Vrafta ta zlahu 9

Tɗanaŋtá sləməŋ ta la Israʼila

1 Ka kɗaŋtá Musa ta gwaɗa, kaʼa mantsa: « Snawa la Israʼila! Gita dzaʼa tsughwaɗa kuni ta zala Yardeŋ, ŋa lama ghuni ghəzlaftá mndəra mnduha ta ndəghuta ka mbruta ka malaghuta kaghuni, ta nzakw ma luwaha taŋ dagala dagala ŋaŋam həŋ ma matsaka huzlu ta zaghuta ta luwa ya. 2 Tsa mnduha ya ná, nda slara nda slara həŋ, nda mbara nda mbara həŋ, mndəra la Ghanak ya snaŋ kuni ta həŋ ya həŋ. Ta mnay lu kazlay na: “Wa dzaʼa laviŋtá sladata ta kəma la Ghanak na?” kəʼa. 3 Gita dzaʼa snaŋta kuni kazlay Yawe, Lazglafta ghuni ná, tsatsi ta mbaɗa ta kəma ghuni manda vu ta zaɗanatá skwi ya, kəʼa. Tsatsi dzaʼa zaɗanatá həŋ, tsatsi dzaʼa dzaganatá həŋ ta kəma ghuni, ŋa ghəzlafta ghuni ta həŋ ka gi zaɗanatá həŋ manda va ya mnaghuna Yawe.

4 Ma ghəzlafta dzaʼa ghəzlafta Yawe, Lazglafta ghuni ta həŋ ta kəma ghuni dazlay, yaha kuni da mnay ma ŋuɗufa ghuni kazlay: Dabga vəl nzakwa ŋni ka tɗukwa mnduha kəl Yawe ka hlagamtá aŋni ŋa hlaghuta ŋa ŋa ŋni ta na haɗik na kəʼa. Ya dabga ghwaɗaka skwi ta mag mndəra na mnduha na kəl Yawe ka ghəzlaftá həŋ ta kəma ghuni. 5 Nza a dabga vəl nzakwa ghuni ka tɗukwa mndu nda ŋərma mndu dzaʼa kəl kuni ka lami da klaghuta ŋa ŋa ghuni ta haɗika taŋ wu, ama dabga ghwaɗaka skwi ta mag mndəra na mnduha na dzaʼa kəl Yawe, Lazglafta ghuni ka ghəzlaftá həŋ ta kəma ghuni. Nda nza guli ŋa hɗanamtá gwaɗa ya waɗana tsi ta dzidzíha ghuni i Abraham, nda Izak, nda Yakubu. 6 Snaŋwa sna tama kazlay, dabga vəl nzakwa ghuni ka tɗukwa mnduha a kəl Yawe, Lazglafta ghuni ka vlaghunata ŋa ŋa ghuni ta tsa haɗik ta ɗinuta ya wa. Nziya nza tsi ná, nda nza kuni ka mnduha təŋtəŋa ghəŋa taŋ. »

Mamakwa sla ka dasu

Sab 32

7 « Havakwa hava, ma zanap kuni ya ká kuni gufanaftá ŋuɗuf ta Yawe, Lazglafta ghuni ma mtak. Daga baɗ saba ghuni ma haɗika Masar ha ka ɓhagaghatá ghuni da hadna, ta ga sidi kuni nda Yawe. 8 Ma nzakwa ghuni ma Hwarev, ka gufanaftá kuni ta ŋuɗuf ta Yawe, ka ɓasavaghunatá Yawe ta ŋuɗuf ha ka kum tsi ta zaɗaghunata. 9 Ma ŋlaghata ɗa ta ghwá da tsuʼa klamha, ta nzakway ka klamha dzratá wa Yawe nda kaghuni ná, ka nzatá yu ta ghwá ka vaghu fwaɗ mbsak, nda rviɗik fwaɗ mbsak, kul zaŋtá skwa zay dər saŋtá imi. 10 Ka vlihatá Yawe ta klamha his, vindaf Lazglafta nda ndəfiŋa ni. Tida, mamu inda gwaɗaha ya si mnaghuna Yawe ta ghwá ma takataka vu, baɗ tskavata guyatá ghəŋa ghuni ya. 11 Tahula luta tsa fitik fwaɗ mbsak, nda tsa rviɗik fwaɗ mbsak ya, ka vlihatá Yawe ta tsa klamha his, klamha dzratá wi ya.

12 Ka Yawe nda iʼi mantsa: “Sliʼaf sliʼa hadna ka laha ka misimmisim, kabga tsa mnduha gha hlagap ka ma Masar ya ná, gaga həŋ ta dmaku dagala. Vagim zluŋ zla həŋ hada hada ta tvi ya mnana yu ta həŋ, ka laghwi da slraftá skwa wuyay nda kfur nwap lu ŋa ghəŋa taŋ,” kaʼa. 13 Ka Yawe nda iʼi guli mantsa: “Ta nghə yu ta na mnduha na ná, mnduha təŋtəŋa ghəŋa taŋ həŋ. 14 Zliha zla ka zaɗanata yu ta həŋ, ka hərɗiŋta yu ta hga taŋ ta ghəŋa haɗik. Ama kagha, dzaʼa naghaf na yu ka mndəra mndu ta mbruta, ta ndəghuta ka malaghutá hahəŋ,” kaʼa.

15 Ka mbəɗavatá yu ka saha ta ghwá, tsa ghwá ka vu ya, nda ŋatá klamha dzratá wi his nda dzvuha ɗa his his. 16 Ta nghə yu ná, gana ga kuni ta dmaku ta Yawe, Lazglafta ghuni ma slranaftá ghuni ta ghəŋa ghuni ta mamakwa sla ka kfur nwap lu. Ka gi zluŋtá kuni ta tvi ya mnaghuna Yawe, Lazglafta ghuni. 17 Mantsa, ka hlaftá yu ta tsa klamha his ya, ka slanatá yu nda dzvuha ɗa his his, ka dzaɓiŋta ta wa ira ghuni. »

Magay Musa ta duʼa

18 « Ka zləmbəglatá yu zlumbruh ta kəma Yawe manda va tsa taŋtaŋ ya, ka vaghu fwaɗ mbsak, nda rviɗik fwaɗ mbsak, kul zaŋtá skwa zay dər saŋtá imi, dabga inda dmakuha ya maga kuni nda ma magatá ghwaɗaka skwi ta wa ira Yawe, ka gufanaftá ŋuɗuf. 19 Giɗif ga ɓasatá ŋuɗuf nda gufata ŋuɗufa Yawe si ta ɓasafta ta ghəŋa kaghuni ya ta zləŋ, kabga si ta kumay ta zaɗaghunata. Ama ka snata tsi ta tawa ɗa ta ghəŋa kaghuni ma tsa fitik ya guli. 20 Ɓasanava ɓasa Yawe ta ŋuɗuf katakata ta Haruna ha ka kuma dzata. Ama ka magatá yu ta duʼa ta ghəŋa Haruna ma tsa fitik ya. 21 Ka klaftá yu ta tsa mamakwa sla slraf kuni, slna dmakwa ghuni ya, ka driŋta nda vu. Ka ɓalanaptá yu, ka dzaɓanapta, ka huʼapta kəzlitit, ka dzaftá yu ta ŋərɗata ni ta zala ta saha ta ghwá.

22 Ka ganaftá kuni guli ta ɓasa ŋuɗuf ta Yawe ma Tavghera, nda ya ma Masa, nda ya ma Kivrutʼhataʼava.^* 23 Ma fitika ghunaftá Yawe ta kaghuni ma Kadesbarnegha kazlay na: “Ŋlawa ŋla ka zatá kuni ta haɗik ya vlaghuna yu” kəʼa ya, ka gaftá kuni ta sidi nda gwaɗa ya mnaf Yawe, Lazglafta ghuni. Faf a kuni ta ghəŋa ghuni tida wu, sna a kuni ta gwaɗa ni wa.^* 24 Ta ga sidi kuni nda Yawe daga ka yawu snaŋta ɗa ta kaghuni.

25 Ka zləmbatá yu zlumbruh ta kəma Yawe ka vaghu fwaɗ mbsak nda rviɗik fwaɗ mbsak, kabga si kura kura Yawe ta zaɗaghunata. 26 Ama ka mag yu ta duʼa da Yawe, ka yu mantsa:

Mgham Yawe, ma zaɗana ka ta mnduha gha, skwa za həga gha vara kagha ka ghəŋa gha ta həŋ ma glakwa gha həŋ, ka hlagaptá həŋ ma Masar nda glakwa mbrakwa dzva gha. 27 Havap hava ka kwalvaha gha i Abraham, nda Izak, nda Yakubu. Ma kulaf ka ta na təŋata ghəŋa na mnduha na, nda ɓədzakuha taŋ, nda dmakuha taŋ na. 28 Yaha mnduha tsa haɗik hligiŋ ka ta həŋ mida ya da mnay kazlay: “Trap tra Yawe ta hladamta həŋ da haɗik tanaf tsi ta imi ta sləməŋ ta həŋ. Ta husaŋ husa həŋ kəl tsi ka hligiŋtá həŋ ŋa rwanatá həŋ ma mtak,” ka həŋ dzaʼazlay. 29 Mnduha gha həŋ teʼuwa, skwa za həga gha hligiŋ ka ta həŋ ma Masar nda glakwa mbrakwa gha, nda ya nda tɗatá dzva gha həŋ. »