Planata Yawe ta dmakwa mnduha
10
1 « Ka Yawe nda iʼi ma tsa fitik ya na: “Ratsa ratsa ta klamha his manda tsaha taŋtaŋ ya, ka ŋlagafta ka da iʼi ta ghwá. Magaf ka guli ta akwata udzu. 2 Dzaʼa vindglaf vinda yu ta tsa klamha ya ta tsa gwaɗaha si ta tsa taŋtaŋa klamha dzaɓiŋ ka ya, ŋa pghamta gha ta həŋ da tsa akwati ya,” kaʼa. 3 Ka magaftá yu ta akwata udza kwehi, ka raratsatá yu ta klamha his manda tsaha taŋtaŋ ya, ka ŋladaftá yu ta ghwá nda tsa klamha his ya ma dzva ɗa. 4 Ka vindglaftá Yawe ta tsa klamha ya, ta va tsa skwi si vindaf tsi ta tsa klamha taŋtaŋ ya: Tsaya gwaɗaha ghwaŋ, si mnaghuna tsi ta ghwá ma takataka vu ma fitika tskavata guyatá ghəŋa ghuni mista ghwá ya. Ka vlihatá tsi ta həŋ. 5 Ka mbəɗavatá yu ka saha ta ghwá, ka pghamtá yu ta tsa klamha ya ma tsa akwati magaf yu ya kay. Ka nzakw həŋ mida manda ya mnaɗif Yawe, » kaʼa.6 Ka sliʼaftá la Israʼila ta wa vavrəmha Beneʼyaghakaŋ ŋa dzaʼa da Musera. Ka mtuta Haruna hada ka lamta lu hada. Ka klaftá Ilghazar, zwaŋa ni ta slna dra skwi ŋa Lazglafta ma vla ni. 7 Ka sliʼaftá həŋ hada ka laghwi da Gudguda. Ka sliʼaftá həŋ ma Gudguda ka laghwi nda təv Yutvata, haɗik ya nda ndəgha zlərma zala mida.
8 « Ma tsa fitik ya, ka zbaptá Yawe ta mndəra la Levi ŋa kla akwata dzratá wa Yawe, ŋa sladata taŋ ta kəma Yawe ka maganatá slna, ŋa tfay taŋ ta wi ŋa mnduha nda hga ni, manda va ya ta mag həŋ ha gitana ya. 9 Tsaya kwal mayaka la Levi, nda skwa za həga taŋ kul haɗ manda ŋa zwana ma taŋ. Yawe skwa za həga hahəŋ manda ya mnana Yawe, Lazglafta ghuni ta həŋ.
10 Ka nzəɗavatá yu ta ghwá ka vaghu fwaɗ mbsak nda rviɗik fwaɗ mbsak manda tsa taŋtaŋ ya. Ka snəglatá Yawe ta duʼa ɗa, ka kwalaghutá Yawe ta zaɗaghunata. 11 Ka Yawe nda iʼi mantsa: “Sliʼaf sliʼa gha! La ka klanata ka ta kəma ta mnduha, ka dzaʼa həŋ da zatá haɗik ya waɗana yu ta dzidzíha taŋ ŋa vlaŋtá həŋ ya,” kaʼa. »
Skwi ta kəzlu Yawe da mnduha ni
12 « Ndanana tama la Israʼila, nahgani ta kum Yawe, Lazglafta ghuni da kaghuni na? Ta ghəŋa zləŋay ghuni ta Yawe, Lazglafta ghuni, nda ma ksay ghuni ta inda tviha ni, ka ɗvuta ghuni, ka tsəlɓay ghuni ta tsəlɓu ŋa Yawe Lazglafta ghuni ma hya hya ŋuɗufa ghuni, nda inda nzakwa ghuni, 13 ka ŋanatá zlahuha Yawe, nda tva skwiha ŋa magay ta mnaghunafta yu gita, ŋa nzata ghuni ləŋləŋ na. 14 Aŋi, ŋa Yawe, Lazglafta na luwa, nda luwa ta ghəŋa luwa, nda haɗik, nda inda skwiha mida demdem. 15 Kulam nda tsa, nda dzidzíha ghuni nzəvafta Yawe ta vgha ka ɗvutá həŋ. Tahula hahəŋ, ka zbaptá tsi ta na kaghuni zivirha taŋ na mataba inda mndəra mndu, manda ya ta nghə kuni gita na. 16 Tsaya tama, tsawa tsa ta fafaɗa ŋuɗufa ghuni dardar ka ŋa Yawe, Lazglafta ghuni, ka zlanata kuni ta təŋa ghəŋ. 17 Yawe, Lazglafta ghuni ná, tsatsi Lazglafta ta ghəŋa lazglaftaha, mgham ta ghəŋa mghamha. Tsatsi Lazglafta dagala, ta mbruta ta zləŋ lu nda zləŋa. Haɗ ta gala mndu nda gala wu, haɗ ta tsuʼa sməɗ wa. 18 Ta dgana dga nda tva ni ta guma tawakriha, nda wadguha. Ta ɗvu ɗva ta matbayha, ta vlay ta skwa zay nda lgut ŋa taŋ. 19 Ka ɗvuta kaghuni guli ta matbayha, kabga si nda nza kaghuni guli ka matbayha ma Masar.
20 Yawe, Lazglafta ghuni dzaʼa kuni da zləŋay, ŋa ni dzaʼa tsəlɓa kuni ta tsəlɓu, ka ndiʼafta kuni ta vgha nda tsi. Nda hga ni dzaʼa waɗa kuni ta waɗu. 21 Tsatsi zləzləva ghuni, tsatsi Lazglafta ghuni. Tsatsi ta magaghunatá skwiha dagala dagala, nda skwiha ka makwitkwit ya nghaŋ kuni nda ira ghuni ya. 22 Ndəfáŋ mbsak yeya dzidzíha ghuni ta laha həŋ da Masar. Ndanana, wana yaghunaf ya Yawe, Lazglafta ghuni tusak manda tekwatsaha ta luwa. »