Ɗvutá Yawe nda snatá zlahuha ni
11
1 « Ka ɗvutá kuni ta Yawe, Lazglafta ghuni, ka ŋanata kuni dər ta wati ləwa tsi ta skwi ta mnaghunata tsi, nda tva skwiha ya ŋa magay, nda skwiha ta raku, nda zlahuha ni.2 Snaŋwa sna gita, zwana ghuni a ta nghaŋta wu, ta snaŋtá zlahu zlah Yawe, Lazglafta ghuni wu, ama kaghuni ta nghaŋtá glakwa ni, nda mbrakwa dzva ni, nda tɗatá dzva ni, 3 nda ŋizlaha ni, nda slnaha ni ya maga tsi ma huɗa Masar ŋa Firʼawna, mghama la Masar nda inda haɗika ni. 4 Nda ngha kuni ta skwi magana tsi ta gwal vula la Masar, nda plisha ni, nda mwata plisha ni, nda ya kəʼa pghanaghatá ima drəfa Zaŋwafiha ta həŋ ma zbighunista taŋ ya. Ka zaɗanatá Yawe ta həŋ ŋa ɗekɗek.* 5 Nda ngha kaghuni kəʼa nghapta ka kaghuni ma mtak ha ka ɓhagaghatá ghuni da na vli na, 6 nda skwi ya magana tsi ta i Dataŋ nda Aviram, zwana Iliʼav, zighiha Rubeŋ: Ka gunaptá haɗik ta wi ɓak, ka nduta həŋ mataba la Israʼila, kawadaga nda la ga taŋ tani, nda həgaha tumpula taŋ tani, nda inda skwiha ta hafu ta dzaʼa mista taŋ tani.* 7 Nda ira ghuni nghaŋta kuni ta inda slnaha ka mandərmimi maga Yawe.
8 Tsaya tama, ka ŋanata kuni ta inda zlahuha ya mnaghunaf yu gita, kada mutsafta kuni ta mbraku ŋa dzaʼa da zatá haɗik dzaʼa tsughwaɗadamta kuni dida ŋa zata. 9 Ka ŋanata kuni, kada slravaghata hafa ghuni ta haɗik ya waɗana Yawe ta vlaŋtá dzidzíha ghuni nda zivirha taŋ tani, tsa haɗik ta mbəzaku uʼa nda zuɗum mida ya. »
Haɗik ya ta nghə Yawe kelkelkel
10 « Nza a tsa haɗik dzaʼa lam kuni dida ŋa nzakwa ni ŋa ŋa ghuni ya, manda haɗika Masar saghu kuni mida ya wa. Si ta sləgay kuni ta hulfa ka dzaʼa kaghuni da hada nda səla ghuni da pusay, manda ŋa vwaha masuʼata. 11 Ama na haɗik ta dzaʼa kuni dida ŋa zata ghuni ŋa ŋa ghuni ya ná, mamu ghwáha nda didiŋaha mida, ima luwa ta pusay. 12 Tsa haɗik ya ná, Yawe, Lazglafta ghuni ta nghay. Nda fa ira Yawe, Lazglafta ghuni kelkelkel tida daga zlrakwa vaku ha kɗavakta vaku.
13 Ka sna sna kuni kahwathwata ta zlahuha ɗa ta mnaghunaf yu gita, ka ɗvutá Yawe, Lazglafta ghuni, ka tsəlɓay ghuni ta tsəlɓu ma hya hya ŋuɗufa ghuni, nda ya ma nzakwa ghuni katsi, 14 dzaʼa nzəgaghuna nza yuª ta imi ta vwaha ghuni ta fitika ni ga duwiŋ nda ya ga fwak, ŋa tskata ghuni ta nimaya, nda ima inabi ta ka nuni, nda rɗi. 15 Dzaʼa ɗyanaf ɗya yu ta kuzuŋ ma vwaha ghuni ŋa zay rina ghuni. Dzaʼa zay kaghuni guli ta skwi ka baghaku. 16 Ama ɗaswa ka kuni, da barahaftá skwi ta kaghuni, dá mbəɗavatá kuni maganata slna ta sanlaha ma lazglaftaha ka tsəlɓu ta kəma taŋ. 17 Ka maga maga kuni mantsa, dzaʼa gufaf gufa ŋuɗufa Yawe ta ghəŋa kaghuni, ŋa nuʼafta ni luwa ŋa kwala imi saha, ŋa kwala skwi magaku ta vwah, ŋa zaɗakwa ghuni misimmisim ta tsa haɗik ta ɗinuta vlaghuna Yawe ya.
18 Ka famta kuni ta na gwaɗa ta mnaghunata yu na ma ŋuɗufa ghuni nda ya ma hafa ghuni. Ka hbafta kuni ka ŋizla ta dzva ghuni, ka fuŋta kuni ka lamba ta wa bizlbizla kuma ghuni. 19 Ka taghanafta kuni ta zwana ghuni. Ka mna kuni ŋa taŋ mintgha ghuni, ta mbaɗ kuni ta mbaɗa ta tvi, ta hanadatá kuni, nda ya ta sliʼavatá kuni. 20 Ka vindafta kuni ta slərpuha wa tgha həga ghuni, nda ya ta wa tgha luwa ghuni, 21 kada slravaghata hafa ghuni nda ŋa zwana ghuni ta tsa haɗik waɗana Yawe ta vlaŋtá dzidzíha ghuni ya. Manda ɗaslakwa gɗavata luwa nda ta ghəŋa haɗik ya, dzaʼa gɗavata kaghuni guli ta haɗik.
22 Ka si ŋana ŋa kaghuni kahwathwata ta tsa zlahuha mnaghunaf yu ya, nda ma maga slna nda tsi, nda ma ɗvutá Yawe, Lazglafta ghuni, nda ma ksa inda tviha ni, nda ma ndiʼaftá vgha tida katsi, 23 dzaʼa ghəzlaf ghəzla Yawe ta inda hamata mndəra mnduha ta kəma ghuni ŋa ghəzliŋta ghuni ta mndəra mnduha ta ndəghuta, ka mbruta ka malaghuta ka kaghuni ya. 24 Inda vli dzaʼa ŋlata səla ghuni ná, dzaʼa nzakway ka ŋa ghuni. Mukuma ghuni ná, dzaʼa zlrafta ma mtak nda təv sud ka lagha ta ghwáha Ləvanuŋ nda təv nur, zlrafta ni ta zala Yufratis təv safa fitik ha ta drəf Dagala təv dɗakwa fitik. 25 Haɗ mndu dzaʼa ŋaŋta da kaghuni wa. Ma inda vli dzaʼa ŋlata səla ghuni ta tsa haɗik ya, dzaʼa fa fa Yawe, Lazglafta ghuni ta zləŋay mnduha ta kaghuni ka ghudzaku, manda ya mnaghuna tsi ya. »
Tfa wi nda ksiʼi
26 « Snawa sna, wana yu ta fata gita ta kəma ghuni ta tfa wi, nda ksiʼi: 27 Dzaʼa mutsay kuni ta tfa wi ka sna sna kuni ta zlahuha Yawe, Lazglafta ghuni, ta mnaghunafta yu gita na. 28 Dzaʼa mutsay kuni guli ta ksiʼi ka sna a kuni ta zlahuha Yawe, Lazglafta ghuni, ka mbəɗana mbəɗa kuni ta tvi ya mnaghunafta yu gita, nda ma dzaʼa mista sanlaha ma lazglaftaha kul snaŋtá kuni.
29 Ɓhadaghunamta Yawe, Lazglafta ghuni da haɗik dzaʼa kuni klaghuta ŋa nzakwa ni ŋa ŋa ghuni ya ná, ka mna kuni ta tfa wi ta ghwá Gərizim, ka mna kuni guli ta ksiʼi ta ghwá Gheval. 30 Nda ta ɓla Yardeŋ tsa ghwáha ya, nda təv sana slərpa tvi nda təv dɗakwa fitik ma haɗika la Kanʼana, gwal ta nzakw ma Gharava mbəŋ nda Gilgal, ndusa nda halalaya fuha Mure.