Vrafta ta zlahu 24

Zlahu ta ghəŋa ghəzla marakw nda vranakta

1 « Ka klaf kla mndu ta marakw, ama ka kwal tsi zɗəganata, kabga slanaghata ni ta skwa hula tida, vindanafta ni ta ɗelewera ghəzlatá marakw, ka vlaŋta ma dzva ni, ka ghəzliŋta ga taŋ. 2 Ka sab sa tsa marakw ya ga taŋ, sliʼa ni da sana zəʼal. 3 Kawayaka skwi, zɗəgana a ta tsa mahisa zəʼal ya kay guli wu, vindanafta ni ta ɗelewera ghəzla marakw guli, ka vlaŋta ma dzva ni, ka ghəzliŋta ga taŋ, ka mtu nda mta a tsa mndu ta klafta ka mahis ya. 4 Mantsa ya, lavgliŋ a tsa taŋtaŋa zəʼala ni ta ghəzliŋta ya ta kləglafta ka marakw, tahula nzakwa ni ka marakw ta tsaɗ lu wa. Nda nza tsaya ka manzakɗaway ta wa ira Yawe. Yaha kuni vzamta da dmaku ta haɗik ya vlaghuna Yawe, Lazglafta ghuni ka skwa za həga ghuni.

5 Ka klafta ni yeya mndu ta makwa, ləta a da vulu wu, haɗ lu dzaʼa fanaghatá slna guli wa. Mintgha dzaʼa nzata tsi ha ka zata vaku ŋa zɗanaftá ŋuɗuf ta tsa makwa klaf tsi ya. »

Sanlaha ma zlahuha

6 « Yaha mndu da kla buna dagala dər dughura buna a tsi ka muluɗay, kabga nda nza manda klaftá hafu ka muluɗay.

7 Ka ksaf ksa lu ta sana mndu ta ksa la taŋ la Israʼila ŋa niŋta ka vuʼa, ka ŋa skwapta ni a tsi, dzatá tsa ghali ya. Mantsa ya dzaʼa kliŋta kuni ta ghwaɗaka skwi mataba ghuni.

8 Ɗasuwa ka kuni nda ɗaŋwa ghwaɗaka lku, ka nghapta kuni ɗina, ka maga kuni ta slna nda inda skwi dzaʼa taghaghunafta gwal dra skwi ŋa Lazglafta ka la Levi manda ya mnanaf yu ta həŋ ya. 9 Havakwa hava ta skwi ya magana Yawe, Lazglafta ghuni ta Miryam ta tvi manda saba ghuni ma Masar. »

Kataŋtá gwal nda hta

10 « Ka tsanaf tsa ka ta nzawa dər wati ma skwi ta mndu, yaha ka lami da həga ga taŋ da klaghutá muluɗay da tsi. 11 Nzaghuta gha mabli ka kləgaghapta tsa mndu ta vlə ka ta nzawa ŋa ni ya ta tsa muluɗay ya dzibil. 12 Ka si ka pɗu dgər tsi, yaha ka da ŋaghuta ga rviɗik ta lguta bukwa ni ya fa tsi ka muluɗay. 13 Ka nda dɗa fitik, kladanaghata gha ta tsa muluɗay ni ya, ŋa hanay ni ta hani ma skwa bukwa ni. Dzaʼa tfaghagha tfa ta wi, dzaʼa nzakway ka guli ka tɗukwa mndu ta kəma Yawe, Lazglafta gha.

14 Yaha ka da nənɓaptá mndu ka pɗu tulek, dər ma zwaŋama tsi, dər ma mayəm tsi ta nzakw ma sana luwa ta haɗika gha. 15 Vlaŋta gha ta nisəla ni baɗ va tsaya. Yaha fitik da dɗata makəɗ ka ka vlaŋta, kabga pɗu ya, zlah ta kəzla tsi. Ka vlaŋ a ka wu, dzaʼa ŋaɗay ta ghəŋ da Yawe ta ghəŋa kagha, dá nzakw dmaku ka ŋa gha.

16 Pslata a lu ta dadaha dabga dmakwa zwana taŋ wa. Pslata a lu ta zwani dabga dmakwa dadaha taŋ wa. Dər wa ta gata dmaku, tsatsi dzaʼa dzata lu.

17 Yaha ka kwalaghutá skwi ta raŋta mayəm nda ŋa tawakri. Yaha ka klaghuta ka muluɗay ta lguta wadgu. 18 Ka hava ka si ta nzakwa gha ka vuʼa ma Masar, ka varagaghaptá Yawe, Lazglafta gha hada. Tsaya ta kəl yu ka mnaghafta ŋa magay gha manda tsaya.

19 Ka tska tska ka ta skwi ta vwah, ka zanaptá ka ta bakərva ma vwah, yaha ka da vrəgladaghata da klay. Nzakwa ni ŋa la mayəm, nda la tawakri, nda la wadgu, kada tfaghaghata Yawe, Lazglafta gha ta wi ma inda slna gha. 20 Ka sləvaga sləva ka ta yakwa zaytuŋha gha, yaha ka da vradaghata da ɗaga paɗakwa ni fwa ni. Nzakwa ni ŋa la mayəm, nda la tawakri, nda la wadgu. 21 Ka ɗaga ɗaga ka ta yakwa inaba gha, yaha ka da vradaghata da vwaha inabi da vana paɗakwa ni. Nzakwa ni ŋa la mayəm, nda la tawakri, nda la wadgu. 22 Ka hava ka si ta nzakwa gha ka vuʼa ta haɗika Masar. Tsaya ta kəl yu ka mnaghaftá tsa gwaɗa ya ŋa magay gha manda tsaya. »