”

“Ka nza tsi mantsa!” ka inda mnduha dzaʼa zlghaftá wa ni.

22 “Nda ksiʼa mndu ta hanata nda makuma ni, makwa da ni, ka makwa ma ni a tsi.”

“Ka nza tsi mantsa!” ka inda mnduha dzaʼa zlghaftá wa ni.

23 “Nda ksiʼa mndu ta hanata nda ma ni ma markwa taŋ.”

“Ka nza tsi mantsa!” ka inda mnduha dzaʼa zlghaftá wa ni.

24 “Nda ksiʼa mndu ta dzatá zwaŋama kɗekkɗek.”

“Ka nza tsi mantsa!” ka inda mnduha dzaʼa zlghaftá wa ni.

25 “Nda ksiʼa mndu ta tsuʼaftá sməɗ ŋa pghiŋtá usa mndu kul haɗ dmakwa ni.”

“Ka nza tsi mantsa!” ka inda mnduha dzaʼa zlghaftá wa ni.

26 “Nda ksiʼa mndu ta kwal kul maga slna nda gwaɗaha tsa zlahu ya.”

“Ka nza tsi mantsa!” ka inda mnduha dzaʼa zlghaftá wa ni. »