Tagha skwi ŋa la Israʼila ma mtak
8
1 Ka kɗaŋtá Musa ta gwaɗa, kaʼa mantsa: « Ŋanawa ŋa, ka ksa kuni ta slna nda inda na zlahuha mnaghunaf yu gita na, kada nzata kuni nda hafu, ŋa yafta ghuni tusak, ŋa lama ghuni zatá tsa haɗik waɗana Yawe, Lazglafta ghuni ta dzidzíha ghuni ya ŋa ŋa ghuni. 2 Ka hava kuni ta inda tvi raghunaf Yawe, Lazglafta ghuni tida ma mtak ma na vaku fwaɗ mbsak na, kada hanaganatá ghəŋa tsi ghuni. Manda tsaya, ka dzəghaghunatá tsi ŋa tsatsaftá skwi ma ŋuɗufa ghuni, ka dzaʼa ŋana ŋa kuni ta zlahuha ni rí, ka ŋanata a wa a kuni. 3 Ka hanaganatá tsi ta ghəŋa ghuni, ka faghunamta da maya. Ka zughunustá tsi ta manna, skwi si kul snaŋta kaghuni nda dzidzíha ghuni tani. Mantsa ya magata tsi ŋa snaŋta ghuni kazlay, nda skwa zay kweŋkweŋ yeya a ta nzata mndu nda hafu wu kəʼa, ama nda inda gwaɗa ta sabi ma wa Yawe. 4 Ma tsa vaku fwaɗ mbsak ya ná, rdu a lguta ghuni wu, haslaf a səlaha ghuni wa. 5 Grafwa gra ma ŋuɗufa ghuni kazlay zlaha kaghuni ta zlahu Yawe, Lazglafta ghuni manda ya ta zlah da ta zwaŋa ni ya kəʼa. 6 Ŋanawa ŋa ta zlahuha Yawe, Lazglafta ghuni, nda ma ksa tviha ni, nda ma zləŋay, 7 kabga Yawe, Lazglafta ghuni dzaʼa hladaghunamta da haɗik ta ɗinuta, haɗik ka zalaha, nda dzuɓayha, nda imiha ma ghuvata haɗik ta mbəzagapta ma didiŋaha, nda ya ma ghwáha ya. 8 Tsa haɗik ya ná, haɗika alkama, nda urz, nda inabi, nda ghuraf, nda rimuŋ ya, haɗika rɗa zaytuŋ nda zuɗum ya. 9 Haɗik ta hasl lu nda hasla ta skwa zay mida ya. Haɗ sana skwi dzaʼa kuni pɗata hada wa. Tsa haɗik ya ná, ka kfur palaha ni, ta ghwáha ni dzaʼa hlagapta kuni ta kfura dva. 10 Dzaʼa zay kuni ta skwa zay ka baghaku, dzaʼa rfay kuni ta Yawe, Lazglafta ghuni, dabga tsa haɗik ta ɗinuta vlaghuna tsi ya.11 Ɗaswa ka kuni dá zanaptá kuni ta Yawe, Lazglafta ghuni ka zlanata ŋanatá zlahuha, nda tva skwiha ŋa magay, nda skwiha ta raku ta mnaghunafta yu gita na. 12 Dzaʼa zay kuni ta skwa zay ka baghaku, dzaʼa babay kuni ta həgaha ŋa nzakwa ghuni, 13 dzaʼa ndəghu ndəgha slaha ghuni nda rina fisika ghuni, dzaʼa ndəghu ndəgha tseda ghuni nda dasa ghuni, dzaʼa ndəghu ndəgha hamata skwiha ghuni kavghakavgha. 14 Mantsa tama, ɗaswa ka kuni dá glə kuni ta ghəŋ ka zanaptá Yawe, Lazglafta ghuni. Tsatsi ta hlagaghunapta ma ga vuʼa ma Masar. 15 Tsatsi ta hlagaghunapta ma mghama zivak ka makwitkwit, nda nahaɗikha ka gruma, nda rdaha, nda kwalyaha vli da pɗa imi ya. Ka mbəzəgaghunaptá tsi ta imi ma kutumba təŋtəŋa. 16 Ma va tsa mtak ya, ka zughunustá tsi ta manna, skwa zay ya kul snaŋta dzidzíha ghuni, kada hanaganatá tsi ta ghəŋa ghuni ŋa dzəghaghunata, ŋa nzakwa ghuni ləŋləŋ ma rfu dazlay. 17 Ɗaswa ka kuni, dá mnə kuni ma ŋuɗufa ghuni kazlay: “Nda mbrakwa ŋni, nda prəsl ma vgha ŋni kəl ŋni ka nuta ka gadghəl,” kəʼa. 18 Ama ka hava kuni kazlay na, Yawe, Lazglafta ghuni ta vlaghunatá mbrakwa mutsaftá gadghəl kəʼa. Manda tsaya sladanata tsi ta dzratá wa ni ya waɗana tsi ta dzidzíha ghuni manda ɗaslakwa na nzakwa ni gita na.
19 Ka zanap za kuni ta Yawe, Lazglafta ghuni, ka laghu mista sanlaha ma lazglaftaha ka maganata slna ta həŋ, ka tsəlɓu ŋa taŋ katsi, ka iʼi ta mnaghuna ŋəɗaŋəɗa gita ná, dzaʼa zaɗaku kuni kahwathwata. 20 Ka sna a kuni ta ŋa Yawe, Lazglafta ghuni wu katsi, dzaʼa zaɗaghuna zaɗa manda ya zaɗana tsi ta mndəra sanlaha ma mnduha ta kəma ghuni ya, » kaʼa.