Taŋtaŋa ndəhatá skwi ta vwah
26
1 « Ma ɓhadaghata gha ta haɗik ya vlagha Yawe, Lazglafta gha ka skwa za həga gha, ka nda nza nzakwa ni ŋa ŋa gha ka nzamtá ka mida, 2 ka hlaʼata ka ma inda taŋtaŋa ndəhatá skwi ta vwaha gha ya dzaʼa hvata ka ta tsa haɗik vlagha Yawe, Lazglafta gha ya, ka pghamta ma tughba. Ka kladaghata da vli dzaʼa zbapta Yawe, Lazglafta gha ŋa nzakwa hga ni hada ya. 3 Ka lagha ka slanaghata mnda dra skwi ŋa Lazglafta ma tsa fitik ya. Ka ka dzaʼazlay nda tsi na: “Ta mnanaŋ mna yu ta Yawe, Lazglafta gha gita kazlay, ɓhagagha ɓha yu ta na haɗik ya waɗana Yawe ta dzidzíha ŋni ŋa vlaŋnata na kəʼa.”4 Dzaʼa tsuʼaghu tsuʼa mnda dra skwi ŋa Lazglafta ma dzva gha ta tsa tughba ya, ka fata ta kəma gwira Yawe, Lazglafta gha. 5 Ŋa gwaɗglay gha ta gwaɗa ta kəma Yawe, Lazglafta gha. Ka ka dzaʼazlay na:
“Mnda la Aram dzidza ɗa si ta daŋwaraku. Ka laha tsi da Masar nda mnduha hutsekw, ka nzatá tsi ka mayəm hada. Ama hada guli, ka nutá tsi ka mndəra mndu dagala, nda mbra, ka yuta. 6 Ama ka ghuyaŋnaptá la Masar ta ɗaŋwa, ka gaŋnaptá iri, ka faŋnaghatá slna ga vuʼa. 7 Ka wahu ŋni ta wahu da Yawe, Lazglafta dzidzíha ŋni. Ka snaŋtá Yawe ta lwa ŋni, ka nghaŋtá tsi ta giri ta gə lu ŋa ŋni, nda ghuya ɗaŋwa ta ghuy lu ŋa ŋni, nda tulekata aŋni. 8 Ka hlagaŋnaptá Yawe ma Masar nda glakwa mbrakwa ni, nda ya nda tɗatá dzva ni, nda skwi ta ga zləŋ, nda ŋizlaha, nda mandərmimiha. 9 Ka hlagaŋnaghatá tsi da na vli na ka vlaŋnatá na haɗik na, haɗik ya ta mbəzaku uʼa nda zuɗum mida. 10 Ndanana tama, Yawe, wana klakta yu ta taŋtaŋa ndəhatá yakwa skwi ta vwaha ɗa ya vliha ka,” ka ka dzaʼazlay.
Ka fata ka ta kəma Yawe, Lazglafta gha, ka zləmbata ka zlumbruh ta kəma Yawe, Lazglafta gha. 11 Tahula tsa, ka rfa ka ta rfu kawadaga nda la Levi, nda ya nda la mayəm ma səla ghuni, ta ghəŋa skwiha ɗina ɗina ya vlaghuna Yawe, Lazglafta gha, kagha nda la ga ghuni tani. »
Zaka ta mahkəna vaku
12 « Ta inda mahkəna vaku ta nzakway ka vakwa vla zaka, ka hlapta ka ta zaka ma inda skwi tska ka ta vwaha ghuni ka vlaŋtá la Levi, nda la mayəm, nda la tawakri, nda la wadgu, ŋa zay taŋ ka baghaku ma luwa gha. 13 Ka ka da mnay ta kəma Yawe, Lazglafta gha na:
“Klap kla yu ma həga ga ini ta inda skwi ya nda fa ka ŋa gha, ka vlaŋtá yu ta la Levi, nda la mayəm, nda la tawakri, nda la wadgu, taɓta inda gwaɗaha ya mniha ka. Haɗ ya zlanaghu yu dər ka zanapta ma gwaɗaha ya mnaf ka wa. 14 Zaŋ a yu ta tsa zaka ya ma fitika nzakwa ɗa ma taw wa. Haɗ skwi klap yu mida ma fitika nzakwa ɗa ta tsaɗ lu wa. Haɗ skwi klap yu mida ka vlaŋtá mndu nda mta wa. Sna sna yu ta gwaɗa Yawe, Lazglafta ɗa, maga maga yu demdem manda va ya mnaɗif ka. 15 Nghaga ngha nda gaftək ta luwa ma vla nzakwa gha nda ghuɓa, ka tfanaghata ka ta wi ta mnduha gha la Israʼila, nda haɗik ya vlaŋna ka. Na haɗik ta mbəzaku uʼa nda zuɗum mida, manda ya waɗana ka ta dzidzíha ŋni ya,” ka ka dzaʼazlay. »
La Israʼila ná, mnduha Yawe həŋ
16 « Gita, mnaghafta Yawe, Lazglafta gha ta ŋanata gha ta tsa zlahuha mnaf tsi, nda tva skwiha ŋa magay gha ta slna nda tsi ya. Ka ŋanata ka ka maga slna nda tsi ma hya hya ŋuɗufa gha, nda ya ma inda nzakwa gha. 17 Gita, mnaŋ mna ka nda wa gha kazlay Yawe, Lazglafta gha, dzaʼa ksay ka ta tva ni, dzaʼa ŋana ŋa ka ta zlahuha ni, nda tsatá gumaha ni, nda tva skwiha nda ra ŋa magay, ka snata skwi ya mna tsi kəʼa. 18 Gita, ta mnaŋta Yawe kazlay, mnda ni ta nzakway ka ŋa ni nda sgit tida ka kəʼa, manda ya taghaf tsi ta imi ta sləməŋ, ka snata kagha ta inda zlahuha ya mnaf tsi, 19 kada kapaghunafta tsi ta ghəŋa inda mndəra mnduha ya magaf tsi, ŋa ghubay lu ta kagha, ŋa kulay lu ta kagha, ŋa nzakwa gha ka mndu nda sgit tida, ŋa nzakwa gha ka mndu nda ghuɓa ŋa Yawe, Lazglafta gha, manda ya mnagha tsi ya, » kaʼa.