Vrafta ta zlahu 25

Dga guma

1 « Ka mamu zlərɗa wi ta sliʼafta mataba mnduha ná, sliʼa taŋ da vla tsa guma ŋa dganata gwal guma ta həŋ, ŋa zliŋtá mndu kul haɗ dmakwa ni, ta ɓliŋtá bika ta mndu mamu dmakwa ni. 2 Ka ŋa dzay nda dza tsa mndu ɓliŋ bika ya, hananata mnda tsa guma ka mbumba ta haɗik, ŋa slvapta ta kəma ni taɓta dmaku ya ga tsi. 3 Dzu fwaɗ mbsak dzaʼa vlaŋta lu, yaha da malapta. Ka malap mala dzu ta tsaya, dzaʼa nzakway zwaŋama ka skwi htiŋ lu ta wa ira gha. »

Sla ta ɗga alkama

4 « Yaha ka da fanamtá budzaŋ ma wi ta sla ta ɗgə tsi ta alkama. »

Wunanaghatá markwa zwaŋama

5 « Ka ta nzakw zwana ma kawadaga, ka mtuta sani kul fatá zwaŋ, laghuta a markwa tsa mndu ta mtuta ya da sana dzibata mndu ka zlanatá la zəʼala ni wa. Mesa ni dzaʼa lagha slanaghata ka wunanaghata ŋa hɗamta nzakwa ni ka mesi. 6 Taŋtaŋa zwaŋ dzaʼa yata tsa marakw ya, hga tsa zwaŋama ni ta mtuta ya dzaʼa tsanafta tsi, kada kwala hga ni hərɗuta mataba la Israʼila. 7 Ka va a tsa mndu ya ta kla mesa ni wu, lafa tsa mesa ni ya ta wa tgha da la galata mndu ma vla tsa guma. Kaʼa dzaʼazlay nda həŋ mantsa: “Kwalaghu kwala mesa ɗa ta tsanaftá hgu ta zwaŋama ni ta mtuta ya ma Israʼila. Va a ta hɗamta nzakwa ni ka mesi wu,” kaʼa dazlay. 8 Ka hgadaghata la galata mndu ma luwa ka gwaɗganata həŋ. Ka kwalaghu kwala tsi ta ɗvay, “va a yu ta klay wu,” kaʼa, 9 gavadaghata tsa mesa ni ya ta vata ni ta kəma la galata mndu, ka suɗanapta ɓaɓah ma səla, ka tfanamta sərɗək ma kuma. Kaʼa dzaʼazlay mantsa: “Wya skwi ta mag lu ŋa mndu ta kwalaghuta fanatá zivir ta zwaŋama ni,” kaʼa dzaʼazlay. 10 Ka lu dzaʼa hgay ma Israʼila ná, “mndəra la suɗanap lu ta ɓaɓah,” ka lu dzaʼazlay. »

Skwi ŋa kwal kul magay ma lmu

11 « Ka ta lmu mndu nda zwaŋama ni, ka gavadaghatá markwa sani ŋa kata zəʼala taŋ ma dzva tsa mndu ta lmu həŋ ta lmu ya, ka tsəghadamta tsi tɗaftá kuɗa ni nda dzvu, 12 tsaghuta gha ta dzva tsa marakw ya, yaha ka tawa hiɗahiɗa tida. »

Vərɗa skwa gra skwi

13 « Pghamta a ka ta skwa gra ndəgakwa skwi his, ya dagala nda ya kiʼa ma zliba gha wa. 14 Pghamta a ka ta daram his, ya dagala nda ya ki a ma həga gha wa. 15 Skwa gra ndəgakwa skwi nda tva ni ka tɗukwa ni, nda daram nda tva ni ka tɗukwa ni katsi da kagha, kada slravaghata hafa gha ta haɗik ya vlagha Yawe, Lazglafta gha. 16 Inda mndu ta maga mndərga tsa skwiha ya, nda inda mndu kul haɗ ta maga skwi ta tva ni, ka manzakɗaway nzakwa ni da Yawe, Lazglafta gha. »

Mnafta zaɗanatá la Ghamalek

17 « Ka hava ka ta skwi ya magagha la Ghamalek ta tvi ta sab kuni ma Masar, 18 ya ká həŋ sagha dɗaghaghata nda ga mahulhul ma fitika hərfatá kagha, ta haɗ mbraku ma kagha wu, ka zaɗanatá həŋ ta inda gwal ta hərfuta nda hul kul lavgliŋtá mbaɗa ya. Zləŋaŋ a həŋ ta Lazglafta wa. 19 Mantsa ya tama, ka vlagha vla Yawe, Lazglafta gha ta mbiʼa vgha da ghumaha gha dər ndiga ta haɗik ya vlagha Yawe, Lazglafta gha ka skwa za həga gha, ŋa nzakwa ni ŋa ŋa gha ya, ka hərɗiŋta ka ta hga la Ghamalek ta ghəŋa haɗik, ha ŋa kwala lu havglaktá həŋ. Yaha ka da zanapta tsaya. »